Nan Apesa 5 - Chahta Holisso Holitopa 1886

¹ Yʋmohmi ma Tebolah, micha Balak Abinoam ushi itatuklo kʋt nitak yʋmma taloʋt yak ahanchi tok.

² Okla hʋt aiokpanchit im il ihi̱sa ma, Chihowa hʋt Islael a̱ im il aiokha ka hʋsh holitoblichashke.

³ Hʋsh haklashke, mi̱ko hʋchia ma! ho hakló, hochitoka hʋchia ma! ʋno, ʋno fehna kʋt Chihowa ya̱ in taloa la chi̱ hoke; Islael in Chihowa Chitokaka holitoblichi ishit taloa la chi̱ hoke.

⁴ Chihowa ma! Sei ya̱ kohchʋt ish ia ma, Etom yakni ya̱ kohchʋt ish ia ma, yakni ʋt wʋnihinchi ma, shutik ʋt hoiya tok, hoshonti yak kia oka hoiya tok.

⁵ Chihowa itikba ya̱ nʋnih puta, Sainai yʋmma fehna kʋt Islael in Chihowa Chitokaka itikba ya̱ bilʋt yanahanli tok.

⁶ Analh ushi Shamka i̱ nitak ma hina ya̱ ik ai itʋnowo hosh, nowʋt a̱ya ʋhleha hʋt hinaksho, hina fullota yak o̱ ai itʋnowa tok.

⁷ Tʋmahushi puta kʋt chuk il issa tuk, Islael i̱ yakni ya̱ a chuk il issa tuk o̱, Tebolah sia hʋt hikia li tuk, Islael okla ishki yosh hikia li tuk oke.

⁸ Naholbʋt toba himona ishi tok; yohmi ma holihta okhissa ya̱ tʋnʋp ʋt ai asha tok: telihpa yokmá, tʋbi tʋli halupa ontʋla nana kia Islael tahlepa sipokni pokoli ai ititakla ka itoyula na haiaka tok o̱?

⁹ Islael okla pehlichi ʋhleha hʋt okla ai ititakla ya̱ aiokpanchit il ihi̱sa tuk a̱ sa chu̱kʋsh ʋt ibafoyuka hoke: Chihowa ya̱ hʋsh aiokpʋchashke.

¹⁰ Ho anumpuli, issuba haksobish falaia tohbi hʋsh on chieya ma! nan apesʋt hʋsh chieya ma! micha hina takla hʋsh itʋnowa ma!

¹¹ Oka ai ochi iti tanampo sholi tʋshka pa̱ya ka i̱ hlakofi hʋchia ma! yʋmma Chihowa yʋt Islael yakni tʋmahushi puta ka nana ai ʋlhpiesa ka i̱ yʋmihchi tuk a̱ it im anola hi oke: yʋmohmikma Chihowa im okla hʋt akowʋt holihta okhissa puta ka falamʋt ona hi oke.

¹² Okchá, okchá, Tebolah ma! okchá, okchá, ish taloashke; wakayá, Balak ma! micha chi̱ yuka ha̱ yukachit ish pehliechashke, Abinoam ushi chia ma!

¹³ Yʋmohmi ma hlako̱fi ka okla ai ititakla hochitoka ʋhleha ha̱ pehlichi ikbi tok: micha Chihowa ʋt im okla hatak hochitoka pehlichi sakbishke.

¹⁴ Hakshish Eflaim a̱ akohchʋt Amalek a̱ i̱ sanali tuk; Benchamin ma! chiakaiyʋt chim okla ha̱ ibai ʋlhto tuk: Machi ya̱ pehlichi ʋhleha hʋt minti tuk, micha Sebulun a̱ ishit holissochit ieshi ak atuk oke.

¹⁵ Mihma Issaka pehlichi ʋhleha hʋt Tebolah ya̱ ibafoyuka tuk; Issaka fehna, micha Balak ak kia ibafoyuka tuk ak inli: yʋmmak ash osh aka hikia ho̱ okfa ha̱ pila tok. Luben ʋt itachowʋt aiasha ka chu̱kʋsh im anukfila chito fehna tuk oke.

¹⁶ Nanta katiohmi ho̱ chukfʋlhpoa ai asha ka antʋt chukfʋlhpoa ya̱ya ka ish haklo tuk o? Luben ʋt itachowʋt ai asha ka chu̱kʋsh silhhi chito fehna tuk oke.

