Nan Otʋni 12 - Chahta Holisso Holitopa 1886

Ohoyo hʋt hʋshi yo̱ isht foyukʋt ʋlla isha chi̱ nan i̱ palʋmmi, 1; 4 sinti chilita humma yosh yʋmmak ash itikba hikia kʋt im ʋlla ya̱ isht ʋpa chi̱ kʋt im ʋlhtaiyaha; 6 ʋlla yʋt in tola mʋt, ohoyo hash ot yakni haiaka yo̱ pit maleli; 7 Mikael, micha im enchil aiena kʋt nan okpulo sinti chilita yash itihi̱bit imaiyachi; 13 sinti chilita yash ot ʋba mintit aka itola cha, ohoyo hash i̱ tʋnahampi tok.

¹ Yohmi ma na fehna chinto kʋt ʋba shutik a̱ ai otaiyani kʋt, ohoyo hosh hʋshi yo̱ foyuka ma, hʋshi‐ninak‐a̱ya yʋt iyi nuta yo̱ takali tok, yohmi ma fochik auah tuklo iachuka toba ho̱ iachukoli tok.

² Mihmʋt yʋmmak ash ot chakali hatuk osh, ʋlla itola̱ he nan isht i̱ palʋmmit na hotopa tuk ʋt itola hokbano ahnit, tahpahanla tok.

³ Mihma na fehna inla kʋt ʋba shutik a̱ ai otʋni kʋt, yakeh! sinti chilita humma chinto hosh, noshkobo hʋt im untuklo mʋt, anonti in lapish ʋt pokoli ma, iachuka untuklo kʋt noshkobo ha̱ afoyua tok.

⁴ Mihma i̱ hasimbish ʋt ʋba fochik a kashapa ont isht atuchina ka halanlit aka auet fohopli tok; yohmi ma ʋlla yʋt in tola he ai ona hatuk o̱, ʋlla yʋt itola mak inli ho̱ isht im ʋpa chi̱ kʋt, ohoyo hash itikba sinti chilita yash ot hikia tok.

⁵ Atuk o̱ yʋmmak osh tʋli fuli yo̱ ieshi hosh okla moma ka imaiyachit nan im apesa chi̱ mak o̱, ohoyo hash ot ʋlla nakni yo̱ sholi tok; atuk o̱ im ʋlla yash o̱ Chihowa, mikmʋt im ai o̱ binili holitompa pilla a ma̱ya tok.

⁶ Yohmi ma yakni haiaka kanima yo̱ ai ʋtta hi o̱ Chihowa yʋt ai im atahli tok mak o̱, ohoyo hash ot pit maleli tok: yʋmmak o̱ nitak tahlepa sipokni achʋfa tahlepa tuklo cha pokoli hannalit aiena ka yʋmmak oka okla nan ai im atahanla chi̱ hatok.

⁷ Mihma ʋba ya̱ ai it in tanampit ai asha tok: Mikael ʋt im enchil ʋhleha aiena kʋt sinti chilita yash itihimbi ma, anonti sinti chilita yash ot yʋmmak ash, mikmʋt im enchil aiena ka itihimbi kia,

⁸ Imaiyachi keyu ki tok; mihmʋt ai ʋtta he nana kia ʋba ya̱ iksho ki tok.

⁹ Mihma sinti chilita chinto, sinti sipokni, nan isht ahullo okpulo, micha Setan achi chatuk, yʋmmak osh yakni moma ka yoshubli chatuk mak o̱ yʋmma a kohchi tok, atuk o̱ aka pilla ho̱ yʋmmak ash ot pit itola tok; mihma im enchil ʋhleha hash ot apehʋt pit kaha tok.

¹⁰ Mihma ʋba aholitopa ya̱ anumpa ola chinto ka pit a haklo li ma, Himak ano isht ai okcha̱ya, isht hlampko, mikmʋt hʋpin Chihowa im apehlichika, micha Ushi Klaist nan isht im ai a̱hli aiena hash ot ʋlʋshke; hʋp itibapishi ʋhleha i̱ nukkillit na‐mihachi yʋmmak osh nitak, ninak aiena ka hʋpin Chihowa itikba ya̱ ai i̱ nukkillit na‐mihachi yatuk ash osh aka pit itolʋshke, ahanchi tok.

¹¹ Mihmʋt Chukfʋlhpobushi im issish, mikmʋt ilap im anumpa isht atokowa puta ho̱ yʋmmak ash okla isht imaiyachi tok; yohmi kia isht ai illa he kia, ilap im ilhfiopak a̱ i̱ hullo tok keyu.

¹² Yʋmohmi hoka ʋba aholitopa puta, micha yʋmma ai asha puta hʋchia ma! ho yukpá, nan isht ahullo okpulo, yʋmmʋt chekosi itintakla ho̱ anta chi̱ kʋt ithana hosh, nan isht i̱ nukkilli chinto ka il ai eshit hʋchim ʋla hoka, yakni pakna, micha okhʋta aiena ka ai asha tuk ʋt nana i̱ palʋmmi mak oke.

¹³ Yohmi ma sinti chilita yash ot aka ya̱ pit itola kʋt il ithana mʋt, ohoyo yʋmmak osh ʋlla nakni ishi kash, ilbʋshahli tok.

¹⁴ Mikma ilap ai ʋtta yakni haiaka hikʋt ia chi̱ ka, ohoyo hash o̱ssi chito sanahchi tuklo ho̱ ima tok; yohmi ma yʋmmak o̱ afʋmmi tuchina iklʋnnʋt aiena ka sinti chilita yash o̱ itikba ai i̱ filʋmmit ai ilhpihintashke.

¹⁵ Mihma sinti chilita yash ot oka falama ohmi kʋt oka yo̱ ohoyo hash iakaiyachit ilap itakha a kohchi kʋt, yʋmmʋt oka chito yosh yʋmmak ash shalit kanima isht ia hi a̱ ahni hatok.

¹⁶ Yohmi tok kia yakni ʋt ohoyo hash apela tok; mihmʋt yakni ash ot ilap itakha ya̱ wakʋmmi cha, oka chito yʋmma sinti chilita yʋt ilap itakha ya̱ a kohchi kash isht nanʋpli tok.

¹⁷ Yohmi ma sinti chilita yash ot ohoyo hash i̱ nukkilli fehna mʋt, iʋt ohoyo hash isht ai unchululi kaniohmi ma̱ya, yʋmmʋt Chihowa im anumpa ʋlhpisa puta ka holitobli, mikmʋt Chisʋs Klaist nan isht im atokowa aiena ka ieshi ʋhleha hash o̱ in tanampi tok.