Numbas 16 - Chahta Holisso Holitopa 1886

¹ Mihma Kolah, yʋmmʋt Isha ushi, yʋmmʋt Kohalh ushi, yʋmmʋt Lefai ushi atok, micha Eliab ushi, ʋhleha Tahlan micha Abilam, micha Pelelh ushi On, Leuben ushi ʋhleha hʋt hatak kaniohmi ka̱ ishi tok.

² Micha Islael im ʋlla ʋhleha aiachʋfa yʋmmʋt okla moma itʋnahʋt chieya ka̱ i̱ holitopa, hatak ithana tahlepa tuklo cha pokoli tahlapi hatak holitopʋt annoa ai itapeha hosh, Moses itikba ya̱ wakayʋt hielit

³ Moses micha Alon a̱ i̱ sanalit iti hoyot itʋnaha cha, Atablit hʋsh il onochishke, okla moma kʋt holitopa hoka, moma kʋt, mikmʋt Chihowah yʋt ibafo̱ka hoka. Yohmi ka̱ nanta katihmi ho̱ Chihowah im okla ha̱ i̱ shahlechit hʋsh ile hilechi cho? achi tok.

⁴ Atuk o̱ Moses ʋt haklo mʋt nashuka ishit aka hlipia tok.

⁵ Micha Kolah micha im apeha tuk moma ka̱ im anumpulit, Onnaha fehnak mak o̱ kʋna hosh immi hokma micha kʋna hosh holitopa hokma Chihowah yʋt otʋnincha chi̱ hoke; micha ilap a bili̱ka isht ona chi̱ hoke; ilapʋt atokoli tuk pulla kak osh bili̱ka isht ona chi̱ hoke.

⁶ Ilʋppak o̱ hʋsh yʋmihchashke. Kolah micha hʋsh ai itapeha moma kʋt, na balama a hukmi hʋsh ishashke.

⁷ Micha onnaha ma Chihowah itikba ya̱ luak hʋsh fohki cha na balama hʋsh fohkashke; atukma yakohma chi̱ hoke, Chihowah yʋt hatak nana ho̱ atokolikma, yʋmmak osh holitopa chi̱ hoke. Lefai ushi ʋhleha hʋchia hʋt, atablit hʋsh ilonochishke, achi tok.

⁸ Mihma Moses ʋt Kolah ya̱ Lefai ushi ʋhleha ma! hʋsh haklashke, hʋchim asillha lishke.

⁹ Islael in Chitokaka yʋt Islael okla moma ka hʋchi i̱ filʋmminchit Chihowah i̱ binah nan isht hʋsh ai ahanta chi̱ ho̱, micha okla moma nan isht hʋsh im ahanta chi̱ hosh itikba hʋsh hiela chi̱ ho̱ ilap i̱ bili̱ka hʋch isht ona tuk a̱ nan isht ik hʋchim ahobo cho?

¹⁰ Micha chishno, micha Lefai ushi ʋhleha, chitibapishi ʋhleha moma aiena ka̱ bili̱ka hʋchi hʋchisht ona tuk oke, micha naholitompa isht ai ʋtta aiena hʋchi bʋnna cho?

¹¹ Yʋmma pulla kak osh chishno micha ish ai itʋpeha aiena kʋt Chihowah ya̱ i̱ sanalit iti hoyʋt hʋsh itʋnahʋshke; micha Alon ak osh kʋta hatuk o̱ yʋmma i̱ sanalit namihachit hʋsh anumpuli cho? im achi tok.

¹² Micha Moses ʋt Eliab ushi tuklo Tahlan micha Abilam a̱ pit hoyot anumpa i̱ pila tuk o̱ yʋmmak ash osh, Il ona he keyu, achi tok.

¹³ Micha yakni pishukchi micha foibila aiena a yanahanli ya̱ a pehlichit ish pi kohchi kʋt, yakni haiaka ai ʋbit ish pi tahla chin tuk ʋt nana iskitini ho̱ amba pi̱ shahli, pi̱ mi̱ko ish il ikbi cho?

¹⁴ Micha pishukchi, micha foi bila ayanahanli yakni isht chik pimoshke, micha osapa micha pa̱kʋpi ahollokchi ibai asha he a̱ chik pimo ki̱shʋshke; hatak ilʋppa puta nishkin a̱ ish kocha wehla hinla cho̱? il ona he keyu hoke, achi tok.

¹⁵ Mihma Moses ʋt nukowa fehna cha, Chihowah ma! nana chim ihi̱sa ka̱ chik aiokpacho kashke: issuba nashoba achʋfa kia im ishi li tuk keyu hoke, micha achʋfa kia okpʋni li tuk keyu hoko, achi tok.

