Numbas 1 - Chahta Holisso Holitopa 1886

¹ Mihma Chihowah yʋt yakni haiaka Sinai ya̱ Echip yakni ya̱ a kohchʋt minti tok afʋmmi atukla, hʋshi atukla kʋt nitak ʋmmona ma, okla moma im ʋlhtipo ya̱ Moses a̱ et ai im anumpulit,

² Islael im ʋlla ʋhleha moma holhtina ka̱ in chuka achʋfa iakaiya ho̱ i̱ki in chuka achʋfa iakaiya ho̱ nakni puta noshkobo ʋlhpisa hohchifo holhtina ka̱ hʋsh ishashke.

³ Afʋmmi pokoli tuklo ai ʋhlit ʋba ma̱ya kohchʋt tʋnʋp ia hinla puta, Islael ai asha ka̱, chishno micha Alon itatuklot tʋshka pehlichi aiyukali ho̱ hʋsh hotehnashke.

⁴ Mikma apehlichi aiyukali ka̱ hatak achʋfa i̱ki ʋhleha in chuka achʋfa i̱ noshkoboka aiyukali ʋt hʋch ibafo̱ka hi oke.

⁵ Hatak hohchifo ilʋppa puta kak osh hʋchi apehʋt hiela chi̱ hoke. Luben apehlichi ya̱, Sheteu ushi Elisu;

⁶ Simeon apehlichi ya̱, Sulishattai ushi Shelumiel,

⁷ Chutah apehlichi ya̱, Amminatab ushi Nahshon,

⁸ Issaka apehlichi ya̱, Sua ushi Nehlaneel,

⁹ Sebulun apehlichi a, Helon ushi Eliab,

¹⁰ Chosef im ʋlla ʋhleha; Eflaim apehlichi, Ammihut ushi Elishama; Manasseh apehlichi a̱ Petahsu ushi Kamaliel,

¹¹ Benchamin apehlichi a̱, Kiteoni ushi Abitan,

¹² Tan apehlichi a̱ Amishattai ushi Ahiesa,

¹³ Asha apehlichi a̱ Oklan ushi Pakiel,

¹⁴ Kat apehlichi a Teuel ushi Eliasaf,

¹⁵ Naftali apehlichi a̱ Enan ushi Ahila,

¹⁶ Ilʋppa puta kak osh okla moma ka̱ ai annohowa i̱ki ʋhleha apehlichi yo̱ i̱ holitopa Islael a̱ tahlepa sipokni puta i̱ noshkoboka yatok.

¹⁷ Mihma Moses micha Alon itatuklo kʋt hatak ilʋppa puta hohchifo hosh takali tuk o̱ ishi tok.

¹⁸ Micha okla moma ka̱ hʋshi atukla nitak ʋmmona ma itʋnahli tok, mihma in chuka achʋfa iakaiyʋt i̱ki ʋhleha in chuka ʋlhpisʋt hohchifo holhtina yatuk a̱ noshkobo holhtina afʋmmi pokoli tuklo ai ʋhlit ʋba ma̱ya ka̱ okla anoli tok.

¹⁹ Mihma Chihowah yʋt Moses a̱ im apesa tuk mak o̱, yohmit Sinai yakni haiaka ya̱ a hohtena tok.

²⁰ Mihma Islael ushi akni fehna Luben im ʋlla ʋhleha ai unchuloli i̱ki ʋhleha in chuka achʋfa yʋt chuka achʋfa ʋlhpisʋt nakni puta afʋmmi pokoli tuklo ai ʋhli ʋttʋt ʋba ma̱ya kohchʋt tʋnʋp itibit ia hinla moma kʋt noshkobo holhtina hosh hohchifo holhtina tok.

²¹ Luben apehlichi yosh holhtina kʋt tahlepa sipokni pokoli ushta cha tahlepa tahlapi tok.

²² Simeon im ʋlla ʋhleha ai unchuloli ʋt i̱ki ʋhleha in chuka achʋfa ʋt, in chuka achʋfa ʋlhpisʋt nakni puta afʋmmi pokoli tuklo ʋttʋt ʋba ma̱ya kohchʋt tʋnʋp itibit ia hinla puta kʋt noshkobo holhtina hosh hohchifo holhtina tok.

