Nan Otʋni 15 - Chahta Holisso Holitopa 1886

Enchil untuklo kʋt na palʋmmi untuklo ishtaiyopi ka il ai i̱shi, 1; 3 nampoa nukshopa yash im aiyachi tok ʋhleha in taloa; 7 kotobushi untuklo kʋt Chihowa nan isht i̱ nukkilli alota.

¹ Mihma nan isht atokowa inla yʋt isht anukhlakancha he a chinto ho̱ ʋba aholitopa yo̱ a pisa li ma, enchil untuklo kʋt na‐palʋmmi untuklo ishtaiyopi yʋmmak o̱ Chihowa nan isht i̱ nukkilli yʋt isht ai a̱hli mak o̱ ieshi tok.

² Yohmi ma okhʋta shohkoali hosh luak it ieshit talaia chiyuhmi na pisa li tok; mihma nampoa nukshopa, micha yʋmma holbʋt toba, mikmʋt isht in chu̱wa, yʋmohmikmʋt yʋmma hohchifo isht aholhtina aiena ka imaiyachi tok ʋhleha a moyuma hokʋto Chihowa i̱ hap ieshi hosh, okhʋta shohkoali yash o̱ hiohli tok.

³ Mihmʋt Chihowa in tishu Moses im ʋlhtaloak, micha Chukfʋlhpobushi im ʋlhtaloak aiena ka okla taloho̱wa kʋt, Chitokaka Chihowa nana moma imaiya, ʋbanumpuli ʋhleha i̱ Mi̱ko chia ma! nana ish a toksahanli puta ka isht a nukhlakancha he a chinto hoke: yohmi kʋt ai ʋlhpiesa ai a̱hli yak osh a chim anukfila yoke.

⁴ Chitokaka ma! Chishno ak bano hosh chi holitopa hoka, kʋta hosh ik chi̱ nukshohompot, chi hohchifo ha̱ ik holitoblecho ka chi̱ cho? ai ʋlhpiesa na palʋmmi ish onochi hatuk a̱ otʋni hoka, oklushi moma kʋt chi tikba ya̱ ai ʋlʋt chi aiokpahancha hi oke, ahanchi tok.

⁵ Yakohmi ha ya anonti hopo̱koyo li tok; mihma yakeh! nan isht atokowa ʋlhtipo in tempel ʋt ʋba aholitopa ya̱ a tiwa tok.

⁶ Yohmi ma enchil untuklo kʋt na palʋmmi untuklo kash ieshi hosh, linen kashofa tohbi yo̱ foyuka mʋt, anonti tʋli holisso lakna isht ʋskofʋchi toba ho̱ chunuko ya̱ isht ʋskofaiyachi hosh, tempel ash auet a kohcha tok.

⁷ Yohmi ma nan okcha̱ya ushta kash ot achʋfʋt Chihowa, yʋmmʋt okcha̱yʋt anta kʋt biliʋt bilia nan isht i̱ nukkilli ya̱ tʋli holisso lakna kotobushi untuklo alotowa ho̱ enchil untuklo kash ima tok.

⁸ Yohmi ma Chihowa nan isht im aholitopa, mikmʋt nan isht im ai a̱hli a minti shobohli ho̱ tempel ash osh isht alotowa tok; yohmi ka enchil untuklo nan isht im a palʋmmi untuklo kash ot ont ik ai a̱hlo ki̱sha hokʋno hatak nana kia tempel ash a chukowa he keyu hatok.