Nan Otʋni 2 - Chahta Holisso Holitopa 1886

Efesʋs, 1, 8 Smʋna, 12 Pʋkamos, 18 Hlaiatila aiena chʋch a hiohli ka ʋbanumpa isht im ʋtta puta nana ho̱ pit i̱ holissocha chi̱ ka Chan a̱ im apesa kʋt, nana kʋt ai ʋlhpiesa, anonti nana ka ik ai onot aiasha kak a tok.

¹ Chʋch Efesʋs a hikia nan isht im ʋtta ya̱ pit ish i̱ holissochashke: Ibbak isht impak imma ya̱ fochik untuklo ka isht ieshi cha, tʋli holisso lakna pʋla ai o̱ hikia untuklo ho̱ iklʋnna a noho̱wa yak osh ilʋppa puta ka achishke.

² Nana ish a kaniohmi puta, nan isht ahantʋt a chi hoyʋbli, nuktanlʋt ish achunanchi, mikmʋt ai ʋlhpiesa keyu ʋhleha ha̱ kaniohmit ish im ahninchi keyu, yohmikmʋt kʋna kia ilap ak osh ʋbanumpeshi mak o̱ ile miha hatuk kia, keyu hatuk puta ka imomaka pisʋt holabi atuk o̱ ish akostininchi:

³ Micha nana kʋt palʋmmi ka ish pihi̱sa kia, nuktanlʋt ish achunanchi, mikmʋt ʋno sa hohchifo pulla hatuk mak o̱ ish toksahanli mʋt, ik chi hoyʋblo a puta hatuk a̱ chim ithaiyana lishke.

⁴ Yohmi nana kia ʋmmona ka nan i̱ hullo chi anukfoyuka tuk ʋt chik a lauecho hatuk o̱, nana ka isht ak chim ahnincho kʋt ʋm a̱shʋshke.

⁵ Yohmi hoka kanima yo̱ a hikiʋt ik a lauwot ish ia tuk ʋt pit anukfihinlit, ish ile kostininchi cha, nan isht ish ai ʋtta ʋmmona tok ak o̱ ish yʋmihchashke: yʋmmak keyukma chekosi chim a̱ya likmʋt, ish ile kostininchi ho̱ keyukma, chi̱ pʋla ai o̱ hikia ya̱ ishit, a hikia tuk a̱ kanʋllichi la hi oke.

⁶ Amba chishno yokʋto ilʋppak o̱ a chi yakohmi hatuk osh, Nikolaitan okla nana a kaniohmi puta ka chik ahnincho ka, yʋmma ʋno ak kia ak ahninchoshke.

⁷ Kʋna hosh haksobish ʋt i̱ hinli hokʋto, Shilombish Holitopa yʋt chʋch ʋhleha ha̱ nan im ok ahanchi puta ka haklashke. Kʋna hosh nana ka imaiyachit a hlopulli hokʋto, mihi yosh ai‐okcha̱ya iti Chihowa i̱ Palatais iklʋnna hikia hatuk ma ai ʋpa hi a̱ ima la hi oke.

⁸ Mikmʋt chʋch Smʋna a hikia nan isht im ʋtta ya̱ pit ish i̱ holissochashke. Ʋmmona, micha ont ishtaiyopi aiena, yʋmmak osh illi tok ʋt, okcha̱yʋt ahanta mak osh, ilʋppa puta ka achishke.

⁹ Nana ish a kaniohmi puta, mikmʋt na palʋmmi ish a pihi̱sa puta, micha ilbʋsha chim aiena, (yohmi kia nana kʋt chin laua ka ithana li,) mikmʋt kanima kʋt nana ka ik ahobalot anumpulit mihi yo̱ keyu kʋt, amba Setan i̱ sinakak mak okak osh, Chu mak o̱ ile mihʋt aiasha ka, ithana li hoke.

¹⁰ Nana kʋt isht chi ai ilbʋsha he puta a̱sha ka chik i̱ komunto kashke. Yakeh! hʋsh kanima ka hʋch imomaka pisa chi̱ ka, Setan ʋt aboha kʋllo a̱ hʋchi apitta he; yohmikma nitak pokoli ho̱ na palʋmmi hʋsh pisa chi̱ hoke: ai a̱hlit ma̱ha̱yʋt ont chillashke; yohmikma iachuka okcha̱ya yo̱ chima la he mak oke.

¹¹ Kʋna hosh haksobish ʋt i̱ hinli hokʋto, Shilombish Holitopa yʋt chʋch ʋhleha ha̱ nan im ok ahanchi puta ka haklashke. Kʋna hosh nana ka imaiyachit a hlopulli hokʋto, ai illi atukla ka ik im a palʋmmo ka he mak oke.

¹² Mikmʋt chʋch Pʋkamos a hikia nan isht im ʋtta ya̱ pit ish i̱ holissochashke: Bʋshpo falaia itahla̱kla halupa i̱shi mak osh ilʋppa puta ka achishke.

¹³ Nana ish a kaniohmi puta, mikmʋt kanima yo̱ Setan ʋt apehlichi yʋmmak kia ish ai ʋtta ka ithana lishke; yohmi kʋt sa hohchifo hatuk ma kʋllochit ish ieshi mʋt, anonti Antipas yʋmmak okʋt ʋm antia ai a̱hlit atokowa otʋninchi yosh hʋchi ta̱kla ahanta tok a̱ Setan ai ʋtta yak o̱ ai ʋbi tok nitak foka kak kia, ʋno a̱ is sai yimmi tuk ʋt chik kancho tok a̱ ithana lishke.

