Nan Otʋni 18 - Chahta Holisso Holitopa 1886

Babulon ʋt akama 1; 4 Chihowa im okla hʋt yʋmma akocha chi̱ kʋt im ʋlhpisa; 11 yakni pakna a mi̱ko ʋhleha, mikmʋt na chumpa, okhʋta a̱ya ʋlheha aiena kʋt isht ya̱ha̱ya; 20 Chihowa nan im ʋlhpisa na palʋmmi kʋt onʋtula hoka, ʋbanumpuli puta kʋt na yukpa.

¹ Aiyakohmi ha ya, anonti enchil inla yʋt nan isht ai a̱hli chinto ieshi hosh, ʋba a mintit aka ʋla na pisa li tok: mihma yʋmma i̱ shohpakali yo̱ yakni ʋt isht a tohwikeli tok.

² Mihma yʋmmak ash ot anumpa ola chinto ka isht chitoli fehnʋt tahpʋla mʋt, Babulon na‐chinto yash ot aiokpulokʋshke, aiokpuloka mak oke: yohmi mʋt nan isht ahullo okpulo puta im aboha kʋllo, micha shilombish ik kashofo, mikmʋt hushi okpulo ik kashofo moma ka in chuka yo̱ toba mak oke.

³ Yʋmmʋt nan itin luma̱ka nan isht haksichi oka pa̱ki yo̱ okla momʋt ishko tok, mihma mi̱ko ʋhleha yakni pakna ai asha kʋt yʋmma ai itinluma̱ka tok; mihma na chumpa ʋhleha yakni pakna ai asha kʋt, nan ilimpa hochukma in laua kak o̱ nan in laua toba tok oka, ahanchi tok.

⁴ Anonti anumpa ola inla yʋt ʋba aholitopa ya̱ a minti mʋt, Ʋm okla hʋchia mʋt, yʋmma nan im ai ashʋchi puta ka, mikmʋt na‐palʋmmi im ʋlhpisa puta ka hʋch ik ibai esho ka chi̱ kʋt, yʋmma a kohchʋt ho mintí.

⁵ Yʋmma nan im ai ashʋchika puta kʋt ʋba shutik a̱ ont a bikeli hatuk o̱, Chihowa hʋt, yʋmmʋt nan ik ai ʋlhpeso puta ka ithaiyana tok oke.

⁶ Nana ka hʋchi̱ yʋmihchi tok mak o̱ chohmichit oh i̱ yʋmihchí; mikmʋt nana ka a yʋmihchi tok a̱ ʋlbita ho̱ apesʋt oh im ʋlbitelichí; isht ishko yʋmma alotoli ka, ilap ma ʋlbitelit oh im alotolí.

⁷ Ilap inli ile holitoblichi kʋt, mihma nan ilimpa champuli isht il ai atahlit, impʋt anta kʋt kaniohmi hatuk okma, yʋmma chohmichit na palʋmmi, na‐nukha̱klo aiena ka oh imá; I̱ hatak illi sia keyu, yohmi kʋt na‐nukha̱klo pisa la chi̱ keyu, ohoyo mi̱ko sia hosh binili li, ilap chu̱kʋsh anu̱kaka achi hoka.

⁸ Yohmi hoka na palʋmmi puta, nan illi, yaiya, mikmʋt hohchʋfo aiena kʋt nitak achʋfa ka im a̱ya chi̱; mikmʋt yʋmmak ash ot luak o̱ isht hullukmit taiyaha chi̱ hoke; Chitokaka Chihowa hʋt hlampko hokʋt, yʋmmak ash nan im apesʋt i̱ palʋmmichishke.

⁹ Yohmikma mi̱ko ʋhleha yakni pakna ai asha kʋt yʋmma ai itin luma̱kʋt, nan ilimpa champuli ai it atahlit impʋt ai asha tuk ʋt, yʋmmʋt luhu̱wʋt shobulli ka okla pisa cha isht yaha̱yʋt, nishkin okchi mihinti mʋt,

¹⁰ Yʋmmʋt nan isht i̱ palʋmmi ka nukshopa hatuk osh, auet i̱ mishema ho̱ hiohma̱yʋt Ikikkeh! ikikkeh! tʋmaha chito, Babulon tʋmaha chinto kʋllo atampa, yʋmmʋt hʋshi kanʋlli achʋfa mak inli ho̱ nan isht palʋmmi chim ʋlhpisa kʋt chim a̱yʋshke.