¹⁷ Kileat ʋt Chatan mish tʋnnʋp ak o̱ anta tuk: micha nanta katiohmi ho̱ Tan ʋt peni hochito ai ahanta tuk o̱? Asha ʋt okhʋta lapalika ak inli antʋt, peni hochito atakali ya̱ ai ahanta tuk.

¹⁸ Sebulun, micha Naftali achahaka ahielit ilhfiopak a̱ illi ka il im ihi̱sa okla hoke.

¹⁹ Mi̱ko puta kʋt ʋlʋt itibi tuk; yohmi na Mekitto oka taloha bili̱ka Tanaach a̱ Kenan mi̱ko puta kʋt ai itibi tuk oke; nawehpoa tʋli holisso ya̱ ishi tuk keyu hoke.

²⁰ Ʋba minti hosh okla itibi tuk; fochik puta ai ia he ʋlhpesa kʋt a̱yʋt Sisela ya̱ itibi tuk oke.

²¹ Kishon okhina, okhina nitak cha̱shpo yʋmmʋt, Kishon okhina yʋt pi̱fit kanchi tuk oke. Ʋmi shilombish ma! hatak hlampko chilita ya̱ yakni ya̱ ish a hʋhlichishke.

²² Yʋmohmi ma ilauatʋchi kak o̱, micha hatak hlampko chilita yʋt ilauatʋchi kak o̱, issuba iyi akchush ʋt kobahli tuk oke.

²³ Chihowa im enchel ʋt Chihowa ya̱ okla ant apela tuk keyu, Chihowa ya̱ ant apelʋt chilita hochitoka ya̱ i̱ sanali tuk keyu hoka, Melos a̱ kalakshichit hʋsh mihashke, okla yʋmma ai asha ka hʋsh kalakshichi fehnashke, achi tok.

²⁴ Hebe Kenait tekchi Chael ʋt holitopa kʋt ohoyo puta ka i̱ shahla chi̱ hoke, ohoyo puta ʋlhtipo ahanta ka holitopa kʋt i̱ shahla hi oke.

²⁵ Oka im asilhha ma, pishukchi yo̱ ipeta tuk: pishukchi nia ya̱ ampo holitopa yo̱ fohkit isht im ʋla tuk oke.

²⁶ Ibbak a̱ chofak a̱ isht ishi mʋt, ibbak isht impak imma ya̱ chofak isht anʋhlichi yash Sisela ya̱ isht isso tuk oke: imosana bahlit hlopullichi mʋt, noshkobo ha̱ chanlit tʋbli tuk oke.

²⁷ Iyi itikba ya̱ akachunoli tuk, itula tuk, aka itoyula tuk: iyi itikba ya̱ akachunoli tuk, itula tuk; iyi itikba ya̱ akachunoli tuk mak osh yʋmma illit itula tuk oke.

²⁸ Sisela ishki ʋt okhissushi ya̱ pit a hopo̱koyot, okhissushi isht okshilita tʋnna pit tahpʋlʋt, Nanta katiohmi ho̱ im itichanʋlli hʋt minti kʋt hopaki cho? nanta katiohmi ho̱ im itichanʋlli hʋt chanʋlli kʋt sʋlaha cho? achi tuk oke.

²⁹ Ohoyo hopoyuksa im a̱sha ʋhleha hʋt anumpa falama ya̱ ima, a̱hli, ilap inli hosh anumpa falama ya̱ il anumpulit,

³⁰ Nana ahayuchi tuk keyu ho̱? na wehpoa ya̱ itakʋshkoʋt, ohoyo himita achʋfa, keyukmʋt tuklo kia, hatak chilita puta kʋt ishit, Sisela ʋto na wehpoa pisa ilaiyukali, chofak ushi isht ʋlhtaha na wehpoa pisa ilaiyukali, pisa ilaiyukali tahlala̱ka chofak ushi isht ʋlhtaha, na wehpoa ishi tuk ʋt i̱ nucha he ʋlhpesa ka itakʋshkowa tuk keyu ho̱? achi tok.

³¹ Yʋmohmi hosh chin tʋnʋp moma kʋt illashke, Chihowa ma! amba Chihowa holitobli ʋto hʋshi ʋt imi̱ hlampko il ai eshi hosh kohcha kak inli ho̱ chiyuhmashke, ahanchi tok oke. Mihma yakni ʋt afʋmmi pokoli ushta ho̱ foha tok oke.