Numbas 17 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha ha̱ ish im anumpuli cha, i̱ki ʋhleha in chuka achʋfa ʋlhpisa ho̱ tʋbi achʋfa bieka ho̱ im ai ishit, i̱ki ʋhleha in chuka achʋfa ʋlhpi̱sa ho̱ holitopa puta ka̱ tʋbi auahtuklo ho̱ ish ishashke, micha hatak hohchifo aiyukali ka̱ in tʋbi ya̱ ish atakalichashke.

³ Micha Alon hohchifo ha̱ Lefai in tʋbi ak o̱ ish a takalichashke; i̱ki ʋhleha in chuka achʋfa i̱ noshkoboka yʋt tʋbi im achʋfʋt ia chi̱ hoke.

⁴ Micha okla moma in tabenakel anu̱kaka a chi afama la chi̱, isht atokowa itikba ak o̱ ish ashachashke.

⁵ Atukma yakohma hi oke, hatak mihi yo̱ atokoli la chi̱ in tʋbi ʋt pakanla chi̱ hoke; micha Islael im ʋlla ʋhleha hʋt namihachit anumpuli ishit hʋchi̱ sanalit na mihachi ka̱ issʋchi li̱ a̱ kʋnia chi̱ hoke, achi tok.

⁶ Mihma Moses ʋt Islael im ʋlla ʋhleha ha̱ im anumpuli ma, i holitopa ʋhleha puta kʋt tʋbi achʋfa bieka ho̱ ima tok, holitopa achʋfa kʋt achʋfa bano tok, i̱ki ʋhleha chuka achʋfa ʋlhpi̱sa hosh tʋbi auahtuklo tok, mihma Alon in tʋbi ʋt in tʋbi puta ka̱ ibafoyuka tok.

⁷ Mihma Moses ʋt tʋbi puta kash Chihowah itikba nan isht atokowa tabenakel ak o̱ ashachi tok.

⁸ Atuk o̱ onna ma yakohmi tok, Moses ʋt nan isht atokowa tabenakel a̱ ont chukowa tok; mihma yakeh! Lefai in chuka achʋfa ya̱ Alon in tʋbi ak osh bokobli tuk atok, micha bokoblit kohcha mʋt pakanli cha almont o̱ waya tok.

⁹ Mihma Moses ʋt tʋbi puta Chihowah itikba aiasha tuk ishit kohchʋt Islael im ʋlla ʋhleha ha̱ isht im ona tok: mihma okla pisa cha hatak puta kʋt in tʋbi aiyukali ka̱ ishi tok.

¹⁰ Mihma Chihowah yʋt Moses a̱ I̱ filʋmmit i̱ sanali ʋhleha isht atokowa yosh itoyula chi̱ ho̱ Alon in tʋbi ya̱ anonti isht ish la cha nan isht atokowa itikba ya̱ ish bohlashke; micha na mihachit anumpuli ya̱ a̱ kanʋllechit isht ish kanchashke, mihma ik illo kashke, im achi tok.

¹¹ Mihma Moses ʋt yʋmihchi tok, Chihowah yʋt im achi tuk mak o̱, yʋmihchi tok.

¹² Mihma Islael im ʋlla ʋhleha hʋt Moses a̱ yakeh! pillishke, ilbʋshʋt pillishke, moma ilbʋshʋt pillishke,

¹³ Kʋna hosh Chihowah in tabenakel a̱ bili̱ka kanima onakmʋt illa chi̱ hoke; illit ont pi taha chi̱ cho? im achi tok.