Nan Apesa 6 - Chahta Holisso Holitopa 1886

¹ Yʋmohmi ma Islael im ʋlla ʋhleha hʋt nana ik achukmo ka Chihowa itikba ya̱ ai yʋmohmi tok: mihma Chihowa yʋt afʋmmi untuklo ho̱ Mitian ibbak a̱ fohki tok.

² Mihma Mitian ibbak ʋt Islael a̱ i̱ sanali kʋt kʋllo tok; micha Mitianait ʋhleha pulla kak o̱ Islael im ʋlla ʋhleha hʋt hichukbi nʋnih chaha, ai asha ka, micha yakni chiluk, micha aiatukko kʋllo aiena ka il ai ikbi tok.

³ Micha Islael ʋt nana hokchi ma, yakohmi tok; Mitianait ʋhleha, micha Amalekait ʋhleha, micha hʋshi akochaka in chipota aiena kʋt ʋlʋt, Islael a̱ ant itibi beka tok.

⁴ Micha ant im i̱ sanalit abinanchi cha, yakni na waya ya̱ okpʋnit, Kasa ish ona ka ont ʋhlichi beka tok: micha Islael a̱ isht okcha̱ya nana kia chukfi ʋlhpoa, wak, issuba haksobish falaia nana kia ik im ashancho beka tok.

⁵ Laua kʋt hatʋffo ak o̱ chiyuhmi hosh i̱ wak, micha im ʋlhtipo aiena ka isht ʋla hatuk osh; okla, micha i̱ kamel aiena kʋt a holhtina iksho hatuk osh; micha yakni yash chukowʋt okpʋni tok.

⁶ Mihma Mitian okla pulla kak o̱ Islael ʋt ilbʋsha fehna tok; mihmʋt Islael ʋt Chihowa ya̱ i̱ pa̱ha̱ya tok.

⁷ Mihma yakohmi tok, Mitianait ʋhleha pulla kak o̱, Islael im ʋlla ʋhleha hʋt Chihowa ya̱ i̱ pa̱ha̱ya ma,

⁸ Chihowa yʋt Islael a̱ hopaii i̱ pila tok: mihma yʋmmak ash osh, Islael in Chihowa Chitokaka yʋt yak ahanchishke, Ʋno ak osh Echip a̱ ai ishit hʋchi kokchi li tok, micha aboha yuka a kohchit hʋch isht ʋla li tok oke.

⁹ Micha ʋno ak osh Echip okla ibbak a̱, micha hʋch ilbʋshali tok ibbak a̱ a hʋchi hlakofichi li tok; micha hʋch itikba tihlelit kohchit, micha i̱ yakni ya̱ hʋch ima li tok oke.

¹⁰ Micha, Ʋno ak osh hʋchin Chitokaka Chihowa sia hoke; Amolait ʋhleha i̱ yakni yo̱ hʋsh ai asha kʋt i̱ naholbʋt toba puta ka hʋsh i̱ nukshopa ná, hʋchim achi li tok kia, ʋm anumpa ha̱ hʋs sʋm antia tuk keyushke, im ahanchi tok.

¹¹ Mihma Chihowa im enchel ʋt ʋla cha, iti baiyi akishtʋla yʋmmʋt Oflah hikia hosh Choash Abieslait ak o̱ im atalaia ak o̱ binili tok: mihma ushi Kiteon ʋt Mitianait ʋhleha hak o̱ in luhma chi̱ hosh pa̱ki abushli ya̱ bili̱ka ho̱ onush a̱ boli tok.

¹² Mihma Chihowa im enchel ash osh i̱ haiaka cha, Chihowa yʋt chib afoyukʋshke, hatak hlampko, hatak chilita nukwia iksho chia ma! im achi tok.

¹³ Mihma Kiteon ʋt, An Chitokaka ma! Chihowa yʋt pibafoyuka hokak o̱ nanta katiohmi ho̱ ilʋppa puyuta kʋt pi onʋtola tuk o̱? nana afehna puta pi̱ki ʋhleha hʋt pim anolit, Chihowa ak osh Echip a̱ akohchit pisht ʋla keyu̱, ahanchi beka tok mʋto? yohmi kia himak ano Chihowa yʋt pi kanchit, Mitianait ʋhleha ibbak a̱ pi fohkishke.

