Numbas 21 - Chahta Holisso Holitopa 1886

¹ Atuk o̱ Kenanait mi̱ko Alat oka mahli pilla ʋtta tuk ʋt yakni pisa ʋhleha ata̱ya tuk ak o̱, Islael ʋt minti ho̱ anoli na haklo tok, mihmʋt Islael a̱ itibi cha kanohmi ka̱ yukachi tok.

² Mihma Islael ʋt anumpa il onochi Chihowah ya̱ im il onochit, okla ilʋppa sʋbbak a̱ ish fohki ho̱ mʋhlikma, yohmikma in tʋmaha holihta puta moma ka̱ okpʋnit tahlit ʋmohmichi lashke, achi tok.

³ Mihma Chihowah yʋt Islael im anumpa ha̱ haklo cha, Kenanait ʋhleha ha̱ ibbak fohki tok; mihma yʋmma, micha in tʋmaha holihta puta aiena ka̱ okpʋnit taiyahli tok; mihma yakni yash Homah hochifo tok.

⁴ Mihma Etom yakni ya̱ apakfopa chi̱ hosh nʋnih Ho ya̱ ashʋt Okhʋta Humma pilla hina yo̱ ia tok: mihma okla hʋt hina pulla kak o̱ chu̱kʋsh isht ielli tok.

⁵ Micha okla hʋt Chitokaka ya̱ i̱ sanalit, micha Moses a̱ i̱ sanalit anumpulit, Nanta katiohmi ho̱ yakni haiaka ai illit pi taha chi̱ ho̱ Echip a̱ pi pehlichit ish pi kohchi tuk oh cho? pʋska yʋt iksho, micha oka yʋt iksho, micha pʋska okpulo ilʋppano pi̱ yuwalʋt tahʋshke, achitok.

⁶ Mihma Chihowah yʋt sinti luak o̱ okla ai itin takla on tihleli na okla ha̱ kopoli tok, mihma Islael okla laua kʋt illi tok.

⁷ Yʋmohmi ho̱ okla hʋt Moses a̱ im ʋla cha, Pi yoshobʋshke, Chihowah ya̱ micha chishno ya̱ e chi̱ sanalit il anumpuli tuk okʋt, Chihowah ya̱ ish im asilhha na, sinti ya̱ pi̱ kanʋllichit ishit kanchashke, achi tok. Mihma Moses ʋt okla ha̱ asilhhʋt isht anumpuli tok.

⁸ Mihma Chihowah hʋt Moses a̱ Sinti luak o̱ ish ikbi cha, iti fabʋssa wishakchi ish ontalalashke: atuk o̱ yakohma hi oke, sinti ʋt kopoli tuk aiyuka hokʋt yʋmma pisakmʋt okcha̱ya hi oke, achi tok.

⁹ Mihma Moses ʋt asonak lakna yo̱ sinti ikbi cha iti fabʋssa wishakchi on talali tok, atuk o̱ yakohmi tok, sinti ʋt hatak nana ho̱ kopoli tuk ma, asonak lakna sinti yash pisakmʋt okcha̱ya beka tok.

¹⁰ Atuk osh Islael im ʋlla ʋhleha hʋt tikba iʋt Obolh ak o̱ abinanchi tok.

¹¹ Atuk osh Obolh a̱ ashʋt ia mʋt yakni haiaka Iche‐abalim, yʋmmʋt hʋshi akochaka pilla Moab itikba ya̱ talaia kak o̱ a binanchi tok.

¹² Yʋmma ashʋt kanʋlli mʋt Salet okfa ak o̱ a binanchi tok.

¹³ Yʋmma ashʋt kanʋlli mʋt, Anon mishtʋnnʋp yʋmmʋt Amolait im ai ʋhli et kocha yakni haiaka ak o̱ a binanchi tok. Moab micha Amolait ititakla ya̱ Anon ak osh Moab im aiʋhli yatuk oke.

¹⁴ Yʋmohmi hatuk o̱ Chihowah itin tanampi tok holisso ha̱, Okhʋta Humma micha Bokushi Anon.

¹⁵ Micha bokushi yanʋlli A aiʋtta pilla ia, micha Moab im aiʋhli bachaya aiena ka̱ a yʋmihinchi tok achit a holihi̱so hoke.

¹⁶ Micha yʋmma ashʋt ia mʋt Bee ya̱ ona tok, yʋmmʋt kʋli hofobi yʋmmak o̱ Chihowah yʋt Moses a̱ ai im anumpulit, Okla hoyot ish itʋnahli na oka ipeta lashke, achi tok.

¹⁷ Yohmi ma Islael ʋt taloa ilʋppa taloa tok. Kʋli hofobi ma! ish mitafashke; hʋsh in taloashke.

¹⁸ Hatak i̱ shahli ʋhleha ak osh kulli; okla holitopa ʋhleha ak osh nan apesa yak osh miha ho̱ in tʋbi ishit kulli tok oke. Atuk osh yakni haiaka̱ ashʋt ia mʋt Mattanah ya̱ ona tok.

