Numbas 28 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha ha̱ im anumpulit, Nan ʋm issa micha am pʋska ʋbit isht aiokpʋchi luak isht hullukmi, a̱ nabalama ya̱ ithaiyanʋt ont ai ʋlhpiesakma ʋm issashke, ish im apesashke.

³ Micha luak ishit hukmit im issa ilʋppak o̱ Chihowah ya̱ hʋsh im issa hi oke; Chukfi ushi tuklo ho̱ afʋmmi ʋmmona hosh, ik aiono takali kʋt iksho hukmit im issa bilia yo̱ onna hosh onnakma hʋsh yʋmihinchashke.

⁴ Chukfi ushi achʋfa kash onnahinli ish im issa tukmʋt, chukfushi achʋfa ya̱ ont opiakma, ish im issa hi oke:

⁵ Micha ilhpak im issa yo̱ bota tohbi lipehbi efah isht pokoli, boʋt bila toba hin kʋshkoa ai ushta kʋt itaioma hi oke.

⁶ Chihowah i̱ nabalama ʋbit luak ishit hullukmit im issa, hukmit im ihi̱sa bilia yosh Sinai nʋnih ha̱ ai ʋlhpisa tok mak oke.

⁷ Micha nan ishko im issa ya̱ chukfi ushi achʋfakma hin kʋshkoa ai ushta hi oke: nan ishko im issa ya̱ aholitopa ak o̱ oka pa̱ki kʋllo ya̱ Chihowah ish im afohoblicha hi oke.

⁸ Mikma chukfi ushi achʋfa yano, opiakma ish im issashke: onnahinli ilhpak im issa mak o̱, micha nan ishko im issa mak o̱, chohmit ish im issa hi oke, ʋbit luak ishit hukmit im issa Chihowah i̱ balama ya̱ hi oke.

⁹ Nitak hullokma chukfi ushi tuklo afʋmmi ʋmmona ik ai ono takali kʋt iksho, micha bota tohbi ishit pokoli kʋshkoa tuklo, bila itaioma ho̱ ilhpak im issa mak o̱ micha nan ishko im issa aiena hi oke.

¹⁰ Hukmit im issa bilia, micha nan ishko im issa aiena kʋt a̱shakma, ilʋppak osh nitak hullo moma hukmit im issa yoke.

¹¹ Micha hʋshi puta isht hʋchim ia ʋmmona ka̱ hukmit im issa ya̱ Chihowah hʋsh im issa hi oke; wak hobʋk himita tuklo, micha chukfi nakni achʋfa, chukfi ushi untuklo afʋmmi ʋmmona ik ai ono takali kʋt iksho aiena yashke.

¹² Micha wak hobʋk achʋfakma ilhpak im issa mak o̱ bota tohbi ishit pokoli kʋshkoa tuchina bila aioma yashke; micha chukfi nakni achʋfakma ilhpak im issa mak o̱ bota tohbi ishit pokoli kʋshkoa tuklo bila aioma yashke.

¹³ Micha chukfi ushi achʋfakma, ilhpak im issa mak o̱ bota tohbi kʋshkoa ishit pokoli bano ho̱ bila aioma, nabalama hukmit im issa, micha ʋbit hukmit Chihowah im issa ya hi oke.

¹⁴ Micha ishkot im issa yʋt wak hobʋk achʋfakma, oka pa̱ki hin iklʋnna; micha chukfi nakni achʋfakma, hin kʋshkoa atuchina, micha chukfi ushi achʋfakma, hin kʋshkoa isht ai ushta ya hi oke. Ilʋppak osh afʋmmi hlopulli, hʋshi puta kʋt hʋshi talalikma, hukmit im issa yoke.

¹⁵ Hukmit im issa bilia, micha nan iksho im issa aiena kʋt a̱shakma, nan ashʋchi im issa mak o̱ issi kosoma ai ishit issi kosomushi achʋfa ho̱ Chihowah im issa hi oke.

