Numbas 2 - Chahta Holisso Holitopa 1886

¹ Mihma Chihowah yʋt Moses micha Alon a̱ im anumpulit,

² Islael im ʋlla ʋhleha hatak puta kʋt ilap i̱ nahʋta shali, i̱ki in chuka achʋfa i̱ nahʋta aiyukali kak o̱ abinancha hi oke: okla moma im ʋlhtipo holitopa i̱ hopakechit afolublit a binancha hi oke.

³ Mikma i̱ hʋshi akochaka pilla hak o̱ Chutah i̱ nahʋta shali ai achʋfa kʋt okla laua moyuma kʋt abinancha hi oke; mikma Amminatab ushi Nahshon ak osh Chutah im ʋlla ʋhleha ha̱ i̱ kʋpitʋni ha chi̱ hoke.

⁴ Mihma in tʋshka ʋhleha holhtina kʋt tahlepa sipokni pokoli untuklo akucha ushta cha tahlepa hannali tok.

⁵ Mikma yʋmma pit iakaiyʋt binanchi kʋto Issaka apehlichi kak a hi oke: mikma Sua ushi Nehlaneel ak osh Issaka im ʋlla ʋhleha ha̱ i̱ kʋpitʋni ha chi̱ hoke.

⁶ Mihma in tʋshka ʋhleha hʋt holhtina kʋt tahlepa sipokni pokoli tahlapi akucha ushta cha tahlepa ushta aiena tok.

⁷ Yohmi ma Sebulun apehlichi kak a tok; mihma Helon ushi Eliab ak osh Sebulun im ʋlla ʋhleha ha̱ i̱ kʋpitʋni ha chi̱ hoke.

⁸ Mihma in tʋshka ʋhleha hʋt holhtina kʋt tahlepa sipokni pokoli tahlapi akucha untuklo cha tahlepa ushta aiena tok.

⁹ Chutah i̱ binah aiasha holhtina moma kʋt okla moyuma kʋt tahlepa sipokni achʋfa cha tahlepa sipokni pokoli untuchina tahlepa sipokni hannali micha tahlepa ushta aiena tok, ilʋppa puta kak osh tikba iashke.

¹⁰ Oka mahli in tʋnnʋp a̱ Luben in tʋshka ʋhleha mak osh a binanchi ya̱ i̱ nahʋta shali a hikia chi̱ hoke: mikma Luben im ʋlla ʋhleha i̱ kʋpitʋni ʋt Sheteu ushi Elisu ak a hi oke.

¹¹ Mihma in tʋshka ʋhleha micha a holhtina kʋt tahlepa sipokni pokoli ushta akucha hannali cha tahlepa tahlapi tok.

¹² Mikma apontʋt binanchi kʋt Simeon apehlichi ak a chi̱ hoke; mikma Simeon im ʋlla ʋhleha i̱ kʋpitʋni ʋt Sulishattai ushi Shelumiel ak a chi̱ hoke.

¹³ Mikma in tʋshka ʋhleha micha holhtina kʋt tahlepa sipokni pokoli tahlapi akucha chakkali cha tahlepa tuchina tok.

¹⁴ Yʋmmakma Kat apehlichi ak a chi̱ hoke, mikma Kat ushi ʋhleha i̱ kʋpitʋni ʋt Leuel ushi Eliasaf ak a chi̱ hoke.

¹⁵ Mihma in tʋshka ʋhleha micha holhtina tuk ʋt tahlepa sipokni pokoli ushta akucha tahlapi micha tahlepa hannali cha pokoli tahlapi tok.

¹⁶ Luben i̱ binah ha̱ aiashʋt holhtina tuk ʋt okla moma kʋt tahlepa sipokni tahlepa achʋfa tahlepa sipokni pokoli tahlapi akucha achʋfa, micha tahlepa ushta cha pokoli tahlapi tok: micha ilʋppa puta kak osh a̱ya atukla yosh wakaya hi oke.

¹⁷ Yohmikma okla moma im ʋlhtipo holitopa yʋt wakayʋt Lefait ʋhleha i̱ binah, binah iklʋnna aiasha tuk aienʋt ia chi̱ hoke; kaniohmit binachi tuk ʋt moma hosh ahikia aiyukali, micha i̱ nahʋta shali aiyukali hielit iashke.

