Numbas 10 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Tʋli hʋta isht pu̱fa tuklo ho̱ ish ikbashke; ita chakʋchi keyu hosh ish ikbashke: yʋmmak o̱ okla moma isht ish i̱ howashke, micha binah puta kʋt ia chi̱ isht ish im apesashke.

³ Atuk o̱ ita tu̱klot isht olachikma okla moma kʋt okla moma i̱ binah okhissa ya̱ chim ai itʋnahashke.

⁴ Atuk osh isht pu̱fa achʋfa bano ho̱ olachikma, holitopa ʋhleha yʋmmʋt Islael tahlepa sipokni puta i̱ noshkoboka ʋt chim ai itʋnahashke.

⁵ Nukta̱hla he ish olachikma, binah puta hʋshi akochaka in tʋnnʋp a̱sha kʋt tikba iashke.

⁶ Atukla ma nukta̱hla he ish olachikma, binah puta oka mahli pilla in tʋnnʋp aiasha kʋt, nowʋt iashke; nowʋt ia chi̱ puta ka̱ nukta̱hla hi ya̱ okla olahanchashke.

⁷ Amba okla moma kʋt itʋnaha chi̱ hokma ish olachi hoh kia, nukta̱hla hano chik olacho kashke.

⁸ Mikma naholitompa isht asha Alon ushi ʋhleha hak osh isht pu̱fa ya̱ olachashke; micha chim ai itishali puta hlopulli ka̱ chi̱ nan ʋlhpisa bilia ha chi̱ hoke.

⁹ Atuk osh chi̱ yakni ya̱, hʋchin tʋnʋp ʋt hʋch ilbʋshali na, in tanampit hʋsh iakmʋt nukta̱hla he isht pu̱fa hʋsh olachashke; yohmikma hʋchin Chitokaka itikba ya̱ hʋch ithana hi oke, mikma hʋchin tʋnʋp a̱ hʋchi hlakoficha hi oke.

¹⁰ Micha hʋchi yukpa nitak, micha nitak hʋchi̱ holitopa, micha hʋchi̱ hʋshi isht ia ʋmmona puta ka̱, na hukmit im issa, micha isht itin nanaiyachi im issʋt ʋbi puta ka̱ paknaka isht pu̱fa hʋsh ai olachashke: yohmi na yʋmmʋt isht ithana bilia yosh Chihowah itikba itoyulashke, Chitokaka hʋchin Chihowah sia hoke, achi tok.

¹¹ Atuk o̱ yakohmi tok, afʋmmi ont atuklahʋshi atukla kʋt nitak ishit pokoli tuklo ma, hoshonti ha̱ nan isht atokowa binah paknaka ya̱ ai ishit ʋba isht ia tok.

¹² Yohmi ma Islael im ʋlla ʋhleha hʋt Sinai yakni haiaka isht ia tok; atuk o̱ Pelan yakni haiaka yak o̱ hoshonti hʋt ont talaia tok.

¹³ Micha Chihowah hʋt Moses a̱ tohno tuk mak o̱, tikba ia tok.

¹⁴ Tikba fehna ya̱ Chutah im ʋlla ʋhleha i̱ binah na hʋta shali ak osh okla ʋlhpi̱sa mak osh ia tok; mikma in tʋshka moma pehlichi ʋt Amminatab ushi Nahshon ak atok.

¹⁵ Mikma Issaka im ʋlla ʋhleha apehlichi tʋshka moma pehlichi ʋt Sua ushi Nehlaneel ak atok.

¹⁶ Micha Sebulon im ʋlla ʋhleha apehlichi okla ha̱ pehlichi ʋt Helon ushi Eliab ak atok.

¹⁷ Mihma binah ha̱ akʋchi ma, Keshon ushi ʋhleha, micha Melali ushi ʋhleha aiena kak osh binah ha̱ sholi cha iakaiyʋt ia tok.

¹⁸ Mihma Luben i̱ binah na hʋta shali ak osh okla ha̱ ʋlhpi̱sa mak osh wakayʋt ia tok, mihma Sheteu ushi Elisu ak osh in tʋshka ʋhleha ha̱ pehlichi ak atok.

