Numbas 26 - Chahta Holisso Holitopa 1886

¹ Atuk osh ililli okpulo ʋt a̱sha ha ya̱, yakohmi tok, Chihowah yʋt Moses micha naholitompa isht ʋtta Alon ushi Eleasa ya̱ im anumpulit,

² Islael im ʋlla ʋhleha okla moma afʋmmi pokoli tuklo ʋhli ʋba ma̱yʋt i̱ki ʋhleha in chuka achʋfa hlopullit Islael aiasha kʋt tʋnʋp itibit ia hinla moma holhtina ka̱ hʋsh ishashke, im achi tok.

³ Mihma Moses micha naholitompa isht ʋtta Eleasa ita tuklo kʋt; Chatan a̱ Moab yakni patali Cheliko bili̱ka ya̱ ai im anumpulit,

⁴ Afʋmmi pokoli tuklo ʋhli ʋba ma̱ya holhtina ka̱, Chihowah yʋt Moses micha Islael im ʋlla ʋhleha Echip yakni ya̱ kohcha ia tok aiena, im achi tok mak o̱ ish ishashke, im achi tok.

⁵ Islael ushi akni Luben: Luben im ʋlla ʋhleha; Hanok, yʋmmak o̱ Hanokait in chuka achʋfa akohcha tok: Pallu, Palluait chuka achʋfa:

⁶ Heslon a̱, Heslonait chuka achʋfa: Kamai ya̱, Kamait chuka achʋfa:

⁷ Ilʋppa puta kak osh Lubenait chuka achʋfa ʋhleha hoke, atuk osh holhtina kʋt tahlepa sipokni pokoli ushta akucha tuchina micha tahlepa untuklo cha pokoli tuchina aiena tok.

⁸ Mikma Pallu ushi; Eliab.

⁹ Mikma Eliab ushi ʋhleha; Nemuel micha Tahlan micha Abilam atok. Tahlan micha Abilam ilʋppʋt Kolah ai itʋpeha kʋt Chihowah kʋllot i̱ sanali ma, ibafo̱kʋt Moses micha Alon ita tuklo ka̱ kʋllot i̱ sanalit okla moma im ai annoho̱wa tok mak oke.

¹⁰ Mihma yakni ʋt itakpashali cha Kolah ya̱ ai itapeha ho̱ ishit nanʋbli tok, ai itapeha yʋmma, yʋmmʋt illi ma luak ʋt hatak tahlepa tuklo cha pokoli tahlapi aiena ho̱ hushmit tahli tok; yohmi mʋt yʋmmʋt nan isht atokowa yo̱ toba tok.

¹¹ Yohmi kia Kolah im ʋlla ʋhleha hʋt ik illo tok.

¹² Simeon ushi ʋhleha hʋt in chuka achʋfa ʋlhpisa hatok: Nemuel a̱, Nemuelait chuka achʋfa: Chamin a̱, Chaminait chuka achʋfa: Chakin a̱, Chakinait chuka achʋfa:

¹³ Selah ya̱ Sahait chuka achʋfa: Shaul a̱, Shaulait chuka achʋfa yatok.

¹⁴ Ilʋppa puta kak osh Simeonait chuka achʋfa ʋhleha hoke: tahlepa sipokni pokoli tuklo akucha tuklo cha tahlepa tuklo tok.

¹⁵ Kat im ʋlla ʋhleha in chuka achʋfa puta ʋlhpi̱sa hosh, Sefon a̱, Sefonait chuka achʋfa ak atok: Hakki ya̱ Hakkait chuka achʋfa ak atok: Shuni ya̱, Shunait chuka achʋfa ak atok:

¹⁶ Osni ya̱, Osnait chuka achʋfa ak atok: Eli ya̱, Elait chuka achʋfa ak atok:

¹⁷ Alot a̱, Alotait chuka achʋfa ak atok: Aleli ya̱, Alelait chuka achʋfa ak atok.

¹⁸ Ilʋppa puta kak osh Kat im ʋlla ʋhleha in chuka achʋfa hatok; micha holhtina tuk mak osh tahlepa sipokni pokoli ushta cha tahlepa tahlapi tok.

¹⁹ Chutah im ʋlla ʋhleha hʋt El micha Onan ak atok, micha El micha Onan ita tuklo kʋt Kenaan yakni ya̱ ai illi tok.

²⁰ Mihma Chutah im ʋlla ʋhleha in chuka achʋfa ʋlhpi̱sa hosh: Shelah ya̱, Shelanait chuka achʋfa ak atok: Fales a̱, Falesait chuka achʋfa ak a tok: Selah ya̱, Salait chuka achʋfa ak atok.

²¹ Mihma Fales ushi ʋhleha: Heslon a̱, Heslonait chuka achʋfa ak atok: Hamul a̱, Hamulait chuka achʋfa ak atok:

²² Ilʋppa puta kak osh Chutah im ʋlla ʋhleha, chuka achʋfa puta hatok, micha holhtina mak osh tehlepa sipokni pokoli untuklo akucha hannali cha tahlepa tahlapi tok.