¹⁴ Yohmi kia na holbʋt toba puta isht aiokpʋchi tuk puta ka ʋpa chi̱, mikmʋt itin luma̱ka ma yʋmohma chi̱ ka, Islael okla itikba ya̱ isht ai ibetʋbli i̱ bohla chi̱ ka Belam ʋt Balak a̱ im abʋchi tok nan ʋlbʋchi ilʋppa holitobli ʋhleha yʋmmak o̱ ish il a pehlichi hoka, nana ka isht ak chim ahnincho ka achafoa kʋt ʋm a̱shʋshke.

¹⁵ Yohmi mʋt anonti Nikolaitan okla nana isht ithʋnanchi yʋmmak oka ak ahnincho chatuk mak o̱, mihi yo̱ holitobli ʋhleha yʋmmakma ish il apehlichi ak inlishke.

¹⁶ Ile kostininchí; yʋmmak keyukma chekosi fehna chim a̱ya lish, okla yʋmmak oka bʋshpo falaia sʋtih a kohcha hatuk ma ont isht itibi la he mak oke.

¹⁷ Kʋna hosh haksobish ʋt i̱ hinli hokʋto, Shilombish Holitopa yʋt chʋch ʋhleha ha̱ nan ok im ahanchi puta ka haklashke. Kʋna hosh nana ka imaiyachit a hlopulli hokʋto, mihi yosh manna lumpoa ʋpa chi̱ ka ima likmʋt, anonti tʋli tohbi yo̱ yʋmma hohchifo himona yosh a holisso, yohmi ka yʋmma hatak nana hosh ithana he keyu, amba ishi tuk ak illa hosh akostininchi mak o̱ ima la hi oke.

¹⁸ Anonti chʋch Hlaiatila a hikia nan isht im ʋtta ya̱ pit ish i̱ holissochashke: Chihowa Ushi yʋmmʋt nishkin ʋt luak libbi ho̱ chiyuhmi ma, iyi mʋt tʋli lakna malanta achukma ho̱ chiyuhmi mak osh ilʋppa puta ka achishke.

¹⁹ Nana ish a kaniohmi puta, micha ish i̱ hullo, nan isht ish ahanta, na chi yimmi, nuktanlʋt ish achunanchi, mikmʋt nana ish a kaniohmi puta, yohmi kʋt ont ishtaiyopi kak osh tikba ya tok a̱ imaiyachi ka chim ithaiyana lishke.

²⁰ Yohmi nana kia ohoyo Chesebel, yʋmmak okʋt ohoyo hopaii mak o̱ ile miha hosh, yʋmmʋt an tishu ʋhleha ha̱ nan im abʋchit, yoshubli na itin luma̱ka yʋmohma he, mikmʋt nana ka na holbʋt toba yo̱ isht aiokpʋchi tuk puta kia ʋpʋt ai asha hi a̱, ʋlhpesa ish im ai ahni hatuk oka, nana ka isht ak chim ahnincho ka achafoa kʋt ʋm a̱shʋshke.

²¹ Yohmi mʋt itin luma̱kʋt ahanta chatuk ʋto ai ile kostinincha chi̱ ka nitak a̱ ima li tok, nana kia ile kostinincha he keyu ki tok.

²² Yohmi hoka yakeh! yʋmma atuk ma topa pakna yo̱ pit ai om bohli likmʋt, yʋmma itin luma̱ka yatuk ma na palʋmmi chinto ka onochi la chi̱ hoke; nana a kaniohmi yatuk puta kʋt ai ile kostininchi ho̱ keyukma.

²³ Mikmʋt ohoyo yʋmma im ʋlla ʋhleha hatuk ma illi mak o̱ isht ahambi la chi̱ hoke; yohmikma ʋno ak osh hatak chu̱kʋsh nana ai ahni puta ka afʋnalechit ithana sia hatuk a̱ chʋch ʋhleha puta kʋt ithaiyana he mak oke: yohmikma hʋchishno hʋsh a kaniohmi puta kak o̱ isht ai ʋlhpesa aiyukali mak o̱ hʋch ima la hi oke.

²⁴ Yohmi kia hʋchishno, micha inla Hlaiatila ma̱ya aiena, laua kʋt kaniohmi hosh nan ʋlbʋchi ilʋppak ash ik ahnincho, micha Setan ʋt im anukfila ont ai ʋhli mak o̱, okla miha ka, ik ithano hʋchia hokʋno na weki inla nana ho̱ hʋchi onochi la chi̱ ho̱ keyu, hʋchim achi lishke.

²⁵ Amba nana ka hʋsh ieshi ma̱shko hatuk okʋto, kʋllochit hʋsh i̱shi na ʋla li hayashke.

²⁶ Yohmikma kʋna hosh nana ka imaiyachit, nana kʋt yakohma he ahni li ka holitoblit im antiʋt a hlopulli hokʋto, mihi yosh oklushi puta hatuk ma i̱ shahla he mak o̱, ʋno a̱ A̱ki ʋt ʋm apesa tok a̱, chohmichit im apesa la he mak oke:

²⁷ Yohmikma yʋmmak ash ot tʋli fuli toba ho̱ ieshi hosh yʋmma nan im apihi̱sa he; mikma yʋmmak atuk mʋt shuti tʋna yosh na tʋna tuk o̱ bushullit tʋmoa chatuk a̱ chiyuhma hi oke.

²⁸ Yohmikma yʋmmak amo onnahinli fochik a̱ ima la he mak oke.

²⁹ Kʋna hosh haksobish ʋt i̱ hinli hokʋto, Shilombish Holitopa yʋt chʋch ʋhleha ha̱ nan im ok ahanchi puta ka haklashke.