¹⁸ Hʋshi ai okatula in tʋnnʋp a̱ Eflaim in tʋshka ʋhleha mak osh i̱ binah nahʋta shali ʋt hikia hi oke: mikma Eflaim im ʋlla ʋhleha ha̱ i̱ kʋpitʋni ʋt Ammihut ushi Elishama ak a̱ chi̱ hoke.

¹⁹ Mihma in tʋshka ʋhleha, micha holhtina tuk ʋt tahlepa sipokni pokoli ushta cha tahlepa tahlapi tok.

²⁰ Mikma apotoa kʋt Manasseh apehlichi ak a chi̱ hoke, mikma Manasseh im ʋlla ʋhleha ha̱ i̱ kʋpetʋni ʋt Petahsu ushi Kamaliel ak a chi̱ hoke.

²¹ Micha in tʋshka ʋhleha, micha holhtina tuk ʋt tahlepa sipokni pokoli tuchina akucha tuklo cha tahlepa tuklo tok.

²² Yohmikma Benchamin apehlichi ak a chi̱ hoke; mikma Benchamin im ʋlla ʋhleha i̱ kʋpitʋni ʋt Kiteoni ushi Abitan ak a chi̱ hoke.

²³ Micha in tʋshka ʋhleha, micha holhtina tuk ʋt tahlepa sipokni pokoli tuchina akucha tahlapi cha tahlepa ushta tok.

²⁴ Eflaim i̱ binah hʋt holhtina moma, okla moma kʋt tahlepa sipokni tahlepa achʋfa, tahlepa sipokni untuchina cha tahlepa achʋfa tok; micha a̱ya atuchina kak o̱ hielit ia chi̱ hoke.

²⁵ Tan i̱ binah nahʋta shali ʋt falʋmmi in tʋnnʋp im ok la aiasha bili̱ka hikia chi̱ hoke: mikma Tan im ʋlla ʋhleha i̱ kʋpitʋni ʋt Ammishattai ushi Ahiesa yak a chi̱ hoke.

²⁶ Mihma in tʋshka ʋhleha, micha holhtina kʋt tahlepa sipokni pokoli hannali akucha tuklo cha tahlepa untuklo tok.

²⁷ Mikma apotoʋt binachi kʋt Asha apehlichi ak a chi̱ hoke, mikma Asha im ʋlla ʋhleha i kʋpitʋni ʋt Oklan ushi Pakiel ak a chi̱ hoke.

²⁸ Mihma in tʋshka ʋhleha, micha holhtina tuk ʋt tahlepa sipokni pokoli ushta akucha achʋfa cha tahlepa tahlapi tok.

²⁹ Yʋmmakma Naftali apehlichi ak a chi̱ hoke; micha Naftali im ʋlla ʋhleha i̱ kʋpitʋni ʋt Enan ushi Ahila ak a chi̱ hoke.

³⁰ Mihma in tʋshka ʋhleha, micha holhtina tuk ʋt tahlepa sipokni pokoli tahlapi akucha tuchina cha tahlepa ushta tok.

³¹ Tan i̱ binah aiashʋt holhtina moma kʋt tahlepa sipokni tahlepa achʋfa tahlepa sipokni pokoli tahlapi akucha untuklo cha tahlepa hannali tok: yʋmmʋto i̱ nahʋta ieshit a̱shaka fehna a̱ya chi̱ hoke.

³² Islael im ʋlla ʋhleha ilʋppa puta kak osh i̱ki in chuka achʋfa ʋlhpisa hosh holhtina tok. Okla moma binah puta ka̱ aiashʋt holhtina tuk moma kʋt tahlepa sipokni tahlepa hannali, tahlepa sipokni tuchina cha tahlepa tahlapi pokoli tahlapit aiena tok.

³³ Amba Chihowah yʋt Moses a̱ im apesa tuk mak o̱, Lefait ʋhleha hʋto Islael im ʋlla ʋhleha ta̱kla ik holhtina tok.

³⁴ Mihma Chihowah yʋt Moses a̱ im apesa tuk mak o̱, moma Islael im ʋlla ʋhleha hʋt yʋmihchi tok; yohmi hosh i̱ki ʋhleha in chúka achʋfa ʋlhpi̱sa hosh in chuka achʋfa aiyukali i̱ nahʋta shali abinachi, micha yohmi hosh wakayʋt ia beka tok.