Numbas 18 - Chahta Holisso Holitopa 1886

¹ Mihma Chihowah yʋt Alon a̱, Chishno micha chiso ʋhleha, micha in chuka achʋfa chi apeha kʋt ʋlhtipo holitopa nan ai ashʋchi ʋt hʋchi onʋtoyula chi̱ hoke; micha chishno micha chiso ʋhleha aiena kʋt naholitompa isht hʋsh ai ʋtta ya̱ ai ashʋchi kʋt hʋchi onʋtoyula chi̱ hoke.

² Micha chitibapishi ʋhleha apehlichi ai achʋfa chi̱ki apehlichi yak kia chi apehʋchit isht ish lashke, mikma chibafoyuka cha nan isht chim ahantashke; amba chishno micha chiso ʋhleha aienʋt chi apeha hokʋto nan isht atokowa tabenakel itikba ak o̱ nan isht hʋsh ai aha̱shwa chi̱ hoke.

³ Mikma nan isht ish ahanta ya̱ ieshi cha, tabenakel ai atoni moma ka̱ ieshashke; peh nan aiʋlhto holitopa aiasha micha alta bili̱ka aiena ka̱ iklo kashke. Yohmi hosh yʋmma micha hʋchishno aiena kʋt ik hʋch illo kashke.

⁴ Micha okla chibafoyukashke, micha okla moma in tabenakel ai atoni; tabenakel nan ai isht ahanta puta ka̱ ieshashke, mikma okla inla yokʋt hʋchi̱ bili̱ka ona he keyu hoke.

⁵ Mikma ʋlhtipo holitopa ai atoni, micha alta ai atoni aiena ka̱ hʋsh iesha chi̱ hoke; yʋmohmi ho̱ himakma ai i̱ nukkilli ʋt Islael im ʋlla ʋhleha ha̱ ik onʋtoyulo kashke.

⁶ Mikma ʋno, yakeh! ʋno ʋt hʋchitibapishi Lefait ʋhleha, Islael im ʋlla ʋhleha ha̱ i̱ filʋmmichit ishi li tuk oke; Chihowah immi hosh okla moma in tabenakel nan isht ai ahanta chi̱ ho̱ na hʋlbina yo̱ chohmit hʋchima lishke.

⁷ Yʋmohmi hoka chishno micha chiso ʋhleha hʋsh ai itapeha hokʋto, alta isht ahala̱ya nana puta, micha im ompoholmo anu̱kaka aiena isht hʋsh ai ahanta chi̱ hosh naholitompa isht ai ʋtta ya̱ hʋsh ieshashke, naholitompa isht hʋsh ai ʋtta ya̱ na hʋlbina nan isht ʋtta yo̱ hʋchima li hatuk oke: Yohmi ka̱ okla inla yosh bili̱ka onakmʋt illi pulla hi oke, achi tok.

⁸ Mihma Chihowah yʋt Alon a̱ im anumpulit, Yakeh! Islael im ʋlla ʋhleha i̱ nahullochi puta, i̱ walit im issa puta atoni ya̱ chima lishke: bila ahamʋt chi ʋlhtoka yatuk mak o̱ chima lishke, micha nan ʋlhpisa kʋllo bilia mak o̱ chiso ʋhleha ima lishke.

⁹ Naholitompa i̱ shahli luak a̱ ilatomba tuk ilʋppak osh chimmi ha chi̱ hoke, im isht aiokpʋchi puta, ilhpak im issa puta, micha nan ashʋchi im issa puta, micha yoshoba im issa puta, yʋmma ʋm ihi̱ssa tuk puta kʋt chishno micha chiso ʋhleha aiena kʋt hʋchi̱ holitopa moma i̱ shahli ya chi̱ hoke.

¹⁰ Aholitopa i̱ shahli ak o̱ hʋsh ai ʋpa chi̱ hoke, nakni puta kak osh ʋpa chi̱ hoke, hʋchi̱ holitopa ya chi̱ hoke.

¹¹ Micha ilʋppak osh chimmi ha chi̱ hoke, Islael im ʋlla ʋhleha na hʋlbina i̱ walit im issa, micha i̱ fahfolit im issa moma aiena ak oke; nana ʋlhpisa bilia yo̱ chishno, micha chiso ʋhleha, micha chiso tek ʋhleha chibafoka aiena ka̱ chima lishke; chin chuka ya̱ kashofa aiasha puta kʋt ʋpa chi̱ hoke.

¹² Micha bila achukma i̱ shahli moma, micha oka pa̱ki achukma i̱ shahli moma, micha onush aiena nawaya ʋmmona, Chihowah im issa tuk a̱ yʋmma puta chima lishke.

¹³ Micha yakni ya̱ nana hosh ti̱kba waya na Chihowah ya̱ isht im onakma, chimmi ha chi̱ hoke, kashofa hosh chin chuka ahanta moma kʋt ai ʋpa chi̱ hoke.

¹⁴ Nana puta kʋt Islael a̱ ahullochi kʋt chimmi ha chi̱ hoke.

¹⁵ Nana moma nipi puta ai achʋfa hosh ushʋto ya̱ tiwi na Chihowah ya̱ isht im ʋla puta, hatak okmá, nana ʋlhpoba yokmá nana kia chimmi ha chi̱ hoke: Yohmi kia hatak osh ʋtta ʋmmona yokʋno falʋmminchit ish chumpa pulla chi̱ hoke; micha nan ʋlhpoa ik kashofo ʋtta ʋmmona aiena kʋno falʋmminchit ish chumpa hi oke.

