Nan Otʋni 21 - Chahta Holisso Holitopa 1886

Ʋba ʋmmona micha yakni ʋmmona ita tuklo ka Chan ʋt pisa, 1; 10 Chelusalem ʋba isht annoa a̱hli moma; 23 yʋmmak oka hʋshi ʋt a tomma he ahna he keyu, Chihowa im atohwikeli yak osh a tommi; 24 yakni pakna ai i̱ mi̱ko puta kʋt yʋmmak o̱ im aholitopa ya̱ isht im oho̱na.

¹ Ʋba ʋmmona, micha yakni ʋmmona ita tuklo kash ot ont ik ai iksho ma, anonti himak a pilla ma okhʋta mʋt iksho ka chi̱ ho̱ ʋba himona, micha yakni himona ita tuklo ho̱ pisa li tok.

² Mihma Chan sia hʋt tʋmaha chito holitopa Chelusalem himona Chihowa ya̱ a mintit ʋba ya̱ auet a kohcha kʋt, ohoyo himita hatak auwaya chi̱ hosh isht il a shema chatuk ak o̱ chiyuhmi tok.

³ Yohmi ma anumpa ola chinto kʋt ʋba aholitopa ya̱ a kohcha na haklo li ma, yakeh! Chihowa hʋt im ʋlhtipo yʋt hatak puta ka ibafoyuka hatuk o̱, yʋmmak o̱ ibai ahanta chi̱, mikma im okla tobakma, anonti Chihowa ilap mʋt yʋmma in Chihowa hosh ibafoyukʋt ahanta chi̱ hoke.

⁴ Mikmʋt Chihowa yʋt yʋmma i̱ nishkin okchi puyuta ma im a kasholichit kaiyancha chi̱; mikma nana ti̱kba tuk ʋt ont taiyaha hoka, himak a pilla ma isht ai illi, micha na‐nukha̱klo, micha yaha̱ya aiena kʋt ik ai iksho ka he, mikmʋt na‐hotopa mʋt ik ai iksho ka hi oke, ahanchi tok.

⁵ Yohmi ma ai o̱ binili holitompa o̱ binili yʋmmak ash ot, Yakeh! nana moma kʋt himona ho̱ ikbi lishke, achi mʋt, yʋmmak ash ot, Anumpa ilʋppʋt aia̱hli, micha na miha ka ont ai a̱hla chi̱ hoka holissochí, ʋm achi tok.

⁶ Atuk osh yʋmmak ash ot, Ʋlhtaiyahʋshke; Alfa, micha Omeka, ai isht ia ʋmmona, micha ont ai ʋhli sia hosh, kʋna hosh itukshila hokma, oka ai okcha̱ya kʋli hak o̱ pilla ai ima la chi̱ mak oke.

⁷ Kʋna hosh nana ka imaiyachi tuk mak osh nana moma ka ai immi ha chi̱ im ai ʋlhpiesa; mikma in Chihowa sia hokma, anonti ilap ʋt sʋso ha chi̱ hoke.

⁸ Amba na nukshopa, micha nan ik yimmo, i̱ yuwala he ʋlhpesa kia yʋmihchi, mikmʋt hatak bi̱ka ʋbi ʋhleha, haui ʋhleha, mikmʋt ikhi̱sh isht yushpakʋmmi ʋhleha, na holbʋt toba aiokpʋchi ʋhleha, holabi puta a moyuma hokʋto atukla illi mak osh okhʋta yʋmmak okʋt hituk lakna isht ita luhu̱wa ho̱ isht ai i̱ palʋmma chi̱ hosh im ʋlhpisa he mak oke, ʋm achi tok.

⁹ Yʋmohmi ma enchil untuklo kash ai ibai achʋfa, yʋmmak okʋt kotobushi untuklo nan isht palʋmmi ishtaiyopi untuklo kash isht alotowa ho̱ ieshi hosh, ʋlʋt sʋt im anumpuli mʋt, Mintí, himona nan auwaya Chukfʋlhpobushi tekchi chi̱ haiakʋchi la chi̱ hoke, achi tok.

¹⁰ Mihma shilombish o̱ si anukfoyuka ho̱ sʋsht ia ma, nʋnih chinto chaha yo̱ sʋsht ona cha, tʋmaha chito, Chelusalem holitopa yʋt Chihowa isht im aholitopa ai ishit Chihowa a mintit, ʋba aholitopa auet a kohcha mak o̱ a̱ haiakʋchi tok:

¹¹ Mihma in tohwikeli hʋt tʋli holitopa fehna, tʋli chaspa chohmi kak o̱ hoyulba hosh, bʋlancha kʋt klistal o̱ chiyuhmi tok;

¹² Mihmʋt tʋli yosh isht a holihta kʋt chito, micha cha ha ma, anonti okhissa yʋt im auah tuklo ma, enchil mʋt okhissa ya̱ ʋlhpi̱sʋt auah tuklo kʋt a hieli tok; mihma yʋmma ai o̱ holisso hohchifo kʋt Islael okla it a kʋshkowa auah tuklo i̱ hohchifo hatok.