¹⁴ Mihma Chihowa yʋt i̱ holhponayo onochit pisa mʋt, Ilʋppa ish a kʋllo kʋt yʋmohmi hosh iá, mikmʋt Islael a̱ Mitianait ʋhleha ibbak a̱ ish hlakoficha chi̱ hoke; chi pila li keyu cho? achi tok.

¹⁵ Mihma an Chitokaka ma! nanta hak o̱ Islael a̱ ishit hlakofichi la chi̱ cho? yakeh! an chuka achʋfa yʋt Manasseh ya̱ ilbʋsha yoke, micha a̱ki in chuka achʋfa ya̱ moma ik lauwo sia hoke, im achi tok.

¹⁶ Mihma Chihowa yʋt, Chibafoyuka li pulla chi̱ hoke; mikma Mitianait ʋhleha ha̱ hatak achʋfa chiyuhmichit issot ish kancha chi̱ hoke, im achi tok.

¹⁷ Mihma, Himak a̱ chi holhponayo hanta a chi ahayuchi li hokma, yohmikma is sʋm anumpuli tuk ʋt nan isht atokowa is sa̱ haiakʋchashke.

¹⁸ Ish ia ná, chim asilhha lishke, ont falamʋt nan isht aiokpʋchi ya̱ isht ʋtʋt, chi tikba talali li hayashke, achi tok. Mihma, Binili li̱ anonti ish lashke, achi tok.

¹⁹ Mihma Kiteon ʋt ont chukowʋt, issi kosoma ushi, micha bota tohbi efa achʋfa ho̱ pʋska ik shatʋmmo atahli tok: nipi ano kishi fohki mʋt, okchi ya̱ shuti ʋni mʋt, baiyi akishtʋla ya̱ isht im ona cha, isht aiokpʋchi tok.

²⁰ Mihma Chitokaka im enchel ʋt, Nipi micha pʋska ik shatʋmmo ya̱ ishi cha, tʋli ilʋppa onochi cha, okchi ya̱ hlatʋblí, im achi tok. Mihma yʋmohmi tok.

²¹ Mihma Chihowa im enchel ʋt tʋbi ibbak foyuka tuk ʋt weli cha, tʋbi wishakchi ya̱ nipi micha pʋska ya̱ tikelichi ma, luak ʋt tʋli ya̱ kohcha cha, nipi micha pʋska ik shatʋmmo ya̱ hushmit tahli tok. Yʋmohmi ma Chihowa im enchel ʋt ia na ik peso ki tok.

²² Mihma Kiteon ʋt Chihowa im enchel atuk o̱ akostininchi mʋt, Kiteon ʋt, Ikikkeh! Chitokaka Chihowa ma! Chihowa im enchel a̱ nashuka itipisa li hokʋt, achi tok.

²³ Mihma Chihowa hʋt, Chi nuktaiyalashke, chi nukshopa ná, chilla he keyu hoke, im achi tok.

²⁴ Yʋmohmi ma Kiteon ʋt Chihowa ya̱ alta im ikbi cha, Chihowa‐shalom hochifo tok: himak nitak a̱ Abieslait ʋhleha in tʋmaha Oflah ya̱ a hikia moma hoke.

²⁵ Atuk o̱ yakohmi tok, mih ninak ak inli ho̱ Chihowa yʋt, Chi̱ki i̱ wak hobʋk himita, wak hobʋk atukla afʋmmi untuklo kak o̱ ish ishashke; micha Baal im alta chi̱ki ʋt ikbi tok a̱ ish kinʋffashke, micha iti lokoli bili̱ka hieli ka chanlit ish akʋchashke:

²⁶ Micha tʋli paknaka ilʋppa a chim apesa li ka Chihowa chin Chitokaka ya̱ alta ish im ikbi cha, wak hobʋk atukla kash ishit ʋbit, iti lokoli chanlit ish akʋcha chi̱ kʋt, isht hukmit isht aiokpʋchi isht ish aiokpʋchashke, im achi tok.

²⁷ Yʋmohmi ma Kiteon ʋt in tishu pokoli ho̱ ishi cha, Chihowa yʋt im achi tuk mak o̱ yʋmohmi tok: mihmʋt i̱ki in chuka achʋfa, micha tʋmaha holihta hatak aiena ka i̱ nukshopa hatuk osh, nitak a̱ yʋmihcha he keyu hosh, ninak o̱ yʋmohmi tok.