¹⁶ Falʋmminchit chumpa chi̱ hokʋto hʋshi achʋfa ʋhli kak o̱ ish apesa mak o̱, tʋli holisso shekel tahlapi, ʋlhtipo holitopa shekel iakaiya hosh, yʋmmʋt kelah pokoli tuklo hoka, falʋmminchit ish chumpa hi oke.

¹⁷ Amba wak chelahpi, keyukmʋt chukfi chelahpi keyukmʋt issi kosoma chelahpi aiena hokʋno, falʋmminchit ish chumpa he keyu hoke, holitopa hoka, im issish a̱ alta ya̱ ish o̱ fimmi cha, Chihowah i̱ balama ya chi̱ ho̱, luak ishit hukmit im issa yo̱ i̱ nia ya̱ luak isht ish hukmashke.

¹⁸ Micha ikkishi fahfuli, micha fulup isht impakimma yʋt chimmi ka̱ yʋmmak inli chohmit i̱ nipi ʋt chimmi ha chi̱ hoke.

¹⁹ Pit i̱ walit im issa holitopa Islael im ʋlla ʋhleha hʋt Chihowah ya̱ im issa tuk moma ka̱ chishno, micha chiso ʋhleha, micha chiso tek ʋhleha chibafoka aiena ka̱, nan ʋlhpisa bilia yo̱ chima lishke; Chihowah itikba hʋpi nan itim apesa kʋt chishno, micha chim isht atiaka aiena bilia ya chi̱ hoke, achi tok.

²⁰ Micha Chihowah yʋt Alon a̱ im anumpulit, Chishno ʋto i̱ yakni ya̱ ish isha he keyu hoke, micha ibata̱klʋt chi̱ kashapa ish isha he keyu hoke; ʋno ak osh Islael im ʋlla ʋhleha ai itin takla ya̱ chi̱ kashapa, chimmi sia hoke.

²¹ Micha yakeh! Lefai im ʋlla ʋhleha hʋt nan isht ai ahanta isht aha̱shwa tuk okla moma i̱ tabenakel isht ai ahanta tuk ʋt ai isha he ʋlhpesa yʋt Islael a̱ ishit pokoli moma kak o̱ ima li hoke.

²² Micha himak a pilla hoka Islael im ʋlla ʋhleha hʋt okla moma in tabenakel a̱ bili̱ka ʋla he keyu, yohmit nan ashʋchi shaiyali cha illi yoba nah.

²³ Amba Lefait ʋhleha ak osh okla moma in tabenakel a̱ nan ai isht ahanta chi̱ hoke: micha yʋmmak osh ilap nan ashʋchi ya̱ shaiyala chi̱ hoke, chim isht atiaka hlopulli puta ka̱ Islael im ʋlla ʋhleha ai itin takla ka̱ ai isha he ʋlhpesa yʋt ik im iksho nan ʋlhpisa bilia ya chi̱ hoke.

²⁴ Amba Islael im ʋlla ʋhleha nan im isht i̱ pokoli, yʋmma i̱ walit im issa yo̱ Chihowah im ihi̱sa yak o̱, ai isha he ʋlhpesa mak o̱ Lefait ʋhleha ima li hoke. Yohmi kak o̱ Islael im ʋlla ʋhleha ai itin takla ya̱ ai isha he ʋlhpesa yʋt ik im iksho ka chi̱ hoke, im achi li tuk oke, achi tok.

²⁵ Micha Chihowah yʋt Moses a̱ im anumpulit,

²⁶ Yakohmichit Lefait ʋhleha ha̱ im anumpulit, Hʋsh ai isha he ʋlhpesa yo̱ hʋch ima li tuk a̱ Islael im ʋlla ʋhleha ha̱ ishit pokoli ya̱ hʋsh im ai ishikmʋt ishit pokoli kash ishit pokoli ka̱ walit im issa yo̱ Chihowah ya̱ hʋsh im issashke.

²⁷ Mikma i̱ walit ish im issa ilʋppak okʋt a nihechi i̱ patʋlhpo onush a̱sha tuk, micha pa̱ki a̱ okbushli alota atuk chim itilaua hi oke.

²⁸ Hʋchishno ak kia yakohmichit Islael im ʋlla ʋhleha hʋsh im ai ishi tuk, ishit hʋchi̱ pokoli moma kʋt walit im issa yo̱ Chihowah hʋsh im issashke, micha walit Chihowah im issa yash, naholitompa isht ʋtta Alon a̱ hʋsh ima hi oke.

²⁹ Na hʋchi̱ hʋlbina moma ka̱ akohchit walit Chihowah im issa achukma i̱ shahli moma hullochi kashapa ka̱ akohchit hʋsh im issashke.

³⁰ Yʋmohmi hoka achukma i̱ shahli ka̱ akohchit hʋsh walikma, yohmikma yʋmmʋt anihechi patʋlhpo onush awaya a̱sha tuk, micha pa̱ki ai okbushli awaya tuk ak inli, Lefait ʋhleha im itilaua hi oke.

³¹ Mikma kanima moma ka̱ hʋchishno micha hʋchin chuka achʋfa hʋsh aiena kʋt hʋsh ai ʋpa hi oke; okla moma in tabenakel nana isht hʋsh ai aha̱shwa tuk hʋchim ʋlhtoba mak oke.

³² Micha achukma i̱ shahli ka̱ ai ishit hʋsh walikma, yʋmmak atuk mak o̱, nan ashʋchi ya̱ hʋsh shaiyala he keyu hoke; micha Islael im ʋlla ʋhleha i̱ naholitompa puta ka̱ hʋsh litehla he keyu hoke, hʋsh yohmi cha hʋch illi nah, ish im achashke, im achi tok.