Nan Otʋni 16 - Chahta Holisso Holitopa 1886

Nan isht i̱ nukkilli kotabushi alota kash o̱ enchil ʋt fohopli, 1; 6 mih ma na palʋmmi hosh a̱ya; 15 hu̱kopa yo̱ chohmit Klaist ʋt ʋla chi̱; mikma kʋna hosh o̱kchʋt hoho̱yo tuk okʋto na yukpa he.

¹ Yʋmohmi ma anumpa ola chinto kʋt tempel a̱ auet a kohcha kʋt, Oh ia cha, Chihowa nan isht i̱ nukkilli kotobushi ai ʋlhto kash yakni pakna oh ai o̱ fohopli, enchil untuklo kash im ahanchi na haklo li tok.

² Mihma ʋmmona kash ot ia mʋt, ilap i̱ kotobushi ʋlhto kash yakni ont o̱ fohopli tok; mihma kʋna hosh nampoa nukshopa isht in chu̱wa ya̱ isht ai in chu̱wa tok, mikmʋt kʋna hosh yʋmma holbʋt toba ya̱ aiokpahanchi tok hatak puta kash o̱ hichi okchushba nan okpunlo kʋt onʋtuyula tok.

³ Anonti enchil atukla kash ot ilap i̱ kotobushi ʋlhto kash okhʋta ont o̱ fohopli tok; mihma hatak illi im issish o̱ chohmit toba na nan okcha̱ya okhʋta ai asha tuk ʋt moyumʋt illit taha tok.

⁴ Anonti enchil atuchina kash ot ilap i̱ kotobushi ʋlhto kash okhina, mikmʋt kʋli puta ka o̱ fohopli tok; mihma yʋmmak ash ot issish o̱ toba tok.

⁵ Yohmi ma oka puta ka im enchil osh okcha̱yʋt ish ahanta kʋt, okcha̱yʋt ish ahanta tok osh, anonti okcha̱yʋt ish ahanta hi osh nana ka yakohmichit ish apesa hoka, Chitokaka ma! nan ai ʋlhpiesa chia hoke.

⁶ Yʋmmak okʋt ʋbanumpuli ʋhleha, mikmʋt hopaii ʋhleha aiena im issish a̱ hlatahambli tok okʋt, ilap mʋt, ai i̱ yʋmohma he ʋlhpesa mak o̱, ishka chi̱ ka issish o̱ ish ihi̱mʋshke, achi ho̱ haklo li tok.

⁷ Anonti inla kʋt alta ya̱ auet a kohcha kʋt, Ik yʋmohmi mʋhli, Chitokaka Chihowa nana moma imaiya ma! nan ai a̱hli ai ʋlhpesa kak o̱ ish apesa yoke, achi ho̱ haklo li tok.

⁸ Anonti enchil ont ai ushta kash ot ilap i̱ kotobushi ʋlhto kash hʋshi yo̱ o̱ fohopli tok: mihma hatak puta ka luak o̱ isht towulhkocha chi̱ ka yʋmmak ash o̱ nan isht ai a̱hli yosh im ʋlhpisa tok.

⁹ Atuk o̱ hatak puta kash ot na lʋshpa chinto ka isht towulhko mʋt, Chihowa, yʋmmak osh na palʋmmi ilʋppa puta ka i̱ shahli yatuk a̱ i̱ hohchifo ha̱ ik ahobalot na mihachi tok; mihmʋt yʋmmak ash o̱ holitoblicha hi atok ʋt okla ik ile kostinincho ki tok.

¹⁰ Yohmi ma enchil ont isht tahlapi kash ot ilap i̱ kotobushi ʋlhto kash nampoa nukshopa yash im ai o̱ binili o̱ fohopli tok; mihma yʋmma im apehlichika ya̱ ai okhlili kʋt kʋnia ma, nan anukhahʋmi hokʋt, isunlʋsh atuk a̱ okla ahampa tok.

¹¹ Mihmʋt hichi okchushbʋt hotohompa hokʋt, ilap nana a kaniohmi tok puta ka okla ai ile kostininchi keyu mʋt, ʋba aholitopa in Chihowa yak o̱ ik ahobalot na mihahanchi tok.

¹² Anonti enchil ont isht hannali kash ot ilap i̱ kotobushi ʋlhto kash okhina chito Euflates a̱ o̱ fohopli tok; mihma hʋshi a kochaka mi̱ko ʋhleha im ata̱ya yʋt ʋlhtaha chi̱ mak o̱, oka yʋmma foyuka tuk ʋt shilʋt taha tok.

¹³ Yʋmohmi ma shilombish ik kashofo tuchina kʋt ha tonlʋbi ho̱ holba hosh sinti chilita itakha, mikmʋt nampoa nukshopa itakha, micha hopaii ilahobi itakha aiena kash akohcha na pisa li tok.

¹⁴ Yʋmmak okʋt nan isht ahullo okpulo imi shilombish ʋhleha hatuk osh, nafehna puta ka yʋmihinchi mʋt, Chihowa nana moma imaiya i̱ nitak a chintokma ai itiba chi̱ mak o̱ itʋnala chi̱ hosh, mi̱ko ʋhleha yakni moma ai asha ka iʋt im oho̱nʋshke.

¹⁵ Yakeh! hu̱kopa yo̱ chiyuhmit ʋla lishke; isht a hofahya ka okla pi̱sa hinla ka, nipi banot ik a̱yo ka chi̱ kʋt, kʋna hosh o̱kchʋt ahah! ahnit ilap imi̱ nafohka puta ka ilatomba hokʋto nayukpʋshke.

¹⁶ Yohmi ma Heblu anumpa hʋt Amaketton achi yʋmmak o̱ ai itahobit tahli tok.

¹⁷ Yʋmohmi ma enchil ont isht untuklo kash ot ilap i̱ kotobushi ʋlhto kash ʋba shutik takla yak o̱ a fohopli tok; mihma anumpa ola chinto kʋt ai o̱ binili holitompa yak o̱ a minti hosh ʋba aholitopa in tempel a̱ auet a kohcha mʋt, Ʋlhtaiyahʋshke, achi tok.

¹⁸ Yohmi ma nan ola, hiloha, mikmʋt malʋtha puta aiena kʋt yʋmmak ash o̱ a takali tok: yohmi ma yakni winnakʋchi chinto atampa, yʋmma chohmi kʋt hatak ʋt yakni pakna ai ʋtta tok taiyakla ka iksho chatuk ʋt, yakni winnakʋchi chinto kʋt ituyula tok.

¹⁹ Yohmi ma tʋmaha chito yash ot itakʋshkoʋt kashapa tuchina ma, anonti oklushi in tʋmaha puta hatuk ʋt aiokpuloka tok; yohmi ma Chihowa hʋt ilap nan isht i̱ nukkilli kʋllo chinto oka pa̱ki isht ishko ʋlhto ka ima chi̱ kʋt Babulon chito ash ithaha̱na tok.

²⁰ Mihma tishaiyi yʋt momʋt atoshowa tok osh iksho ma, anonti nʋnih hochito puta hatuk mʋt ik otaiyano ki tok.

²¹ Yʋmohmi ma hata̱fo chinto kʋt ʋba shutik a minti hosh, weki kʋt talent achʋfa foka aiyuka hosh hatak puta ka onʋtuyula tok; yohmi ma hata̱fo nan isht palʋmmi pulla hatuk mak o̱, hatak puta kʋt Chihowa ha̱ ik ahobalot namihahanchi tok, yʋmma nan isht palʋmmi kʋt chinto hoka.