Numbas 29 - Chahta Holisso Holitopa 1886

¹ Atuk osh hʋshi ont isht untuklo, hʋshi nitak ʋmmonakma, itʋnaha holitopa hʋchim a̱sha hi oke: tishu atoksʋli nana kia hʋsh yʋmihcha he keyu: isht pu̱fa olachi hʋchi̱ nitak oke.

² Micha Chihowah i̱ balama yo̱ hukmit im issa hʋsh im issa hi oke: wak hobʋk himita achʋfa, chukfi nakni achʋfa, micha chukfi ushi afʋmmi ʋmmona untuklo ha hi oke.

³ Mikmʋt ilhpak im issa yʋt bota tohbi bila itaioma hosh, wak hobʋk achʋfakma ishit pokoli kʋshkoa tuchina, micha chukfi nakni achʋfakma, ishit pokoli kʋshkoa tuklo,

⁴ Chukfushi untuklo kʋt chukfushi achʋfakma ishit pokoli kʋshkoa achʋfa bat hlopulla hi oke,

⁵ Micha nan ashʋchi im issa ishit hʋchi̱ kashofa chi̱ kʋt issi kosoma ya̱ ushi achʋfa hi oke,

⁶ Chihowah i̱ balama ʋbit im issʋt luak ishit hukmit im issa, hʋshi yʋmma, nitak moma luak ishit hukmit im issa, micha ilhpak im issa, micha nan ishko im issa ayʋmohmi chatuk mak o̱ yʋmihcha hi oke.

⁷ Micha hʋshi isht untuklo ilʋppʋt nitak ont ishit pokolikma itʋnaha holitopa hʋchim a̱sha hi oke; micha hʋchi shilombish a̱ hʋsh ilbʋshala hi oke; micha yʋmma natoksʋli nana kia hʋsh yʋmihcha he keyu hoke;

⁸ Amba Chihowah i̱ balama yo̱ hukmit im issa ya̱ hʋsh im issa hi oke; wak hobʋk himita achʋfa, chukfi nakni achʋfa, micha chukfi ushi afʋmmi ʋmmona untuklo yosh, inlʋt a takali kʋt iksho ka hi oke.

⁹ Micha ilhpak im issa yʋt bota tohbi bila itaioma yosh wak hobʋk achʋfakma ishit pokoli kʋshkoa tuchina, chukfi nakni achʋfakma ishit pokoli kʋshkoa tuklo,

¹⁰ Chukfushi untuklo kʋt chukfi ushi achʋfakma ishit pokoli kʋshkoa achʋfa bat hlopulla hi oke,

¹¹ Nan ashʋchi ishit kashofa, micha hukmit im ihi̱sa na bilia, micha ilhpak im issa, micha nan ishko im issa aiena kʋt a̱sha na, nan ashʋchi im issa yo̱ issi kosoma ya̱ ushi achʋfa ho̱ im issa hi oke.

¹² Atuk osh hʋshi isht untuklo kʋt nitak ont isht auah tahlapikma itʋnaha holitopa hʋchim a̱sha hi oke; tishu atoksʋli nana kia hʋsh yʋmihcha he keyu, micha Chihowah impʋchi isht hʋsh im aiasha nitak untuklo ha hi oke.

¹³ Chihowah i̱ nabalama yo̱ hukmit im issa, ʋbit luak ishit hukmit im issa hʋsh im issa hi oke; wak hobʋk himita auahtuchina, chukfi nakni tuklo, micha chukfi ushi afʋmmi ʋmmona auahushta, inlʋt a takali kʋt iksho ho̱ hʋsh im issa hi oke,

¹⁴ Mikma ilhpak im issa yʋt bota tohbi bila itaioma yo̱ wak hobʋk auahtuchina kash wak hobʋk achʋfakma ishit pokoli kʋshkoa tuchina biekakma, chukfi nakni tuklo kash chukfi nakni achʋfakma ishit pokoli kʋshkoa tuklo bi̱ka,

¹⁵ Mikma chukfushi auahushta kʋt chukfushi achʋfakma ishit pokoli kʋshkoa achʋfa bieka hi oke,

¹⁶ Hukmit im ihi̱sa bilia, ilhpak im issa, micha nan ishko im issa aiena kʋt aiashakma, nan ashʋchi im issa yo̱ issi kosoma ya̱ ushi achʋfa ho̱ hʋsh im issa hi oke,

¹⁷ Atuk osh nitak atuklakma, wak hobʋk himita auahtuklo, chukfi nakni tuklo, micha chukfushi afʋmmi ʋmmona auahushta inlʋt a takali kʋt keyu ho̱ hʋsh im issa hi oke.

¹⁸ Micha ilhpak im issa, micha nan ishko im issa yʋt wak hobʋk puta, chukfi nakni puta, chukfushi puta aiena holhtina ʋlhpi̱sa ho̱ ayʋmohmi chatuk mak o̱ hʋsh im issa hi oke.

¹⁹ Hukmit im ihi̱sa na bilia, micha ilhpak im issa, micha nan ishko im issa aiena kʋt aiashakma, nanashʋchi im issa yo̱ issi kosoma ya̱ ushi achʋfa ho̱ hʋsh im issa hi oke.