²³ Simeon apehlichi holhtina kʋt tahlepa sipokni pokoli tahlapi akucha chakkali cha tahlepa tuchina tok.

²⁴ Kat im ʋlla ʋhleha ai unchuloli hʋt i̱ki ʋhleha in chuka achʋfa yʋt chuka achʋfa ʋlhpisʋt afʋmmi pokoli tuklo ai ʋhli ʋttʋt ʋba ma̱ya kohchʋt tʋnʋp itibit ia hinla puta kʋt hohchifo holhtina tok.

²⁵ Kat apehlichi yʋmma holhtina kʋt tahlepa sipokni pokoli ushta akucha tahlapi, tahlepa hannali cha pokoli tahlapi tok.

²⁶ Chutah im ʋlla ʋhleha ai unchuloli hʋt i̱ki ʋhleha in chuka achʋfa yʋt chuka achʋfa ʋlhpisʋt afʋmmi pokoli tuklo ai ʋhli ʋttʋt ʋba ma̱ya kohchʋt tʋnʋp itibit ia hinla puta kʋt hohchifo holhtina tok.

²⁷ Chutah apehlichi yʋmmʋt holhtina kʋt tahlepa sipokni pokoli untuklo akucha ushta cha tahlepa hannali tok.

²⁸ Issaka im ʋlla ʋhleha ai unchuloli hʋt i̱ki ʋhleha in chuka achʋfa ʋt chuka achʋfa ʋlhpisa hosh afʋmmi pokoli tuklo ai ʋhli ʋttʋt ʋba ma̱ya kohchʋt tʋnʋp itibit ia hinla puta kʋt hohchifo holhtina tok.

²⁹ Issaka apehlichi yʋmmʋt holhtina kʋt, tehlepa sipokni pokoli tahlapi akucha ushta cha tahlepa ushta tok.

³⁰ Sebulun im ʋlla ʋhleha ai unchuloli hʋt i̱ki ʋhleha in chuka achʋfa ʋt chuka achʋfa ʋlhpisʋt afʋmmi pokoli tuklo ai ʋhli ʋttʋt ʋba ma̱ya kohchʋt tʋnʋp itibit ia hinla puta kʋt hohchifo holhtina tok.

³¹ Sebulun apehlichi yʋmmʋt holhtina kʋt tahlepa sipokni pokoli tahlapi akucha untuklo cha tahlepa ushta tok.

³² Chosef im ʋlla ʋhleha yʋmmʋt Eflaim in ʋlla ʋhleha ai unchuloli hʋt i̱ki ʋhleha in chuka achʋfa yʋt chuka achʋfa ʋlhpisa hosh afʋmmi pokoli tuklo ai ʋhli ʋttʋt ʋba ma̱ya kohchʋt tʋnʋp itibit ia hinla puta kʋt hohchifo holhtina tok.

³³ Eflaim apehlichi yʋmmʋt holhtina kʋt tahlepa sipokni pokoli ushta cha tahlepa tahlapi tok.

³⁴ Manasseh im ʋlla ʋhleha ai unchuloli hʋt i̱ki ʋhleha in chuka achʋfa yʋt chuka achʋfa ʋlhpisa hosh afʋmmi pokoli tuklo ai ʋhli ʋttʋt ʋba ma̱ya kohchʋt tʋnʋp itibit ia hinla puta kʋt hohchifo holhtina tok.

³⁵ Manasseh apehlichi yʋmmʋt holhtina kʋt tahlepa sipokni pokoli tuchina akucha tuklo cha tahlepa tuklo tok.

³⁶ Benchamin im ʋlla ʋhleha ai unchuloli hʋt i̱ki in chuka achʋfa yʋt chuka achʋfa ʋlhpisa hosh afʋmmi pokoli tuklo ai ʋhli ʋttʋt ʋba ma̱ya kohchʋt tʋnʋp itibit ia hinla puta kʋt hohchifot holhtina tok.

³⁷ Benchamin apehlichi yʋmmʋt holhtina kʋt tahlepa sipokni pokoli tuchina akucha tahlapi cha tahlepa ushta tok.

³⁸ Tan im ʋlla ʋhleha ai unchuloli hʋt i̱ki ʋhleha in chuka achʋfa yʋt, chuka achʋfa ʋlhpisʋt afʋmmi pokoli tuklo ai ʋhlit ʋba ma̱ya kohchʋt tʋnʋp itibit ia hinla puta kʋt hohchifot holhtina tok.