¹⁹ Atuk osh Mattanah ashʋt ia mʋt Nahaliel ona tokatuk osh Nahaliel a̱ ashʋt ia mʋt Bemolh ona tok.

²⁰ Atuk osh okfa talaia Bemolh yʋmmʋt Moab i̱ yakni ya̱ talaia ka̱ ashʋt ia mʋt Piskah paknaka yʋmmʋt Cheshimon pit talaia ka̱ ona tok.

²¹ Mihma Islael ʋt Amolait ʋhleha i̱ mi̱ko Sihon a̱ anumpa shali pit i̱ pilʋt,

²² Chi̱ yakni ya̱ e hlopullashke, fullotʋt chim osapa puta, micha chi̱ pa̱kʋpi ahollokchi puta ka̱ e chukowa he keyu; micha kʋli hofobi ya̱ oka il ai ishka he keyu hoke, amba mi̱ko i̱ hina ak o̱ a̱yʋt chim aiʋhli ya̱ ont iʋt e hlopullashke, achi tok.

²³ Mihma Sihon ʋt im ai ʋhli ya̱ Islael ʋt ik hlopullih, ik im ahno tok; amba Sihon ʋt im okla moma ka̱ hoyot itʋnahli cha, yakni haiaka Islael ai itiba chi̱ hosh kohchʋt ia tok; atuk osh Chahas a̱ ʋla cha Islael a̱ itibi tok.

²⁴ Mihma Islael ʋt bʋshpo falaia halupa ishit fahamʋt kanchi tok, micha i̱ yakni ya̱ im eshit Anon ʋttʋt ia hosh Chabbok ont aiʋhli, Ammon im ʋlla ʋhleha im ai ʋhli ya̱ isht ona tok. Ammon im ʋlla ʋhleha im ai ʋhli ʋt kʋllo fehna hatuk oka.

²⁵ Micha Islael ʋt tʋmaha holihta ilʋppa puta moma ka̱ ishi tok; mihmʋt Islael ʋt Amolait in tʋmaha holihta puta Heshbon aiasha ka̱, micha chuka im a lokoli moma aiena ka̱ aiasha tok.

²⁶ Heshbon ak osh Amolait okla i̱ mi̱ko Sihon yʋmmʋt chashpo ka̱ Moab i̱ mi̱ko ya̱ itibi cha i̱ yakni moma Anon ont ʋhli ha̱ ibbak ai ishi tok a̱, in tʋmaha holihta yatuk oke.

²⁷ Yʋmohmi hatuk o̱ nan achi anumpuli kʋt Heshbon a̱ hʋsh lashke, Sihon in tʋmaha holihta yʋt tobʋt ʋlhtahashke.

²⁸ Luak ʋt Heshbon a̱ kohchʋt ia hoka, luak libbi kʋt Sihon in tʋmaha kohchʋt ia hoka; Moab talaia A, micha Anon achahaka puta hochitoka ʋhleha ha̱ hukmit tahlishke.

²⁹ Na palʋmmi chi onʋtolʋshke, Moab ma! okpulokʋt hʋchi tahʋshke, Chemosh okla ma! ushi ʋhleha micha ushetik ʋhleha aiena kʋt hlakofi tuk a̱ Amolait i̱ mi̱ko Sihon yuka ikbit im issʋshke.

³⁰ E husa tuk oke; Heshbon ʋt illit taha kʋt Tibon a̱ ont ʋhlishke, micha chukilissʋchit Nofah yʋmmʋt Meteba ona ka̱ isht il onʋshke, achi hoke.

³¹ Yakohmi hosh Islael ʋt Amolait i̱ yakni ya̱ aiasha tok.

³² Mihma Chaasa ya̱ pisa chi̱ ho̱ Moses ʋt yakni pisa ya̱ pit pila tok, micha in chuka lokoli puta ishi cha Amolait yʋmma aiasha tuk a̱ tihlelit kocha wehli tok.

³³ Mihmʋt fullotʋt iʋt Bashan pilla ho̱ pit fullota tok; mihma Bashan i̱ mi̱ko Ok, yʋmma micha im okla moma aiena kʋt Etlei ya̱ ai itiba chi̱ hosh i̱ sanalit kohehʋt ia tok.

³⁴ Mihma Chihowah yʋt Moses a̱ Ish i̱ nukshopa nah, yʋmma micha im okla moma, micha i̱ yakni aiena ka̱ chibbak fohki li hoke; mikma Amolait i̱ mi̱ko Sihon Heshbon ai ʋtta yatuk a̱ ish i̱ yʋmihchi tok ʋt chohmichit ish yʋmih cha chi̱ hoke, im achi tok.

³⁵ Yʋmohmi hosh yʋmma, micha ushi ʋhleha, micha im okla moma ka̱ issot kanchi na, okcha̱yʋt im anta kʋt iksho tok, micha i̱ yakni ishit abinili tok.