Numbas 14 - Chahta Holisso Holitopa 1886

¹ Mihma okla moma kʋt chitolit yaiya tok; micha ninak yʋmma okla yaiya tok.

² Micha Islael im ʋlla ʋhleha moma kʋt Moses micha Alon ita tuklo ka̱ na mihachit anumpuli tok; micha okla moma kʋt, Chihowah yʋt ʋlhpesa ahni na Echip yakni ak inli ho̱ a pilli tok okbano; keyukmʋt Chihowah yʋt ʋlhpesa ahni na, yakni haiaka a pilli tuk okbano;

³ Nanta katiohmi ho̱ bʋshpo falaia ishit pi akakoha na, pi tekchi micha pim ʋlla aiena kʋt nawehpoa toba chi̱ ka̱, Chihowah yʋt pi pehlichit yakni ilʋppa pishit ʋla tuk oh cho? Echip yakni falamʋt il ona ka̱ achukma kʋt pim i̱ shahla hinla keyu cho? ahanchi tok.

⁴ Micha ilap bi̱ka itim achit, Pi̱ kʋpitʋni iloh ikbi cha, falamʋt Echip a̱ il onashke, itim achi tok.

⁵ Yohmi ma Moses micha Alon ita tuklo kʋt Islael im ʋlla ʋhleha okla moma itʋnahʋt aiasha tuk a̱ itikba ya̱, nashuka aka ishit hlipkaiyʋchi tok.

⁶ Mihma Nʋn ushi Choshua micha Chifʋnneh ushi Kaleb ita tuklo yʋmmʋt yakni yash ahopo̱koyo aiena tuk osh i̱ nafohka ya̱ hlilʋffi tok.

⁷ Micha Islael im ʋlla ʋhleha moma ka̱ im anumpulit, yakni yash yʋmma hopo̱koyʋt a̱ hlopulli tuk ʋt yakni achukma atampʋshke.

⁸ Chihowah yʋt pi ahninchi hokmʋt, yohmikmʋt yakni ilʋppa pisht ona cha pima chi̱ hoke; yakni pishukchi micha foi bila ayanahanli yoke.

⁹ Peh, Chihowah ya̱ i̱ yoshobʋt hʋchik i̱ filʋmmo kashke, micha okla yakni ai asha ka̱ hʋchik i̱ nukshopo kashke; yʋmmʋt pi̱ pʋska yoka; yʋmma ai atukko yʋt i̱ kʋnia hoke, mikma Chihowah yʋt piba foyuka hoke; hʋchik i̱ nukshopo kashke, im achi tok.

¹⁰ Yohmi kia okla moma kʋt tʋli ishit bola chi̱ ka̱ miha tok. Mihma Islael im ʋlla ʋhleha itikba ya̱ Chihowah im aholitopa yʋt okla moma i̱ binah holitopa ya̱ ahaiaka tok.

¹¹ Mihma Chihowah yʋt Moses a̱ katiohmi foka ho̱ okla ilʋppʋt sa nukowahancha chi̱ cho? micha katiohmi fokak mak o̱ nan isht atokowa puta im iti takla ai otʋnihinchi li kak o̱ a̱ yimma chi̱ cho?

¹² Ililli okpulo isht issot kanchi lish, ai isha he ʋlhpesa im ishi lashke, micha chishno ak o̱ oklushi chito micha kʋllo yʋmma i̱ shahli ka̱ chi ai ikbi lashke, achi tok.

¹³ Mihma Moses ʋt Chihowah ya̱, Yohmikma Echip okla hʋt hakla chi̱ hoke (nan isht chim ai a̱hli pulla hosh okla ilʋppa im ai iti takla ya̱ akohchit isht ishla tuk oka;)

¹⁴ Micha yakni ilʋppa okla aiasha ka̱ im anola chi̱ hoke: Chihowah chia hʋt okla ilʋppa ish iba foyuka ka̱ ha̱klo tuk, Chihowah ya̱ nashuka bi̱ka iti pi̱sa tuk, chi̱ hoshonti hʋt o̱ wakayʋt hikia tuk, nitak ma hoshonti toni̱k, atuk osh ninak ma luak toni̱k o̱ isht ish pehlichi ka̱ ha̱klo tok oka.

