Numbas 20 - Chahta Holisso Holitopa 1886

¹ Yohmi ma Islael im ʋlla ʋhleha okla moma kʋt hʋshi ʋmmona ho̱ Sin yakni haiaka ya̱ ona tok; mihma okla hʋt Katesh ak o̱ aiasha tok; atuk o̱ Miliam ʋt yʋmmak o̱ ai illi cha yʋmmak o̱ a hollohpi tok.

² Atuk o̱ okla moma kʋt oka ik im iksho tok, mihmʋt Moses micha Alon a̱ i̱ sanalit iti hoyot itahoba tok.

³ Micha Moses a̱ i̱ nukowʋt anumpulit, Chihowah hʋt ʋlhpesa ahni na pitibapishi ʋhleha hʋt Chihowah itikba illit taha ka̱ ta̱kla pilli tuk okbano.

⁴ Micha nanta katiohmi ho̱ Chihowah im okla hʋt yakni haiaka ilʋppa pishno, micha pi̱ wak aiena kʋt pi ai illa he a̱ pisht ish la tuk oh cho?

⁵ Micha nanta katiohmi ho̱ ik ai achukmo ilʋppa pisht ishla chi̱ kʋt Echip a̱ ish pi kohchechi tok oh cho? nanihi, micha fik, micha pa̱kʋpi, micha pomeklanit aiasha keyushke; micha oka ishka hi ʋt ikshoshke, achi tok.

⁶ Mihma Moses micha Alon ʋt okla ha̱ itikba ai i̱ filʋmmit okla moma in tabenakel okhissa ya̱ ona cha, nashuka ishit hlipkaiyachi tok. Mihma Chihowah im aholitopa yʋt i̱ haiaka tok.

⁷ Mihma Chihowah yʋt Moses a̱ im anumpulit,

⁸ Tʋbi ya̱ ishi cha okla hoyot ish itʋnahlashke, chishno micha chitibapishi Alon ita tuklo kʋt, micha nishkin itikba tʋli chito ya̱ hʋsh im ai anumpulashke; mikma im oka ya̱ kohchicha chi̱ hoke; mihma tʋli chito ak o̱ akohchit oka ish imashke; yohmi hosh okla moma, micha i̱ nan ʋlhpoba aiena ka̱ nan ishko hʋsh imashke, im achi tok.

⁹ Mihma im achi tuk mak o̱, Moses ʋt tʋbi yash Chihowah itikba itoyula tuk a̱ ishi tok.

¹⁰ Atuk osh Moses micha Alon ʋt okla moma ka̱ hoyot tʋli chito yash itikba ya̱ ai itʋnahli tok, micha Ila filʋmmit i̱ sanali ʋhleha hʋchi ma! ho haklo, tʋli chito ilʋppa oka e hʋchim akohcha chi̱ cho? im achi tok.

¹¹ Micha Moses ʋt ibbak a̱ ʋba pit weli cha tʋli chito ya̱ in tʋbi yash hitukla ha̱ isht isso tok; mihma oka laua fehna hosh et kohcha tok, mihma okla moma, micha i̱ nan ʋlhpoa aiena kʋt ishko tok.

¹² Mihma Chihowah yʋt Moses micha Alon a̱ im anumpulit, Hʋchik sa̱ yimmot Islael im ʋlla ʋhleha itikba ya̱ hʋchik sa holitoblo tuk okʋt, yʋmohmi tuk okʋt okla ilʋppa pehlichit yakni ima li tok a̱ isht hʋsh chukowa chi̱ keyu hoke, im achi tok.

¹³ Ilʋppak osh Melibah oka mak oke, Islael im ʋlla ʋhleha hʋt Chihowah ya̱ i̱ kʋllo na isht aholitopa tuk oka.

¹⁴ Mihma Moses ʋt Katesh a̱ ʋttʋt anumpa shali ʋhleha ha̱ ha̱ Etom i̱ mi̱ko ya̱ pit i̱ pilʋt, Chitibapishi Islael ʋt yak achishke, nan isht ilbʋsha pi onʋtoyula moma ka̱ ish ithanʋshke.

