Numbas 3 - Chahta Holisso Holitopa 1886

¹ Ilʋppa puta aiena kak osh, Chihowah yʋt Sinai nʋnih ha̱ Moses a̱ im anumpuli nitak, Alon micha Moses a̱ anoli holisso yoke.

² Mihma hohchifo ilʋppa puta kak osh Alon ushi ʋhleha hatok. Natab ʋt ʋtta ʋmmona, micha Abihu, Eleasa micha Ihlama ak atok.

³ Hohchifo ilʋppa puta kak osh Alon ushi ʋhleha yosh naholitompa isht asha ya chi̱ bila ahʋmmit yʋmmʋt naholitompa isht asha ʋlhtoka isht ai aha̱shwa chi̱ ho̱ hullochi tok oke.

⁴ Atuk o̱ Natab micha Abihu ʋt yakni haiaka Sinai ya̱ Chihowah itikba ya̱ luak inla yo̱ im issa cha illi tok, mihmʋt ʋlla ik im iksho ki tok; mihma Eleasa micha Ihlama itatuklo kʋt i̱ki Alon itikba ya̱ naholitompa isht ʋtta ʋlhtoka ya̱ isht ai aha̱shwa tok.

⁵ Mihma Chihowah yʋt Moses a̱ im anumpulit,

⁶ Lefai apehlichi yo̱ bili̱ka isht ishla cha, naholitompa isht ʋtta Alon itikba ya̱ isht ish onashke; yohmi na yʋmmak o̱ nana isht im ahantashke.

⁷ Micha nan isht im ai ʋtta ya̱ yʋmi̱hinchit, micha okla moma nan isht im ai ʋtta, okla moma im ʋlhtipo holitopa itikba ya̱ a yʋmi̱hinchit, ʋlhtipo holitopa isht ai ahanta ya̱ yʋmi̱hinchashke.

⁸ Micha okla moma im ʋlhtipo holitopa nan isht toksʋli puta ka̱ ieshit Islael im ʋlla ʋhleha nan isht im aiʋtta yʋmihinchit ʋlhtipo nan isht aiahanta ya̱ yʋmi̱hinchaske.

⁹ Lefait ʋhleha ha̱, Alon micha ushi ʋhleha hak o̱ ish imashke: Islael im ʋlla ʋhleha ha̱ akohchit mominchit ima li hatuk oke.

¹⁰ Mikma Alon micha ushi ʋhleha ha̱ ish atokoli na, naholitompa isht ʋtta ʋlhtoka ya̱ isht aha̱shwa chi̱ hoke: mikma hatak inla yosh bili̱ka ʋlakmʋt illi pulla chi̱ hoke, achi tok.

¹¹ Micha Chihowah yʋt Moses a̱ im anumpulit,

¹² Micha ʋno ʋt yakeh! ʋno ʋt Islael im ʋlla ʋhleha ha̱ ʋttahpi ishki im oshʋto tiwi puta ya̱ atobbichit Islael im ʋlla ʋhleha ha̱ akohchit Lefait ʋhleha hak o̱ ishe lishke; yohmi hoka Lefait ʋhleha hʋt ʋmmi ha chi̱ hoke.

¹³ Ʋttahpi moma kʋt ʋmmi hokʋt; Echip yakni ya̱ ʋttahpi moma ka̱ ʋbit tahli li tok nitak mʋt Islael a̱ hatak, micha nanʋlhpoa aiena ʋttahpi puta ka̱ hullochit il ai ishi il tok okʋt; ʋmmi ha chi̱ hoke. Chihowah sia hoke, achi tok.

¹⁴ Micha Chihowah yʋt yakni haiaka Sinai ya̱ Moses a̱ im anumpulit,

¹⁵ Lefai im ʋlla ʋhleha ha̱ i̱ki in chuka achʋfa ahohchifot iakaiyʋt ilap im iksa ibafohkʋt ish hohtenashke: nakni puta hʋshi achʋfa ʋttʋt ʋba ma̱ya kak o̱ ish hohtenashke, achi tok.

¹⁶ Mihma Moses ʋt Chihowah yʋt im apesa tuk im anumpa hatuk mak o̱ hohtena tok.

¹⁷ Mihma Lefai ushi ʋhleha hohchifo hʋt ilʋppak atok; Keshom micha Kohalh micha Melali ak atok.

¹⁸ Mikma Keshom ushi ʋhleha ahohchifot in chuka achʋfa yʋt Libni micha Shimei ilʋppak atok.

