Nan Apesa 7 - Chahta Holisso Holitopa 1886

¹ Yʋmohmi ma Chelub‐baal (yʋmmʋt Kiteon) ak osh okla moma apeha tuk aiena kʋt onnahinli fehna wakaya mʋt, kʋli Halot ak o̱ bili̱ka binanchi tok: yohmi ho̱ Mitianait okla chito ʋt i̱ falʋmmi imma in tʋnnʋp nʋnih Moleh bili̱ka okfa kak o̱ aiasha tok.

² Mihma Chihowa yʋt Kiteon a̱, Okla chi api̱hʋt a̱ya kʋt laua fehna hatuk o̱, Mitianait ʋhleha ha̱ ibbak fohki la he keyushke; i̱ yohmi li hokma, Islael ʋt ʋm ilauatʋt, Ʋno sʋbbak ak inli hosh sa hlakofichishke, acha hinla hoka.

³ Yʋmohmi hoka himak a̱ okla ha̱ haklochit anumpulit, Kʋna hosh nukshopʋt komuntakmʋt, Kileat nʋnih ha̱ onnahinli a̱ falamʋt iashke, ish achashke, achi tok. Mihma okla hʋt tahlepa sipokni pokoli tuklo cha tuklo aiena kʋt falamʋt ia tok; mihma tahlepa sipokni pokoli hosh a̱sha tok.

⁴ Mihma Chihowa yʋt Kiteon a̱, Okla hʋt laua momʋshke: oka aiasha isht ish onashke, mikma yʋmmak o̱ ai imomaka chi̱ pisa lashke: mikma yakohma chi̱, kʋna ho̱, Ilʋppak osh chi awant ia chi̱, chim achi likma, yʋmmak osh chi awant ia chi̱ hoke; micha kʋna ho̱, Ilʋppʋt chi awant ia he keyu, chim achi likma, yʋmmak okʋt ia he keyu hoke, im achi tok.

⁵ Yʋmohmi ma, okla ha̱ oka ai asha isht ona tok: mihma Chihowa yʋt Kiteon a̱, Isunlʋsh a̱ oka isht taklit ishko kʋt, ofi yosh isunlʋsh isht takli ka chohmikma moma kia ila naksika ish hilechashke; mikmʋt iyi̱kʋlaha hachukbihlepʋt hikia hosh ishko kak kia ila naksika ish hilechashke, im achi tok.

⁶ Yohmi ma ibbak isht taklit ishko kʋt holhtina kʋt tahlepa tuchina tok: amba inla moma kʋto hachukbihlepʋt iyi̱kʋlaha isht hikiʋt ishko tok oke.

⁷ Mihma Chihowa yʋt Kiteon a̱, Hatak tahlepa tuchina oka taklit ishko tuk mak o̱ ishit chi hlakofichit, Mitianait ʋhleha ha̱ chibbak fohki la chi̱ hoke: mikma okla inla moma kʋto ai ʋtta aiyukali onashke, im achi tok.

⁸ Yʋmohmi ma pinak, micha isht pu̱fa aiena ka ibbak isht ieshi tok: mihma Islael ʋhleha inla moma kʋno im ʋlbina aiyukali pit tihleli cha, hatak tahlepa tuchina yʋmmak ash o̱ ishi tok. Mihma Mitian okla tʋshka chipota hʋt nutaka okfa ho̱ aiasha tok.

⁹ Atuk o̱ yakohmi tok, mih ninak ak inli Chihowa yʋt, Wakaya cha, tʋshka chipota ai asha ka akowʋt oná; chibbak a̱ fohki li hoka.

¹⁰ Amba ia ka chi nukwiakmʋt, chin tishu Fulah yak o̱ ish ishi cha, tʋshka chipota ai asha ka ish onashke.

¹¹ Micha nana achi ka ish hakla chi̱ hoke; micha himmakma chibbak ʋt hlampko cha, tʋshka chipota aiasha ka ish im ona chi̱ hoke, im achi tok. Yohmi ma in tishu Fulah ya̱ ieshi cha, iʋt hatak na halupa ieshi tʋshka chipota ibafoyuka ʋhli ho̱ ona tok.

¹² Mihma Mitianait ʋhleha, micha Amalekait ʋhleha, micha hʋshi akochaka in chipota aiena kʋt okfa ha̱ kahʋt a̱ya kʋt, la̱wa kʋt hatʋffo chiyuhmi ma, i̱ kamel ʋt a holhtina iksho, laua kʋt okhʋta lapalika shinuk ai asha kak o̱ chiyuhmi tok.

