Numbas 13 - Chahta Holisso Holitopa 1886

¹ Mihma Chihowah hʋt Moses a̱ im anumpulit,

² Hatak pit ish tihleli na, Kenan yakni ya̱ yʋmma Islael im ʋlla ʋhleha ima li tok a̱, pisashke; i̱ki ʋhleha apehlichi aiyukali ka̱ hatak achʋfa aiachʋfa pehlichi yo̱ ish pilashke, achi tok.

³ Mihma Moses ʋt Chihowah ak osh anumpuli ho̱ yakni haiaka Palan a̱ a tihleli tok; hatak yʋmma puta kʋt Islael im ʋlla ʋhleha ha̱ i̱ noshkoboka bieka tok.

⁴ Micha ilʋppa puta kak osh hohchifo: Luben apehlichika Sakka ushi Shammua ak atok.

⁵ Simeon apehlichi ka Holi ushi Shafat ak atok.

⁶ Chutah apehlichi Chefunneh ushi Kaleb ak atok.

⁷ Issaka apehlichi Chosef ushi Ikal ak atok.

⁸ Eflaim apehlichi, Nʋn ushi Oshea ak atok.

⁹ Benchamin apehlichi Lafu ushi Palti ak atok.

¹⁰ Sabulon apehlichi Soti ushi Kattiel ak atok.

¹¹ Chosef apehlichi yʋmmʋt Manasseh apehlichi Susi ushi Katti ak atok.

¹² Tan apehlichi Kemalli ushi Ammiel ak atok.

¹³ Asha apehlichi, Mikael ushi Selhu ak atok.

¹⁴ Naftali apehlichi Fofsi ushi Nahbi ak atok.

¹⁵ Kat apehlichi Maki ushi Keuel ak atok.

¹⁶ Hatak hohchifo ilʋppa puta kak osh yakni ya̱ pisʋt hlopulla chi̱ ho̱ Moses ʋt tihleli tok. Micha Nʋn ushi Oshea ʋt Chehoshua hochifo tok.

¹⁷ Micha Moses ʋt Kenan yakni pisa chi̱ ka̱ pit tihlelit Oka mahli imma ilʋppak o̱ iʋt nʋnih ha̱ ont hʋsh chukowashke:

¹⁸ Micha yakni ʋt kaniohmi ka̱ hʋsh pisashke, micha okla hʋt aiasha aiena ka̱, kʋllo hokmá, ik kʋllo hokmá, iklauo hokmá, laua hokmá nana ka̱;

¹⁹ Micha yakni ʋt kaniohmi ho̱ aiasha ka̱ achukma hokmá, keyukmʋt okpulo yokmá; micha tʋmaha holihta puta ho̱ aiashakma, ʋlhtipo yokmá, keyukmʋt holihta kʋllo yo̱ aiasha hokmá:

²⁰ Micha yakni ʋt kaniohmi hokmá, nia hokmá, keyukmʋt, chunna hokmá, iti ʋt a̱sha hokmá keyukmá, nana hʋsh pisashke; Micha hʋchi nakni achukma cha yakni ya̱ nana a waya ka̱ isht hʋshlashke, im achi tok. Yohmi ka̱ nitak yʋmmak okʋt pa̱ki waya ʋmmona nitak atuk atok.

²¹ Yohmi ho̱ ia cha yakni yash ahopo̱koyot Sin yakni haiaka ʋttʋt hatak ʋt Hamalh pit ai itʋnowʋt Lehob a̱ ont ʋhlichi tok.

²² Micha oka mahli imma oiyʋt ia cha Heblon a̱ ʋla tok: yʋmmak oka Ahiman, Sheshai micha Talmai aiena Anak im ʋlla ʋhleha hʋt a̱sha tok. Yohmi ka̱ Heblon ʋt Soan Echip talaia yʋt ik tobo ki̱sha afʋmmi untuklo mak o̱, toba tok atok.

²³ Atuk osh Eshkol bokushi ya̱ ona mʋt, yʋmma pa̱ki lokoli achʋfa takali ho̱ naksish achʋfa ho̱ chanlit akʋchi cha tuklo hosh tʋbi takalichit sholi tok; micha pomeklanit, micha fik aiena ka̱ ai isht ʋla tok.

²⁴ Islael im ʋlla ʋhleha hʋt yakni yʋmma pa̱ki lokoli achʋfa achanlit akʋchi tuk ak osh bokushi Eshkol hochifo tok.

²⁵ Atuk osh nitak pokoli ushta kʋt ont taha ma, yakni ya̱ a hopo̱koyʋt itʋnowa tuk ʋt falamʋt ʋla tok.

²⁶ Micha iʋt Moses micha Alon micha Islael im ʋlla ʋhleha okla moma kʋt Palan yakni haiaka Katesh ak o̱ a̱sha tuk o̱ im ona tok; micha anumpa falama isht im ona cha, yakni yash nana a waya ka̱ okla moma ka̱ i̱ haiakʋchi tok.

²⁷ Micha im anolit, Pit ish pi pila tuk yakni ya̱ il ona tuk, mihma pishukchi micha foi bila aiena a yanahanli kʋt aia̱hlishke; yohmi ka̱ ilʋppak osh nan awaya mak oke.

²⁸ Yohmi kia okla yakni ya̱ aia̱sha kʋt kʋlloshke, mikma tʋmaha holihta puta kʋt aholihta hosh chito fehnʋshke, micha Anak im ʋlla ʋhleha hʋt yʋmma asha na, e pi̱sa tuk oke.

²⁹ Amalekait ʋhleha hʋt oka mahli yakni ak o̱ aiashʋshke; mikma Hittait ʋhleha micha Chebusait ʋhleha, micha Amolait ʋhleha aiena kʋt nʋnih foka ak o̱ aiasha hoke; mikma Kenanait ʋhleha hʋt okhʋta bili̱ka micha Chatan aiʋhli aiena kak o̱ aiasha hoke, achi tok.

³⁰ Mihma Kaleb ʋt okla hʋt Moses itikba aiasha ka̱ nuktalali cha, Yakosi iti takla iʋt iloh ishashke, il imaiya he ʋlhpesa fehna hokʋt, achi ok.

³¹ Amba api̱hʋt ia tuk ʋto, Okla ha̱ itibit il ia he pi ʋlhpesa keyushke, kʋllo kʋt pi̱ shahli hoka.

³² Micha yakni ya̱ ahopo̱koyo tuk ʋt ik achukmo ho̱ Islael a̱ anumpa isht im ʋlʋt; Yakni yash il a hopo̱koyo kʋt okla ha̱ tahli yakni chohmishke; micha yʋmma aiasha na e pisa ka̱ hatak chaha fehnʋshke.

³³ Micha yʋmma hatak hofaloha Anak ushi ʋhleha, yʋmmʋt hatak hofaloha ʋhleha a kohcha tok a̱ e pi̱sa tuk oke: mikmʋt pishno ile pisa kʋt hatʋfo ak o̱ pi chohmi tuk; mikma yʋmmʋt pi pesa ka̱ yʋmmak inli il in chohmi tuk oke: achi tok.