Numbas 11 - Chahta Holisso Holitopa 1886

¹ Atuk o̱ okla hʋt na mihʋt anumpuli ma, Chihowah yʋt ik im ʋlhpieso tok; micha Chihowah yʋt haklo tok; mihmʋt anukhobela yʋt libbi tok, mihma Chihowah in luak ʋt luachit binah ʋhli puta aiasha tuk a̱ hukmit tahli tok.

² Mihma okla hʋt Moses a̱ i̱ paha̱ya tok; mihma Moses ʋt Chihowah im asilhha ma luak ʋt mosholi tok.

³ Mihma yakni yʋmma Tabelah hochifo tok, Chihowah in luak ʋt ai itin takla ka̱ hukmi tuk oka.

⁴ Mihma okla laua itaiyokoma takla asha tuk ʋt pushkʋnot wakaya tok; micha Islael im ʋlla ʋhleha hʋt anonti yaiya mʋt, kʋta hosh nipi ya̱ pipeta chi̱ cho?

⁵ Echip a̱ nʋni, kukʋmba, micha shukshi puta, micha leek, micha shachuna puta, micha kalik puta laua ho̱ epa fehna beka tok ʋt il ithaiyanʋshke.

⁶ Yohmi tok kia himak ano pim ishilombish ʋt shilʋt kʋniʋshke; nana kʋt iksho kʋmohmi, manna ilʋppak illa pi nishkin itikba aiashʋshke, achi tok.

⁷ Mihma manna yʋt kolianta nihi ak o̱ chohmi hosh pisa hokʋto tellium ak o̱ holba tok.

⁸ Mihma okla kohchʋt itʋnowʋt aiowa cha afotoha a fotohli, keyukmʋt kiti a hosi cha, ampmahaia fohkit pʋska cha pʋska lumbo ikbi beka tok; mikma ʋpʋt pisa ka̱ bila himona chohmi beka tok.

⁹ Micha ninak o̱ fichak ʋt binah ha̱ onʋtolakma manna ʋt onʋtola beka tok.

¹⁰ Mihma Moses ʋt okla hʋt in chuka achʋfa puta hlopulli kʋt i̱ binah okhissa ya̱, hatak moma kʋt yaha̱ya na haklo tok; mihma Chihowah im ai i̱ nukkilli ʋt libbi fehna tok; Moses ak kia ik im ʋlhpieso tok.

¹¹ Mihma Moses ʋt Chihowah ya̱, nanta katiohmi ho̱ chin tishu ha̱ ish ilbʋshali cho? nanta katiohmi ho̱ chim isht i̱ kana ak chi ahayucho ho̱, okla illʋppa moma na weki is si onochi cho?

¹² Okla ilʋppa moma ka̱ shali li tuk oh cho? ʋno ak osh tobachi li tuk o̱, i̱ki yosh ʋlla pi̱shi ya̱ shoyuli chohmit, chi shakba fohkit shoyulit i̱ki ʋhleha anumpa ilonochit yakni im issa li tok a̱ isht ona, is sʋm acha hinla cho?

¹³ Okla ilʋppa moma ka̱ katima ak o̱ nipi ai isht ima la hinla cho? a̱ yaiyʋt, Nipi ish pima na epashke, ahanchi hoka,

¹⁴ Ʋno ak illa hosh okla ilʋppa moma ka̱ shali la hekeyushke, a̱ weki fehna hokʋt.

¹⁵ Micha ilʋppa o̱ is sa̱ yʋmihcha chi̱ hokmʋt ʋmohmichit is sʋbashke; na̱ i̱ kana chi tikba ai ahayuchi likma chim asilhha lishke, mikma a sʋlbʋsha kʋt ak peso kashke, im achi tok.

¹⁶ Mihma Chihowah yʋt Moses a̱ Islael im asʋnonchi pokoli untuklo, yʋmma im asʋnonchi, micha nan ʋlhtoka ya̱ ish ithana kʋt, ʋm itʋnahlit okla moma i̱ binah isht ish ona na chi apehʋt yʋmma hielashke.

¹⁷ Mikma akowa lish yʋmmak o̱ a chim anumpule lashke; micha shilombish chi onʋtoyula ka̱ ishi lish yʋmmak o̱ onochi lashke; mikma okla pehlichi weki ka̱ chiba shaiyalashke, mikma chishno ak bano hosh chik shaiyalo kashke.

¹⁸ Micha onnaha takla ka̱ hʋsh ile hullochashke; atuk osh nipi ya̱ hʋshpa chi̱ hoke; hʋsh yaha̱yʋt kʋta hosh nipi ya̱ pipeta chi̱ cho? Echip ano pim aiachukma tok oka; hʋsh achi ho̱ Chihowah yʋt ha̱klo tuk oka; yʋmohmi hoka, Chihowah yʋt nipi hʋch ima na, hʋsh pa chi̱ hoke,

¹⁹ Nitak achʋfa ho̱ hʋsh pa he keyu, micha nitak tuklo keyu, micha nitak tahlapi keyu, micha nitak pokoli keyu, micha nitak pokoli tuklo keyu,

²⁰ Amba hʋshi achʋfa ont hlopulli hok kia hʋsh ahampakma, pola̱ka hʋch ibishakni a kohchakmʋt nan isht hʋchi̱ yuwala ya chi̱ hoke; Chihowah hʋchi takla ahanta ka̱ hʋsh shitilema cha, itikba ya̱ ayaiyʋt, Nanta katiohmi ho̱ Echip a̱ e kohcha tuk oh cho? hʋsh achi hokʋt, ish im achashke, achi tok.

