Nan Otʋni 3 - Chahta Holisso Holitopa 1886

Satis chʋch hikia ʋbanumpa isht im ʋtta ya̱ nan i̱ miha, 1: 3 ile nukha̱klonchit ilekostinincha chi̱ ka i̱ miha: Filatelfia chʋch hikia ka nan isht im ʋtta yʋto nana ka a̱hlit achunanchit ahanta ka im ahninchi; 15 Laotisea chʋch nan isht im ʋtta ya tuk ʋt libisha keyu, mikmʋt kapʋsa keyu aiena ha tuk o̱ im alʋmmi; 20 Klaist ʋt okhissa ya̱ hikiʋt soko̱ha.

¹ Mikmʋt chʋch Satis a hikia nan isht im ʋtta ya̱ pit ish i̱ holissochashke. Chihowa imi shilombish untuklo, micha fochik untuklo aiena il ai eshi mak osh ilʋppa puta ka achishke: Nana ish a kaniohmi puta, okcha̱ya mak o̱ chi hohchifo ak inli kia, illi yo̱ chia hoka chim ithaiyana lishke.

² Nana kʋt ai ʋlhpiesa a̱hli ho̱ Chihowa itikba ya̱ ish a yʋmohmi na pisa li keyu hoka, ahah! ish il ai ahni cha, nana kʋt illi mak o̱ maha̱ya kia a̱sha moma hatuk okʋno ish hlampkohonchashke.

³ Yohmi kʋt nana ka ish ishi, micha ish haklo aiena tuk ʋt, ithaiyanʋt kʋllochit ish ieshi cha, ish ile kostininchashke. Amba ahah! chik il ai ahno hok mʋno, hu̱kopa nowʋt a̱ya ho̱ chohmi hosh ant chi̱ kohcha la chi̱; yohmi ka hʋshi kanʋlli nana ho̱ ant chi̱ kohcha la chi̱ ka ish ithana hi o̱ keyu hoke.

⁴ Satis ak okʋno holhtina kanomosi kʋt, yʋmmak okʋto im ilefoka ya̱ ik litehlo kʋt, chim a̱shʋshke; yohmi hatuk osh yʋmmak okʋto yʋmmak a he im ai ʋlhpesa hokʋt, na fohka tohbi foyuka cha sʋb ai itʋnowa he mak oke.

⁵ Kʋna hosh nana ka imaiyachit a hlopulli hokʋto, mihi yosh nafohka tohbi a fohka he; yohmikma yʋmma hohchifo hʋt ai okcha̱ya holisso a takali tuk a̱ kashofi la he keyu, amba hohchifo ha̱ A̱ki, micha im enchil ʋhleha aiena itikba ya̱ ai anohonli la he mak oke.

⁶ Kʋna hosh haksobish i̱ hinli hokʋto, Shilombish Holitopa yʋt chʋch ʋhleha ha̱ nan im ok ahanchi puta ka haklashke.

⁷ Mikmʋt chʋch Filatelfia a hikia nan isht im ʋtta ya̱ pit ish i̱ holissochashke: Holitopa, ai a̱hli mak osh, Lewi im isht tiwa ya̱ ieshi hosh, yʋmmʋt okhishta haya, hatak nana hosh wakʋmma he keyu; anonti tiwa haya, hatak nana hosh okhishta he keyu chatuk mak o̱ ilʋppa puta ka achishke.

⁸ Nana ish a kaniohmi puta ka ithana lishke: yakeh! isht hlampko iskʋtinosi kʋt chin takanli cha, ʋm anumpa ha̱ ish holitobli mʋt, sa hohchifo ha̱ chik kancho hatuk oka, okhissa ya̱ tiwit chi tikba ya̱ hilechi li: yohmi ka hatak nana hosh yʋmmak oka okhishta hi o̱ keyu hoke.

⁹ Kanima kʋt mih mak o̱ keyu kʋt, Chu mak o̱ ile mihʋt holabi ʋhleha hʋt Setan i̱ sinakak atuk a̱ atokolit anoli la chi̱ hoke: yakeh! yʋmma puta kash ot chiyi ituma ya̱ ai ʋlʋt ant aiokpʋchi hosh, ʋno ʋt chi̱ hullo li hatuk a̱ akostinincha hi a̱ im anukfilli la chi̱ hoke.

