Nan Otʋni 6 - Chahta Holisso Holitopa 1886

Nan ashana kash it iakaiyachit wakamohli; tiwakma nana hosh kaniohmi; nana kʋt ont ai ʋlhikma kaniohma he anoli.

¹ Yohmi ma pi̱sa li ho̱, Chukfʋlhpobushi ʋt holisso isht ashana achʋfa kash tiwi tok: mihma hiloha wimimpa ho̱ chiyuhmi hosh nan okcha̱ya ushta kash ot achʋfʋt, Minti cha, ant pisá, achi ho̱ haklo li tok.

² Mihma yakeh! issuba tohbi yo̱ pisa li tok: mihma iti tanampo i̱shi hosh yʋmmak ash o̱ o̱ binili; yohmi ma yʋmmak ash o̱ iachuka ima ma, yʋmmak ash ot imaiyachit hlopulla chi̱ kʋt imaiyahanchit ishit ma̱ha̱ya tok.

³ Atuk o̱ anonti holisso isht ashana atukla kash tiwi ma, nan okcha̱ya atukla kash osh, Minti cha, ant pisá, achi ho̱ haklo li tok.

⁴ Atuk o̱ issuba inla yʋmmʋt humma yosh kohchʋt ia tok: yohmi ma yʋmma o̱ binili kʋt nanaiya hatuk a̱ yakni pakna ya̱ a mokofit isha chi̱ kʋt im ʋlhpisa na okla hʋt ilap bi̱ka ya̱ itillicha he mak atok; yohmi ma yʋmmak ash o̱ bʋshpo falaia chinto ho̱ ima tok.

⁵ Mihma anonti holisso isht ashana ont atuchina kash tiwi ma, nan okcha̱ya atuchina kash osh, Minti cha, ant pisá, achi na haklo li tok; mihma yakeh! issuba lusa yo̱ pisa li tok; mihma yʋmma o̱ binili kʋt nan‐isht‐weki ibbak isht i̱shi tok.

⁶ Yohmi ma nan okcha̱ya ushta ai itinta̱kla ya̱ ai anumpa ola kʋt, Iskʋli achʋfakma onush isht ʋlhpisa achʋfa, mikma iskʋli achʋfa ka bale ʋt isht ʋlhpisa tuchinashke; yohmi kia ahah! ish ai ahni cha, alif ʋni, mikmʋt oka pa̱ki aiena hokʋno chik okpano kashke, achi ho̱ haklo li tok.

⁷ Atuk o̱ anonti holisso isht ashana ont ai ushta kash tiwi ma, nan okcha̱ya ont ai ushta kash osh miha mʋt, Minti cha, ant pisá, achi na haklo li tok.

⁸ Yohmi ma yakeh! issuba hato‐lakna yo̱ pisa li tok: mihma Isht‐ai‐illi hohchifo hosh yʋmmak ash o̱ o̱ binili ma, ai okpulo ka ai asha tuk ʋt pit iakaiya tok. Mihma yʋmmak ash ot yakni itakashkoa ont isht ai ushta ka bʋshpo falaia, micha na hohchʋfo, mikmʋt nan‐illi, micha nampoa nukshopa puta yakni pakna ai asha aiena kak o̱ isht illicha chi̱ kʋt im ʋlhpisa tok.

⁹ Atuk o̱ holisso isht ashana ont isht tahlapi kash tiwi ma, Chihowa im anumpa pulla, micha nana atokowa anolit ieshi pullʋt isht illi tok ʋhleha shilombish ʋt alta nutaka ya̱ ai asha na pisa li tok.

¹⁰ Mihma yʋmmak ash ot, chitolit anumpulit miha mʋt, Chitokaka ai a̱hli holitopa chia hʋt pim issish a tok a̱ atobʋchi kʋt yakni pakna ai asha ka chik im apeso ho̱, hopaki kʋt katiohmi foka chi̱ cho? ahanchi tok.

¹¹ Yohmi ma yʋmmak ash o̱ ilefoka tohbi falaia holitompa aiyuka ho̱ ima tok: mihma chekosi ta̱kla hokʋno nukchintot fohʋt ma̱ya na itibapishi ʋhleha tishu ilap ai itilaui puta kak kia, ilap ak atok ak inli ho̱ chohmit illa hi atuk ʋt, ont ai a̱hla hi a̱ i̱ miha tok.

¹² Mihma holisso isht ashana ont isht hannali kash tiwi ma, yakeh! yakni winakʋchi chinto ho̱ pisa li tok: mihma hʋshi ʋt lusa kʋt na pa̱shi tʋnna yo̱ chiyuhmi ma, hʋshi‐ninak‐a̱ya yʋt issish ak o̱ chiyuhmi tok.

¹³ Yohmi ma ʋba fochik puta kʋt chilofʋt akakoha kʋt, fik ʋpi yʋt mahli kʋllo fehna ho̱ faiokahanchi na ik ai ono ho̱ ʋni ʋt chilofa chatuk ak o̱ chiyuhmi tok.

¹⁴ Mihma ʋba shutik ʋt ita pahlatʋt, a holisso yosh bonuntʋt ont taiyahʋt kʋnia ho̱ chohmit pit kʋnia tok: mihma nʋnih chaha, micha tashaiyi puta kʋt a taloha tuk a̱ a kanʋllit taha tok.

¹⁵ Mihma mi̱ko ʋhleha yakni pakna ai asha tuk, micha hatak hochitokaka ʋhleha, mikma hatak nan in laua ʋhleha, kʋpitʋni hochito, hatak holitompa ʋhleha, mikmʋt hatak yuka, micha hatak yuka keyu puyuta kʋt nʋnih chaha puta tʋli hochito aiena ka chiluk ai asha tuk a̱ a lumpoa tok.

¹⁶ Mihmʋt nʋnih chaha puta, micha tʋli hochito aiena kash o̱, Auet hʋsh pi o̱ kinahli cha, ai o̱ binili holitompa o̱ binili ka̱ i̱ nashuka, micha Chukfʋlhpobushi nan isht i̱ nukkilli aiena hatuk ma pisht hʋsh i̱ luhmashke.

¹⁷ Himak a̱ nan isht i̱ nukkilli nitak chinto kʋt ʋlʋshke; yohmi ka kʋta hak osh hikia hinla cho? achi tok.