Nan Otʋni 5 - Chahta Holisso Holitopa 1886

Holisso hʋt nan isht ashana untuklo ho̱ isht ashana ho̱ Chan ʋt pisa, 1; 9 yʋmma chukfʋlhpoba ushi yʋmmʋt illi tok ak bano hosh wakama hi ʋt im ʋlhpesa, yohmi hoka hatak tikba ʋhleha hashot yʋmmak ash o̱ aiokpahanchi; 9 ilap im issish o̱ isht okchalinchi tuk a̱ okla anohonli.

¹ Yʋmohmi ma a holisso yʋt anu̱kaka, mikmʋt pakna aiena ka holisso hosh, isht ashana untuklo ho̱ isht ashana hosh ai o̱ binili holitompa o̱ binili ibbak isht impak imma ya̱ foyuka na pisa li tok.

² Mihma enchil hlampko fehna kʋt chitolit anumpohonli mʋt, Kʋta hak osh isht ashana puta hatuk a̱ mokohlichi cha, holisso hash tiwa hi ʋt im ʋlhpiesa cho? achi ho̱ pisa li tok.

³ Yohmi ma ʋba shutik, micha yakni, mikmʋt yakni nutaka aiena ai ahanta kʋt kʋna kia holisso yʋmma tiwa he, mikmʋt pisa he ai im ʋlhpiesa aiena kʋt iksho ki tok.

⁴ Yohmi ma kʋna kia holisso hatuk a̱ tiwi cha, it im anumpula he, micha yʋmma pisa he ai im ʋlhpiesa kʋt iksho hatuk o̱, sa nishkin okchi ʋt mihinti fehna tok.

⁵ Mihma hatak tikba ʋhleha hash osh achʋfʋt, Chi nishkin okchi ʋt minti ná; yakeh! Koi chito Chuta okla a minti, yʋmmʋt Lewi a minti hakshish filaminchi yak osh isht ashana untuklo kash mokohlichi cha, holisso hash tiwa chi̱ kʋt ont im ai a̱hli hatuk oke, ʋm achi tok.

⁶ Yohmi ma yakeh! ai o̱ binili holitompa, micha nan okcha̱ya ushta, mikmʋt hatak tikba ʋhleha aiena ka ai itin takla ya̱ Chukfʋlhpobushi ʋt hikia kʋt illi tuk a̱ ahoba hosh, lapish ʋt untuklo cha, nishkin mʋt untuklo, yʋmmʋt Chihowa imi shilombish untuklo yakni moyuma ai im a̱ya mak o̱ pisa li tok.

⁷ Mihmʋt yʋmmak ash ot minti mʋt, ai o̱ binili holitompa o̱ binili im ibbak isht impak imma holisso hʋt fo̱ka tuk ash ant kohchit ishi tok.

⁸ Mihma yʋmmʋt holisso ha̱ ant ishi ma, nan okcha̱ya ushta, micha hatak tikba pokoli tuklo akucha ushta kash ot, hap, micha tʋli holisso lakna nan ai ʋlhto yosh na balama alotowa, yʋmmʋt ʋbanumpuli puta im anumpa ilbʋsha mak osh yohmi ho̱ i̱shi banot, Chukfʋlhpobushi itikba ya̱ okla ont hlipkʋchi tok.

^9-10 Micha taloa himona ka okla taloho̱wa kʋt, Chishno ak osh chilli hosh oklushi ilaiyuka, im anumpa ilaiyuka puyuta, hatak okla moma a kohchi hosh Chihowa immi e toba chi̱ ka, chishno chim issish ak o̱ isht ish pi chumpa hatuk; yohmi hosh Chihowa ha̱ na holitompa isht imʋtta, micha mi̱ko ʋhleha aiena ka ish pikbi tok: atuk o̱ yakni pakna ka a mi̱kot il ai asha chi̱ hoka, Chishno ak osh holisso hash ish ishi cha, isht ashana yash ish tiwa he ʋt a chim ʋlhpiesa hoke, ahanchi tok.

¹¹ Yohmi ma pit pisa li ma, ai o̱ binili holitompa bili̱ka fullota ka, enchil ʋhleha laua, mikmʋt nan okcha̱ya, micha hatak tikba ʋhleha aiena ka itih ola bieka ho̱ haklo li tok; yohmi kʋt yʋmmʋt holhtena kʋt tahlepa sipokni pokolí banot ia kʋt tahlepa sipokni pokoli cha, anonti tahlepa sipokni bano hosh tahlepa sipokni achʋfa hosh,

¹² Chitolit miha hosh, Chukfʋlhpobushi illi tok ʋt nan isht im ai a̱hla he, micha nan u̱ha in laua, mikmʋt isht a hopoyuksa, micha isht hlampko, mikmʋt isht ahninchi, micha isht aholitopa, mikmʋt isht aiokpanchi aiena ka a chimmi ha he ʋt chim ʋlhpesa hoke, ahanchi ho̱ haklo li tok.

¹³ Yohmi ma ʋba, micha yakni pakna, mikmʋt yakni nutaka, mikmʋt okhʋta anu̱kaka, nan okcha̱ya aiasha tuk, mikmʋt yʋmma puta aiasha tuk ʋt momʋt, Ai o̱ binili holitompa o̱ binili, micha Chukfʋlhpobushi ita tuklo kʋt isht ai okpanchi, micha isht ahninchi, mikmʋt isht a holitopa, mikmʋt isht im ai a̱hli aiena kʋt ai immi kʋt biliʋt biliashke, ahanchi ho̱ haklo li tok.

¹⁴ Yohmi ma nan okcha̱ya ushta kash ot Amen, achi tok: mihma hatak tikba pokoli tuklo akucha ushta kash ot aka hlipkʋchi cha, okcha̱yʋt ahantʋt biliʋt bilia yash o̱ aiokpahanchi tok.