¹⁰ Chishno ʋt nuktanlʋt ish achunancha hi chim apesa li tok ʋm anumpa ha̱ ish holitobli tuk oka, ʋno ak kia na palʋmmi yʋmmʋt yakni pakna a̱sha puta ka imomaka pisa chi̱ mak osh yakni pakna onʋtuyula hi oka, hʋshi kanʋlli yʋmma fehna ka chi hlakofihinchi la he oke.

¹¹ Yakeh! chekosi ʋla la chi̱ mak oke: nana ish i̱shi yʋmmak atuk ʋt kʋllochit ish ieshi pulla na iachuka ha̱ hatak nana kia ik chim esho kashke.

¹² Kʋna hosh nana ka imaiyachit a hlopulli hokʋno mihi yo̱ an Chihowa in tempel in toni̱k o̱ ikbi la he: yohmikma yʋmmak atuk mʋt nitak nana ik kohcho ka he mak oke: yohmikma an Chihowa hohchifo, mikmʋt an Chihowa in tʋmaha chito hohchifo, yʋmmʋt Chelusalem himona, an Chihowa ak o̱ minti hosh ʋba yakni a̱ a kohchʋt ʋla hatuk a̱ yʋmma isht a holissochi la he, mikmʋt, sa hohchifo himona ma yʋmmak ash isht a holissochi la hi oke.

¹³ Kʋna hosh haksobish ʋt i̱ hinli hokʋto, Shilombish Holitopa yʋt chʋch ʋhleha ha̱ nan im ok ahanchi puta ka haklashke.

¹⁴ Mikmʋt chʋch Laotisea a hikia nan isht im ʋtta ya̱ pit ish i̱ holissochashke: Amen, Nan atokowa anoli a̱hli, Chihowa nana ikbi tok a̱ moma in Tikba mak osh ilʋppa puta ka achishke.

¹⁵ Nana ish a kaniohmi puta ma ithana li ka, chi kapʋssa, keyukmʋt, anonti ik chi lʋshposhke; yohmi ka chi kapʋssa hokmá, chi lʋshpa hokmá, nana tuk okbano, ahni lishke.

¹⁶ Yohmi kʋt chi kapʋssa keyukmʋt, anonti ik chi lʋshpo hosh peh chi libisha ʋmmona hatuk oka, hoitʋt sa takha a kohchit chi kanchi la hi oke.

¹⁷ Nana kʋt an laua kʋt, i̱ shahlit isht ia hatuk osh nana kia sa bʋnna keyu, ish achi; yohmi cha na palʋmmi pihi̱sʋt chilbʋsha, micha nana ik chim iksho, chik hoponayo, nipi bano aiena ho kak osh chik ithano hokʋt.

¹⁸ Nan chin laua chi̱ kʋt, tʋli holisso lakna luak isht imomaka pisʋt ʋlhtaha yo̱ ʋno ak o̱ is san chumpa chi̱, mikmʋt na fohka ish fohka cha, nipi banot hofahya kʋt ik chim iksho ka chi̱ kʋt, ʋno ak o̱ na fohka tohbi yo̱ is san chumpa chi̱, micha nishkin ahama ma an chumpʋt, chi nishkin a̱ ish ahami cha, ish hoponaya chi̱ ka, chi̱ miha lishke.

¹⁹ Kʋna ho̱ ʋno ʋt i̱ hullo li hokʋto, nana ka im olʋbbit kostininchi li chatuk: yohmi hoka nana ka amosholi hosh ish ile kostininchashke.

²⁰ Yakeh! okhissa ya̱ hikiʋt suko̱ho̱ha lishke: Kʋna hosh ʋm anumpa ha̱ haklo cha, okhissa ya̱ tiwi hokma, iba chukowa lish, ibai impa likma, anonti ilap mʋt sʋbai impa chi̱ mak oke.

²¹ Kʋna hosh nana ka imaiyachit a hlopulli hokʋto, mihi yosh, ʋno ʋt imaiyachit a hlopulli lish, A̱ki a̱ awant im ai o̱ binili holitompa ya̱ a binili li kʋt, yʋmmak inli ho̱ chohmit ʋm ai o̱ binili holitompa ya̱ a binila chi̱ ka, im apesa la he mak oke.

²² Kʋna hosh haksobish ʋt i̱ hinli hokʋto, Shilombish Holitopa yʋt chʋch ʋhleha ha̱ nan im ok ahanchi puta ka haklashke.