Numbas 22 - Chahta Holisso Holitopa 1886

¹ Mihma Islael im ʋlla ʋhleha hʋt tikba ia mʋt, Moab yakni patali chatan ola in tʋnnʋp Cheliko bili̱ka ak o̱ abinanchi tok.

² Mihma Sippo ushi Balak ʋt Islael ʋt Amolait a̱ kaniohmichi tok moma ka̱ pi̱sa tok.

³ Mihma okla hʋt laua fehna hatuk oka, Moab ʋt i̱ nukshopa fehna tok; mihma Islael im ʋlla ʋhleha pulla kak o̱ Moab ʋt komunta tok.

⁴ Micha Moab ʋt Mitian im asʋnonchi ʋhleha ha̱ Himak a̱ okla ilʋppʋt pi afolublit a̱sha tuk moma ka̱, wak osh osapa hushuk a̱sha ho̱ holakshit ishi chatuk ak o̱ chohmit holakshit pisha chi̱ hoke, im achi tok. Micha Sippo ushi Balak ʋt nitak yʋmma Moabait okla i̱ mi̱ko yatok.

⁵ Yʋmohmi hatuk osh Beo ushi Balaam, Pehlo yʋmmʋt im okla im ʋlla ʋhleha i̱ yakni okhina bili̱ka talaia ka̱ anta tuk o̱ hoya chi̱ hosh, anumpa shali pit i̱ pilʋt, Yakeh! Okla hosh Echip a̱ akohchʋt mintit ʋlʋshke; Yakeh! yakni paknaka ya̱ ompohomoshke, micha sa chapaka yak o̱ okla ai ashʋshke.

⁶ Yʋmohmi hoka, minti cha himak a̱ okla ilʋppa anumpa kalakshichi onochit ant is sa̱ mihashke, a̱ kʋllo kʋt atʋpa hoke: imaiya likma issot e kanchikma, tihlelit yakni ya̱ kocha wehli li yoba ná; kʋna ho̱ na yukpali anumpa ish onochikma, na yukpa ka̱, micha kʋna ho̱ anumpa kalakshichi ish onochikma kalakshi ka̱ ithaiyana li hoke.

⁷ Mihma Moab im asʋnonchi ʋhleha, micha Mitian im asʋnonchi ʋhleha aiena kʋt isht ahullo na habenʋchi ʋt ibbak foyuka hosh ilhkoli tok; atuk osh Balaam a̱ im ʋla mʋt, Balak im anumpa hatuk a̱ im anumpuli tok.

⁸ Mihma Himak ninak a̱ ilʋppak o̱ hʋchi nusashke, atuk o̱ Chitokaka yʋt kaniohmit ʋm anumpulikma, anonti isht hʋchim ʋla la chi̱ hoke; mihma Moab holitopa ʋhleha hʋt Balaam a̱ ta̱kla a̱sha tok.

⁹ Mihma Chitokaka yʋt Balaam a̱ im ʋla cha, Hatak nanta hosh ilʋppa chi apehʋt aiasha cho? im achi tok.

¹⁰ Mihma Balaam ʋt Chitokaka ya̱ Moab i̱ mi̱ko Sippo ushi Balak ʋt et sa hoyot,

¹¹ Yakeh! okla hʋt Echip a̱ a minti hosh ʋla cha yakni paknaka ya̱ ompohomoshke; himak a ishla cha anumpa kalakshichi onochit ant is sa̱ mihakma, im aiya lish tihlelit kocha weli li yoba na; achishke, im achi tok.

¹² Mihma Chihowah hʋt Balaam a̱, Awant ish ia he keyu; anumpa kalakshichi ish onocha he keyu; holitopa hoka, im achi tok.

¹³ Atuk o̱ onnahinli ma Balaam ʋt wakaya cha Balak i̱ holitopa ʋhleha ha̱, Hʋchi̱ yakni ya̱ ont hʋsh chukowashke; hʋchi awant ia la he ya̱ Chihowah yʋt ʋm olʋbi hoka, im achi tok.