²³ Issaka ushi ʋhleha chuka achʋfa ʋlhpi̱sa; Tola ya̱, Tolait chuka achʋfa ak atok: Pua ya̱ Punait chuka achʋfa ak atok:

²⁴ Chashob a̱, Chashobait chuka achʋfa ak atok: Shimlon a̱, Shimlonait chuka achʋfa ak atok.

²⁵ Ilʋppa puta kak osh Issaka im ʋlla ʋhleha chuka achʋfa hatok; micha holhtina mak osh tahlepa sipokni pokoli hannali akucha ushta cha tahlepa tuchina tok.

²⁶ Sebulon ushi ʋhleha chuka achʋfa ʋlhpi̱sa: Selet a̱, Satait chuka achʋfa ak atok: Elon a Elonait chuka achʋfa ak atok: Chahleel a̱, Chahleelait chuka achʋfa ak atok.

²⁷ Ilʋppa puta kak osh Sebulonait chuka achʋfa hatok; micha holhtina mak osh tahlepa sipokni pokoli hannali cha tahlepa tahlapi tok.

²⁸ Chosef ushi ʋhleha chuka achʋfa ʋlhpi̱sa hosh Manasseh micha Eflaim ak atok:

²⁹ Manasseh ushi ʋhleha: Makil a̱, Makilait chuka achʋfa ak atok: micha Makil ʋt Kileat a̱ tobachi tok: Kileat a̱ Kileatait chuka achʋfa akohcha tok.

³⁰ Kileat ushi ʋhleha hʋt ilʋppak atok: Cheesa ya̱ Cheesalait chuka achʋfa: Helek a̱, Helekait chuka achʋfa:

³¹ Micha Asliel a̱ Aslielait chuka achʋfa: Shekem a, Shekemait chuka achʋfa ak atok.

³² Micha Shemita ya̱, Shemitait chuka achʋfa: micha Hefe ya̱, Hefalait chuka achʋfa ak atok.

³³ Mihma Hefe ushi Selofehat ʋt ushi ik im iksho, amba ushetik ʋt im asha tok: micha Selofehat ushetik ʋhleha hohchifo kʋt Mahlah, micha Noah, Hoklah, Milkah micha Tisah ak atok:

³⁴ Ilʋppa puta kak osh Manasseh chuka achʋfa hatok; micha holhtina mak osh tahlepa sipokni pokoli tahlapi akucha tnklo cha tahlepa untuklo tok.

³⁵ Ilʋppak osh Eflaim ushi ʋhleha chuka achʋfa ʋlhpi̱sa hatok: Shuhlelah ya̱, Shuhlalhait chuka achʋfa: Beka ya̱ Baklait chuka achʋfa: Tahan a̱, Tahanait chuka achʋfa ak atok:

³⁶ Mihma Shuhlelah ushi ʋhleha hʋt ilʋppak atok, Elan a̱ Elanait chuka achʋfa ak atok.

³⁷ Ilʋppak osh Eflaim ushi ʋhleha chuka achʋfa ʋlhpi̱sʋt holhtina mak osh tahlepa sipokni pokoli tuchina akucha tuklo cha tahlepa tahlapi tok: Ilʋppa puta kak osh Chosef ushi ʋhleha chuka achʋfa ʋlhpi̱sa hatok:

³⁸ Benchamin ushi ʋhleha chuka achʋfa ʋlhpi̱sa; Bela ya̱, Belait chuka achʋfa: Ashbel a̱, Ashbelait chuka achʋfa: Ahilam a̱, Ahilamait chuka achʋfa:

³⁹ Shufam a̱, Shufamait chuka achʋfa: Hufam a̱ Hufamait chuka achʋfa ak atok.

⁴⁰ Mihma Bela ushi ʋhleha hʋt At micha Naaman ak atok: At a̱ Atait chuka achʋfa: Naaman a̱ Naamanait chuka achʋfa ak atok.

⁴¹ Ilʋppa puta kak osh Benchamin ushi ʋhleha chuka achʋfa ʋlhpi̱sa hatok: micha yʋmma holhtina mak osh tahlepa sipokni pokoli ushta akucha tahlapi cha tahlepa hannali tok.

⁴² Ilʋppak osh Tan ushi ʋhleha chuka achʋfa ʋlhpi̱sa: Shuham a̱ Shuhamait chuka achʋfa ak atok. Ilʋppak osh Tan in chuka achʋfa puta, chuka achʋfa ʋlhpi̱sa hatok.

⁴³ Shuhamait chuka achʋfa moma holhtina mak osh tahlepa sipokni pokoli hannali akucha ushta cha tahlepa ushta tok.

⁴⁴ Asha im ʋlla ʋhleha chuka achʋfa ʋlhpi̱sa: Chimna ya̱, Chimnait chuka achʋfa: Chesui ya̱, Chesuait chuka achʋfa: Beliah ya̱, Belait chuka achʋfa ak atok.