²⁰ Atuk osh nitak ont isht atuchinakma wak hobʋk auahachʋfa, chukfi nakni tuklo, chukfushi afʋmmi ʋmmona auahushta ik ai ono kʋt iksho ha̱shke,

²¹ Mikma ilhpak im issa, micha nan ishko im issa puta kʋt wak hobʋk puta, chukfi nakni puta, micha chukfushi puta aiena holhtina ka̱ ʋlhpi̱sa ho̱ ayʋmohmi chatuk mak a hi oke.

²² Micha hukmit im ihi̱sa bilia, micha ilhpak im issa, micha nan ishko im issa aiena kʋt a̱shakma, nan ashʋchi im issa yo̱ issi kosoma achʋfa hashke,

²³ Micha nitak ont isht ai ushtakma, wak hobʋk pokoli chukfi nakni tuklo, micha chukfushi afʋmmi ʋmmona auah ushta ik ai ono kʋt iksho yashke.

²⁴ Micha ilhpak im issa, micha nan ishko im issa yʋt, wak hobʋk puta, chukfi nakni puta, chukfushi puta aiena holhtina ka̱ ʋlhpi̱sa ho̱ ayʋmohmi chatuk mak o̱ i̱ yʋmihchashke:

²⁵ Micha hukmit im ihi̱sa na bilia, micha ilhpak im issa, micha nan ishko im issa aiena kʋt a̱shakma, nan ashʋchi im issa yo̱ issi kosoma ya̱ ushi achʋfa yashke.

²⁶ Micha nitak ont ishit tahlapikma wak hobʋk chakkali, chukfi nakni tuklo, micha chukfushi afʋmmi ʋmmona auahusta ik ai ono kʋt iksho yashke.

²⁷ Mikma ilhpak im issa, micha nan ishko im issa puta kʋt wak hobʋk puta, chukfi nakni puta, chukfushi puta aiena kʋt holhtina ka̱ ʋlhpi̱sa ho̱ ayʋmohmi chatuk mak o̱ i yʋmihchashke.

²⁸ Micha hukmit im ihi̱sa na bilia micha ilhpak im issa micha nan ishko im issa aiena kʋt a̱shakma, nan ashʋchi im issa yo̱ issi kosoma achʋfa yashke.

²⁹ Micha nitak ont ishit hannalikma, wak hobʋk untuchina, chukfi nakni tuklo, micha chukfushi afʋmmi ʋmmona auah ushta ik ai ono kʋt iksho yashke.

³⁰ Micha ilhpak im issa, micha nan ishko im issa puta kʋt, wak hobʋk puta, chukfi nakni puta, micha chukfushi puta aiena kʋt holhtina ka̱ ʋlhpi̱sa ho̱ ayʋmohmi chatuk mak o̱ i̱ yʋmihchashke:

³¹ Micha hukmit im ihi̱sa na bilia, micha ilhpak im issa micha nan ishko im issa aiena kʋt a̱shakma, nan ashʋchi im issa yo̱ issi kosoma achʋfa yashke.

³² Micha nitak ont isht untuklokma, wak hobʋk untuklo, chukfi nakni tuklo, micha chukfushi afʋmmi ʋmmona auahushta ik ai ono kʋt iksho yashke:

³³ Micha ilhpak im issa, micha nan ishko im issa puta kʋt, wak hobʋk puta, chukfi nakni puta, micha chukfushi puta aiena holhtina ka̱ ʋlhpi̱sa ho̱ a yʋmihchi chatuk mak o̱ i̱ yʋmihchashke:

³⁴ Micha hukmit im ihi̱sa na bilia, micha ilhpak im issa, micha nan ishko im issa aiena kʋt a̱shakma, nan ashʋchi im issa yo̱ issi kosoma achʋfa yashke:

³⁵ Micha nitak ont isht untuchinakma itʋnaha holitopa hʋchim a̱sha hi oke; nitak yʋmma tishu atoksʋli nana kia hʋsh yʋmihcha he keyu.

³⁶ Amba Chihowah nan i̱ balama yo̱ ʋbit luak ishit hukmit im issa, wak hobʋk achʋfa, chukfi nakni achʋfa, chukfushi afʋmmi ʋmmona untuklo ik ai ono kʋt iksho aiena ho̱ hukmit im issa yo̱ hʋsh im issa hi oke.

³⁷ Ilhpak im issa, micha nan ishko im issa puta kʋt, wak hobʋk puta, chukfi nakni, micha chukfushi puta aiena holhtina ka̱ ʋlhpi̱sa ho̱ ayʋmohmi chatuk mak o̱ i̱ yʋmihchashke.

³⁸ Micha hukmit im ihi̱sa na bilia, micha ilhpak im issa, micha nan ishko im issa aiena kʋt a̱shakma, nan ashʋchi im issa yo̱ issi kosoma achʋfa hashke.

³⁹ Anumpa hʋsh il onochi puta, micha ilap ahnit nana hʋsh im issa puta, luak ishit hukmit nana hʋsh im issa puta, micha ilhpak hʋsh im issa puta, micha nan ishko hʋsh im issa puta, micha itinnanaiyʋchit nana hʋsh im issa puta aiena hʋt a̱shakma, impʋchi hʋchim ʋlhpisa puta ka̱ ilʋppa puta aiena kak o̱ Chihowah ya̱ hʋsh i̱ yʋmihchashke, im achi tok.

⁴⁰ Mihma Chihowah yʋt Moses a̱ im apesa tuk mak o̱, moma ka̱ Moses ʋt Islael im ʋlla ʋhleha ha̱ im anoli tok.