Nan Otʋni 1 - Chahta Holisso Holitopa 1886

Ʋba nan im otaiyani tok ʋt tʋli holisso lakna pula ai o̱ hikia untuklo nan isht ʋlhpisa ho̱ Chan ʋt chʋch untuklo Asia a hiohmaya ka pit i̱ holisso chi tok, 1; 7 Klaist ʋt minta chi; 14 nan isht im ai a̱hli holitopa chinto aiena ka anoli.

¹ Chisʋs Klaist nan isht otʋninchi yʋmmak oka Chihowa hʋt ima na in chekosikma nana a kaniohmi pulla chi̱ ka, in tishu ʋhleha ha̱ im otʋnincha hi a tok; atuk o̱ yʋmmak ash osh im enchil ak o̱ pit chʋffichi hosh in tishu Chan a̱ nan it apesa hosh im anoli tok.

² Mihi yosh Chihowa im anumpa, mikmʋt Chisʋs Klaist nan isht im atokowa, micha nana ho̱ pisa tok aiena kʋt atokowa anoli tok mak oke.

³ Kʋna hosh ilʋppa it im anumpohonli, mikma kʋna hosh na tikbanli annoa anumpa ilʋppa haklo cha, nana hosh a holihi̱so tuk a̱ holitobli hokʋto momʋt na yukpʋshke; yakohma chi̱ ka ai ona̱ hosi hoka.

⁴ Chan ʋt Asia yakni chʋch a hiohli untuklo ka pit aiokpʋchi; yʋmmʋt okcha̱yʋt ahanta kʋt, yʋmmak osh okcha̱yʋt ahanta tok osh, anonti himak a pilla ka okcha̱yʋt ahanta he mak o̱ nan isht i̱ kana, isht it i̱ nanaiya aiena kʋt a minti, yʋmma im ai o̱ binili holitompa itikba ya̱ a hieli Na shilombish untuklo aiena ka a minti;

⁵ Micha Nan atokowa anoli ai a̱hli, mikmʋt illi tuk osh falamʋt tani kʋt illi ʋhleha hak o̱ Ʋttahpi hosh holitopa i̱ shahli; micha mi̱ko yakni pakna ai asha puta I̱ shahli Chisʋs Klaist mak o̱ a minti hosh hʋchi anukfoyukashke. Hʋp i̱ hullo cha, na hʋpim ai ashʋchika puta hatuk ma ilap im issish ak inli ho̱ isht achifʋt hʋp i̱ kashofi cha,

⁶ I̱ki Chihowa na holitompa isht im ʋtta, micha mi̱ko yo̱ ohminchi hosh pi atokoli tuk mak osh mihi yo̱ isht a holitopa, micha nana moma isht imaiya ita tuklo kʋt immi hosh biliʋt biliashke. Amen.

⁷ Yakeh! hoshonti ho̱ il ai eshi hosh minti mak oke; yohmi ka hatak nishkin puta, mikma kʋna hosh yʋmma tʋli halupa isht bahli tok ʋhleha ash kia moyumʋt pisa he; yohmikma oklushi puta yakni pakna ai asha tuk ʋt moyumʋt yʋmmak atuk pulla kak o̱ komuntʋt yaha̱ya hi oke; yakohmi mak inlashke. Amen.

⁸ Chitokaka nan oklu̱ha imaiya yʋt himak a̱ okcha̱yʋt ahanta kʋt, yʋmmak osh okcha̱yʋt ahanta tok osh, himak a pilla ka okcha̱yʋt ahanta he mak osh, Ʋno ak osh Alfa, Omeka, ai isht ia ʋmmona, micha ont ai ʋhli aiena sia mak oke, achishke.

⁹ Chan sia hʋch itibapishi, mikmʋt na palʋmmi ka hʋch iba pihi̱sa sia, micha Chisʋs Klaist apehlichika ibafohka, micha Chisʋs ʋt nuktanlʋt achunanchi tok a̱ ohmit isht a hʋch iba achʋfa sia hatuk ʋt, Chihowa im anumpa, micha Chisʋs Klaist nan isht im atokowa pulla hatuk mak o̱ yakni tashaiyi Patmos hohchifo ho̱ ont anta li tok.