⁴⁵ Beliah ushi ʋhleha: Heba ya̱, Hebalait chuka achʋfa: Malkiel a̱, Malkielait chuka achʋfa ak atok.

⁴⁶ Mihma Asha ushetik ʋt hohchifo kʋt Selah ak atok.

⁴⁷ Ilʋppa puta kak osh Asha ushi ʋhleha chuka achʋfa hatok, micha yʋmma holhtina mak osh tahlepa sipokni pokoli tahlapi akucha tuchina micha tahlepa ushta tok.

⁴⁸ Naftali ushi ʋhleha chuka achʋfa ʋhlpi̱sa: Chahseel a̱, Chahseelait chuka achʋfa: Kuni ya̱ Kunait chuka achʋfa:

⁴⁹ Chesa ya̱, Chesalait chuka achʋfa: Shillem a̱ Shillemait chuka achʋfa ak atok.

⁵⁰ Ilʋppa puta kak osh Naftali in chuka achʋfa chuka achʋfa ʋhleha ʋlhpi̱sa hatok, micha yʋmma aholhtina kʋt tahlepa sipokni pokoli ushta akucha tahlapi micha tahlepa ushta tok.

⁵¹ Ilʋppa puta kak osh Islael im ʋlla ʋhleha hosh holhtina mʋt tahlepa sipokni bat tahlepa hannali cha tahlepa sipokni achʋfa, micha tahlepa untuklo pokoli tuchina aiena tok.

⁵² Mihma Chihowah yʋt Moses a̱ im anumpulit,

⁵³ Ilʋppa puta kak osh hohchifo holhtina ka̱ ʋlhpisa i̱ yakni ya̱ chi̱ hosh yakni yash osh i̱ kʋshkoashke.

⁵⁴ Laua ka̱ i̱ yakni ya̱ i̱shahlechit ish imashke, micha ik lauo ka̱ i̱ yakni ik lauo hʋsh imashke, i̱ yakni aiyukali kʋt holhtina tuk ak o̱ ʋlhpi̱sa ho̱ ish imashke.

⁵⁵ Yohmi kia nashoeli hosh yakni ya̱ itikʋshkoashke, i̱ki ʋhleha apehlichi hohchifo kak o̱ ai ishashke.

⁵⁶ Laua micha ik lauo aiena kʋt na shoeli hosh yakni ya̱ itakʋshkoashke.

⁵⁷ Atuk o̱ chuka achʋfa puta ʋlhpisa hosh Lefait ʋhleha hʋt holhtina ilʋppa puta kak atok, Keshon a̱, Keshonait chuka achʋfa ak atok: Kohalh a̱, Kohalhait chuka achʋfa ak atok: Melali ya̱ Melalait chuka achʋfa ak atok.

⁵⁸ Ilʋppa puta kak osh Lefait chuka achʋfa ʋhleha hatok: Lebnait chuka achʋfa, Heblonait chuka achʋfa, Mahlait chuka achʋfa, Mushait chuka achʋfa, Kolahlait chuka achʋfa ak atok. Atuk o̱ Kohalh ʋt Amlam a̱ tobachi tok.

⁵⁹ Mihma Amlam tekchi ʋt hohchifo kʋt Chokebet osh Lefai ushetik, ishki ʋt Lefai ya̱ Echip im ai eshi tok. Atuk osh Alon micha Moses micha in tek Miliam aiena ka̱ Amlam a̱ im eshi tok.

⁶⁰ Atuk o̱ Alon ʋt Natab micha Abihu, Eleasa micha Ihlama aiena kʋt im ʋtta tok.

⁶¹ Atuk o̱ Natab micha Abihu ita tuklo kʋt, luak inla Chihowah itikba ai im issa mʋt illi tok.

⁶² Micha holhtina mʋt nakni bieka hosh hʋshi achʋfa ʋba ma̱ya kʋt tahlepa sipokni pokoli tuklo akucha tuchina. Islael im ʋlla ʋhleha ha̱ takla yakni ik emo hatok. Islael im ʋlla ʋhleha ha̱ takla holhtina tok keyu hokʋt.

⁶³ Ilʋppa puta kak osh Moses micha naholitompa isht ʋtta Eleasa ita tuklo kʋt Islael im ʋlla ʋhleha Chatan a̱ Moab yakni patali Cheliko bili̱ka a holhtina tok, holhtina tok mak oke.

⁶⁴ Yohmi kia Moses micha naholitompa isht ʋtta Alon itatuklo kʋt Islael im ʋlla ʋhleha ha̱ yakni haiaka Sinai ya̱ a hohtena tok a̱, hatak achʋfa kia ilʋppa puta ka̱ itin takla ya̱ iksho tok.

⁶⁵ Chihowah yʋt, Yakni haiaka ai illit taha pulla chi̱ hoke, achi tok oka. Mihma hatak achʋfa kia hlakofi kʋt iksho tok. Chefʋnneh ushi Kaleb micha Nʋn ushi Choshua ak illa tok.