Numbas 23 - Chahta Holisso Holitopa 1886

¹ Mihma Balaam ʋt Balak a̱, Ilʋppa alta untuklo ho̱ is sʋm ikbashke, micha wak untuklo, micha chukfi untuklo aiena ho̱ is sʋm atahlashke, im achi tok.

² Mihma Balak ʋt Balaam ʋt anumpuli tuk mak o̱ yʋmihchi tok; mihma Balak micha Balaam ita tuklot alta puta wak hobʋk achʋfa, micha chukfi nakni achʋfa aiyukali ho̱ onochit im issa tok.

³ Mihma Balaam ʋt Balak a̱, Na hukmit ish im issa ilʋppa bili̱ka ish hikia na, ia lashke: Chihowah yʋt si afamʋt ʋla hinla yoba kah; atuk o̱ nana ho̱ ʋm otʋninchikma chim anoli lashke; im achi tok. Mihmʋt achaha ka yo̱ ona tok.

⁴ Mihma Chitokaka yʋt Balaam a̱ afama tok; mihma Alta untuklo ho̱ atahli-lishke, micha alta puta ka̱ wak hobʋk achʋfa micha chukfi nakni achʋfa bieka ho̱ onochit im issa lishke, achi tok.

⁵ Mihma Chihowah yʋt Balaam itih ha̱ anumpa fohki mʋt, Falamʋt Balak a̱ im ona cha yakohmi hosh ish im anumpulashke, im achi tok.

⁶ Mihma falamʋt im ona tok, mihma, yakeh! hukmit isht aiokpʋchi ya̱ bili̱ka, yʋmma, micha Moab i̱ holitopa ʋhleha moma aienʋt hieli tok.

⁷ Mihma nan isht ʋlhpisa ya̱ ishi mʋt, Moab i̱ mi̱ko Balak ʋt Alam ont ai ishit hʋshi akochaka nʋnih foka ya̱ akohchit sʋsht ʋla cha, Minti cha, Chekob a̱ anumpa kallakshichit ant ʋm onochi, micha Islael a̱ ant a̱ pa̱fi; achishke.

⁸ Katiohmichi kak osh Chitokaka yʋt kallakshichi tuk keyu ka̱, anumpa kallakshichi onochi la hinla cho? micha Chihowah yʋt nan ik achukmo im anukfilli tuk keyukma, katiohmichi kak osh nan ikachukmo im anukfilli la hinla cho?

⁹ Tʋli hochito paknaka hikiʋt pi̱sa li, micha nʋnih puta hikiʋt pisa li hokʋt, Yakeh! okla hash osh ila aiasha chi̱ hoke, micha oklushi puta ka̱ iba holhtina he keyu hoke.

¹⁰ Kʋta hosh Chekob lukfi pushi ya̱, micha Islael kʋshkoa ont isht aiushta hoh kia hohtina hinla cho? Aiʋlhpiesa illi kak o̱ chohmit sʋllashke, micha ʋm ai isht aiopikmʋt yʋmmak o̱ chohmashke, achi tok.

¹¹ Mihma Balak ʋt Balaam a̱, Nanta mak o̱ is si yʋmihchi cho? an tʋnʋp ʋhleha ha̱ anumpa kallakshichi ish onocha chi̱ ho̱ chi hoyo li kash o̱, anonti yakeh! anumpa yukpali a̱ ish onochi kak biekʋshke, im achi tok.

¹² Mihma afalaminchit, Ahah! ahni lish Chihowah yʋt sʋtih ha̱ fohki tuk ak o̱ anumpuli la he ʋlhpesa keyu cho? im achi tok.

¹³ Mihma, Balak ʋt, Mintih, chim asilhha lishke, inla ho̱ si awant ish ona cha yʋmmak o̱ ish a pisashke, ont ʋhli fehna kak illa ho̱ ish pisa chi̱, moma ish pisa he keyu hoke, micha yʋmmak o̱ hikiʋt anumpa kallakshichi is sʋm onochashke, achi tok.