¹⁹ Mikma Kohalh ushi ʋhleha in chuka achʋfa yʋt Amlam micha Iseha, Heblon micha Ussiel, ilʋppak atok.

²⁰ Mikma Melali ushi ʋhleha in chuka achʋfa yʋt Mahli micha Mushi ak atok; Ilʋppa puta kak osh i̱ki ʋhleha in chuka achʋfa ʋlhpisa hosh Lefait ʋhleha in chuka achʋfa hatok.

²¹ Keshom a̱ chuka achʋfa Libnait, micha chuka achʋfa Shimait ak atok, Keshomait ʋhleha hʋt chuka achʋfa ilʋppak atok.

²² Yʋmmʋt nakni moma holhtina holhtina tuk ʋt hʋshi achʋfa ai ʋhli ʋttʋt ʋba ma̱ya holhtina mʋt, tahlepa sipokni untuklo cha tahlepa tahlapi tok.

²³ Keshomait ʋhleha chuka achʋfa ʋt hʋshi ai okʋtula pilla ʋlhtipo holitopa a̱shaka yak o̱ binacha hi oke.

²⁴ Keshomait ʋhleha i̱ki in chuka achʋfa i̱ shahli ʋt Lael ushi Eliasaf ak a hi oke.

²⁵ Micha Keshom ushi ʋhleha hʋt okla moma im ʋlhtipo ya̱ nan isht aiahanta yʋt, ʋlhtipo holitopa, micha ʋlhtipo, yʋmma isht ompoholmo, micha okla moma im ʋlhtipo okhissa a takali,

²⁶ Micha wanuta natakali puta, micha wanuta okhissa yʋmmʋt ʋlhtipo holitopa micha alta bili̱ka fullota natakali, micha yʋmma im isht talakchi puta, micha nan isht aiahanta puta iesha chi̱ kak oke.

²⁷ Mikma Kohalh a̱ chuka achʋfa Amlamait micha chuka achʋfa Isekalait, micha chuka achʋfa Heblonait micha chuka achʋfa Ussielait: ilʋppa puta kak osh Kohalhait chuka achʋfa puta hatok.

²⁸ Nakni moma hʋshi achʋfa ai ʋhlit ʋba ma̱yʋt holhtina kʋt tahlepa sipokni untuchina cha tahlepa hannali hosh ʋlhtipo holitopa ya̱ atonit ieshi tok.

²⁹ Kohalh ushi ʋhleha in chuka achʋfa puta kʋt oka mahli pilla ʋlhtipo apotoa ho̱ binacha hi oke.

³⁰ Kohalhait ʋhleha chuka chʋfa puta ka̱ i̱ki in chuka achʋfa i̱ shahli ʋt Ussiel ushi Elisafan ak achi̱ hoke.

³¹ Micha nana aiatoni ieshi kʋt itombi holitopa, micha ai impa, micha pʋla ai o̱ hikia, micha alta puta, micha nan isht toksʋli nan aiʋlhto ʋlhtipo holitopa aiasha, micha natakali, micha nan isht toksʋli puta kak a hi oke.

³² Mikma naholitompa isht ʋtta Alon ushi Eleasa yak osh Lefait ʋhleha i̱ shahli ya̱ i̱ shahli ya̱ chi̱ hoke, micha ʋlhtipo holitopa apesʋchi ʋhleha yo̱ apistikela chi̱ hoke.

³³ Melali ya̱ Mahlait in chuka achʋfa, micha Mushait in chuka achʋfa ak atok. Ilʋppak osh Melali in chuka achʋfa ya tok.

³⁴ Mihma hʋshi achʋfa ʋttʋt ʋba ma̱yʋt nakni moma holhtina mak osh holhtina tuk ʋt tahlepa sipokni hannali, cha tahlepa tuklo tok.

³⁵ Mikma i̱ki in chuka achʋfa Melali in chuka achʋfa ya̱ Abihail ushi Suliel ak osh i̱ shahli ya chi̱ hoke. Ilʋppa puta kak osh ʋlhtipo nowʋt a̱ya apotoʋt i̱ falʋmmi in tʋnnʋp ak o̱ binacha hi oke.

³⁶ Melali ushi ʋhleha nana apistikelit ieshi ʋto chuka nowʋt a̱ya im iti shima, micha im okhowatakʋchi, micha in toni̱k, micha ai o̱ hikia, micha nana aiʋlhto moma, micha nana isht toksʋli moma,

³⁷ Micha toni̱k puta wanuta apakfoyupa micha ai o̱ hikia moma, micha isht ishtʋffena puta, micha isht talakchi puta aiena kak a chi̱ hoke.

