Nan Otʋni 17 - Chahta Holisso Holitopa 1886

Ohoyo hʋt natishipa humma lapushki yo̱ foyuka mʋt, tʋli hʋta lakna isht ishko toba ho̱ ieshi hosh nampoa nukshopa yash pakna, yʋm mʋt Babulon mak o̱ o̱ binili, 1; 5 noshkobo untuklo kʋt nana ka anoli; 12 mikmʋt lapish pokoli kʋt nana hatuk aiena kʋt annoa ohoyo haui yashot nan i̱ palʋmmi; 14 chukfʋlhpobushi ʋt nan im aiyachi.

¹ Yʋmohmi ma enchil untuklo, yʋmmʋt kotobushi untuklo ieshi tok ʋhleha hash achʋfʋt ant ʋm anumpuli mʋt, olehma minti; haui chinto yʋmmʋt oka la̱wa pakna o̱ binili;

² Yʋmmak o̱ mi̱ko puta yakni pakna ai asha kʋt isht itin luma̱ka tok; yohmi ma ilap nan itin luma̱ka oka pa̱ki a̱ yakni pakna ai asha ʋhleha hʋt ishkot ik haksí im ahni tok, yʋmmʋt nan isht i̱ palʋmmi im ʋlhpisa ka chim otʋninchi la chi̱ hoke, ʋm achi tok.

³ Yohmi ma shilombish si anukfo̱ka ho̱ yʋmmak ash ot ishit yakni haiaka sʋsht ona tok: mihma nampoa nukshopa humma hosh nana ka ik ahobalot miha hohchifo ho̱ isht alotowa mʋt, noshkobo untuklo cha, anonti lapish mʋt pokoli ho̱ ohoyo hosh o̱ binili ho̱ pisa li tok.

⁴ Yʋmohmi ma ohoyo hash ot na hummakbi mikmʋt na tishepa na fohka hosh tʋli holisso lakna, tʋli holitopa puta, mikmʋt pʋl aiena ka isht a shema ho̱ foyuka mʋt, ilap itin luma̱ka isht a liteha na yuwalʋchi puta kʋt tʋli holisso lakna isht ishko yo̱ alotowa hosh ibbak a foyuka tok.

⁵ Yʋmohmi ma, Nan ik otano, na chinto Babulon, haui puta, mikmʋt yakni pakna a yuwalʋchi puta ishki, hohchifo hosh yʋmma ibitakla ya̱ a holisso hatok.

⁶ Yohmi ma ohoyo hash ot ʋbanumpuli ʋhleha im issish, mikmʋt Chisʋs isht im atokowa kak o̱ isht illi tok ʋhleha im issish aiena ka ishkot haksi na pisa li tok; mikmʋt pisa li mʋt, sa nukhlakancha mʋt, okokko! ai ahni li fehna tok.

⁷ Atuk o̱ enchil ash ot, Nanta katiohmi ho̱ chi nukhlakancha tuk oh cho? ohoyo hash, micha nampoa nukshopa yash ot, yʋmmʋt ohoyo ha̱ isht a̱ya kʋt, noshkobo hʋt untuklo mʋt, anonti lapish mʋt pokoli ka nan isht ik im otano ka chim anoli lashke.

⁸ Nampoa nukshopa yash, yʋmma ish pi̱sa tuk a̱ anta tuk osh, anonti ikshoshke; yohmi kia yʋmmʋt chiluk hofobi ai ʋhli iksho a̱ auet a kohcha chi̱ hoke; mikmʋt aiokpuloka ont chukowa chi̱ hoke: mikma yakni pakna ai asha puta kʋt, kʋna hosh i̱ hohchifo hʋt yakni toba tok taiyakla ka holisso ai okcha̱ya ya̱ a holisso tok keyukmʋt, nampoa nukshopa, yʋmmʋt anta tok osh, anonti iksho kia, anonti anta ak inli ka okla pisakmʋt, nukhlakancha chi̱ hoke.

⁹ Yohmi ka ilʋppak o̱ nan ithana anukfohka kak osh akostininchishke. Noshkobo untuklo kʋt nʋnih hochito untuklo mak o̱ yʋmma pakna ya̱ ohoyo hash ot o̱ binili hoke.

¹⁰ Mikma mi̱ko untuklo kʋt ai asha ka, tahlapi hosh iksho ma, achʋfa kʋto anta, mikma achʋfa kʋto ik lo ki̱sha hoke; mikmʋt kaniohmi ho̱ yʋmmʋt ʋla hokmʋt, chekosi ai itin takla ho̱ anta chi̱ hoke.

¹¹ Anonti nampoa nukshopa yash ot, yʋmmʋt anta tok osh, anonti iksho kʋt, yʋmmak ash kia isht untuchina kʋt, isht untuklo kak o̱ ibai achʋfa hosh aiokpuloka ya̱ pit a chukowa mak oke.

¹² Mihma lapish pokoli ho̱ ish pi̱sa tuk ash mi̱ko pokoli hoke; yʋmmʋt apehlichika ik im iksho ki̱sha hoke; yohmi kia mi̱ko ʋhleha chohmit hʋshi kanʋlli achʋfa ka nampoa nukshopa yash ibai achʋfʋt nan isht ai a̱hli yʋt im ʋlhpisa hoke.

¹³ Ilʋppak ash ot, im anukfila hʋt achʋfa cha, anonti ilap nan isht im ai a̱hli, mikmʋt im ile hlampko ita tuklo ka nampoa nukshopa yash ima chi̱ mak oke.

¹⁴ Mikmʋt ilʋppak ash ot Chukfʋlhpobushi ya̱ itintanampa chi̱, mikma yʋmmak okʋt chitokaka ʋhleha in Chitokaka, micha mi̱ko ʋhleha i̱ Mi̱ko yokʋt Chukfʋlhpobushi yash ot yʋmmak ash o̱ imaiyacha chi̱ hoke; yohmi ka kʋna hosh yʋmma ai ibachʋfa hokʋto ʋlhtoka, mikmʋt ai a̱hli, micha holitopa mak oke, ʋm achi tok.

¹⁵ Mihmʋt oka puta yʋmma ish pi̱sa tuk a̱, haui yash osh yʋmma o̱ binili ka, hatak okla chinto, oklushi puta im anumpa ilaiyuka mak oke.

¹⁶ Mikmʋt lapish pokoli, yʋmmʋt nampoa nukshopa on talohma̱ya na ish pi̱sa tuk, ilʋppak okʋto na haui yash i̱ nukkillit, a chukillissʋchit nipi banochi cha, nipi a̱ ʋpa cha, anonti luak a̱ isht hukma hi oke.

¹⁷ Chihowa yʋt yʋmmak ash chu̱kʋsh anukfohki na ilap nan ai ahni ho̱ ai a̱hlicha chi̱ ka im anukfila achʋfa hosh ilap im apehlichika yatuk ma nampoa nukshopa yash ihi̱ma na Chihowa im anumpa puta kʋt ont ai a̱hlik mak a hi oke.

¹⁸ Yohmi ka ohoyo yʋmma ish pi̱sa tuk ʋt tʋmaha chito mak oke, yʋmmak osh mi̱ko ʋhleha yakni pakna ai asha ka ai i̱ shahli mak oke, ʋm achi tok.