¹⁶ Micha Moses ʋt Kolah ya̱, Chishno micha ish aiitʋpeha aiena kʋt Chihowah itikba, chishno micha yʋmma, micha Alon aienʋt onnakma hʋsh onashke.

¹⁷ Micha hatak hʋsh moma kʋt na balama im aiʋlhto aiyukali ka̱ na balama fohkit hatak moma kʋt na balama im ai ʋlhto aiyukali na balama ai ʋlhto aiyukali na balama ai ʋlhto tahlepa tuklo cha pokoli tahlapi ho̱ ieshit Chihowah itikba isht hʋsh onashke, Chishno micha Alon hʋsh aiena na balama ai ʋlhto hʋsh ieshi biekashke, im achi tok,

¹⁸ Mihma hatak puta kʋt na balama im aiʋlhto luak fohki cha na balama onochit ieshi cha Moses micha Alon a̱ apehʋt okla moma i̱ tabenakel okhissa ya̱ hieli tok.

¹⁹ Mihma Kolah ʋt okla moma ka̱ im itʋnahlit okla moma i̱ tabenakel okhissa ya̱ isht ona tok, mihma Chihowah im aholitopa yʋt okla moma ka̱ i̱ haiaka tok.

²⁰ Mihma Chihowah yʋt Moses micha Alon a̱ im anumpulit,

²¹ Okla ilʋppa hʋsh il i̱ filʋmmichashke, Yohmikma yakosi itin takla ʋbit lushummi lashke, achi tok.

²² Mihma nashuka ishit hlipkaiyachi cha Chitokaka ma! Nipi moma imi shilombish in Chitokaka ma! hatak achʋfa hosh yoshoba na okla moma ka̱ ish i̱ nukkilla chi̱ cho? achi tok.

²³ Mihma Chihowah, yʋt Moses a̱ im anumpulit,

²⁴ Okla moma ka̱ im anumpulit, Kolah. Tahlan micha Abilam i̱ binah apakfoyupa ka̱ issʋt hʋsh wakayashke, ish im achashke, im achi tok.

²⁵ Mihma Moses ʋt wakaya cha Tahlan micha Abilam a̱ im ona tok, mihma Islael im asʋnonchi ʋhleha hʋt iakaiya tok,

²⁶ Micha okla moma ka̱ im anumpulit, Hatak haksi puta ilʋppa i̱ binah ha̱ issʋt hʋsh iashke, hʋchim asilhha lishke; micha nana immi puta ka̱ hʋsh potoli na, keyu hosh nan ashʋchi moma ka̱ ta̱kla illit hʋchi taiyaha nah, achi tok.

²⁷ Yʋmohmi ma, Kolah, Tahlan micha Abilam i̱ binah apakfoyupʋt fullota tuk ʋt wakayʋt i̱ filʋmmi tok, mihma Tahlan micha Abilam ʋt tekchi ʋhleha, micha ushi ʋhleha, micha im ʋlla chipunta ʋhleha aiena kʋt kohchʋt i̱ binah okhissa ya̱ ont hieli tok.

²⁸ Mihma Moses ʋt, Ilʋppak o̱ na toksʋli ilʋppa puta yʋmihchi la chi̱ ho̱ Chihowah yʋt sa tohno tuk a̱, ishit hʋsh ithaiyana chi̱ hoke; ʋno ak inli ʋm anukfila hosh yʋmihchi li tuk keyu hoka.

²⁹ Hatak ilʋppa puta kʋt hatak moma illi chatuk mak o̱ illikma, keyukmʋt hatak moma im akaniohmi chatuk mak o̱ i̱ yʋmohmikma, yohmikma Chihowah yʋt sa tohno tuk keyu ka chi̱ hoke.

³⁰ Amba Chihowah hʋt nana himona ho̱ ikbi na, yakni yash osh itakpashali cha, yʋmma micha nana im aiasha moma ka̱ ishit nanʋbli na, okcha̱ya hosh illi aiasha ka̱ pit tamoakma, hatak ilʋppa puta kʋt Chihowah ya̱ nukowʋchi tuk a̱ hʋsh ithaiyana chi hoke.

³¹ Atuk o̱ yakohmi tok, anumpa ilʋppa moma anumpuli kʋt ont tahli ma, yakni ʋt nutaka fehna ita pʋhlata tok.

³² Micha yakni ʋt itakpashali cha yʋmma micha in chuka puta micha hatak moma Kolah apeha tuk, micha im ila̱yak moma ka̱ ishit nanʋbli tok.

