Numbas 25 - Chahta Holisso Holitopa 1886

¹ Mihma Islael ʋt Shittim ak o̱ ahanta tok, mihma okla hʋt Moab ushetik ʋhleha ha̱ iti̱ hauit isht ia tok.

² Mihma i̱ naholbʋt toba puta ka̱ nan ʋbit isht aiokpʋchi mʋt okla hash hoyo tok; mihma okla hash osh impa cha i̱ naholbʋt toba puta ka̱ im akachunoli tok.

³ Mihma Islael ʋt Baal‐pio ya̱ ibafohka tok; mihma Chihowah im ai i̱ nukkilli yʋt Islael a̱ i̱ sanalit libbi tok.

⁴ Micha Chihowah yʋt Moses a̱ okla hash noshkobo puta moma ish ishi cha hʋshi ya̱ ichapaka Chihowah itikba ya̱ iti a̱ ish atakohlechashke, Yʋmohmi ho̱ Chihowah im ai i̱ nukkilli libbi kʋt Islael a̱ i̱ filʋmmashke, im achi tok.

⁵ Mihma Moses ʋt Islael nan im apesa ʋhleha ha̱, Baal‐pio ya̱ ibafohka tuk hatak hʋchim asha aiyukali kʋt hʋsh bashke, im achi tok.

⁶ Atuk o̱ yakeh! Islael im ʋlla ʋhleha aiachʋfa hosh ʋlʋt Mitianait ohoyo ho̱ itibapishi ʋhleha aiasha ka̱, Moses micha okla moma aiena kʋt okla moma in tabenakel okhissa itikba yaiya hosh aiasha tuk osh pi̱sa ho̱ isht ʋla tok.

⁷ Atuk o̱ naholitompa isht ʋtta Alon ushi Eleasa ya̱ ushi Finehas ʋt pisa mʋt okla moma takla binili tuk ʋt tʋli halupa isht hu̱sa ishi cha wakaya tok.

⁸ Micha Islael hatak a̱ iakaiyʋt iʋt binah ha̱ ont chukowa cha Islael hatak ash bahlit hlopullechi mʋt, ohoyo hash ikfoka ya̱ bahlit hlopullechi tok; Yʋmohmi ho̱ ililli okpulo ʋt Islael im ʋlla ʋhleha itin takla ya̱ yokopa tok.

⁹ Mihma ililli okpulo isht illi kʋt tahlepa sipokni pokoli tuklo akucha ushta tok.

¹⁰ Mihma Chihowah yʋt Moses a̱ im anumpulit,

¹¹ Naholitompa isht ʋtta Alon ushi Eleasa ushi Finehas ʋt ʋno pulla kak o̱ amosholi cha ʋm ai i̱ nukkilli ya̱ Islael im ʋlla ʋhleha im itin takla ya̱ kanʋllichi na, sa nukta̱hla kak osh Islael im ʋlla ʋhleha ʋbit ak tahloshke.

¹² Yʋmohmi hoka, yakeh! iti̱ nanaiya nan itim apesa li ya̱ ima lishke.

¹³ Atuk o̱ naholitompa isht aiahanta bilia fehna ka̱ yʋmma, micha im isht atiaka aiena kʋt iesha hi oke; in Chitokaka ya̱ im amosholi cha Islael im ʋlla ʋhleha ha̱ im atobbi tuk okʋt, ish achashke, im achi tok.

¹⁴ Mitianait ohoyo pulla ho̱ Islaelait ʋt awant illi tuk hohchifo kʋt Salu ushi Simli atok, yʋmmʋt Simeonait ʋhleha im itin takla ya̱ chuka achʋfa i̱ shahli i̱ holitopa yatok.

¹⁵ Mikma Mitianait ohoyo illi tuk ʋt Su ushetik osh hohchifo kʋt Kosbi atok, yʋmmʋt okla i̱ noshkoboka yosh Mitian a̱ chuka achʋfa ya̱ i̱ shahli yatok.

¹⁶ Mihma Chihowah yʋt Moses a̱ im anumpulit,

¹⁷ Mitianait ʋhleha ha̱ ilbʋshalechit hʋsh fahamashke;

¹⁸ Nan isht haksichi in tek Mitian i̱ holitopa ushetik Kosbi pulla ho̱, micha Pio pulla ka̱ hʋchi haksechit hʋch ilbʋshali tuk oka, yʋmmʋt Pio pulla kak o̱ ililli okpulo ʋt itonla nitak ma illi tuk oka, achi tok.