¹⁵ Pi̱ki ʋhleha hʋt Echip a̱ ona tok, atuk o̱ Echip a̱ il aiasha na hopaki, mihma Echip okla hʋt pishno, micha pi̱ki ʋhleha aiena ka̱ pilbʋshali tok.

¹⁶ Atuk o̱ Chihowah ya̱ il i̱ paha̱ya ma, pim anumpa haklo cha, enchil o̱ et pila cha pehlichit Echip a̱ ai ishit pi kohchichi tuk oke; atuk o̱ yakeh! chim ai ʋhli fehna tʋmaha holihta Katesh ak o̱ il ai ashʋshke.

¹⁷ Chi̱ yakni ya̱ ke hlopullih, chim asilhha lishke, osapa puta, micha pa̱ki ahollokchi puta ka̱ e hlopulla he keyu; micha kʋli hofobi puta ka̱ oka il ai ishka he keyu hoke; mi̱ko i̱ hina ak o̱ il ia cha isht impakimma, micha ʋlhfʋbekimma pit ke fulloto hosh chim ai ʋhli ya̱ e hlopulla chi̱ hoke, achi tok.

¹⁸ Mihma Etom ʋt, A̱ bili̱ka ont hʋsh ia he keyu, yohmikma bʋshpo falaia isht hʋchi afama la chi̱ hoke, achi tok.

¹⁹ Mihma Islael im ʋlla ʋhleha hʋt, Hina ak o̱ il ia chi̱ hoke, atuk o̱ ʋno, micha a̱ nan ʋlhpoa yʋt chim oka ya̱ ishkokma atobbi lashke, peh, nan inla ka̱ ak yʋmihcho hosh, aka a̱yʋt hlopulli lashke, im achi tok.

²⁰ Mihma, Ish hlopulla he keyu, achi tok. Mihmʋt Etom ʋt okla laua ho̱ ieshi hosh, micha ibbak kʋllo hosh kohchʋt afamʋt minti tok.

²¹ Yakohmi hosh Islael ʋt im ai ʋhli hlopulla chin tuk a̱ ʋlhpesa ik im ahno tok, yʋmohmi ho̱ Islael ʋt i̱ filʋmmit ia tok.

²² Micha Islael im ʋlla ʋhleha hʋt okla moma kʋt Katesh a̱ asht ia hosh hʋnih Ho ya̱ ona tok.

²³ Mihma Chihowah yʋt nʋnih Ho Etom yakni ai ʋhli bili̱ka yo̱ Moses micha Alon a̱ im anumpulit,

²⁴ Alon ʋt im okla ha̱ ont ibafohka chi̱ hoke, oka Melibah ya̱ ʋm anumpa ha̱ i̱ sanalit hʋsh filʋmmi tuk oka, yakni Islael im ʋlla ʋhleha ima li tok a̱ chukowa he keyu hoke.

²⁵ Alon micha ushi Eleasa ya̱ ish ishi cha nʋnih Ho ya̱ oiyʋt isht ish onashke.

²⁶ Micha Alon i̱ nafohka ya̱ ish i̱ shu̱fi cha, ushi Eleasa ak o̱ ish fohkʋchashke; mikma Alon ʋto im okla ha̱ ont ibafohka chi̱ hoke, micha yʋmmak o̱ ai illa chi̱ hoke.

²⁷ Mihma Chihowah yʋt apesa tuk mak o̱, Moses ʋt yʋmihchi tok; micha okla moma kʋt pi̱sa ho̱ nʋnih Ho ya̱ pit oiya tok.

²⁸ Mihma Moses ʋt Alon a̱ i̱ nafohka ya̱ i̱ shu̱fi cha ushi Eleasa ak o̱ fohkʋchi tok: mihma Alon ʋt nʋnih paknaka yʋmmak o̱ ai illi tok: mihma Moses micha Eleasa ita tuklo kʋt nʋnih ha̱ akowa tok.

²⁹ Atuk o̱ okla moma kʋt Alon ʋt illi tuk a̱ ithana mʋt, Islael in chuka achʋfa moma kʋt Alon a̱ ishit yaha̱ya na nitak pokoli tuchina tok.