Nan Otʋni 14 - Chahta Holisso Holitopa 1886

Chukfʋlhpobushi ʋt ilap ai itapeha itapehʋt Saion nʋnih a̱ hiohma̱ya, 1, 6 Enchil osh ʋbanumpa isht anumpuli; 8 Babulon ʋt akama; 15 yakni pakna nawaya hoiyo; 20 Chihowa nan isht i̱ nukkilli oka pa̱ki toba ya̱ itahobi.

¹ Yakohmi ma hopo̱koyo li ma, anonti yakeh! Chukfʋlhpobushi ash osh Saion nʋnih ha o̱ hikia ma, tahlepa sipokni bat tahlepa achʋfa cha pokoli ushta akucha ushta kʋt, yʋmma I̱ki i̱ hohchifo hʋt ibitakla ai o̱ holisso hosh yʋmmak ash o̱ apeha tok.

² Yohmi ma ʋba aholitopa ya̱ auet anumpuli ka oka laua fopa, mikmʋt hiloha chinto ola chiyuhmi ho̱ haklo li tok: mikma hap olachi ʋhleha hʋt ilap i̱ hap ai olahanchi na ola ka haklo li tok.

³ Yohmi ma ai o̱ binili holitompa itikba, mikmʋt nan okcha̱ya ushta, micha hatak tikba ʋhleha aiena itikba taloa himona yo̱ okla a taloho̱wa tok; yohmi ka taloa yʋmma hatak nana hosh ithʋna he keyu ma, amba tahlepa sipokni bat tahlepa achʋfa cha pokoli ushta akucha ushta yʋmmak o̱ yakni a̱ a kohchit chumpa ak illa tok.

⁴ Ilʋppak ash osh ohoyo nana kia isht a liteha tok keyu ʋhleha hoke; ohoyo himithoa hatak haleli keyu ho̱ chiyuhmi ʋhleha hoke. Ilʋppak ash osh Chukfʋlhpobushi, yʋmmʋt kanima yo̱ ia hoh kia, iakaiya ʋhleha mak oke. Ilʋppak o̱ hatak puta ai itintakla a kohchit chumpa tok o̱, Chihowa, micha Chukfʋlhpobushi ita tuklo ka immi nawaya ʋmmona ʋhleha hoke.

⁵ Yohmi ka yʋmma itakha ya̱ na holabi kia ai otʋni chatuk o̱ keyu; Chihowa ai o̱ binili holitompa itikba ya̱ na liteha nana kia ik im iksho ʋhleha hoka.

⁶ Yakohmi ma anonti okla, oklushi ilaiyuka, mikmʋt hatak im anumpa ilaiyuka moma yakni pakna ai asha tok a̱ im anumpula chi̱ hosh, enchil inla yʋt ʋbanumpa ai a̱hlit bilia il ai eshi hosh ʋba shutik iklʋnna ya̱ hikʋt a̱ya mʋt,

⁷ Chitoli hosh mihʋt, Chihowa hʋt nan ai apesa chi̱ hʋshi kanʋlli ʋt ʋla hoka; yʋmmak o̱ i̱ nukshumpʋt ho holitoblí; micha yʋmmak osh ʋba shutik, yakni, okhʋta, mikmʋt kʋli hiohli puta aiena ka ikbi tok oka, oh aiokpahanchí, ahanchi na pisa li tok.

⁸ Yohmi ma anonti enchil inla kʋt iakaiya mʋt, Ilap nan itin luma̱ka nan isht haksichi oka pa̱ki chiyuhmi ho̱ okla moma ka ishkochi tok okʋt, Babulon tʋmaha chito yʋmmak ash ot aiokpulokʋshke, aiokpuloka mak oke, ahanchi tok.

⁹ Anonti enchil ont isht atuchina kʋt yʋmmak ash o̱ pit iakaiya mʋt, chitoli hosh mihʋt, Hatak nana kia nampoa nukshopa, micha yʋmma holbʋt toba yash aiokpʋchi cha, anonti isht in chu̱wa ma ibitakla, keyukmʋt ibbak isht impak imma okmá, nana ka isht ai in chu̱wa hok mak osh,

¹⁰ Mihi yosh Chihowa nan isht i̱ nukkilli oka pa̱ki yʋmmʋt nan itaiyoma keyu hosh, yʋmmʋt nan isht i̱ nukhobela isht ishko ya̱ a toshowa mak o̱ ai ishka chi̱ hoke; yohmikmʋt yʋmmak ash ot enchil holitopa ʋhleha itikba, mikmʋt Chukfʋlhpobushi itikba aiena ka luak, micha hituk lakna aiena ho̱ isht ai ilbʋsha hi oke, ahanchi tok.

