Nan Otʋni 10 - Chahta Holisso Holitopa 1886

Enchil hlampko kʋt holisso tiwa yʋt ibbak a̱ foyuka ho̱ haiaka, 1; 6 okcha̱ya bilia yʋmmak atuk mak o̱ himak ma nitak ʋt atakala chi̱ keyu, achi tok: 9 holisso hosh ishi cha ʋpa chi̱ kʋt, Chan ʋt im ʋlhpisa.

¹ Yohmi ma enchil chinto inla yosh hoshonti ho̱ ibafoyuka hosh ʋba shutik a̱ mintit aka ʋla na pisa li tok; mihma hinak‐bitepuli hosh noshkobo ha̱ apakfoyupa ma, nashuka yʋt hʋshi yo̱ chiyuhmi ma, anonti iyi yʋt luak tonik o̱ chiyuhmi tok.

² Mihmʋt holisso iskʋtinosi kʋt wakama yo̱ ibbak a̱ isht ieshi tok; mihmʋt iyi isht impak imma ya̱ okhʋta ha̱ o̱ hilechi mʋt, anonti iyi isht im afʋbekimma yano yakni ya̱ o̱ hilechi cha,

³ Koi chito woha chatuk a̱ chohmit chitolit tahpʋlʋt miha tok; atukmʋt yʋmmak ash ot tahpʋla ma, hiloha untuklo kʋt hiloho̱ha tok.

⁴ Atuk o̱ hiloha untuklo kash ot hiloho̱ha haya, holissochi la chi̱ hatok; atuk ak o̱ ʋba aholitopa ya̱ auet anumpa na, Nana yakohmi ka hiloha untuklo kash ot anumpuli tuk a̱ chik holissocho hosh ish ashanichashke, ʋm achi na haklo li tok.

⁵ Yohmi ma enchil yʋmmʋt okhʋta, micha yakni ita tuklo ka o̱ hikia na pisa li kash, yʋmmak ash ot ibbak a̱ ʋba shutik pit weli tok.

⁶ Mihmʋt okcha̱yʋt ahantʋt biliʋt bilia, yʋmmak osh ʋba, micha yʋmma nana kʋt aiasha puta, mikmʋt yakni, micha yʋmma nana kʋt aiasha puta, mikmʋt okhʋta, micha yʋmma nana kʋt aiasha puta aiena ka ikbi tok mih mak o̱ isht a mihʋt anumpa kʋllo isht il onochi kʋt, nana kʋt a yohma he tuk ont ia he keyu ka hi atok;

⁷ Amba enchil ont isht untuklo im anumpa chi̱ nitak okʋno yʋmmak ash ot olachit isht iakma, Chihowa nana ai ahni tuk ʋt in tishu hopaii ʋhleha nan im otʋninchi tok mak osh ont ʋlhtaha chi̱ mak oke.

⁸ Yohmi ma anumpa yʋmma ʋba aholitopa pit a haklo li tok ash ot anonti auet ʋm anumpuli tok: mihmʋt, Ia cha, holisso iskʋtinosi yʋmmʋt tiwa yash enchil, yʋmmʋt okhʋta, micha yakni ita tuklo ka o̱ hikia ka ibbak fo̱ka ka ont ishí, ʋm achi tok.

⁹ Mihma enchil ash im ona lish, Holisso iskʋtinosi yash et ʋmá, im achi li tok: mihma, Ishi cha, ʋpʋt tahlí; yohmikma chikfoka ya̱ takbacha chi̱ hoke, amba chitakha anu̱kaka yano champuli kʋt foi bila yo̱ chohma chi̱ hoke, ʋm achi tok.

¹⁰ Yohmi ma enchil ibbak a̱ a kohchit holisso iskʋtinosi yash ishi lish, ʋpʋt tahli li tok; mihma satakha anu̱kaka yokʋno champuli kʋt foi bila yo̱ chohmi tok: yohmi kia isht nanʋbli li mak inli ho̱, sakfoka yash ot takbʋt kʋnia tok.

¹¹ Mihma yʋmmak ash ot, Hatak oklushi, mikmʋt im anumpa ilaiyuka, mi̱ko ʋhleha puta la̱wa ka itikba ya̱ nana ka tikbanli ish ai otʋnihincha chi̱ pulla hoke, ʋm achi tok.