Nan Otʋni 8 - Chahta Holisso Holitopa 1886

Nan ashana ont isht untuklo kash o̱ wakami, 1; 2 isht pu̱fa untuklo ho̱ enchil untuklo ka ima, 6 ushta kʋt olachi ma na palʋmmi chinto kʋt otʋni; 3 enchil achʋfa kʋt ʋbanumpuli ʋhleha ʋba pit anumpohonli ta̱klak ma tʋli holisso lakna alta toba ka na balama pit o̱ bohli.

¹ Atuk o̱ holisso isht ashana ont isht untuklo kash tiwi ma, hʋshi kanʋlli isht ʋlhpisa iklʋnna itintakla ka ʋba aholitopa yʋt chullusʋt talaia tok.

² Mihma enchil untuklo Chihowa itikba hieli tuk a̱ pisa li tok: yohmi ma yʋmmak ash o̱ isht pu̱fa untuklo ho̱ ima tok.

³ Mihma enchil inla hosh tʋli holisso lakna na‐balama ai‐ʋlhto yo̱ sholi kʋt, mintit alta ya̱ ant a hikia tok: yohmi kʋt ʋbanumpuli ʋhleha moyuma kʋt ʋba pit anumpohonlikma ai atakla ma tʋli holisso lakna alta toba yʋt ai o̱ binili holitompa itikba hikia tuk a̱ ai o̱ huhu̱kma chi̱ ka, na balama laua ho̱ ima tok.

⁴ Atuk o̱ na balama ya̱ a shobulli kʋt, ʋbanumpuli ʋhleha ʋba pit anumpohonli ka ai itiba fo̱kʋt enchil ibbak a̱ a kohchʋt ia hosh, Chihowa itikba oho̱na tok.

⁵ Atuk o̱ enchil ash ot na balama ai ʋlhto yash ishi cha, alta yak o̱ luak a̱ ai ishit alotuli mʋt, aka pit fohobli tok; yohmi ma nan ola, micha hiloha, malʋtha, mikmʋt yakni winakʋchi aiena tok.

⁶ Mihma enchil untuklo kash ot isht pu̱fa untuklo ka i̱shi tuk ash, olacha chi̱ kʋt il ai atahli tok.

⁷ Mihma enchil ʋmmona kash ot olachi ma, hata̱fo, mikmʋt luak, issish it ib ʋlhto aiena ho̱ yakni a̱ o̱ kanchi tok: mihma iti okcha̱ki moma ka a kashapa ont isht a tuchina kʋt luʋt taha ma, hʋshuk okcha̱ki mʋt momʋt luʋt taha tok.

⁸ Mihma anonti enchil ont atu̱kla kash ot olachi ma, nʋnih chito yosh luak o̱ isht luhu̱a chiyuhmi hosh okhʋta ha̱ pit okatula tok: mihma okhʋta a kashapa ont isht atuchina kʋt issish o̱ toba tok.

⁹ Yohmi ma okhʋta anu̱kaka nana toba tok puta im ilhfiopak a̱sha tuk ʋt, kashapa ont isht atuchina kʋt illi tok: mihma peni hochito yatuk ʋt kashapa ont isht atuchina kʋt okpulot taha tok.

¹⁰ Mihma anonti enchil ont atuchina kash ot olachi ma, fochik chito yosh pʋla ho̱ chiyuhmit luhu̱a hosh, ʋba shutik a̱ a mintit aka ant itola cha, okhina puta kashapa ont isht atuchina, mihmʋt kʋli a hiohli kashapa ont isht atuchina aiena ka onʋtula tok.

¹¹ Yohmi kʋt fochik yʋmma hochifo kʋt wumwut achi hatok; yohmi hatuk o̱ oka moyuma ka kashapa ont isht atuchina kʋt wumwut o̱ toba tok: mihma oka ak osh takbʋt kʋnia hatuk oka, hatak ʋt oka yash o̱ isht illi kʋt laua tok.

¹² Mihma anonti enchil ont ai ushta kash ot olachi ma, hʋshi, hʋshi ninak a̱ya, fochik puta aiena kʋt koyufa ont isht atuchina hosh ai okpuloka tok; yohmi hatuk osh koyufa ont isht atuchina kʋt im okhlili na nitak koyufa ont isht atuchina kʋt ik tommo ma, anonti ninak ʋt mihinli tok.

¹³ Mihma anonti pit hopo̱koyo li mʋt, enchil achʋfa kʋt o̱ssi hi̱ka ho̱ chiyuhmit ʋba shutik iklʋnna ya̱ hlopullit a̱ya mʋt, chitolit tahpʋlʋt, enchil tuchina kash ot himak pilla isht pu̱fa ola inla ka olacha chi̱ kʋt a̱sha ka, yʋmmak osh ohonla hokʋno, hatak yakni pakna a̱sha hatuk ʋt i̱ Palʋmmi, palʋmmi, palʋmmi chinta chi mak oke, ahanchi ho̱ haklo li tok.