¹¹ Atuk o̱ yʋmma isht ai ilbʋsha shobohli hʋt ʋba ai ihi̱ya kʋt biliʋt bilia hoke; yohmi ka kʋna hosh nampoa nukshopa, micha yʋmma holbʋt toba yash aiokpahanchi, mikma kʋna hosh yʋmma i̱ hohchifo isht in chu̱wa ya̱ isht ai in chu̱wa hokʋto nitak, ninak aiena ka a foha he ik im iksho ʋhleha hoke.

¹² Ilʋppak o̱ ʋbanumpuli ʋhleha hʋt nuktanlʋt achunanchi ka isht otaiyani hoke; ilʋppak o̱ Chihowa im anumpa ʋlhpisa puta holitobli, micha Chisʋs i̱ yimmi aiena ka isht otaiyani hoke.

¹³ Yakohmi ma ʋba aholitopa ya̱ auet anumpa na haklo li ma, Ish holissochashke, Kʋna hoh kia himak a pilla ka Chitokaka ya̱ ibai achʋfʋt illi hokʋto na yukpa hoke; a̱hli yʋmmak okʋt nana ka isht ahantʋt isht hoyʋbli tok puta ka a mokofʋt a foha chi̱ hatok, Shilombish Holitopa yʋt achishke; mikma nan‐toksʋli puta kash ot ilap a̱ iakaiya hoke, ʋm achi tok.

¹⁴ Atuk o̱ anonti yakeh! hoshonti tohbi ka pisa li ma, hoshonti pakna ya̱ hatak Ushi ak o̱ holba hosh o̱ binili cha, tʋli holisso lakna iachuka iachukoli mʋt, anonti nan isht ʋlmo halupa fehna ka ibbak isht ieshi tok.

¹⁵ Mihma enchil inla yʋt tempel a̱ a kohchʋt minti mʋt, hoshonti o̱ binili yʋmmak ash chitolit in tahpʋlʋt, Nan isht chim ʋlmo ya̱ fahʋmmit na‐waya ya̱ ʋmó; nan ish ma he ʋlhpesa ka ai ona hoka; micha yakni pakna nan a waya kʋt a laknʋt tahʋshke, im achi tok.

¹⁶ Mihma hoshonti o̱ binili yʋmmak ash ot nan isht im ʋlmo ya̱ ishit yakni pakna moma o̱ fahʋmmi tok: mihma yakni ʋt ʋlmot taha tok.

¹⁷ Anonti enchil inla yosh yʋmmak kia nan isht ʋlmo halupa ka i̱shi hosh, tempel ʋba aholitopa talaia ka auet a kohchʋt minti tok.

¹⁸ Mihma enchil inla yʋmmʋt luak o̱ imaiya hosh alta ya̱ ai ʋttʋt kohchʋt minti tok: mihmʋt nan isht ʋlmo halupa i̱shi yʋmmak ash o̱ chitoli hosh in tahpʋlʋt, Nan isht chim ʋlmo halupa yash ishi cha, yakni pakna pa̱kʋpi ai ʋnit pokospoa ka tʋptulit itahobí; pa̱ki ʋt nuna fehnʋt taha hoka, im achi tok.

¹⁹ Mihma enchil ash ot nan isht im ʋlmo yash yakni pit o̱ fahʋmmi mʋt, yakni pakna pa̱kʋpi a̱ ai ʋmot itahobi cha, Chihowa nan isht i̱ nukkilli ya̱ oka pa̱ki atoba chito ya̱ pit fohopli tok.

²⁰ Yohmi ma tʋmaha chito kochanli ak o̱ oka pa̱ki atoba yash o̱ a hʋhlichi tok: mihma issish osh oka pa̱ki atoba yash a kohoncha kʋt, kowi tahlepa tuklo a taiyakla ka chaha kʋt issuba tʋli kapali itih ha̱ kapanli ona hosh talaia tok.