Numbas 27 - Chahta Holisso Holitopa 1886

¹ Yohmi ma Selofehat yʋmmʋt Hefe ushi, mikma yʋmmʋt Kileat ushi, mihma yʋmmʋt Maki ushi, mihma yʋmmʋt Manasseh chuka achʋfa Manasseh ushi, mihma yʋmmʋt Chosef ushi atok yʋmma ushetik ʋhleha hʋt ona tok, micha ushetik ʋhleha hohchifo kʋt ilʋppak atok, Mahlah, Noah micha Hoklah micha Milkah micha Tisah atok.

² Atuk osh Moses, micha naholitompa isht ʋtta Eleasa, micha holitopa ʋhleha micha okla moma aiena itikba, okla moma in tabenakel okhissa bilika hieli cha,

³ Pi̱ki ʋt yakni haiaka ai illi tok oke, micha Kolah ai itapeha kʋt Chihowah ya̱ i̱ sanalit itihoyʋt itʋnaha ka̱ ibafohka tok keyushke: yohmi kia ilap nanashʋchi isht illi tok oke; micha ushi ik im iksho tok oke.

⁴ Nanta katiohmi ho̱ ushi iksho hatuk ak osh pi̱ki hohchifo kʋt in chuka achʋfa ai itin takla ya̱ kʋnia hinla cho? Yʋmohmi hoka, pi̱ki itibapishi ʋhleha ta̱kla yakni ish pimashke, achi tok.

⁵ Mihma Moses ʋt nan isht im akaniohmi ka̱ Chihowah itikba isht ona tok.

⁶ Mihma Chihowah yʋt Moses a̱ im anumpulit,

⁷ Selofehat ushetik ʋhleha hʋt ʋlhpesa ho̱ anumpuli hoke: i̱ki itibapishi ʋhleha ta̱kla yakni ai eshi ya̱ ish ima pullashke: micha i̱ki i̱ yakni yash tosholit ish im onachashke.

⁸ Micha Islael im ʋlla ʋhleha im anumpulit, Hatak ʋt ushi iksho hosh illikma i̱ yakni yash tosholit ushetik ak o̱ hʋsh im onachashke.

⁹ Atuk o̱ ushetik ʋt ikshokma i̱ yakni yash itibapishi ʋhleha hak o̱ hʋsh imashke.

¹⁰ Atuk o̱ itibapishi ʋt ik im ikshokma i̱ yakni yash i̱ki itibapishi ʋhleha hak o̱ hʋsh imashke.

¹¹ Atuk o̱ i̱ki ʋt itibapishi ʋhleha hʋt ikshokma i̱ yakni yash in chuka achʋfa ai achʋfa i̱ kanomi pit i̱ bili̱ka yak o̱ hʋsh ima na ieshashke, mikma yʋmmak osh Islael im ʋlla ʋhleha, Chihowah yʋt Moses a̱ im apesa tuk mak o̱, i̱ nan ʋlhpisa ai apihi̱sashke, im achi tok.

¹² Micha Chihowah yʋt Moses a̱, Nʋnih Abalim ilʋppa oiya cha Islael im ʋlla ʋhleha yakni ima li tok a̱ pisah.

¹³ Atuk osh ish pisa, ha mʋt chishno ak kia chitibapishi Alon ʋt iba holhtina chohmit chim okla ha̱ ish iba holhtina chi hoke.

¹⁴ Chukushmi Sin ash okla moma kʋt itachowa ma, nishkin itikba ya̱ oka yʋmma is si aholitobla he tuk ʋt ilafilʋmmit ʋm anumpa ha̱ ish i̱ sanali tuk oka, yʋmmʋt Melibah oka Katesh talaia yakni haiaka Sin ak atok, im achi tok.

¹⁵ Mihma Moses ʋt Chihowah ha̱ im anumpulit,

¹⁶ Chihowah yʋt nipi puta moma imi shilombish in Chitokaka yʋt okla moma pehliechi hatak atokoli na,

¹⁷ Yʋmmak osh itikba kohchʋt ihi̱ya, micha yʋmmak osh itikba ont chukoho̱wa, micha yʋmmak osh pehlichit kohoncha, micha yʋmmak osh pehlichit chukowʋt ahantashke, yʋmohmi ho̱ Chihowah im okla moma yʋt chukfi yosh apistikeli iksho yo̱ ik chohmo kashke, im achi tok.

¹⁸ Mihma Chihowah yʋt Moses a̱ im anumpulit, Nʋn ushi Choshua hatak shilombish nukfoka yʋmmak o̱ ish ishi cha chibbak ish onochashke.

¹⁹ Micha Eleasa naholitompa isht ʋtta itikba, micha okla moma itikba ya̱ ish hilechashke; micha yʋmmak osh pi̱sa ho̱, anumpa ish imashke.

²⁰ Micha chim aholitopa kaniohmi ka̱ ish onochashke; yʋmohmi ho̱ Islael im ʋlla ʋhleha okla moma kʋt im antia achukmashke.

²¹ Micha naholitompa isht ʋtta Eleasa itikba hikia na yʋmmak osh Chihowah itikba Ulim ai isht apesa yak o̱ isht im asilhhʋcha hi oke: im anumpa ho̱ kohchʋt ia hi oke, micha im anumpa ho̱ ont chukowa hi oke, yʋmma micha Islael im ʋlla ʋhleha apiha aiena kʋt okla moma puta kʋt yʋmohma hi oke, im achi tok.

²² Mihma Moses ʋt Chihowah yʋt im achi tuk mak o̱ yʋmihchi tok: micha Choshua ya̱ ishi cha naholitompa isht ʋtta Eleasa itikba, micha okla moma itikba ya̱ hilechi tok.

²³ Micha ibbak a̱ onochi mʋt anumpa ima tok, Chihowah yʋt Moses a̱ tohnʋt im apesa tuk mak o̱ yʋmihchi tok.