Numbas 15 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha ha̱ im anumpulit, Hʋsh aiasha chi̱ yakni hʋch ima li tok a̱ hʋsh onakmʋt,

³ Micha il onochi tok osh yʋmihchi hosh hukmit im issa, keyukmʋt ʋbit im issa, keyukmʋt ilap ahnit nan im issa, keyʋkmʋt ʋlhpoa hochito, keyukmʋt ʋlhpoa chipunta ai ishit Chihowah ya̱ na balama im ikbit impʋchi holitopa isht asha hosh luak ishit hukmit Chihowah ya̱ im issakmʋt:

⁴ Yohmi hosh Chihowah nan im issa im issakma ilhpak im issa bota tohbi kʋshkoa ishit pokoli, bila hin kʋshkoa ai ushta itaiyoma ho̱ isht ʋlashke.

⁵ Micha oka pa̱ki hin kʋshkoa ai ushta chukfʋlhpoa ushi achʋfa ho̱ hukmit im issa, keyukmʋt ʋbit im issa hokmá aienint ish atahlashke.

⁶ Keyukmʋt chukfi nakni yokma ilhpak im issa yo̱ bota tohbi kʋshkoa ishit pokoli tuklo ho̱ bila yʋt hin kʋshkoa atuchina itaiyoma ho̱ ish atahlashke.

⁷ Micha nan ishko im issa ya̱ Chihowah nan i̱ balama yo̱ oka pa̱ki hin kʋshkoa isht atuchina ho̱ ish im issashke.

⁸ Micha anumpa il onochi tuk osh yʋmihchi hosh hukmit im issa, keyukmʋt ʋbit isht aiokpʋchi, keyukmʋt itin nanaiyʋchit im issa yo̱ wak hobʋk im atahlikmʋt,

⁹ Yohmit wak hobʋk isht ʋlakmʋt ilhpak im issa bota tohbi kʋshkoa ishit pokoli tuchina, bila hin iklʋnna itaiyoma ho̱ isht ʋlashke.

¹⁰ Micha nan ishko im issa Chihowah i̱ balama yo̱ luak ishit hukmit im issa ya̱ oka pa̱ki hin iklʋnna ho̱ i̱sht ishlashke.

¹¹ Yakohmichi hosh wak hobʋk achʋfakma, keyukmʋt chukfi nakni achʋfakma, keyukmʋt chukfʋlhpoa ushi achʋfakma, keyukmʋt issi kosoma ushi achʋfakma hʋsh yʋmihchashke.

¹² Holhtina kaniohmi ho̱ hʋsh atahli tuk mʋt, holhtina hatuk mak o̱ yohmi bieka ho̱ hʋsh yʋmihcha chi̱ hoke.

¹³ Yakni ya̱ aiʋtta tuk moma kʋt nan im issa ya̱ Chihowah i̱ balama luak ishit hʋkmit im issakmʋt ilʋppa puta kak o̱ chohmichit iakaiya hosh yʋmihcha hi oke.

¹⁴ Micha okla inla yosh hʋchi takla ahanta hosh, keyukmʋt hʋch isht atiaka puta ka̱ kʋna hosh ahanta cha nan im issa ya̱ Chihowah i̱ balama luak ishit hukmit im issakmʋt, hʋsh yʋmihchi kak o̱ yʋmmak kia yʋmihcha hi oke.

¹⁵ Okla hʋchia, micha okla inla hʋchi takla ahanta hʋsh aiena kʋt hʋchi̱ nan ʋlhpisa achʋfa yosh hʋch isht atiaka puta ka̱ nan ʋlhpisa bilia ya chi̱ hoke; hʋsh kaniohmi ka̱ okla inla ak kia Chihowah itikba ya̱ yʋmohma he ak inli hoke.

¹⁶ Hʋchishno micha okla inla hʋchi takla ahanta aiena kʋt nan ʋlhpisa achʋfa, micha nana akaniohmi hʋchim achʋfa hi oke, achi tok.

¹⁷ Mihma Chihowah yʋt Moses a̱ im anumpulit,

¹⁸ Islael im ʋlla ʋhleha ha̱ im anumpulit, Yakni hʋch isht ona la chi̱ yʋmma hʋsh onakmʋt,

¹⁹ Yohmikmʋt yakohma hi oke, yakni yash pʋska ya̱ hʋshpakmʋt i̱ walit im issa ya̱ Chihowah hʋsh im issa hi oke.

²⁰ I̱ walit im issa ya̱ onush bota yʋmmʋska ʋmmona pʋska lumbo hʋsh im issa hi oke: a nihechi ya̱ ai i̱ walit hʋsh im issa chatuk ʋt yʋmihchi hosh hʋsh i̱ wala hi oke.

²¹ Hʋch isht atiaka puta ka̱ onush bota yʋmmʋska ʋmmona ya̱ i̱ walit im issa yo̱ Chihowah hʋsh im issa hi oke.

