Numbas 19 - Chahta Holisso Holitopa 1886

¹ Mihma Chihowah yʋt Moses micha Alon a̱ im anumpulit,

² Ilʋppak osh nan ʋlhpisa Chihowah yʋt anumpulit, Islael im ʋlla ʋhleha ha̱ ish im anumpuli na, wak tek himita homma, inlʋt takali iksho, ik ai ono kʋt iksho, yʋmmak oka ikunla abana yʋt onʋtoyula tuk keyu ho̱ isht chim ʋlashke.

³ Mikma naholitompa isht ʋtta Eleasa ya̱ ish ima na, binah ha̱ kocha isht onakma, achʋfʋt nashuka itikba ya̱ ai ʋbashke.

⁴ Mihma Eleasa naholitompa isht ʋtta yʋt im issish a̱ ibbak ushi isht ishi cha im issish a̱ okla moma in tabenakel itikba fehna untuklo ha̱ a fimmashke.

⁵ Mihma pisa ho̱ achʋfʋt wak tek himita yash hukma hi oke; hakshup micha nipi micha im issish, i̱ yʋlhki aiena ka̱ hukma hi oke.

⁶ Mihma naholitompa isht ʋtta yʋt chuahla iti, hissop, micha natishepa aiena ka̱ ishi cha, wak tek himita lua ka̱ iklʋnna pit pila hi oke.

⁷ Yohmikma naholitompa isht ʋtta yʋt i̱ nafohka ya̱ achefa cha nipi ya̱ oka isht achifashke, atuk osh i̱ himmak a̱ yo̱ binah ha̱ ont chukowashke, micha naholitompa isht ʋtta yʋt liteha na opiashke.

⁸ Mikma hukmi tuk ʋt i̱ nafohka ya̱ oka isht achefashke, micha nipi ya̱ oka isht achefashke, micha liteha na opiashke.

⁹ Mikma hatak kashofa hosh wak tek himita hituk chubbi ya̱ aiowa cha binah puta ka̱ kocha akashofa ho̱ ashachashke; atuk o̱ Islael im ʋlla ʋhleha okla moma kʋt ila filʋmminchi oka yosh im aiasha hi oke, nanashʋchi ishit kashofa yoke.

¹⁰ Mikma wak tek himita hituk chubbi aiowa tuk ʋt i̱ nafohka achifa cha liteha na, ont opia hi oke; micha Islael im ʋlla ʋhleha, micha okla inla yosh takla ahanta aiena kʋt i̱ nan ʋlhpisa bilia hi oke.

¹¹ Hatak kʋna kia illi nipi yo̱ potolikmʋt nitak untuklo ho̱ liteha hi oke.

¹² Nitak ont isht atuchinakma isht ile kashoffashke, micha nitak ont isht untuklokma kashofa chi̱ hoke; amba nitak ont isht atuchina ka̱ ik ile kashoffokmʋt nitak ont ishit untuklo ka̱ kashofa he keyu hoke.

¹³ Kʋna hosh hatak kʋna illi nipi illi tuk o̱ potoli tuk osh, ik ile kashoffokmʋt Chihowah in tabenakel a̱ litehlishke; mikmʋt shilombish yʋmmʋt Islael a̱ i̱ filʋmmit fiopa tʋpa hi oke, ile filʋmmichi oka yʋt ik o̱ fimmo tok okʋt, liteha hi oke, im a liteha kʋt onʋtonla moma hoke.

¹⁴ Hatak osh ʋlhtipo ai illikma nan ʋlhpisa hʋt ilʋppak oke; bina hash ont chukowa tuk moma, micha binah aiasha tuk aiena kʋt nitak untuklo ho̱ liteha hi oke.

¹⁵ Mikma nan ai ʋlhto tiwa tuk puta on hlipia isht ompoholmo tuk keyu kʋt liteha hi oke.

¹⁶ Mikma kʋna hosh achʋfʋt ashahbika yo̱ bʋshpo falaia isht illi tuk o̱, keyukmʋt illi nipi, keyukmʋt hatak foni, keyukmʋt ahollohpi yo̱ potoll tuk mʋt nitak untuklo ho̱ liteha hi oke.

¹⁷ Mikma hatak liteha ka̱, nan ashʋchi ishit kashofa, wak tek himita yash hituk chubbi ya̱, micha oka yanʋlli ya̱ ishi cha ai ʋlhto itibanashke.

¹⁸ Mikma hatak kashofa yosh hissop ishi cha oka yash okʋchi cha binah hash, micha nan ai ʋlhto puta moma micha hatak yʋmma aiasha tuk, micha foni, keyukmʋt ʋbi na illi tuk, keyukmʋt illi, keyukmʋt ahollohpi potoli tuk a̱ o̱ fimmashke.

¹⁹ Micha hatak kashofa yʋt ik kashofo yosh nitak ont isht atuchina, micha ont isht untuklo ka̱ o̱ fimma hi oke; mikma nitak ont isht untuklokma ile kashoffi cha i̱ nafohka ya̱ achifakmʋt oka yupi cha opiakma kashofa hi oke.

²⁰ Amba liteha hoh kia hatak yʋmmʋt ile kashofa he keyukmʋt shilombish yʋmmʋt okla moma ka̱ ai i̱ filʋmmit fiopa tʋpa hi oke; Chihowah im ʋlhtipo holitopa ya̱ litehli tuk okʋt, ile filʋmminchi oka yʋt o̱ fimimpa tuk keyu hoka; liteha hoke.

²¹ Ile filʋmmichi oka o̱ fimmi tuk ʋt i̱ nafohka ya̱ achifa he, micha ile filʋmmichi oka ya̱ potoli tuk ʋt liteha na ont opia hi ʋt hʋchi̱ nan ʋlhpisa bilia hi oke.

²² Micha nana ho̱ hatak liteha kʋt potolikma liteha hi oke, micha shilombish ʋt potolikmʋt liteha na ont opia hi oke.