Nan Apesa 8 - Chahta Holisso Holitopa 1886

¹ Yʋmohmi ma Eflaim hatak ʋhleha hʋt, Nanta katiohmi ho̱ ish pi yakohmichi tuk oh cho? Mitianait ʋhleha ha̱ itibit ish ia mʋt, chik pi hoyo kʋt, achi tok; mihmʋt okla itachowʋt i̱ kʋllo tok.

² Mihma, Ʋno kaniohmi li tuk ʋt chishno ya̱ nanta isht ahoba cho? Eflaim pa̱ki ʋlbʋlli ak osh achukma kʋt Abiese ʋt pa̱ki ʋmo ka i̱ shahli keyu̱?

³ Chitokaka yʋt Mitian tʋshka pehlichi Oleb, micha Seeb a̱ hʋch ibbak fohki tuk oke: yohmi ka nanta hak o̱ nana hʋsh yʋmihchi tuk o̱ chohmi ho̱ yʋmihchi la hinla tuk o̱? im achi tok. Yʋmohmit yʋmma achi ma, anukhobela tuk ʋt i̱ yokopa tok.

⁴ Mihma Kiteon ʋt Chatan a̱ ona tok; mihmʋt yʋmma, micha hatak tahlepa tuchina api̱hʋt a̱ya kash aienʋt hoyʋbli kia, hlioli moyuma hosh hlopulli tok.

⁵ Mihma Sukkolh hatak ʋhleha ha̱, Okla si akaiya ka pʋska lumbo kanohmi ka hʋsh imashke, hʋchim asilhha lishke: hoyʋbli hoka, micha Mitian mi̱ko Sebah, micha Salmunna ita tuklo ka hlioli li hoke, im achi tok.

⁶ Mihma Sukkolh okla pehlichi ʋhleha hʋt, Sebah, micha Salmunna ibbak ʋt chibbak a̱ foyuka tuk o̱, chin tʋshka chipota ya̱ pʋska il ipeta hinla cho? achi tok.

⁷ Mihma Kiteon ʋt, Yʋmohmi ka Chihowa yʋt Sebah, micha Salmunna ya̱ sʋbbak fohkikma, yakni haiaka kʋti, micha onush isht nihechi aiena ho̱ hʋchi nipi ya̱ ishit hlillichi la chi̱ hoke, achi tok.

⁸ Micha yʋmma ʋttʋt iʋt Penuel a̱ ona mʋt, yʋmmak inli ho̱ i̱ miha tok: mihma Penuel hatak ʋhleha hʋt afalamichit anumpuli kʋt, Sukkolh hatak ʋhleha hʋt afalamichit anumpuli tuk mak o̱ chohmi tok.

⁹ Mihma Penuel hatak ʋhleha hak kia im anumpulit, Si achukma̱kʋt falamʋt ʋla likmʋt, holihta chaha ilʋppa kinʋffi la chi̱ hoke, achi tok.

¹⁰ Mihma Sebah, micha Salmunna itatuklo kʋt, micha in tʋshka chipota, hatak tahlepa sipokni auah tahlapi foka hosh hʋshi akochaka in chipota tʋshka chipota laua yatuk a̱ hlako̱fi tuk ʋt moma mak o̱ aiena kʋt Kalko ak o̱ aiasha tok; hatak bʋshpo falaia ieshi ʋt tahlepa sipokni tahlepa achʋfa cha, pokoli tuklo hosh akʋma tuk oka.

¹¹ Mihma Kiteon ʋt Nobah, micha Chokbehah hʋshi akochaka imma ʋlhtipo aiasha hina ia hosh tʋshka chipota laua ya̱ ont issot kanchi tok; tʋshka chipota laua yʋt ik nukta̱hlo hatuk oka.

¹² Mihma Sebah, micha Salmunna ʋt tihlaiya ma, hlioli tok; micha Mitian mi̱ko tuklo Sebah, micha Salmunna yash ishi cha, tʋshka chipota laua ya̱ komuntʋchit yuhli tok.

¹³ Mihma Choash ushi Kiteon ʋt hʋshi ʋt ik kohcho ki̱sha ho̱ tʋnʋp a̱ya tuk ʋt falama tok.

¹⁴ Micha Sukkolh hatak ʋhleha ha̱ ai achʋfa hatak himita yo̱ hokli cha, i̱ ponaklo tok: mihma Sukkolh pehlichi ʋhleha, micha hatak asʋnonchi ʋhleha aiena yʋmmʋt pokoli untuklo cha, untuklo ho̱ holissochit anoli tok.

¹⁵ Mihma Sukkolh hatak ʋhleha ha̱ im ona cha, Yakeh! Sebah, micha Salmunna yʋmma isht hʋsh yopulʋt, Sebah, micha Salmunna ibbak ʋt chibbak a̱ fo̱ka tuk o̱, hatak chi apehʋt a̱ya hoyʋbli ka pʋska il ipeta hinla cho? ishit hʋs si ahanchi tuk mak oke, achi tok.

¹⁶ Micha tʋmaha holihta hatak im asʋnonchi ʋhleha yash ishi cha, yakni haiaka kʋti, micha onush isht nihechi aiena ho̱ Sukkolh hatak ʋhleha ha̱ nan isht im abʋchi tok.

¹⁷ Mihmʋt Penuel holihta chaha ya̱ kinʋffi cha, tʋmaha holihta yash hatak ʋhleha ha̱ ʋbi tok.