¹⁴ Mihma Moab holitopa ʋhleha hʋt wakaya cha Balak a̱ im ona mʋt, Balaam ʋt pi awant minti ik bʋnnoshke, achi tok.

¹⁵ Mihma Balak ʋt anonti holitopa ʋhleha laua i̱ shahli, micha holitopa kʋt i̱ shahli ho̱ pila tok.

¹⁶ Mihma Balaam a̱ im ʋla cha, Sippo ushi Balak ʋt yak achishke, Nana kia is sʋm ʋla chi̱ ka̱ ik chi ataklʋmmo kashke, chim asilhha lishke.

¹⁷ Holitopa chinto fehna ho̱ chi hilechi la hi oka, micha nana ho̱ is sa̱ mihakma yʋmihchi la chi̱; yʋmohmi hoka, minti cha okla ilʋppa kalakshichi, ant ʋm onochih, chim asilhha lishke, achishke, im achi tok.

¹⁸ Mihma Balaam ʋt afalamichit, Balak in tishu ʋhleha ha̱, Balak ʋt tʋli hʋta, micha tʋli holisso lakna ya̱ im aboha alota achʋfa ho̱ ik sʋma chi̱ hok mak o̱, Chitokaka an Chihowah im anumpa ha̱ ont iʋt, ola takla, micha i̱ shahli hoh kia yʋmihchi la he keyu hoke.

¹⁹ Yʋmohmi hoka himak a a̱shʋt himak ninak ak kia ilʋppa hʋchi nusashke, hʋchim asilhha lishke; Yohmi na himakma Chihowah hʋt nana ho̱ ʋm acha hinla ka̱ akostininchi lashke, im achi tok.

²⁰ Atuk o̱ ninak o̱ Chitokaka yʋt Balaam a̱ im ʋla cha, Hatak ʋhleha hash osh chi̱ hoyot a̱ya tuk ma, ish wakaya cha, awant ish iashke; yohmi kia anumpa chim achi la chi̱ yʋmmak o̱, ish yʋmohma chi hoke, im achi tok.

²¹ Atuk o̱ onnahinli ma Balaam ʋt wakaya cha, im issuba nashoba ya̱ om patali mʋt Moab holitopa ʋhleha ha̱ awant ia tok.

²² Mihma ia kak o̱ Chitokaka im ai i̱ anukkilli ʋt libbi tok: mihma Chihowah im enchel ʋt in tanampi hosh hina ya̱ i̱ sanalit hikia tok. Mihma im issuba nashoba ya̱ om binilit a̱ya ma, in tishu tuklo kʋt takla a̱ya tok.

²³ Mihma issuba nashoba yʋt Chihowah im enchel ʋt hina takla hikia mʋt, bʋshpo falaia shu̱fa ibbak foyuka hosh hikia na pisa tok; micha issuba nashoba yʋt fullotʋt hina ya̱ kohchʋt osapa ont chukowa tok; mihma Balaam ʋt hina ya̱ pit fohkʋchi hosh issuba nashoba ya̱ isso tok.

²⁴ Yohmi kia Chihowah im enchel ʋt pa̱kʋpi a hollokchi hina ya̱ hikia ma, holihta chaha yʋt ilʋppa bachaya ma, anonti holihta chaha yʋt yʋmma bachaya tok.

²⁵ Atuk o̱ issuba nashoba yʋt Chihowah im enchel pisa mʋt holihta kʋllo ont nʋhli cha Balaam iyi ya̱ holihta kʋllo ya̱ akatanlechit litoli tok, mihma anonti isso tok.

²⁶ Mihma Chihowah im enchel ʋt mishema ona cha ai atukonofa, isht impakimma ia he, micha ʋlhfʋbekimma ia he kia, iksho ho̱ a hikia tok.

²⁷ Atuk o̱ issuba nashoba yʋt Chihowah im enchel a̱ pisa mʋt Balaam nutaka itula tok; mihma Balaam im ai i̱ nukkilli ʋt libbi mʋt issuba nashoba yash tʋbi isht isso tok.

²⁸ Mihma Chihowah yʋt issuba nashoba im itih ha̱ wakʋmmi na, Balaam a̱, Nanta chi katiohmichi li ho̱ ilʋppa ont isht atuchina mak o̱ issʋsso cho? im achi tok.

