Nan Otʋni 13 - Chahta Holisso Holitopa 1886

Nampoa nukshopa yʋt noshkobo hʋt untuklo, lapish mʋt pokoli hosh okhʋta ha̱ akohcha tok; mihma yʋmmak o̱ sinti chilita yash ot nan ai a̱hli ima tok, 1; 11 nampoa nukshopa inla yosh yakni a akohcha; 14 nampoa nukshopa tikba ya tuk toba chi̱ ka na holbʋt toba ya̱ im ahni; 15 yohmi na yʋmmak ash o̱ hatak puta kʋt aiok pahancha chi̱; 16 mikmʋt isht ai in chu̱wa chi̱ ha tok.

¹ Yʋmohmi ma okhʋta shinuk pakna ya̱ ai o̱ hikia li mʋt, nampoa nukshopa achʋfa kʋt okhʋta ha̱ a koyucha ho̱ pisa li ma, noshkobo hʋt untuklo mʋt, lapish ʋt pokoli, mihma in lapish pakna ya̱ iachuka pokoli ma, anonti Chihowa isht ik ahobalo hohchifo hosh noshkobo ha̱ ai o̱ holisso tok.

² Mihma nampoa nukshopa yʋmma pisa li kash o̱ koi chikchiki ho̱ holba ma, iyi yʋt nita iyi yo̱ chiyuhmi ma, anonti itakha mʋt koi chito itakha yo̱ chohmi tok: mihma sinti chilita yash ot nan isht hlampko, micha mi̱ko ai o̱ binili, mikmʋt nan isht im ai a̱hli aiena ka yʋmmak ash o̱ ima tok.

³ Yohmi ma yʋmma noshkobo achʋfa kamo nʋhlʋt isht illa̱ hi o̱ chiyuhmi tok; atuk ak osh nʋhlʋt isht illa̱ he kash ot hlakofi tok; mihma nampoa nukshopa hash o̱ yakni moma kʋt, okokko! ai ahnit iakaiya tok.

⁴ Yʋmohmi mʋt sinti chilita yʋmmak osh nampoa nukshopa ya̱ nan isht ai a̱hli ima hatok oka, okla aiokpahanchi mʋt; anonti nampoa nukshopa hash o̱ okla aiokpahanchit, Kʋta hosh nampoa nukshopa holba cho? kʋta hosh yʋmma in tanampit ahanta hinla cho?

⁵ Yohmi ma na chinto fehna, micha nana ka ik ahobalo puta isht anumpula chi̱ ka yʋmmak ash o̱ itakha ima tok; yohmi ka hʋshi pokoli ushta akucha tuklo ka a moyumʋt isht ahanta chi̱ mak osh im ʋlhpisa tok.

⁶ Yohmi ma yʋmmak ash ot itakha ya̱ wakʋmmit, Chihowa ya̱ ik ahobalot isht anumpulit, i̱ hohchifo, micha im ʋlhtipo, mikmʋt ʋba aholitopa aiasha puta ma ik ahobalot na mihachi tok.

⁷ Yohmi kʋt ʋbanumpuli a̱hli ʋhleha in tanampit yʋmmak ash o̱ imaiyacha chi̱ kʋt nan im ʋlhpisa tok; micha hatak oklushi ilaiyuka, mikmʋt im anumpa ilaiyuka puta ka imaiyacha chi̱ ka yʋmmak ash o̱ nan isht im ai a̱hli ima tok.

⁸ Mikma kʋna hosh hohchifo hʋt yakni tobʋt a minti tok ai ʋhli ka ʋlhtobʋt illi tok Chukfʋlhpobushi i̱ holisso ai‐okcha̱ya a holisso tok keyu kʋt, yakni pakna ai asha moma kʋt yʋmmak ash o̱ aiokpahancha chi̱ hoke.

⁹ Hatak nana hoh kia haksobish ʋt i̱ hikiakmʋt, ik hakló.

¹⁰ Kʋna hoh kia inla ya̱ yuka ikbit isht a̱ya hokʋto, ilap mʋt yuka tobʋt a̱ya hi oke; kʋna hoh kia inla ya̱ bʋshpo falaia vo̱ isht ʋbi hokʋto, ilap mʋt bʋshpo falaia yo̱ isht illa hi oke. Ilʋppak o̱ ʋbanumpuli ʋhleha hʋt nuktanlʋt achunanchit na yimmi ka isht otaiyani hoke.

¹¹ Yakohmi ma nampoa nukshopa inla kʋt yakni a̱ auet a kohcha na pisa li tok; yohmi ka yʋmmak ash ot in lapish ʋt a̱sha kʋt Chukfʋlhpobushi ak o̱ holba mʋt, anonti sinti chilita yak o̱ chiyuhmit anumpuli tok.

¹² Mikmʋt yʋmmak ash ot nampoa nukshopa ʋmmona isht im ai a̱hli ash yʋmma itikba yo̱ isht ahanta hoke; mikmʋt yakni, micha yʋmma ai asha pit aiena kʋt nampoa ʋmmona, yʋmmʋt bahʋt illit hlakofi tok ash aiokpahancha chi̱ ka im ahni hoke.

¹³ Mikmʋt yʋmmak ash ot na fehna chinto ka yʋmihchi; yohmi hatuk osh yʋmmak ash ot luak ʋt ʋba mintit hatak puta itikba yakni a̱ ant onʋtuyula chi̱ ka ahni hoke.

¹⁴ Yohmi hatuk osh yʋmmak ash ot nan im ai a̱hlit nampoa nukshopa itikba ya̱ na fehna puta ka a yʋmihchi kak osh yakni pakna ai asha puta ka yoshublihinchi mʋt; bʋshpo falaia isht baha tok kia, anonti okcha̱ya tok nampoa nukshopa yʋmma na‐holbachit okla im ikba chi̱ ka, yakni pakna ai asha ʋhleha ha̱ im ahanchi hoke.

¹⁵ Mihmʋt nampoa nukshopa holba yash ot anumpuli, mikmʋt laua kʋt kaniohmi hosh nampoa nukshopa holba yash aiokpʋcha hi o̱ keyukmʋt, illa hi a̱ aiena ka im ahna hi oka nampoa nukshopa holba yash ilhfiopak ima hi ʋt im ʋlhpisa hoke.

¹⁶ Yohmi kʋt hochitoka, mikmʋt ik a lauwo, nan in laua, mikmʋt ilbʋsha, yuka keyu, mikmʋt yuka a moyuma kʋt ibbak isht impak imma, keyukmʋt ibitakla ya̱ in chu̱wa hi a̱ yʋmmak ash ot im apesa yoke.

¹⁷ Yohmikma hatak nana kia nanasi kia chumpa, keyukmʋt kancha he keyu mak a tok: amba kʋna hosh nampoa nukshopa isht in chu̱wa, yʋmmak keyukmʋt i̱ hohchifo, yʋmmak keyukmʋt i̱ hohchifo ha̱ isht a holhtina kʋt isht ai in chu̱wa ak a hi oke.

¹⁸ Ilʋppak o̱ nan isht ithana yoke. Kʋna kia im anukfila isht akostininchi im a̱shakmʋt, nampoa nukshopa isht im a holhtina ka ik hotehná, yʋmma hatak ʋt a hotehna yoka: yohmi ka yʋmma isht im a holhtena kʋt tahlepa hannali cha pokoli hannali akucha hannali hoke.