³³ Yʋmma micha nana im aiasha tuk moma kʋt okcha̱ya moma hosh illi aiasha ka̱ pit tʋmoa na, yakni ʋt itafamʋt ompohomo tok, mihma okla moma ka̱ i̱ filʋmmit illit taha tok.

³⁴ Mihma Islael moma apakfoyupʋt aiasha tuk ʋt yʋmmʋt yaiya kak o̱ yihlepa tok. Pishno ak kia yakni ʋt ishit pi nanʋbli mak, achi hatuk okʋt.

³⁵ Mihma luak ʋt Chihowah ya̱ akohchʋt minti cha hatak tahlepa tuklo cha pokoli tahlapi, na balama im issa kash o̱ hukmit tahli tok.

³⁶ Mihma Chihowah yʋt Moses a̱ im auumpulit,

³⁷ Naholitompa isht ʋtta Alon ushi Eleasa ya̱ ish im anumpuli na, na balama ai ʋlhto puta ka̱ alua ya̱ akohchashke, micha luak a̱ yʋmma pit ish fimmashke, hullochi tuk oka.

³⁸ Ilap imi shilombish akinli i̱ yoshoba ʋhleha ilʋppa na balama im aiʋlhto ya̱ alta ompoholmo ya chi̱ ho̱ patʋssʋlit okla pʋthʋchashke; Chihowah itikba ai im issa tuk oka, hullochi hatuk oke, mihma Islael im ʋlla ʋhleha ha̱ nan isht atokowa ya chi̱ hoke, ish im achashke, im achi tok.

³⁹ Yʋmohmi ma naholitompa ishit ʋtta Eleasa yʋt asonak lakna na balama ai ʋlhto luʋt taha tuk ʋt ai im issa kash ishi tok, mihma patʋssa pʋtha alta ompoholmo toba tok.

⁴⁰ Okla inla Alon isht atiaka keyu kʋt bili̱ka onʋt Chihowah itikba na balama ik im isso pulla hosh Kolah micha ai itʋpeha yatuk a̱ ik chohmo ka hi ʋt Chihowah ʋt Moses a̱ tohnot im achi tuk mak o̱ isht ithaiyana bilia hi atok.

⁴¹ Yohmi tuk kia onna ma Islael im ʋlla ʋhleha moma kʋt Moses a̱ i̱ sanalit micha Alon a̱ i̱ sanalit na mihachit Chihowah im okla ha̱ ʋbit hʋsh tahlishke, achi tok.

⁴² Atuk o̱ yakohmi tok, okla moma kʋt itʋnahʋt Moses a̱ i̱ sanalit micha Alon a̱ i̱ sanali mʋt okla moma in tabenakel a̱ pit hopo̱koyo tok mihma Yakeh! hoshonti hʋt ompohomo tok, micha Chihowah im aholitopa yʋt haiaka tok.

⁴³ Mihma Moses micha Alon ʋt okla moma in tabenakel a̱ itikba ona tok.

⁴⁴ Mihma Chihowah yʋt Moses a̱ im anumpulit,

⁴⁵ Okla moma ilʋppa wakayʋt ish i̱ filʋmmashke mikma yakosi iti takla chohmi ho̱ ʋbit lushummi lashke, achi tok. Mihma nashuka ya̱ aka ishit hlipkaiyachi tok,

⁴⁶ Mihma Moses ʋt Alon a̱ nabalama ai ʋlhto ishi cha alta ya̱ luak ai ishit fohkit nabalama onochi cha tu̱shpʋt iʋt okla moma ya̱ im onʋt ish i̱ kashoffashke; im ai i̱ nukkilli ʋt Chihowah ya̱ a kohchʋt ia hoka, ililli okpulo ʋt isht iʋshke, im achi tok.

⁴⁷ Mihma Moses ʋt im apesa tuk mak o̱, Alon ʋt ishi cha malelit okla moma yash iklʋnna ona tok; mihma yakeh! ililli okpulo ʋt okla ai iti takla ya̱ ai ishit wakaya tuk atok; mihma nabalama onochi cha okla ha̱ i̱ kashoffi tok.

⁴⁸ Micha illi micha okcha̱ya aiena iti takla ya̱ hikia tok, mihma ililli okpulo ʋt yokopa tok.

⁴⁹ Yohmi ka̱ Kolah nan im akaniohmi isht illi tuk ʋto a̱sha na, ililli okpulo isht illi kʋt tahlepa sipokni auahushta cha tahlepa untuklo hosh illi tok.

⁵⁰ Mihma Alon ʋt falamʋt Moses a̱ im onʋt okla moma in tabenakel a̱ ona tok: mihma ililli okpulo ʋt yokopa tok.