¹⁵ Himak a̱ okla ilʋppa moma ka̱ hatak achʋfa chiyuhmichit ʋbit ish tahlikma, oklushi puta chi annoa ka̱ haha̱klo tuk ʋt anumpulit,

¹⁶ Chihowah yʋt yakni ya̱ ima he mihʋt anumpa kʋllo il onochi tuk ʋt pehlichit ishit chukowa he tuk ʋt, nanihma he keyu hatuk osh, yakni haiaka ai ʋbit tahlishke, acha hi oke.

¹⁷ Yohmi ka̱ himak a chim asilhha lishke, ish anumpulit,

¹⁸ Chihowah yʋt nuktaiyala na hopaki, micha isht i̱ nukha̱klo ʋt chinto hosh, nan ashʋchi micha yoshoba ya̱ i̱ kashoffi, micha nan ashʋchi im a̱hli ya̱ hlakoffichi keyu, micha i̱ki ʋhleha nan ashʋchi tuk a̱ im ʋlla ʋhleha ai iti shali ont atuchina, micha ont ai ushta hoh kia, nana palʋmmi ish onocha he ish miha tok mak osh, an Chihowah nan isht im aia̱hli ʋt chitashke.

¹⁹ Nan isht ish i̱ nukha̱klo chito hatuk mak osh, micha okla ilʋppa ish i̱ kasho̱fi na Echip ashʋt mintit himak a̱ ant aiʋhli hatuk mak osh okla nan ashʋchi ya̱ ish i̱ kashoffashke, chim asilhha lishke, achi tok.

²⁰ Mihma Chihowah yʋt, chim anumpa hatuk mak o̱ i̱ kashoffi lishke.

²¹ Yohmi kia si okcha̱ya pulla ka̱ yakni moma kʋt Chihowah isht im aholitopa alotowa pulla chi̱ hoke.

²² Hatak yʋmma puta moma kʋt ʋm isht aholitopa, micha nana afehna puta Echip a̱ micha yakni haiaka ya̱ a yʋmihchi ka̱ pihi̱sa tuk osh ilʋppʋt ont ishit pokoli mak o̱, sasht imomaka pisa cha ʋm anumpa ha̱ ik haklo tuk okʋto,

²³ I̱ki ʋhleha anumpa kʋllo il onochit im issa li tok yakni ya̱ pisa he keyu; micha sa nukowʋchi tuk puta hokʋto pisa chi̱ keyu pulla hoke.

²⁴ Amba an tishu Kaleb yʋmmak okʋto shilombish inla ieshi cha siakaiya a̱hli tuk oka, yʋmmak okʋno yakni a̱ achukowʋt a̱ya tuk a̱ isht ona la hi oke; mihma im isht atiaka yʋt abinila hi oke,

²⁵ (Yohmi ka̱ Amalekait micha Kenanait ʋhleha aiena kʋt okfa ha̱ aiasha tok.) Onnaha ma fullolʋt yakni haiaka okhʋta humma pilla hak o̱ hʋsh iashke, achi tok.

²⁶ Mihma Chihowah yʋt Moses micha Alon a̱ im anumpulit,

²⁷ Katiohmi foka ho̱ okla ik achukmo ilʋppʋt a̱ sanalit namihachit anumpuli ka̱, peh ik ashah im ahni la chi̱ cho? Islael im ʋlla ʋhleha na miha anumpuli puta yʋmmʋt a̱ sanalit na miha ka̱ haklo lishke.

²⁸ Sa okcha̱ya pulla kʋt anumpulit sa haksobish a̱ hʋsh haklochi pulla mak o̱ hʋchi̱ yʋmihchi la chi̱ hoke, Chihowah yʋt achishke, hʋsh im achashke.

²⁹ Hʋchi haknip ʋt yakni haiaka ilʋppa akakoha chi̱ hoke; mikma a̱ sanalit na miha tuk, hʋchi holhtina tuk moma, afʋmmi pokoli tuklo ʋttʋt ʋba ma̱yʋt hʋchi holhtina tuk moma mak osh.

³⁰ Yakni yʋmma hʋchi ashachi la he, anumpa kʋllo il onochi li tok a̱ hʋsh chukowa chi̱ keyu pulla hoke, Chefʋnneh ushi Kaleb micha Nʋn ushi Choshua ak illa chi̱ hoke.