¹⁸ Yʋmohmi mʋt Sebah, micha Salmunna itatuklo ka, Tabo hʋsh ai ʋbi kʋt hatak katiohmi hatok o̱? im achi ma, afalamichit anumpuli mʋt, Chi kaniohmi ka, yʋmmak kia yohmi tok: mi̱ko yo̱ ushi ʋhleha nana chohmi bieka tok.

¹⁹ Mihma Kiteon ʋt, Itibapishi li ʋhleha ha tok, hʋshki ushi ʋhleha ha tok oke: Chihowa yʋt okcha̱ya pulla ka apowʋt ish okchalinchi tuk okma, hʋchibe la he tuk keyu hoke, achi tok.

²⁰ Mihmʋt ushi ʋttahpi fehna Chehle ya̱, Wakaya cha, ʋbí, im achi tok. Yohmi kia hatak himita ʋt bʋshpo falaia ya̱ shu̱fit ik esho tok: ʋlla fehna moma hatuk osh nukshopa hokʋt.

²¹ Yohmi ma Sebah, micha Salmunna ʋt, Chishno ʋt ish wakaya cha, ish pi onʋtolashke; hatak ak osh kaniohmikma, imi hlampko hʋt yʋmohmi chatuk oka, achi tok. Mihma Kiteon ʋt waka̱ya cha, Sebah, micha Salmunna ya̱ ʋbi mʋt, nan isht il akshema i̱ kamel inuchi tuk a̱ im ai ishi tok.

²² Yohmi ma Islael hatak ʋhleha hʋt Kiteon a̱, Ish pi pehlichashke, chishno, micha chiso, micha chiso ha̱ iso ak kia aiena kʋt: chishno ak osh Mitian ibbak a̱ ish pi hlakofichi tuk okʋt; im achi tok.

²³ Mihma Kiteon ʋt, Hʋchi pehlichi la he keyu, sʋso hak kia hʋchi pehlicha he keyu: Chihowa ak osh hʋchi pehlicha hi oke im achi tok.

²⁴ Mihma Kiteon ʋt, Nana asilhha achʋfa ho̱ hʋchim ahni lishke, yʋmmʋt hatak hʋsh puta kʋt na wehpoa haksobish takali immi aiyukali kʋt hʋs sʋmashke, im achi tok. (Ishmaelait ʋhleha atuk okʋt, tʋli holisso lakna haksobish takali ʋt im a̱sha tok oke.)

²⁵ Mihma afalamichit anumpuli mʋt, Aiokpanchit e bohlashke, im achi tok. Mihmʋt nafohka patali cha, hatak puta kʋt na wehpoa haksobish takali immi aiyukali kʋt pit fohki tok.

²⁶ Mihma tʋli holisso lakna haksobish takali asilhha tuk weki kʋt tʋli holisso lakna shekel tahlepa sipokni achʋfa cha, tahlepa untuklo tok; nan isht il akshema puta, micha ikunla inuchi, micha nafohka hummaiyi Mitian mi̱ko ʋlbeha tuk, micha itatakʋli kamel ʋt inuchi tuk puta kʋt aiena tok.

²⁷ Mihma Kiteon ʋt efot a̱ ai ikbi cha, in tʋmaha holihta, yʋmmʋt Oflah yak o̱ bohli tok: mihma Islael moma kʋt iʋt hauit iakaiya tok: yʋmmʋt Kiteon, micha in chuka achʋfa isht ai ibetʋbli tok.

²⁸ Yakohmi hosh Mitian ʋt Islael im ʋlla ʋhleha itikba ya̱ i̱ nutaka cha, i̱ himmakma noshkobo ha̱ ik akachakalecho tok. Mihma Kiteon i̱ nitak afʋmmi pokoli ushta ka yakni ʋt achukmʋt talaia tok.

²⁹ Mihma Chelub‐baal Choash ushi ʋt iʋt ilap in chuka akinli ho̱ ont ahanta tok.

³⁰ Mihma Kiteon ʋt ilap nipi tobachi ʋt ushi nakni pokoli untuklo tok; tekchi ʋt in laua tok okʋt.

³¹ Mihma im itaiena yʋt Shechem a̱ anta tuk osh, yʋmmak kia ʋlla nakni yo̱ im eshi na, hohchifo ka Abimilech hochifo tok.

³² Mihma Choash ushi Kiteon ʋt sipokni achukma hosh illi cha, iki Choash im ahollopi yʋt Oflah Abieslait ʋhleha yakni ahikia ka a hollopi tok.

³³ Atuk o̱ yakohmi tok, Kiteon ʋt illi mak inli ho̱, Islael im ʋlla ʋhleha hʋt anonti falamʋt hauit ia cha, Baalim a̱ iakaiya cha, Baal‐belilh naholbʋt toba ya̱ aiokpʋchi tok.

³⁴ Micha Islael im ʋlla ʋhleha hʋt Chihowa in Chitokaka yʋmmak osh in tʋnʋp ʋt apakfoyupa tuk ibbak a̱ ahlakofichit kohonchi tuk a̱ ik ithaiyano tok.

³⁵ Micha Chelub‐baal, yʋmmʋt Kiteon in chuka achʋfa ya̱, yʋmmʋt Islael a̱ i̱ kana tuk a̱ chiyuhmit okla i̱ kana tok keyu hoke.