Nan Otʋni 20 - Chahta Holisso Holitopa 1886

Setan ʋt tala̱kchi na afʋmmi tahlepa sipokni achʋfa chi̱, 1; 6 illi yʋt tani ʋmmona yʋmma ai ib ahalaia hokʋto na yukpa he; 7 chekosi takla ka Setan ashot i̱ holhtofa he. 8 Kok micha Makok imma ho̱ isht anumpuli. 10 Okhʋta hituk lakna isht aluhu̱wa ho̱ Setan amo pit itakanchi; 12 nan ʋlhpisa chinto isht aiyopi.

¹ Yohmi ma enchil ʋt chiluk hofobi ont ai ʋhli iksho ash isht tiwa ieshi mʋt, tʋli itatakʋli chito yosh ibbak a foyuka hosh ʋba ya̱ a minti ho̱ pisa li tok.

² Mihma yʋmmak ash ot sinti chilita chito yash, sinti sipokni, yʋmmʋt nan isht ahullo, micha Setan mak o̱ afʋmmi tahlepa sipokni achʋfa ka ona chi̱ ho̱ ishit yukachi tok.

³ Mihmʋt yʋmmʋt himmakma oklushi puta ik yoshublo ho̱ afʋmmi tahlepa sipokni achʋfa he tuk ʋt ont ai a̱hli ha yo̱, misha pilla ho̱ chekosi itintakla ka i̱ hlitofa hi o̱, yʋmmak ash chiluk hofobi ont ai ʋhli iksho ash pit pilʋt im okshita mʋt, isht in chu̱wa on lapalichi tok.

⁴ Mihma ai o̱ binili holitompa puta ka pisa li tok, mihma yʋmma o̱ binohma̱ya kʋt nan ai apihi̱sa he im ʋlhpisa tok: yohmi ma nampoa nukshopa, mikmʋt i̱ holbʋt toba aiena ka ik aiokpacho, mikmʋt isht in chu̱wa yʋt ilap ibitakla, ibbak aiena ka ik a lapalo hosh; Chisʋs nan isht im atokowa, micha Chihowa im anumpa pulla ho̱ noshobo hʋt tahampa tok ʋhleha imi shilombish a̱ pisa li ma, yʋmmak ash ot okcha̱ya cha afʋmmi tahlepa sipokni achʋfa ka, mi̱ko yo̱ chohmit Klaist a̱ ibai ahanta tok.

⁵ Amba illi inla ma̱ya tok okʋto ik okcha̱yo ho̱ afʋmmi tahlepa sipokni achʋfa kʋt tahak mak a hi atok. Ilʋppak osh illit falamʋt tani ʋmmona mak oke.

⁶ Illit falamʋt tani ʋmmona ka kʋna hosh ibahalaia hokʋto, mihi yosh na yukpʋt holitopa: yohmi hokʋno atukla illi ʋt nan isht i̱ shahla he ik im iksho hoke; Chihowa, micha Klaist na holitompa isht im ʋtta ʋhleha ha chi̱, mikmʋt mi̱ko yo̱ chohmit ibai ahanta na afʋmmi tahlepa sipokni achʋfa chi̱ hoke.

⁷ Yʋmohmi tuk ma afʋmmi tahlepa sipokni achʋfa kash ot ont ataiyahakma, Setan ash ot aboha kʋllo a̱ ik akohchá, im ai ahna hi oke.

⁸ Yohmikmak o̱ oklushi puta, yʋmmak okʋt yakni pakna akʋshkowa ushta ka ai asha Kok, micha Makok okla yʋmmʋt holhtina kʋt okhʋta alaka shinuk ai asha kak o̱ chiyuhmi ho̱ yoshublihinchit itahobi cha, tanahampa chi̱ hosh akohcha hi oke.

⁹ Mihmʋt yʋmmak ash ot, yakni pakna a mominchit ilhkoli mʋt, yʋmmʋt ʋbanumpuli a̱hli ʋhleha i̱ bina, mikmʋt tʋmaha chito holitopa aiena ka okla ai apakfokahanchi; mihma luak osh Chihowa a mintit ʋba akohchʋt ʋlʋt, yʋmmak ash ishit ʋpa tok.

¹⁰ Yohmikma yʋmma yoshublichi tuk nan isht ahullo yʋt okhʋta hituk lakna isht ita luhu̱wa, yʋmma nampoa nukshopa, micha hopaii ilahobi aiena kash ot pit itʋtula tok: yohmi kʋt nitak, ninak aiena ka ai ilbaha̱sha na bilia hosh bilia hi oke.

¹¹ Yohmi ma ai o̱ binili holitompa tohbi chinto, micha yʋmma o̱ binili ita tuklo ka pisa li ma; yʋmma nashuka ya̱ i̱ filʋmmit yakni, mikmʋt ʋba shutik ita tuklo kʋt tamoa kʋt, kanima yo̱ a taloha he kia ik im iksho ki tok.

¹² Yohmi ma illi, ik alauwo, micha i̱ shahli pit aiena kʋt ai o̱ binili holitopa itikba hiohma̱ya ka pisa li tok; yohmi ma holisso puta kʋt wakama tok; anonti holisso inla, yʋmmak osh holisso ai okcha̱ya mak osh wakama tok: mihma illi yash ot ilap nana a kaniohmi tuk puta, yʋmmʋt holisso ha̱ a holihi̱so tok ilʋppa puta ho̱ isht ai im ʋlhpihi̱sa tok.

¹³ Yohmi ma okhʋta hʋt illi puta, yʋmmʋt im aiasha tuk ʋt il ai a kocha welikma, anonti nan‐illichi, micha illi ai asha mʋt illi puta, yʋmmʋt im ai asha tuk ʋt il ai a kohcha weli na yʋmmak ash ot ilap nana a kaniohmi puyulla tuk mak o̱ hatak moma kash ot nan isht im ʋlhpihi̱sa tok.

¹⁴ Mihma nan‐illichi, micha illi ai asha yamo okhʋta luak o̱ pit itokaha tok. Ilʋppak osh atukla illi mak oke.

¹⁵ Yohmi ka holisso ai okcha̱ya ya̱ a holisso tuk osh otʋni keyu hokʋto okhʋta luak mak o̱ pit a kʋnia tok.