Nan Otʋni 9 - Chahta Holisso Holitopa 1886

Enchil ont isht tahlapi kash ot olachi ma, fochik ʋt aka auet itula ma, yʋmmak asho̱ chittuk hofobi ont ataha he iksho isht tiwa ya̱ ima, 1: 2 chiluk ash o̱ tiwi ma ha̱wa puta halambia ho̱ choh mi hosh auet kocha wiha tok; 13 isht pu̱fa isht hannali kash ot ola; 15 mihma enchil ushta talakchi atuk ʋt i̱ holhtofa.

¹ Yʋmohmi ma enchil ont isht tahlapi kash ot olachi ma, fochik ʋt ʋba shutik ak o̱ a mintit yakni a̱ ant onʋtula ho̱ pisa li tok; mihma yʋmmak ash o̱ chiluk hofobi ont ai ʋhli iksho isht tiwa ya̱ ima tok.

² Mihma yʋmmak ash ot chiluk hofobi ont ai ʋhli iksho yash tiwi ma, tʋli a bileli chito yo̱ shobullit a kohcha ka, chiyuhmit chiluk hofobi a̱ a shobullit kohoncha tok; mihma chiluk hofobi a̱ a shobullit kohoncha kak o̱ hʋshi, micha shutik takla aiena kʋt isht okhlilit kʋnia tok.

³ Yohmi ma ha̱wa puta mʋt shobohli ka a̱sht kohchʋt, yakni a̱ ai itʋnowa tok; yohmi ka yʋmmak atuk mʋt nan okpʋna he im ʋlhpisa kʋt, halambia yakni pakna ai a̱sha kʋt nan okpʋna he im ʋlhpisa tok ak inli ho̱ chiyuhmi tok.

⁴ Yohmi mʋt yakni pakna hʋshuk ai asha ka, micha nan okcha̱ki puyuta, mikmʋt iti aiena hokʋno ik okpano ka chi̱, amba hatak kaniohmi hosh Chihowa im isht in chu̱wa yʋt in lapanli keyu hatuk ak illa chi̱ ho̱ im ʋlhpisa tok.

⁵ Yohmi kia yʋmmak oka ik illicho ka chi̱, amba ilʋppak ash ot nan i̱ palʋmmi kʋt hʋshi tahlapi ka ona chi̱ ho̱ im ʋlhpisa tok; yohmikma ha̱wa ʋt yʋmmak ash o̱ i̱ palʋmmichi kʋt halambia hosh hatak a̱ nʋhlikmʋt i̱ palʋmmichi chatuk a̱ chiyuhmi tok.

⁶ Mikmʋt nitak yʋmma foyuka hokʋno hatak ʋt illa hi a̱ hoho̱yo kia, ik ahayucho ka he; micha illi ka ik bʋnna kia, nan illichi ʋt i̱ kʋnihi̱ya hi oke.

⁷ Yohmi ma ha̱wa yash osh issuba hosh tʋnʋp ia chi̱ hosh im ʋlhtahʋt kʋnia chatuk a̱ chiyuhmi tok: mihmʋt tʋli holisso lakna holba ho̱ iachuka iachukoli ma, nashuka yʋt hatak nashuka yo̱ chiyuhmi tok.

⁸ Mihmʋt pa̱shi ʋt ohoyo pa̱shi ak o̱ chiyuhmi ma, noti ʋt koi chito noti yo̱ chiyuhmi tok.

⁹ Yohmi mʋt ikkishi alata puta kʋt tʋli ikkishi alata holba ho̱ okla i̱shi tok: mihmʋt i̱ sanahchi fopa kʋt itichanʋli issuba laua shali ho̱ tʋnʋp itibit ia hosh yihlepʋt a̱ya na winihʋchi ho̱ chiyuhmi tok.

¹⁰ Mihmʋt hasimbish ʋt halambia hasimbish o̱ holba hosh a̱sha ho̱, nan isht nʋhli mʋt a̱sha tok; yohmi hosh nan im ʋlhpisa kʋt hʋshi tahlapi ho̱ hatak a̱ ilbʋshala chi̱ hatok.

¹¹ Mihmʋt i̱ mi̱ko ʋt binili tok: yʋmmʋt chiluk hofobi ont ai ʋhli iksho a̱ im enchil mak a tok: yʋmmʋt Heblu anumpa hokma Abatton hohchifo ma, amba Klik anumpa hokʋno hohchifo kʋt Apolyon oke.

¹² Nana palʋmmi achʋfa kash ot ant iʋt kʋnia ma, anonti na palʋmmi tuklo hosh himmakma mihinta chi̱ oke.

¹³ Atuk o̱ enchil ont isht hannali kash ot olachi ma, tʋli holisso lakna alta Chihowa itikba hikia tuk lapish ushta ka, anumpa ola hʋt a kohcha mʋt, enchil ont isht hannali kash ot isht pu̱fa i̱shi hosh hikia kash o̱,

¹⁴ Enchil ushta talakchi yosh okhina chito Euflates a̱ oka a̱sha ka ont ish i̱ hotofashke, im achi ho̱ haklo li tok.

¹⁵ Mihma enchil ushta kash ot i̱ holhtofa mʋt, hatak puta kashapa ont isht atuchina ka ʋba chi̱ kʋt, hʋshi kanʋlli achʋfa, nitak achʋfa, hʋshi achʋfa, afʋmmi achʋfa aiena ka im ʋlhtaha tok.

¹⁶ Mihma issuba o̱ binilit tʋnʋp a̱ya holhtina kʋt tahlepa sipokni tahlepa tuklo bat tahlepa sipokni achʋfa tok: mihma holhtina ka haklo li tok.

¹⁷ Mihma nan isht atokowa kʋt yakohmi ho̱ pisa li tok; issuba o̱ binili ʋhleha ilʋppak ash ot ikkishi alata yʋmmʋt humma, micha okchamali, micha lakna ai itaiyoma aiena ho̱ ieshi tok; mihma issuba noshkobo hʋt koi chito noshkobo ho̱ chiyuhmi ma, itakha ya̱ luak shobohli, mikmʋt hituk lakna aiena hosh a kohoncha tok.

¹⁸ Luak shobohli, mikmʋt hituk lakna aiena kʋt itakha ya̱ a kohoncha tuchina ilʋppa pulla kak o̱, hatak moma ka kashapa ont isht atuchina kʋt isht illi tok.

¹⁹ Itakha, mikmʋt hasimbish aiena ka nan isht i̱ palʋmmicha hi ʋt im ʋlhpisa hoke; mihmʋt i̱ hasimbish ʋt noshkobo a̱sha kʋt sinti chilita yo̱ holba hatuk o̱, ilʋppak o̱ nana ka isht okpani yoke.

²⁰ Yohmi kia nan isht ahullo okpulo puta, micha tʋli holisso lakna, tʋli hʋta, mikmʋt tʋli lakna, tʋli, iti aiena naholbʋt toba puta, yʋmmʋt pi̱sa keyu, micha haklo kia haklo keyu, mikmʋt nowa kia nowa keyu aiena ilap ibbak ʋt ikbi tuk okʋno ik aiokpacho ka chi̱ kʋt, hatak kanimi na palʋmmi ilʋppa isht ik illo ke tuk okʋto yʋmma i̱ filʋmmit ik ile kostinincho kish;

²¹ Hatak ʋbi, il isht ahullochi, nan itin luma̱ka, micha na hu̱kopa aiena ka i̱ filʋmmit ik ile kostinincho ki tok oke