¹⁰ Atuk osh Chitokaka i̱ nitak o̱ Shilombish Holitopa yʋt si anukfoyuka fehnʋt ahanta li ho̱, ʋm asha ka imma ya̱ nan ola chinto isht pu̱fa ola ho̱ chohmi kʋt,

¹¹ Ʋno ak osh Alfa, mikmʋt Omeka, ʋmmona, mikmʋt ont ishtaiyopi aiena sia mak oke; yohmi hoka nana ho̱ ish pihi̱sa kʋt holisso ha̱ ish a holissochi cha, Asia yakni chʋch a hiohli untuklo Efesʋs, micha Smʋna, mikmʋt Pʋkamos, micha Hlaiatila, mikmʋt Satis, micha Filatelfia, mikmʋt Laotisea aiena ka pit ish pilashke, ahanchi ho̱ haklo li tok.

¹² Yohmi ma auet ʋm anumpohonli yʋmmak ash o̱ pisa la chi̱ hosh pit filema li tok. Yohmi kʋt pit filema li mʋt, tʋli holisso lakna pʋla ai o̱ hikia untuklo ka pisa li tok:

¹³ Yohmi ma pʋla ai o̱ hikia untuklo yʋmmak ash iklʋnna ya̱ Hatak Ushi ak o̱ holba hosh, anchi ʋt iyi pilla ona ho̱ ai anchi hosh, tʋli holisso lakna isht ʋskofʋchi o̱ chinuko foka ak o̱ isht takchi hosh hikia tok.

¹⁴ Mihma noshkobo, micha pa̱shi aiena kʋt tohbi kʋt chukfi hishi, micha okti pushi aiena kak o̱ chiyuhmi ma, nishkin ʋt luak libbi hak o̱ chiyuhmi tok:

¹⁵ Yohmi mʋt iyi yʋt malanta kʋt tʋli lakna yosh tʋli abila yo̱ fohkʋt hullokmi tuk mak o̱ chiyuhmi ma, itih ola kʋt oka chinto fopa ho̱ chiyuhmi tok.

¹⁶ Mihmʋt ibbak isht impak imma ya̱ fochik untuklo ho̱ isht ieshi tok; mihma itih ha̱ bʋshpo falaia itahla̱kla halupa yosh a kohcha ma, nashuka yʋt shohpakali kʋt, hʋshi tommi ai a̱hli tommi chatuk mak o̱ chiyuhmi tok.

¹⁷ Yohmi ma yʋmmak ash o̱ pisa li mʋt, illi yo̱ chohmit iyi ituma ya̱ ont sa tula tok. Yohmi ma ibbak isht impak imma ya̱ ishit si umbitepa mʋt, Ʋno ak osh ʋmmona, micha ont ishtaiyopi aiena sia mak oke, ik chi nukshopo kashke.

¹⁸ Ʋno ak osh okcha̱yʋt ahanta sia mak osh, sʋlli tok nana kia, anonti yakeh! okcha̱yʋt sa bilia hoke, Amen: yohmi hosh isht ai illa he, micha shilombish aiasha aiena isht‐tiwa ya̱ ieshi li hoke.

¹⁹ Nana ish pi̱sa tuk, micha nana kʋt a kaniohmi, mikmʋt himak a pilla ho̱ nana kʋt a kaniohma he puta ka ish holissochashke.

²⁰ Fochik untuklo sʋbbak isht impak imma a̱lhto ho̱ ish pi̱sa kash, micha tʋli holisso lakna pʋla ai o̱ hikia puta aiena kash ot nan isht ʋlhpisa kʋt ilʋppak oke. Fochik untuklo kʋt chʋch a hiohli untuklo ka nan isht im ʋtta ʋhleha untuklo kak oke; yohmikma pʋla ai o̱ hikia untuklo ish pi̱sa kash ot chʋch a hiohli untuklo kak oke, ʋm achi tok.