²⁸ Mihma tʋmaha holihta hatak ʋhleha hʋt onnahinli fehna wakaya ma, yakeh! Baal im alta ʋt kinafa ma, mihma iti lokoli yʋmma bili̱ka hikia tuk ʋt cha̱yʋt kinahli, micha wak hobʋk atukla kash o̱ alta toba tuk a̱ onochit isht aiokpʋchi tuk achini tok.

²⁹ Yʋmohmi ma it i̱ ponaklot, Kʋta hosh ilʋppa yʋmihchi tuk oh cho? achi tok. Atuk osh okla asilhhʋchit ponaklo ma, Choash ushi Kiteon ak osh ilʋppa yʋmihchi tuk oke, okla achi tok.

³⁰ Yʋmohmi ma tʋmaha holihta hatak ʋhleha hʋt Choash a̱, Chiso ha̱ ishit ish kohcha na illashke: Baal im alta ya̱ kinʋffi hokʋt, micha bili̱ka iti lokoli tuk a̱ chanlit kinʋffi hokʋt, im achi tok.

³¹ Mihma Choash ʋt i̱ sanalit hieli kash, Baal a̱ apehpoʋt hʋsh anumpula chi̱ ho? hʋsh apoba chi̱ cho? kʋna hosh apehpoʋt anumpula hinlakmʋt, yʋmmak osh onnahinli moma na illashke; kʋna hosh im alta ya̱ kinʋffi ka Chitokaka naholbʋt toba ak okmʋt, ilap ak inli hosh il apehpoʋt anumpulashke, im achi tok.

³² Yʋmohmi mʋt nitak yʋmma Chelub‐baal hochifot, Im alta kinʋffi hoka, Baal ak osh apehpoʋt anumpulit i̱ sanalashke, achi tok.

³³ Yʋmohmi ma Mitianait ʋhleha, micha Amalekait ʋhleha, micha hʋshi akochaka in chipota ʋhleha aiena kʋt itihoyʋt itʋnaha cha, iʋt Chesleel okfa hak o̱ ont binanchi tok.

³⁴ Yohmi kia Chihowa imi Shilombish ʋt Kiteon a̱ onʋtola na isht‐pu̱fa olachi na Abiese ʋt im itʋnahʋt iakaiya tok.

³⁵ Mihma anumpa shali ʋhleha Manasseh ya̱ pilʋt hlopullichi tok: mihma yʋmmak kia im itʋnahʋt iakaiya tok: mihmʋt Asha, micha Sebulun, micha Naftali aiena ka anumpa shali ʋhleha i̱ pila tok: mihma afamʋt minti tok.

³⁶ Mihma Kiteon ʋt Chitokaka ya̱, Ish achi tuk ʋt yʋmohmit sʋbbak ak o̱ Islael a̱ isht ish hlakoficha chi̱ hokmʋt,

³⁷ Yakeh! chukfi hishi ya̱ anihechi ya̱ bohli la chi̱ hoke: yohmi ka fichak ʋt chukfi hishi ak bano ho̱ onʋtola cha, yakni inla hokʋto shila biekakma, yohmikma ish achi tuk ʋt Islael a̱ sʋbbak ak o̱ isht ish hlakoficha chi̱ ka, ithaiyana la chi̱ hoke, im achi tok.

³⁸ Atuk o̱ yʋmohmi tok; onna ma onnahinli wakaya mʋt, chukfi hishi ya̱ yichiffit ishi cha, fichak a̱ bushlit chukfi hishi akohchi na oka ʋt ampo alota achʋfa tok.

³⁹ Mihma Kiteon ʋt Chitokaka ya̱ Isht chim anukkilli ʋt a̱ sanalit ik libbo kashke: mikma himonna ilʋppak bano ho̱ anumpuli lashke: Himonna ilʋppak bano ho̱ chukfi hishi ya̱ isht imomaka pisa lashke, chim asilhha lishke; himak ano chukfi hishi ak illa hosh shilakma, yakni paknaka moma hokʋno fichak ʋt onʋtolashke, im achi tok.

⁴⁰ Mihma Chitokaka yʋt ninak yʋmma yʋmihchi tok: chukfi hishi ak illa hosh shila ma, fichak ʋt yakni moma onʋtola tok.