²² Atuk o̱ hʋsh ashʋchi, micha nan ʋlhpisa ilʋppa puta ka̱ Chihowah yʋt Moses a̱ tohnot anumpuli tuk isht hʋchik ahanto tok mʋt,

²³ Chihowah yʋt Moses a̱ im apesa tok nitak ʋttʋt hʋchim isht atiaka ai itin takla himaka pilla maha̱ya ka̱ Chihowah yʋt Moses a̱ tohnot apihi̱sa tok fehna ka̱ ik yʋmohmo tuk mʋt,

²⁴ Yʋmohmikmʋt yakohmashke, okla moma kʋt ik ithano nan ik ithano hosh nana kia yʋmihchikma, okla moma kʋt wak hobʋk himita achʋfa ho̱ hukmit im issa Chihowah i̱ balama, micha ilhpak im issa, micha nan ishko im issa, ai yʋmihchi mak o̱, micha nan ashʋchi im issa yo̱ issi kosoma ushi achʋfa aiena ho̱ im issashke.

²⁵ Mikma naholitompa isht ʋtta yʋt Islael im ʋlla ʋhleha okla moma ka̱ isht i̱ kashoffi na i̱ kashofa hi oke; nana ik ithano yoka: mikma nan im issa ʋbit im issʋt luak ishit hukmi ya̱ Chihowah isht ima hi oke, micha nana ik ithano tuk ʋt nan ashʋchi im issa ya̱ Chihowah itikba isht ona hi oke,

²⁶ Mikma Islael im ʋlla ʋhleha okla moma, micha okla inla apehʋt aiasha tuk aiena kʋt i̱ kashofa hi oke, okla moma kʋt nana ik ithano hatuk oka.

²⁷ Atuk o̱ hatak nana hosh ik ithano hosh yoshobakmʋt nan ashʋchi im issa yo̱ issi kosoma tek afʋmmi ʋmmona isht onashke.

²⁸ Mikma naholitompa isht ʋtta yʋt hatak nan ik ithano hosh ashʋchi kash nan ik ithano hosh Chihowah itikba ai ashʋchi a̱ i̱ kashoffashke, mikma i̱ kashofa hi oke.

²⁹ Nan ik ithano hosh ashʋchi ka̱ Islael im ʋlla ʋhleha takla ai ʋtta tuk, micha okla inla yosh takla ahanta tuk aiena nan ʋlhpisa hʋchim achʋfashke.

³⁰ Amba hatak nana hosh, peh ilapunla hosh nana akaniohmikmʋt, yakni yash inli ai ʋtta tuk okma keyukmʋt okla inla yokmá nana kia, yʋmmak okʋt Chihowah ishit yopoma hoke: mikmʋt hatak yʋmmʋt im okla ai iti takla ya̱ fiopa tʋpa hi oke.

³¹ Chihowah im anumpa ha̱ shitilema cha im anumpa ʋlhpisa ha̱ kobʋffi hokʋt, hatak yʋmma im ilhfiopak ʋt tʋpʋt ʋmohma chi̱ hoke; nan ashʋchi ʋt ilap ak inli ho̱ onʋtoyula chi̱ hoke, achi tok.

³² Atuk o̱ Islael im ʋlla ʋhleha hʋt yakni haiaka a̱sha moma mʋt, hatak ʋt nitak hullo nitak o̱ iti tʋptua aiowa hosh anta na pisa tok.

³³ Micha iti tʋptua aiowa hosh anta na pisa tok ʋt Moses micha Alon micha okla moma aiena ka̱ isht im ona tok.

³⁴ Mihma kaniohma he miha kʋt iksho hatuk o̱ ai atoni okla fohki tok.

³⁵ Mihma Chihowah yʋt Moses a̱, Hatak okʋt illi pullashke: binah kocha yo̱ okla moma kʋt tʋli isht a bolashke, im achi tok.

³⁶ Mihma Chihowah yʋt achi tuk mak o̱, okla moma kʋt binah ha̱ kocha isht ona cha tʋli ishit boli na illi tok.

³⁷ Mihma Chihowah yʋt Moses a̱ im anumpulit,

³⁸ Islael im ʋlla ʋhleha ha̱ ish im anumpuli na, im isht atiaka hlopulli ka̱ i̱ nafohka ai ʋhli ya̱ imposhota ya̱ i̱ fullolechashke; micha i̱ nafohka im poshota ya̱ sita lapushki okchamali lapalechashke,

³⁹ Mikma hʋchim poshota yosh hʋsh pihi̱sakmʋt Chihowah im anumpa moma ka̱ ithaiyanʋt hʋsh yʋmihcha chi̱ hoke; mikmʋt hʋchi chu̱kʋsh akinli, micha hʋchi nishkin akinli iakaiyʋt hauit hʋsh itʋnowa beka tuk ʋt hʋchik yʋmohmo kashke.

⁴⁰ Yʋmohmi ho̱ hʋsh ithaiyana cha ʋm anumpa ha̱ moma hʋsh yʋmihchi cha Chitokaka ya̱ hʋsh i̱ holitopashke.

⁴¹ Ʋno ak osh hʋchin Chihowah Chitokaka sia hosh hʋchin Chitokaka sia ha chi̱ hosh Echip yakni ya̱ a hʋchi pehlichit kohchi li tok oke, Chihowah hʋchin Chitokaka sia hoke, ish im achashke, achi tok.