¹⁴ Mihmʋt Sofim osapa Piskah tabokaka ya̱ isht ona cha alta untuklo ho̱ ikbi mʋt, alta achʋfa ka̱ wak hobʋk achʋfa micha chukfi nakni achʋfa bieka ho̱ onochit im issa tok.

¹⁵ Mihma Balak a̱, Chihowah ya̱ afamʋt yʋmma ia li takla ka̱ hukmit ish im issa ilʋppa bili̱ka ish hiki̱ashke, im achi tok.

¹⁶ Mihma Chihowah yʋt Balaam a̱ afama cha itih ha̱ anumpa fohkit, Anonti Balak a̱ ish im ona cha yak ish im achashke, im achi tok.

¹⁷ Atuk o̱ im ʋla ma, Yakeh! hukmit im issa bili̱ka hiki̱a ma, Moab holitopa ʋhleha hʋt apeha tok. Mihma Balak ʋt Chihowah hʋt nanta ho̱ anumpuli cho? achi tok.

¹⁸ Mihma nan isht ʋlhpisa ishi cha, Balak ma, wakaya cha haklo, Sippo ushi chia hʋt is sa̱ haponaklashke.

¹⁹ Chitokaka yʋt hatak atuk osh holaba he keyu hoke; micha hatak ushi atuk osh im anukfila inlʋt nukha̱kla he keyu hoke: miha tuk ʋt ik yʋmihcho ka hinla cho? anumpuli tuk ʋt ik a̱hlecho ka hinla cho?

²⁰ Yakeh! yukpali la chi̱ ho̱ anumpa ʋma tuk oka: micha yukpali tuk oke, atuk o̱ inlʋchi la he keyu koke.

²¹ Chekob a̱ nanashʋchi a̱sha ik peso tuk, micha Islael a̱ nan ai ʋlhpiesa keyu ka̱ ik peso tuk oke; Chihowah in Chitokaka yʋt ibafohka hoke; micha im itin takla ya̱ mi̱ko shakapa hosh takali hoke.

²² Chitokaka ak osh Echip a̱ pehlichit kohchi tok, imi hlampko hʋt lapish achʋfa ak o̱ chohmi hoke.

²³ Chekob a̱ i̱ sanalit ishit yushpakʋmma he ʋt iksho hoke; micha Islael a̱ i̱ sanalit isht ahulla he ʋt iksho hoke: himak a̱ chohmi ka̱ Chekob a̱ micha Islael a̱ Chitokaka yʋt nan atahli hoke, acha hi oke.

²⁴ Yakeh! okla hʋt koi chito chohmit wakaya hi oke, micha koi chito himita chohmit ile tanicha hi oke; nawehpoa ya̱ ik ai ʋpo ki̱sha kʋt, micha illi tuk im issish a̱ ik ai ishko ki̱sha kʋt tʋshka he keyu hoke.

²⁵ Mihma Balak ʋt Balaam a̱, Anumpa kallakshichi chik onocho pullakmʋt, anonti anumpa yukpali chik onocho pullashke, achi tok.

²⁶ Yohmi kia Balaam ʋt afalamichit Balak a̱ chim anolit, Chihowah yʋt nana anumpuli yʋmma moma ka̱ yʋmihchi la chi̱ hoke, achi li tuk keyu cho? achi tok.

²⁷ Mihma Balak ʋt Balaam a̱ Mintih, chim asilhha lishke, inla ho̱ chisht ona lashke; Chitokaka yʋt ʋlhpesa ahni na, yʋmma hikiʋt anumpa kallakshichi is sʋm onochi yoba na, achi tok.

²⁸ Mihmʋt Balak ʋt Balaam a̱ Peo paknaka Cheshimon pit talaia isht ona tok.

²⁹ Mihma Balaam ʋt Balak a̱ alta untuklo ho̱ ilʋppa is sʋm ai ikbi cha, wak hobʋk untuklo, micha chukfi nakni untuklo ilʋppa is sʋm atahlashke, im achi tok.

³⁰ Mihma Balak ʋt Balaam ʋt achi tuk mak o̱, yʋmihchi tok, micha alta puta ka̱ wak hobʋk achʋfa micha chukfi nakni achʋfa bieka onochit im issa tok.