Numbas 12 - Chahta Holisso Holitopa 1886

¹ Atuk o̱ Miliam micha Alon ita tuklo kʋt Moses ʋt Ehliopian ohoyo yʋmma itauwaya tuk ak o̱ na mihachit anumpuli tok. Ehliopian ohoyo ho̱ itauwaya tok atuk oka.

² Micha Chihowah yʋt Moses ak illa ho̱ tohnot anumpuli tuk oh cho? pishno ak kia pi tohnot anumpuli tuk ak inli keyu cho? achi tok. Mihma Chihowah yʋt haklo tok.

³ Yohmi ka̱ hatak Moses ʋt chu̱kʋsh yohbi kʋt hatak moma yakni paknaka aiasha ka̱ i̱ shahli tok.

⁴ Mihma Chihowah yʋt yakosi itin takla ho̱ Moses micha Alon micha Miliam aiena ka̱ im anumpulit, Hʋsh tuchina kʋt kohchʋt okla moma i̱ binah ha̱ hʋshlashke. Mihma yʋmma tuchina kʋt kohcha tok.

⁵ Mihma Chihowah yʋt hoshonti toni̱k ibafokʋt akowa cha, binah holitopa okhissa ya̱ hikia cha, Alon micha Miliam a̱ i̱ howa tok; mihma ita tuklot kohcha tok.

⁶ Mihma Himak a̱ ʋm anumpa ha̱ hʋsh haklashke; hʋch itin takla ya̱ hopaii ʋt ahantakma, Chihowah sia hʋt nan otʋni yo̱ im ile haiakʋchi lashke, micha holhpokna ho̱ itim anumpule lashke.

⁷ Yohmi kia an tishu Moses ʋt yohmi keyu, yʋmmak okʋt an chuka ya̱ nana aiasha moma ka̱ aia̱hli hoke.

⁸ Yʋmmak okʋno itih bi̱ka itim anumpohonli chohmit itim anumpule la chi̱ hoke: micha anumpa luma ha chi̱ keyu hoke; mikma Chihowah holba pisa chi̱ hoke; yohmi ka̱ nantihmi ho̱ an tishu Moses a̱ na mihachit anumpuli ka̱ ik hʋchi nukwio tuk oh cho? im achi tok.

⁹ Mihma Chihowah im ai i̱ nukkilli ʋt i̱ sanalit libbi tok; mihmʋt ia tok.

¹⁰ Mihma hoshonti hʋt binah holitopa yash issʋt ia tok; mihma yakeh, Miliam ʋt leplosi ʋbit tohbi kʋt okti chiyuhmi tok; mihma Alon ʋt Miliam a̱ pisa ma, yakeh, leplosi ʋbi tok.

¹¹ Mihma Alon ʋt Moses a̱ Ikkikkeh! a̱ shahli ma! chim asilhha lishke, im anukfila iksho pi yʋmohmi tuk a̱ micha nanashʋchi a pi yʋmohmi tuk, nan ashʋchi ya̱ chik pi onocho kashke.

¹² Illi tuk osh ishki im oshʋto ya̱ kohcha mʋt nipi ʋt iklʋnna kʋt taha yo̱ ik chohmo kashke, im achi tok.

¹³ Mihma Moses ʋt Chihowah ya̱ i̱ pa̱yʋt, Chitokaka ma, himak a̱ ish hlakoffichashke, chim asilhha lishke, achi tok.

¹⁴ Mihma Chihowah yʋt Moses a̱ I̱ki ʋt nashuka ya̱ on tofa illa tuk okma, nitak untuklo ho̱ hofahya hinla keyu cho? nitak untuklo ho̱ binah ha̱ kohchichashke, yohmi ha yosh anonti falʋmminchit ishashke, achi tok.

¹⁵ Mihma Miliam ʋt nitak untuklo ho̱ binah ha̱ kocha ahanta tok; mihma Miliam a̱ falʋmminchit isht iklo ki̱sha ka̱ okla hʋt nowʋt ik aiyo tok.

¹⁶ Atuk osh i̱ himak ak o̱, okla hʋt Haselolh asha tuk ʋt kanʋllit Palan yakni haiaka ak o̱ abinanchi tok.