¹³ Atuk o̱ Kiteon ʋt ona ma, yakeh! hatak achʋfa kʋt holhpokuna cha, ilap ai achʋfa ka im anoli mʋt, Yakeh! holhpokuna sa holhpokuna ma, yakeh! bali pʋska lumbo achʋfa hosh tonolit ia mʋt, Mitian tʋshka chipota iba chukowʋt ia mʋt, binah ho̱ ona cha, issot kinʋffi na binah hash ot filema cha, aka pʋtaya tuk oke, achi tok.

¹⁴ Mihma ilap ai achʋfa yʋt afalamichi mʋt, Ilʋppʋt inla keyu, amba Kiteon Choash ushi, Islael hatak i̱ bʋshpo falaia mak oke: Chitokaka yʋt Mitian, micha in tʋshka chipota moma ka ibbak a̱ fohki hoka, achi tok.

¹⁵ Atuk o̱ yakohmi tok, Kiteon ʋt holhpokuna, micha toshowa aiena anoli na haklo mʋt, Chihowa aiokpʋchi mʋt, falamʋt Islael tʋshka chipota ai asha ka ona mʋt, Hʋsh wakayashke, Chihowa hʋt Mitian tʋshka chipota laua ya̱ hʋch ibbak a̱ fohkishke, achi tok.

¹⁶ Mihmʋt hatak tahlepa tuchina kash apehlichi tuchina ho̱ ita kʋshkoli cha, hatak moma ka isht pu̱fa ibbak fohki mʋt, ishtochi nana ʋlhto keyu pʋla ho̱ fohki tok.

¹⁷ Micha, Hʋs sa pisa cha, yʋmmak inli hʋsh yohmashke: atuk osh yakeh! binah ʋhli ona likma, yakohmashke, nana yʋmohmi li kak o̱ hʋsh yʋmohmashke.

¹⁸ Isht pu̱fa yo̱ olachi li, ʋno, micha si apeha aiena kʋt, mikma hʋchishno ak kia momʋt binah apakfoyupʋt isht pu̱fa ya̱ hʋsh olachashke, mikmʋt Chihowa, micha Kiteon i̱ bʋshpo falaia yo̱ke, hʋsh ahanchashke, im achi tok.

¹⁹ Yʋmohmi tuk o̱ Kiteon, micha hatak tahlepa achʋfa api̱hʋt aya tuk ʋt ninak atoni iklʋna isht ia ʋmmona ho̱ binah ʋhli ho̱ ona tok; mihma himona atoni hilechit tahli tok: mihma isht pu̱fa olachi mʋt, ishtochi ibbak fohka tuk ʋt koli tok.

²⁰ Micha apehlichi tuchina tuk ash osh isht pu̱fa ya̱ olahanchi mʋt, ishtochi ya̱ koli, micha ibbak ʋlhfʋbek imma ya̱ pʋla isht ieshi mʋt, ibbak isht impak imma yano isht pu̱fa olacha chi̱ kʋt isht ieshi tok: micha okla tʋshka pa̱ya mʋt, Chihowa, micha Kiteon i̱ bʋshpo falaia yoke, ahanchi tok.

²¹ Mihma hatak moma kʋt a hikia he ʋlhpesa kʋt hikiʋt binah ha̱ apakfoyupa tok; mihma tʋshka chipota laua yʋt yihlepʋt yaiya mʋt, maleli tok.

²² Mihma tahlepa tuchina kash osh isht pu̱fa olahanchi tok; mihma Chihowa hʋt tʋshka chipota laua ya̱ hatak puta i̱ bʋshpo falaia ilap bi̱ka isht it i̱ sanalichi tok; mihma tʋshka chipota laua yʋt yihlepʋt Selelalh imma Belh‐shittah ha̱, micha Tabbalh Abel‐meholah ʋhli ka ona tok.

²³ Mihma Islael hatak ʋhleha hʋt Naftali, micha Asha, micha Manasseh moma aiena ka akohchʋt itihoyot itʋnaha cha, Mitianait ʋhleha ha̱ iakaiyʋt hlioli tok.

²⁴ Mihma Kiteon ʋt anumpa shali ya̱ Eflaim nʋnih moma ka tihlelit, Akowʋt hʋsh minti cha, oka Belh‐balah, micha Chatan ont ai ʋhli ka tikba hʋsh ai ishashke, ahanchi tok. Mihma Eflaim hatak moma kʋt iti hoyot itʋnaha cha, oka Belh‐balah, micha Chatan ont ai ʋhli ka ishi tok.

²⁵ Mihmʋt Mitianait tʋshka pehlichi tuklo Oleb, micha Seeb a̱ ishi tok: micha Oleb a̱ Oleb tʋli onochit ʋbi cha, Seeb a̱ pa̱ki a hollokchi Seeb in talaia ka ai ʋbi tok; micha Mitian a̱ hlioli tok, mihmʋt Oleb, micha Seeb noshkobo ha̱ ishit Chatan mish tʋnnʋp Kiteon a̱ isht im ona tok oke.