Nan Apesa 4 - Chahta Holisso Holitopa 1886

¹ Mihma Ehut ʋt illi ma, Islael im ʋlla ʋhleha hʋt anonti nana ik achukmo ka Chihowa itikba a yʋmohmi tok.

² Mihma Chihowa yʋt kanchit Chabin Kenan i̱ mi̱ko, yʋmmʋt Haso ak o̱ apehlichi ya̱ in tʋshka chipota i̱ kʋpitʋni hʋt Sisela atok, yʋmmʋt Chentail Haloshelh ak o̱ ai ʋtta beka tok.

³ Mihma Islael im ʋlla ʋhleha hʋt Chihowa ya̱ im ilbʋshʋt i̱ pa̱ha̱ya tok; tʋnʋp tʋli itichanʋlli ʋt in tahlepa chakkali tok; micha afʋmmi pokoli tuklo ho̱ Islael im ʋlla ʋhleha ha̱ ilbʋshali fehna tok.

⁴ Mihma Lapitolh tekchi Tebolah ohoyo hopaii yosh nitak yʋmma Islael a̱ nan im apesa atok.

⁵ Micha Tebolah i̱ pam iti nutaka Eflaim nʋnih, micha Behlel itin takla yak o̱ ʋtta tok: mihma nan im apesa chi̱ ho̱, Islael im ʋlla ʋhleha hʋt im ona beka tok.

⁶ Mihma Abinoam ushi Balak a̱ pit hoyot Ketesh‐naftali ai isht ʋla mʋt, Islael in Chihowa Chitokaka yʋt apesa kʋt, Iʋt Tabo nʋnih ha̱ pit akanʋlli cha, Naftali im ʋlla ʋhleha, micha Sebulun im ʋlla ʋhleha aiena hatak tahlepa sipokni pokoli ho̱ i̱sht ish iashke,

⁷ Mikma Chabin in tʋshka chipota i̱ kʋpitʋni Sisela, micha tʋnʋp im iti chanʋlli puta, micha im okla laua aiena ka kanʋllichit okhina Kishon ak o̱ isht ʋla lish, chibbak a̱ fohki la chi̱ hoke, ahanchi tuk keyu cho? im achi tok.

⁸ Mihma Balak ʋt, Si awant ish ia hokmʋno, ia la hinla; amba si awant ish ia he keyu hokmʋno, ia la he keyu, im achi tok.

⁹ Mihma, Chi awant ia li pulla chi̱ hoke: yohmi kia yʋmma nowʋt ish a̱ya kʋt ishit chi annoa he keyu hoke; Chihowa yʋt Sisela ya̱ kanchit ohoyo ho̱ ibbak fohka chi̱ hoka, achi tok. Mihmʋt Tebolah ʋt wakaya mʋt, Balak a̱ awant Ketesh a̱ ona tok.

¹⁰ Mihma Balak ʋt Sebulun, micha Naftali hoyot Ketesh a̱ isht ona tok: mihma hatak tahlepa sipokni pokoli hosh iakaiya tok: mihma Tebolah ʋt awant ia tok.

¹¹ Mihma Hebe Kenait, yʋmmʋt Hobab Moses ipochi ya̱ im ʋlla ʋhleha ai achʋfa hosh Kenait ʋhleha ha̱ ile filʋmmichit, Saanaim yakni patʋssʋchi Ketesh bili̱ka yak o̱ im ʋlhtipo ha̱ ont hilechi tok.

¹² Mihma Abinoam ushi Balak ʋt Tabo nʋnih ha̱ ona ka Sisela ya̱ okla im anoli tok.

¹³ Mihma Sisela ʋt tʋnʋp im itichanʋlli moma, tʋli itichanʋlli tahlepa chakkali, micha okla moma Chentail Haloshelh pilla minti im ai asha tuk ʋt Kishon okhina yak o̱ hoyot ai itʋnahli tok.

¹⁴ Mihma Tebolah ʋt Balak a, Wakayá, himak nitak ak o̱ Chihowa hʋt Sisela ya̱ chibbak a̱ fohki hoka: Chihowa yʋt chi tikba ia tuk keyu̱? im achi tok. Mihma Balak ʋt Tabo nʋnih ha̱ akowʋt ia ma, hatak tahlepa sipokni pokoli hosh iakaiya tok.

¹⁵ Mihma Chihowa yʋt Sisela, micha tʋnʋp im itichanʋlli, micha im okla chito aiena ka Balak itikba ya̱ bʋshpo falaia halupa ya̱ ishit komuntʋchit yuhli tok; yohmi na Sisela ʋt itichanʋlli ya̱ akowa cha, aka hikia hosh maleli tok.

¹⁶ Yohmi kia Balak ʋt tʋnʋp itichanʋlli, micha okla chito aiena ka iakaiyʋt Chentail Haloshelh a̱ isht ona tok; mihma Sisela im okla chito moma kʋt bʋshpo falaia halupa onʋtolʋt akakohʋt taiyaha tok; mihma hatak achʋfa kia iksho tok.

¹⁷ Yohmi kia Sisela ʋto aka hikia hosh malelit Chael Hebe Kenait tekchi im ʋlhtipo ya̱ ona tok: Chabin Haso i̱ mi̱ko, micha Hebe Kenait in chuka achʋfa itatuklo kʋt it i̱ nanaiya hatuk oka.

¹⁸ Mihma Chael ʋt kohchʋt Sisela ya̱ ont afama cha, Fullotʋt ish chukowashke; fullotʋt is sʋba chukowashke; chi nukshopa ná, a̱ shahli ma! im achi tok. Atuk o̱ ʋlhtipo ya̱ fullotʋt chukowa ma, anchi isht ompohomo tok.

¹⁹ Mihma, Oka kanomosi ho̱ sa petá, chim asilhha lishke, satukshila hoka, im achi tok. Mihma pishukchi kotoba ʋlhto ho̱ shu̱fi cha, ishkochichi cha, ompohomo tok.

²⁰ Anonti, Ʋlhtipo okhissa ish hikiashke; atukma kʋna hosh ʋla cha, chi̱ ponaklot, Hatak ʋt a̱sha? achikma, Keyú, ish achashke, im achi tok.

²¹ Yohmi ma Hebe tekchi Chael ʋt ʋlhtipo chofak a̱ ishi, micha chofak isht anʋhlichi a̱ ishi mʋt, lumʋt onʋt chofak a̱ imosana ishit nʋhlit, yakni pit shamʋllichi tok: hoyʋblit nusit illi hatuk o̱. Yʋmohmi na illi tok.

²² Mihma yakeh! Balak ʋt Sisela ya̱ iakaiyʋt a̱ya ma, Chael ʋt kohchʋt afama mʋt, Mintí, mikma hatak hoyot ish a̱ya ka chi pisachi lashke, im achi tok. Atuk o̱ im ʋlhtipo ya̱ ant chukowa ma, yakeh! Sisela ʋt illi cha, itoyula ma, chofak ʋt imosana ya̱ shamʋlli tok.

²³ Yʋmohmi hosh Chitokaka hʋt nitak yʋmma Kenan mi̱ko Chabin a̱ Islael im ʋlla ʋhleha itikba ya̱ anutakʋchi tok.

²⁴ Mihma Islael im ʋlla ʋhleha ibbak ʋt Kenan mi̱ko Chabin a̱ iakaiyʋt i̱ kʋllot ma̱ha̱yʋt, Chabin Kenan mi̱ko ya̱ ʋbit tahli tok.