²⁹ Mihma Balaam ʋt issuba nashoba yash, Isht is sa yopula hoka; bʋshpo falaia yʋt sʋbbak a̱ fo̱ka tuk okbano, ahni lishke, himak a̱ chibe la he tuk okʋt, im achi tok.

³⁰ Mihma issuba nashoba yash osh Balaam a̱ Chim issuba nashoba sia ho̱ chimmi sia hatok ititakla himak nitak ant ai ʋhli ka̱ is si ombinili chatuk keyu cho? himonna kia chi ayʋmohmi li cha tuk oh cho? im achi tok, Mihma, Keyu, achi tok.

³¹ Yohmi ma Chihowah yʋt Balaam nishkin fatummi na, Chihowah im enchel ʋt bʋshpo falaia shu̱fa ibbak afoyuka hosh hina ya̱ hikia ho̱ pisa tok: mihmʋt noshkoba ha̱ akachunolechit nashuka ya̱ aka ishit hlipia tok.

³² Mihma Chihowah im enchel ʋt, Nanta katiohmi ho̱ ilʋppʋt ont isht atuchina mak o̱ chim issuba nashoba ya̱ ish isso cho? Yakeh! sa tikba ya̱ ish ata̱ya kʋt ai ʋlhpesa keyu kak o̱, chi̱ sanali la chi̱ hosh kohchʋt ia li tuk oke.

³³ Mihma issuba nashoba yʋt sa pisa cha, ilʋppʋt ont isht atuchina mak o̱ a̱ shanaiya tuk oke; ik sa̱ shanaiyo tuk okma, himak a̱ chohmi ka̱ chibe li pulla cha, yʋmmʋno okchalinchi la he tuk oke, im achi tok.

³⁴ Mihma Balaam ʋt Chihowah im enchel a̱ sai yoshoba tuk oke, a̱ sanalit sa tikba hina ya̱ ish hikia ka̱ ak ithano tuk okʋt; yʋmohmi hoka, himak a̱ ik chim ʋlhpesokma anonti falamʋt ia lashke, im achi tok.

³⁵ Mihma Chihowah im enchel ʋt Balaam a̱ Hatak ash awant ish iashke; yohmi kia, peh, anumpa chim anumpuli li illa kak o̱ ish anumpula chi̱ hoke, im achi tok; yohmi ma Balaam ʋt Balak i̱ holitopa ʋhleha ha̱ awant ia tok.

³⁶ Atuk o̱, Balaam ʋt ʋla na Balak ʋt haklo mʋt afamʋt iʋt, Moab in tʋmaha holihta yʋmmʋt Anon ʋhli yʋmmʋt ont ʋhli fehna hatuk o̱ ona tok.

³⁷ Mihma Balak ʋt Balaam a̱, A̱hli hosh pit chi̱ pilʋt chi hoyo li tuk keyu cho? nanta katiohmi ho̱ chik sʋm alo tuk oh cho? chi holitoblichi la he ʋt si ʋlhpesa mʋhli keyu cho? im achi tok.

³⁸ Mihma Balaam ʋt Balak a̱, Yakeh! chim ʋla lishke; nan isht im aia̱hli nana ho̱ i̱shi li kak osh nana achi la hinla cho? anumpa nana ho̱ Chihowah yʋt sʋtih ha̱ fohkikma yʋmmak o̱ anumpuli la chi hoke, achi tok.

³⁹ Mihma Balaam ʋt Balak a̱ awant ia ma Kichalh‐husolh a̱ onʋt okla tok.

⁴⁰ Mihma Balak ʋt wak micha chukfi aiena ka̱ im issa mʋt, Balaam micha holitopa ʋhleha apeha aiena ka̱ pit i̱ pila tok.

⁴¹ Atuk osh ont onna ma yakohmi tok, Balak ʋt Balaam a̱ ilaueli cha Baal achahaka puta isht ona tok, yʋmmak o̱ hikia cha okla hash aiasha ont ʋhli fehna ka̱ pisa chi̱ hatok.