¹⁹ Mikma Simeon im ʋlla ʋhleha apehlichi tʋshka ʋhleha pehlichi ʋt Sulishattai ushi Shelumiel ak atok.

²⁰ Mikma Kat im ʋlla ʋhleha apehlichi tʋshka ʋhleha pehlichi ʋt Teuel ushi Eliasaf ak atok.

²¹ Mihma Kohalhait ʋhleha hʋt ʋlhtipo holitopa yo̱ shaiyalit wakayʋt ia tok; mikma ik ono ki̱sha ho̱ inlaka yʋt binah ha̱ hilechi tok.

²² Mihma Eflaim im ʋlla ʋhleha i̱ binah nahʋta shali okla ha̱ ʋlhpi̱sa mak osh wakayʋt ia tok; mihma in tʋshka ʋhleha ha̱ pehlichi kʋt Ammihʋt ushi Elishama ak atok.

²³ Mikma Manasseh im ʋlla ʋhleha apehlichi tʋshka ʋhleha pehlichi ʋt Petashu ushi Kamaliel ak atok.

²⁴ Mikma Benchamin im ʋlla ʋhleha apehlichi tʋshka ʋhleha pehlichi ʋt Kiteoni ushi Abitan ak atok.

²⁵ Mikma Tan im ʋlla ʋhleha i̱ binah nahʋta shali ʋt yʋmmak osh tʋshka ʋhleha puta i̱ binah puta moma hlopulli ka̱ a̱shaka yatuk osh wakayʋt ia tok; mihma in tʋshka ʋhleha pehlichi kʋt Ammishattai ushi Ahiesa ak atok.

²⁶ Mikma Asha im ʋlla ʋhleha apehlichi tʋshka ʋhleha pehlichi ʋt Oklan ushi Pachiel ak atok.

²⁷ Mikma Naftali im ʋlla ʋhleha apehlichi tʋshka ʋhleha pehlichi ʋt Enan ushi Ahila ak atok.

²⁸ Yakohmi hosh Islael im ʋlla ʋhleha hʋt okla puta ka̱ ʋlhpi̱sa hosh wakaiyʋt iakmʋt itʋnowa beka tok.

²⁹ Mihma Moses ʋt Lekuel ushi Hobab Mitianait Moses ipochi yash, Yakni yʋmma Chihowah yʋt chima lashke, achi tok a̱ ia hosh il itʋnowa; pi awant ish iakma, nana achukma ka̱ e chi yʋmihchashke; Chihowah yʋt Islael pulla ka̱ achukma ho̱ anumpuli tuk oka, im achi tok.

³⁰ Mihma, Ia la he keyu, amba iʋt a̱ yakni akinli micha a̱ kanomi ak o̱ im ona la chi̱ hoke i im achi tok.

³¹ Mihma, Chik pisso kashke, chim asilhha lishke; yakni haiaka yo̱ binachit il itʋnowa chi̱ ka̱ ish ithana hokʋt, pi nishkin a he tuk a̱ chishno ak ashke.

³² Mikma yakohmi hi oke, pi awant ish iakma a̱hli, yakohma hi oke; nana achukma nana ho̱ Chihowah yʋt pi̱yʋmihchikma, yʋmmak inli ho̱ e chi̱ yʋmihcha chi̱ hoke, achi tok.

³³ Mihma Chihowah i̱ nʋnih ha̱ issʋt nitak tuchina anowa okla ona tok; mihma Chihowah nan itim apesa afohka itombi holitopa ak osh nitak tuchina anowa yʋmma im afoha hoyot im ahayucha chi̱ hosh tikba ia tok.

³⁴ Mihma binah kohchʋt ia nitak ma, Chihowah i̱ hoshonti hʋt onʋtoyula beka tok.

³⁵ Atuk o̱ yakohmi tok, itombi holitopa yʋt wakayʋt iakma, Moses ʋt Wakaya, Chihowah ma, mikma chin tʋnʋp puta kʋt ita fimimpashke; micha chi̱ nukkilli ʋhleha hʋt chi tikba yihlepashke, achi tok.

³⁶ Atuk osh talaiakma, Islael tahlepa sipokni laua ka̱ falamʋt ish im ʋlashke, Chihowah ma, achi tok.