³⁹ Tan apehlichi yʋmmʋt holhtina kʋt tahlepa sipokni pokoli hannali akucha tuklo cha tahlepa untuklo tok.

⁴⁰ Asha im ʋlla ʋhleha ai unchuloli hʋt i̱ki in chuka achʋfa, chuka achʋfa ʋlhpisʋt afʋmmi pokoli tuklo ai ʋhlit ʋba ma̱ya kohchʋt tʋnʋp itibit ia hinla puta kʋt hohchifot holhtina tok.

⁴¹ Asha apehlichi yʋmmʋt holhtina kʋt tahlepa sipokni pokoli ushta akucha achʋfa cha tahlepa tahlapi tok.

⁴² Naftali im ʋlla ʋhleha ai unchuloli hʋt i̱ki ʋhleha in chuka achʋfa yʋt chuka achʋfa ʋlhpisʋt afʋmmi pokoli tuklo ai ʋhlit ʋba ma̱ya kohchʋt tʋnʋp itibit ia hinla puta kʋt hohchifot holhtina tok.

⁴³ Naftali apehlichi yʋmmʋt holhtina kʋt tahlepa sipokni pokoli tahlapi akucha tuchina cha tahlepa ushta tok.

⁴⁴ Ilʋppa puta kak osh, Moses micha Alon itatuklo kʋt hohtena ma holhtina tok; Islael i̱ holitopa hatak auah tuklo: i̱ki ʋhleha in chuka achʋfakma achʋfʋt ia tok.

⁴⁵ Yohmi ho̱ Islael im ʋlla ʋhleha moma i̱ki ʋhleha in chuka achʋfa ʋlhpisa hosh afʋmmi pokoli tuklo ai ʋhli ʋttʋt ʋba ma̱ya kohchʋt tʋnʋp itibit ia hinla puta kʋt holhtina tok.

⁴⁶ Holhtina kʋt moma kʋt tahlepa sipokni tahlepa hannali cha tahlepa sipokni tuchina tahlepa tahlapi cha pokoli tahlapi aiena tok.

⁴⁷ Amba Lefait ʋhleha hʋt i̱ki ʋhleha apehlichi kʋt takla ik holhtino tok.

⁴⁸ Chihowah yʋt Moses a̱ im anumpulit,

⁴⁹ Lefai apehlichi illa ho̱ ish hohtena he keyu, micha Islael a̱ ta̱kla holhtina ka̱ ish isha he keyu;

⁵⁰ Amba Lefait ʋhleha isht atokowa ʋlhtipo, micha nan ai ʋlhto moma yʋmma foyuka, micha nana hosh ai immi putakma, apistikli ya chi̱ ka̱ ish atokolashke, mikma ʋlhtipo ya̱, micha nanaiʋlhto moma aiena ka̱ shoyula chi̱ hoke: micha nana isht im aha̱shwa, micha ʋlhtipo holitopa ya̱ abinachit afolubla hi oke.

⁵¹ Ʋlhtipo holitopa yʋt ia chi̱kma, Lefait ʋhleha hak osh akʋcha hi oke; micha ʋlhtipo holitopa yʋt hikia chi̱kma, Lefait ʋhleha hak osh hilecha hi oke; atuk o̱ hatak nan ik ithano yosh bili̱ka ona hokʋt illa hi oke.

⁵² Mikma Islael im ʋlla ʋhleha hokʋt ilap im ʋlhtipo puta ka̱ i̱ binah aiyukali a hilecha hi oke; micha hatak aiyukali kʋt i̱ na hʋta shali abinanchit okla moma hlopulla hi oke.

⁵³ Amba Lefait ʋhleha hokʋto nan isht atokowa ʋlhtipo holitopa hilechit apakfoyupʋt binancha hi oke: yʋmohmi ho̱ im ai i̱ nukkilli ʋt Islael im ʋlla ʋhleha ha̱ ik onʋtulo kashke: mikma Lefait ʋhleha hak osh nan isht atokowa ʋlhtipo holitopa ya̱ ieshit atonna hi oke, im achi tok.

⁵⁴ Mihma Islael im ʋlla ʋhleha hʋt Chihowah yʋt Moses a̱ im apesa tuk mak o̱, moma yʋmihchi tok.