²¹ Mihma Moses ʋt okla takla a̱ya li, hatak aka a̱ya yʋt tahlepa sipokni bat tahlepa hannali hoke; mihma nipi ima likma, hʋshi achʋfa hlopulli kia ʋpashke, ish achishke

²² Ʋlhpoa chipunta a̱ya kanohmi kia, micha ʋlhpoa hochito a̱ya kanohmi kia im ʋbi na fihopa chi̱ cho? ak cho? okhʋta nʋni aiasha moma hoyot im itʋnahlit fihobla hinla cho? achi tok.

²³ Mihma Chihowah yʋt Moses a̱ Chihowah ibbak ʋt ikfalaiot taha hoh cho? ʋm anumpa hʋt chim aia̱hlikmá keyukmá nanakmá ish pisa chi̱ hoke, im achi tok.

²⁴ Mihma Moses ʋt kohchʋt ia cha, Chihowah im anumpa hash okla ha̱ im anoli tok; micha okla im asʋnonchi pokoli untuklo kash hoyo cha binah ha̱ afolublichit hiohlechi tok.

²⁵ Mihma Chihowah yʋt hoshonti i̱shit akowa cha, im anumpuli tok, micha shilombish onʋtoyula tuk a̱ ishi cha, im asʋnonchi pokoli untuklo kash onochi tok, atuk o̱ yakohmi tok, shilombish ʋt onʋtoyula ma tikbanli nana anolit Chihowah ya̱ aiokpahanchi cha ik isso tok.

²⁶ Yohmi kia hatak tuklo kʋt achʋfa hohchifo kʋt Eltat, mikma achʋfa hohchifo Metat osh binah ha̱ aha̱shwa moma tok; mihma shilombish ʋt yʋmmak o̱ onʋtoyula tok, yʋmmak okʋt holisso ka̱ ibafo̱ka tuk kia, kohchʋt binah ha̱ ik ono tuk atok, binah aha̱shwa hak inli kia tikbanli nana anolit Chihowah ya̱ aiokpʋchi tok.

²⁷ Mihma hatak himita yosh malelit iʋt Moses a̱ im anolit, Eltat micha Metat ak kia binah ha̱ a̱shwʋt tikbanli nana anolit Chihowah ya̱ aiokpʋchishke, achi tok.

²⁸ Mihma Nʋn ushi Choshua Moses in tishu hʋt hatak himithoa im asha achʋfa yʋt afalaminchit A̱ shahli Moses ma! ish im olʋbashke achi tok.

²⁹ Mihma Moses ʋt, Ʋno ak atuk mak o̱ ish potʋnno cho? Chihowah yʋt ʋlhpesa ahni na, Chihowah im okla moma kʋt tikbanli nana anolit Chihowah ya̱ aiokpʋchi hokbano, micha Chihowah hʋt shilombish a̱ onochi hokbano, im achi tok.

³⁰ Mihma Moses micha Islael im asʋnonchi aiena kʋt binah ha̱ ona tok.

³¹ Atuk o̱ Chihowah hʋt mahli ha̱ kohchichi na, kofi ha̱ okhʋta ha̱ ai isht ʋlʋt okla i̱ binah ilʋppa in tʋnnʋp nitak achʋfa anowa, mihmʋt in tʋnnʋp a̱ nitak achʋfa anowa chohmi ho̱ ai eshit binah ha̱ apakfoyupa cha yakni paknaka ya̱ kubit tuklo chohmi ho̱ aiasha tok.

³² Mihma okla hʋt nitak yʋmmʋt hlopulli ka̱, micha ninak yʋmmʋt hlopulli ka̱, micha nitak atukla kʋt hlopulli ka̱ hielit aiowa tok; moma ik alauwo ho̱ aiowa kʋt homa pokoli ho̱ aiowa tok micha binah ha̱ a mominchit apakfoyuplit patali tok.

³³ Atuk o̱ nipi ash o̱ noti ya̱ ishit kiseli moma ik hopa̱so ki̱sha ho̱ Chihowah im ai i̱ nukkilli ʋt okla ha̱ i̱ sanalit libbi tok; micha Chihowah yʋt okla ha̱ illilli okpulo fehna ho̱ isht isso tok.

³⁴ Mihma yakni yʋmma Kiblolh hattaafah hochifo tok; yʋmmak o̱ pushkʋno tuk okla hʋt ahollohpi tok oka.

³⁵ Mihma okla hʋt Kiblolh hattaafah ya̱ ashʋt ia hosh Haselolh a̱ ona tok: micha Haselolh ak o̱ aiasha tok.