³⁸ Amba chuka nowʋt a̱ya itikba hʋshi akochaka pilla okla moma im ʋlhtipo hʋshi akocha pilla ho̱ binachi hokʋto, Moses micha Alon micha ushi ʋhleha aiena kak achi̱ hoke, yʋmmʋt ʋlhtipo holitopa ya̱ atonit ieshit Islael im ʋlla ʋhleha ha̱ pehlicha chi̱ hoke, hatak inla yosh bili̱ka ʋla hokʋto illi pulla chi̱ hoke.

³⁹ Lefait ʋhleha holhtina moma, Chihowah yʋt apesa na chuka achʋfa puta Moses micha Alon ita tuklo kʋt hohtena tuk a̱ nakni moma hʋshi achʋfa ai ʋhli ʋttʋt ʋba ma̱ya kʋt tahlepa sipokni pokoli tuklo akucha tuklo tok.

⁴⁰ Mihma Chihowah yʋt Moses a̱, Islael im ʋlla ʋhleha nakni ʋttahpi moma hʋshi achʋfa ai ʋhli ʋttʋt ʋba ma̱ya ka̱ ish hohtena cha hohchifo holhtena ka̱ ish ishashke.

⁴¹ Micha Islael im ʋlla ʋhleha ai iti takla ya̱ tikba ʋtta ak oh chatuk a̱ atobbichit Lefait ʋhleha hak o̱ is sʋm isha chi̱ hoke, (Chihowah sia hoke,) micha Islael im ʋlla ʋhleha i̱ wak ai iti takla tikba cheli ak oh chatuk a̱ atobbichit Lefait ʋhleha i̱ wak ak a chi̱ hoke, im achi tok.

⁴² Mihma Chihowah yʋt im apesa tuk mak o̱, Moses ʋt Islael im ʋlla ʋhleha tikba ʋtta moma ka̱ hohtena tok.

⁴³ Mihma nakni tikba ʋtta moma hʋshi achʋfa ai ʋhlit ʋba ma̱ya hohchifot holhtina holhtina tuk ʋt tahlepa sipokni pokoli tuklo akucha tuklo cha tahlepa tuklo pokoli untuklo akucha tuchina tok.

⁴⁴ Mihma Chihowah yʋt Moses a̱ im anumpulit,

⁴⁵ Islael im ʋlla ʋhleha tikba ʋtta moma ak oh chatuk a̱ atobbichit Lefait ʋhleha hak o̱, micha i̱ wak ak oh chatuk a̱ atobbichit Lefait ʋhleha i̱ wak ak o̱ ish ieshashke; mihma Lefait ʋhleha hak osh ʋmmi ha chi̱ hoke: Chihowah sia hoke.

⁴⁶ Micha falʋmminchit chumpa chi̱ Islael im ʋlla ʋhleha tikba ʋtta ai achʋfa tahlepa tuklo cha pokoli untuklo akucha tuchina yʋmmʋt Lefait ʋhleha i̱ shahli ka̱,

⁴⁷ Noshkobo ʋlhpisa ho̱ shekel tahlapi bieka ho̱ ish isha chi̱ hoke, ʋlhtipo holitopa ai ʋlhpisa shekel ʋlhpisa ho̱ ish isha chi̱ hoke, shekel ʋt kelah pokoli tuklo hoke.

⁴⁸ Micha ʋlhkocha falʋmminchit chumpa he tuk o̱ ishit chumpa tʋli holisso yash Alon micha ushi ʋhleha hak o̱ ish imashke, achi tok.

⁴⁹ Mihma Moses ʋt falʋmminchit ishit chumpa tʋli holisso yash Lefait ʋhleha hʋt falʋmminchit chumpa tuk ʋlhkocha yash im ishi tok.

⁵⁰ Islael im ʋlla ʋhleha tikba ʋtta hak o̱ tʋli holisso im ai eshi tok; ʋlhtipo holitopa ai ʋlhpisa shekel iakaya hosh shekel tahlepa sipokni achʋfa cha tahlepa tuchina pokoli hannali akucha tahlapi tok.

⁵¹ Mihma Chihowah im anumpa mak o̱ Chihowah yʋt Moses a̱ im apesa hatuk mak o̱ falʋmminchit chumpa tuk ʋlhtoba kash ishi cha, Alon micha ushi ʋhleha aiena ka̱ ima tok.