¹³ I̱ hʋshi akochak‐imma ya̱ okhissa tuchina ma, i̱ falʋmmi imma ya̱ okhissa tuchina ma, im oka‐mahli imma ya̱ okhissa tuchina ma, anonti i̱ hʋshi ai okʋtulik‐imma ya̱ okhissa tuchina tok.

¹⁴ Yohmi ma tʋmaha chito a holihta ka in tolahpi auah tuklo tok; mihma Chukfʋlhpobushi im anumpeshi auah tuklo hohchifo hosh a lapanli tok.

¹⁵ Yohmi ma sʋt im anumpuli tuk yʋmmak ash ot tʋmaha chito, micha okhissa, mikmʋt a holihta aiena ka isht apesa chi̱ kʋt tʋli holisso lakna nan isht ʋlhpisa yo̱ ieshi tok.

¹⁶ Yohmi ma tʋmaha chito yʋt a itilauia bat fullotʋt bolukta ma, afalaiaka yʋt chito kʋt okhowataka ya̱ itilaui tok; mihma tʋmaha chito yash yʋmmak ash ot nan isht ʋlhpisa yash isht apesa ma, kowi tahlepa auah tahlapi tok. Afalaiaka pilla, micha okhowataka pilla, mikmʋt chaha aiena kʋt ai itilaui bano tok.

¹⁷ Mihmʋt aholihta kash o̱ hatak i̱ nan isht ʋlhpisa yo̱ yʋmma enchil ash ot isht apesa ma, kubit tahlepa achʋfa pokoli ushta akucha ushta tok.

¹⁸ Yohmi ma a holihta kʋt chaspa tʋli yosh toba hatok; yohmi hoka tʋmaha chito yʋt tʋli holisso lakna bieka ho̱ chohmi kʋt apisa kashofa achukma ka chohmi tok.

¹⁹ Yohmi ka tʋmaha chito aholihtaka in tolahpi ʋt tʋli holitopa ilaiyuka puta ho̱ isht a shema hatok; in tolahpi ʋmmona kʋt chaspa yatok; atu̱kla kʋt saffaia yatok; atuchina kʋt kalsetoni yatok; ai ushta kʋt emelal atok;

²⁰ Isht tahlapi kʋt salonik atok; isht hannali kʋt satiʋs atok; isht untuklo kʋt klisolait atok; isht untuchina kʋt belil atok; isht chakkali kʋt topas atok; isht pokoli kʋt klisofasʋs atok; isht auah achʋfa kʋt chasinlh atok; isht auah tuklo kʋt amehlist atok.

²¹ Yohmi ma okhissa isht ʋlhkʋma auah tuklo kʋt pʋl auah tuklo tok; okhissa isht ʋlhkʋma achʋfakma, pʋl achʋfʋt ia tok; yohmi ma tʋmaha chito anu̱kaka ya̱ ai itʋnowa yʋt tʋli holisso lakna bieka ho̱ chohmit apisa shohkoali kak o̱ chiyuhmi tok.

²² Yohmi ma yʋmma anu̱kaka ya̱ tempel a̱ ak peso ki tok: Chitokaka Chihowa nana moma imaiya, micha Chukfʋlhpobushi ita tuklo hosh in tempel oka.

²³ Mihma Chihowa im aholitopaka yosh a tohwikeli ma, anonti yʋmma ai i̱ pʋla hʋt Chukfʋlhpobushi yak atuk o̱, hʋshi, mikmʋt hʋshi‐ninak‐a̱ya kia im a tomma hi a̱ tʋmaha chito yash ot ik bʋnno ki tok.

²⁴ Yohmi ka oklushi puta yʋmmak okʋt okcha̱ya mak osh a tohwikeli ka ya̱ ai itʋnoho̱wa he; mikma yakni pakna a mi̱ko ʋhleha atukmʋt ilap im aholitopaka isht aiokpʋchi hosh ai ʋlʋshke.

²⁵ Yʋmmak oka ninak ʋt iksho ka chi̱ hoka, nitak moma ka okhissa puta mʋt ik okshilito kamohma hi oke.

²⁶ Yohmikma oklushi puta im aholitopa, nan isht il ahninchi aiena ma yʋmma anu̱kaka ya̱ isht ai ʋlʋt chukowa hi oke.

²⁷ Mikma yʋmmak oka nana kʋt liteha, micha ai yuwala he kia ai yohmi, micha na holabichi a moyuma hokʋto kaniohmi kia a chukowa himma keyu hoke; amba Chukfʋlhpobushi i̱ holisso ai okcha̱ya kʋna hosh a holisso tok ak bana hi oke.