¹¹ Nan itatoba yakni paknaka ai asha kʋt yʋmmak ash o̱ nan isht nukha̱klot nishkin okchi mihinti tok; ilap im ʋlhpoyak a himak a pilla ma kʋna kia ik in chumpo hoka;

¹² Tʋli holisso lakna, micha tʋli hʋta, micha tʋli holitopa, pʋl, linen lapushki, nahummakbi, silk, na‐tishepa, mikmʋt iti sitlon moma, mikmʋt aifoli, nan ai ʋlhto ilaiyuka moma, mikmʋt iti holitopa fehna nan ai ʋlhto ilaiyuka moma, micha tʋli lakna, tʋli, mabʋl aiena nan ai ʋlhto ilaiyuka moma atoba;

¹³ Mikmʋt sinnamon, na balama, nan ahama, micha fila̱kinsen, oka pa̱ki, na bila, bota tohbi achukma, onush, mikmʋt nampoa puta chukfʋlhpoba, issuba, micha itichanʋli, yuka, hatak shilombish puta aiena kash o̱ kʋna kia ik in chumposhke.

¹⁴ Nan ʋnit waya puta yʋmmak o̱ chi chu̱kʋsh ʋt anushkunna tuk ash a chim afilʋmmi; mihma nana moma na champonli, micha na shohwalʋshli aiena tuk ash ot a chim okpulo; yohmi kʋt himak a pilla ma yʋmmak ash ish ahayucha chi̱ keyu kamohmi hoke.

¹⁵ Nana ilʋppa puta kash nan itatoba, yʋmmak okʋt yʋmmak o̱ nan isht ai in laua tok ʋt, yʋmmʋt i̱ palʋmmi ka nukshopa hatuk osh, auet i̱ mishemanchit hiohma̱yat isht nukha̱klot nishkin okchi mihintit,

¹⁶ Ikikkeh! ikikkeh! tʋmaha chito yʋmmak amo! yʋmmak okʋt linen lapushki, micha na‐hummakbi, micha na tishepa aiena ka isht ai im ai ʋlhtaha, yohmi kʋt tʋli holisso lakna, micha tʋli holitopa puta pʋl aiena ho̱ isht a shema tok amo!

¹⁷ Nan laua chinto yakohmi kash ot hʋshi kanʋlli achʋfa ho̱ ont aiokpulokʋt kʋnia hoka, ahanchi tok. Yohmi ma peni chito isht a̱ya apesʋchi aiyuka, micha peni chito ai asha yatuk moma, micha a toksʋli aiena, mikmʋt okhʋta nan ai itatoba yatuk ʋt momʋt auet i̱ mishemanchit hiohma̱yʋt,

¹⁸ Yʋmmʋt luhu̱wʋt shobulli ka okla pisa mʋt, tahpʋlʋt, Nanta hosh tʋmaha chito ilʋppa chiyuhmi cho? ahanchi tok.

¹⁹ Mihmʋt hituk chubbi okla ishit noshkobo il o̱ fohopli mʋt, tahpʋlʋt, nishkin okchi mihintit yaha̱ya hosh Ikikkeh! ikikkeh! tʋmaha chito yʋmmak amo! yʋmmʋt nan isht il ahayuchit, nan isht shema ai ʋlli hochito puta ka chumpa hatuk mak o̱, okhʋta pakna peni im a takohli ma̱ya moma kʋt nan in laua yo̱ toba kʋmo! hʋshi kanʋlli achʋfa ma yʋmmak ash ot a chukillissʋt kʋnʋishke, ahanchi tok.

²⁰ Ʋba a holitopa chia ma! ʋbanumpeshi holitopa, micha hopaii holitopa hʋchia ma! Chihowa yʋt yʋmmak ash nan im apesʋt i̱ palʋmminchi hokʋt hʋchi atobʋchi hoka, nan isht il oh aiyukpá.

²¹ Yohmi ma enchil chinto yʋt tʋli na‐botoli tʋli chito yo̱ chohmi ka ishit, okhʋta pit pila ma, yʋmma chiyuhmi hosh tʋmaha chito Babulon ʋt ai oklu̱hʋt kinahla chi̱ hoke; mikmʋt himak a pilla ma otaiyana he keyu kamohmi hoke.

²² Yʋmohmikma hap olachi, micha nan taloa, micha oskula olachi, micha isht pu̱fa olachi aiena nan im ola ka himak a pilla ma a chi a haiyakla he keyu kamohmi; mikma hatak nan imponna nana ho̱ isht ai imponna yatuk kia himak a pilla ma a chi otaiyana he keyu; mikma tʋli na botoli kia himak a pilla ma a chi a haiyakla he keyu kamohmi hoke.

²³ Mikma pʋla tohwikeli mʋt himak a pilla ma a chi on tohwikela he keyu; mikma hatak himona nan itauwaya, micha ohoyo nan auwaya im anumpa ola himak a pilla ka a chi a haiyakla he keyu kamohmi hoke: na chin chumpa ʋhleha hʋt yakni paknaka a hochito kʋt ma̱ya tok oka; ikhi̱sh isht yushpakʋmmi isht ish ahanta hatuk mak o̱, oklushi moma kʋt isht yushpakama hatok, ahanchi tok.

²⁴ Yohmi ma hopaii ʋhleha, micha ʋbanumpuli a̱hli ʋhleha, mikmʋt yakni paknaka ya̱ ai ʋbi tok moma im issish ʋt yʋmma ai otaiyani tok.