¹⁶ Micha hʋshi ʋmmona nitak ont isht auahhushta kʋt Chihowah im ʋbanʋblit ont ia yoke.

¹⁷ Atukma hʋshi ilʋppa nitak ont ishit auahtahlapik mak o̱, impʋchi yoke: nitak untuklo ho̱ pʋska ik shatʋmmo ʋpa hi oke.

¹⁸ Nitak ʋmmona hokʋno itʋnaha holitopa a̱sha hi oke; yʋmmak oka tishu atoksʋli nana kia hʋchik yʋmihcho ka hi oke.

¹⁹ Amba Chihowah ya̱ hukmit im issa ya̱ ʋbit luak ishit hukmit im issa ya̱ hʋsh im issa hi oke; wak hobʋk himita tuklo, micha chukfi nakni achʋfa micha chukfi ushi afʋmmi ʋmmona untuklo aiena hi oke; yʋmmʋt ik ai ono takali kʋt ik hʋchim iksho ka hi oke.

²⁰ Micha im ilhpak im issa yʋt bota tohbi yosh bila itaioma hi oke; wak hobʋk achʋfakma ishit pokoli kʋshkoa tuchina, micha chukfi nakni achʋfakma ishit pokoli kʋshkoa tuklo ho̱ hʋsh im issa hi oke.

²¹ Chukfi ushi achʋfakma, kʋshkoa ishit pokoli biekʋt chukfi ushi untuklo hlopulla hi oke.

²² Micha nan ashʋchi im issa ya̱ issi kosoma achʋfa ho̱ ishit hʋchi̱ kashofa ya hi oke.

²³ Onnahinli moma hukmit im issa, yʋmmʋt hukmit im issa bilia yʋt a̱shakma, ilʋppa puta hʋsh im ihi̱sa hi oke.

²⁴ Ilʋppak o̱ yohmi hosh nitak untuklo hlopulli ka̱ onnakma hʋsh im issa hi oke, ʋbit luak ishit hukmit aiokpʋchi nipi, Chihowah i̱ balama ak a hi oke: hukmit im issa bilia, micha nan ishko im issa aiena kʋt a̱shakma, yʋmma aiena im issa hi oke.

²⁵ Atuk osh nitak ont isht untuklokma itʋnaha holitopa hʋchim a̱sha hi oke; tishu a toksʋli nana kia hʋsh yʋmihcha he keyu hoke.

²⁶ Micha nan awaya ʋmmona nitak, ilhpak im issa himona Chihowah isht hʋsh im onakmʋt, nitak hullo puta kʋt ont hʋchin taha ha yʋt, itʋnaha holitopa hʋchim a̱sha hi oke: tishu atoksʋli nana kia hʋsh yʋmihcha he keyu hoke.

²⁷ Amba Chihowah i̱ balama yʋt hukmit im issa hʋsh im issa hi oke: wak hobʋk himita tuklo, micha chukfi nakni achʋfa, chukfi ushi afʋmmi ʋmmona untukla hi oke.

²⁸ Micha ilhpak im issa yʋt bota tohbi bila itaioma yosh wak hobʋk achʋfakma ishit pokoli kʋshkoa tuchina, chukfi nakni achʋfakma ishit pokoli kʋshkoa tuklo,

²⁹ Chukfi ushi achʋfakma kʋshkoa ont ishit pokoli biekʋt chukfi ushi untuklo ho̱ hlopulla hi oke.

³⁰ Micha isht hʋchi̱ kashofi ʋt issi kosoma ya̱ ushi achʋfa hi oke.

³¹ Hukmit im ihi̱sa na bilia, micha ilhpak im issa (yʋmmʋt ik ai ono takali kʋt ik hʋchim iksho ka hi oke) micha nan ishko im issa aiena kʋt aiasha ma, yʋmma puta ka̱ hʋsh im issa hi oke.