³¹ Amba hʋchim ʋlla ʋhleha na wehpoa ya chi̱, hʋsh achi tuk, yʋmmak okʋno ishit chukowa likma, yakni hʋsh shitilema tuk a̱ ithana chi̱ hoke.

³² Amba hʋchishno ak okʋto, hʋchi haknip illi ʋt yakni haiaka ilʋppa akakoha chi̱ hoke.

³³ Mikma hʋchim ʋlla ʋhleha hʋt afʋmmi pokoli ushta ho̱ yakni haiaka ya̱ ai itʋnowʋt hʋsh haui puta kʋt ʋt onʋtoyula na hʋchi haknip ʋt yakni haiaka ya̱ ataha chi̱ hoke.

³⁴ Nitak kaniohmi ho̱ yakni ya̱ hʋsh a hopo̱koyo tuk; yʋmmʋt nitak pokoli ushta tuk a̱ ʋlhpi̱sʋt (nitak achʋfa kʋt afʋmmi achʋfʋt ia hosh) afʋmmi pokoli ushta ho̱ na hʋsh ashʋchi ʋt hʋchi onʋtoyula chi̱ hoke; mikma nana im issa li tok ʋt kobʋffi li ka̱ hʋsh ithaiyana chi̱ hoke.

³⁵ Chihowah sia hʋt okla ik achukmo ilʋppʋt iti hoyot a̱ sanali tuk a̱ moma ka̱ i̱ yʋmihchi li pulla chi̱ hoke; yakni haiaka ilʋppak o̱ ataha chi̱ hoke, micha yʋmmak o̱ okla ai illa chi̱ hoke, achi li hatuk oke, im achi tok.

³⁶ Atuk o̱ yakni ya̱ ahopo̱koya chi̱ ho̱ Moses ʋt pila tuk hatak ʋhleha, yʋmmʋt falamʋt ʋla mʋt, yakni ya̱ kalakshi anumpa onochit isht ʋla cha okla moma ka̱ i̱ sanalechit na miha ka̱ anumpolechi tuk ʋt,

³⁷ Yakni ya̱ anumpa ik achukmo onochit isht ʋla tuk pulla kʋto Chihowah itikba ililli okpulo isht illit taha tok.

³⁸ Amba Nʋn ushi Choshua, micha Chefʋnneh ushi Kaleb yʋmmʋt yakni ya̱ ahopo̱koyʋt ia ka̱ ai achʋfa tuk ʋt okcha̱ya tok.

³⁹ Mihma anumpa ilʋppa puta ka̱ Moses ʋt Islael im ʋlla ʋhleha moma ka̱ im anoli tok; mihma okla moma kʋt yaiya fehna tok.

⁴⁰ Atuk osh onnahinli fehna moma ho̱ okla hʋt wakaya cha nʋnih oiyʋt paknaka ona mʋt, Yakeh, ilʋppa e hielishke, micha yakni Chihowah yʋt pim issa tok a̱ il ia chi̱ hoke, pi yoshoba tuk okʋt, achi tok.

⁴¹ Mihma Moses ʋt, Nanta katiohmi ho̱ himaka̱ Chihowah im anumpa hʋsh kobʋffi cho? yohmi kia nana kʋt im a̱hla he keyu hoke.

⁴² Hʋchik aiyo kashke, Chihowah yʋt hʋchiba fo̱ka keyu hoka; yohmi hosh hʋchin tʋnʋp itikba hʋch ik akakoho kashke.

⁴³ Amalekait micha Kenanait aiena kʋt hʋchi tikba yʋmma a̱sha hoka; mikma bʋshpo falaia ishit hʋsh akakoha chi̱ hoke; Chihowah ya̱ hʋsh i̱ filʋmmi hatuk oka, yohmi hoka Chihowah yʋt hʋchiba fo̱ka he keyu hoke, achi tok.

⁴⁴ Yohmi kia ilapunlʋt iʋt nʋnih paknaka ya̱ ona tok; yohmi kia Chihowah nan itim apesa afohka itombi holitopa micha Moses aiena kʋto binah ha̱ ik kohcho tok.

⁴⁵ Yohmi ma Amalekait micha Kenanait aiena nʋnih yʋmma aiasha tuk ʋt akowʋt mintit fahama cha imaiyʋt yuhlit Holmah ya̱ ont ʋhlichi tok.