Nan Apesa 3 - Chahta Holisso Holitopa 1886

¹ Mihma oklushi ilʋppak o̱ Chihowa yʋt ashanchi kʋt (Islael laua kaniohmi hosh Kenan tʋnʋp ai asha tok moma ka ik ithano;

² Peh Islael im ʋlla ʋhleha isht atiaka yʋt tʋnʋp ithʋnʋt imomakʋt taha chi̱ ho̱, yʋmohmi ho̱ peh tikba ka ik ithano ya̱ isht imomaka pisa chi̱ hatok;)

³ Yakohmi ak atok, Filistin hochitoka tahlapi, micha Kenanait ʋhleha moma, micha Sitonian ʋhleha, micha Hifait ʋhleha Lebanon ai asha, Baal‐hemon nʋnih asht isht ia hosh Hamalh a chukowa ont ai ʋhli tok.

⁴ Yʋmmak o̱ Islael ʋt Chihowa i̱ nan ʋlhpisa puta yʋmma i̱ki ʋhleha ha̱ Moses a̱ tohno na ibbak ak osh i̱ holissochi tok a̱ haponaklokmá, nana chi̱ ka imomaka pisa chi̱ hatok.

⁵ Mihma Islael im ʋlla ʋhleha hʋt Kenanait ʋhleha, Hittait ʋhleha, micha Amolait ʋhleha, micha Pelissait ʋhleha, micha Hifait ʋhleha, micha Chebusait ʋhleha aiena ka takla aiasha tok.

⁶ Micha ushetik ʋhleha ha̱ tekchi yachi̱ ho̱ okla ishi mʋt, ilap ushetik ʋhleha ha̱ yʋmma ushi ʋhleha ha̱ okla ima cha, i̱ na holbʋt toba puta ka aiokpʋchi tok.

⁷ Micha Islael im ʋlla ʋhleha hʋt nana ik achukmo ka Chihowa itikba a yʋmohmi cha, Chihowa in Chitokaka ya̱ im a haksit Baalim, micha Ashtelah itatuklo ka aiokpʋchi tok.

⁸ Yʋmohmi ma Chihowa im ai i̱ nukkilli yʋt Islael a̱ i̱ sanalit libbi tok, micha Chushan‐lishahlaim Mesopotamia i̱ mi̱ko ya̱ ibbak fohki tok: mihma Islael im ʋlla ʋhleha hʋt afʋmmi untuchina ho̱ Chushan‐lishahlaim a̱ i̱ nutaka tok.

⁹ Mihma Islael im ʋlla ʋhleha hʋt Chihowa ya̱ i̱ pa̱ha̱ya ma, Chihowa yʋt hlakofichi ya̱ Islael im ʋlla ʋhleha ha̱ i̱ hilechi na hlakofichi tok, yʋmmʋt Kaleb nakfish Kenas ushi Olhniel ak atok.

¹⁰ Mihma Chihowa im i̱ Shilombish ʋt onʋtola cha, Islael nan im apesa toba cha, kohchʋt tʋnʋp ia tok: mihma Chihowa yʋt Chushan‐lishahlaim Mesopotamia i̱ mi̱ko ya̱ ibbak fohki tok: mihma ibbak ʋt Chushan‐lishahlaim a̱ imaiyʋchi tok.

¹¹ Mihma yakni ʋt afʋmmi pokoli ushta ho̱ foha tok: mihma Olhniel Kenas ushi ʋt illi tok.

¹² Mihma anonti Islael im ʋlla ʋhleha hʋt nana ik achukmo ka Chihowa itikba ya̱ a yʋmohmi tok: Islael ʋt nan ik achukmo ka Chihowa itikba ya̱ a yʋmohmi kak o̱, Chihowa yʋt Moab i̱ mi̱ko Eklon a̱ kʋllochit i̱ sanalichi tok.

¹³ Mihmʋt Ammon in chipota, micha Amelek in chipota ʋhleha aiena ka hoyot itʋnahli cha, iʋt Islael a̱ issot kanchi cha, pam iti tʋmaha holihta ya̱ ishi tok.

¹⁴ Yʋmohmi ho̱ Islael im ʋlla ʋhleha hʋt Moab i̱ mi̱ko Eklon a̱ afʋmmi auah untuchina ho̱ i̱ nutaka tok.

¹⁵ Yʋmohmi tuk kia Islael im ʋlla ʋhleha hʋt Chihowa ya̱ i̱ pa̱ha̱ya ma, Chihowa yʋt hlakofichi Ehut, Kela ushi, Benchamait hatak afabi yo̱ i̱ hilechi tok: micha yʋmmak o̱ tohno cha, Islael im ʋlla ʋhleha hʋt Moab i̱ mi̱ko Eklon a̱ nahʋlbina i̱ pila tok.

¹⁶ Yohmi kia Ehut ʋt bʋshpo tahlala̱ka halupa falaia kʋt kubit achʋfa ho̱ ikbi cha, iyubi isht impak imma nafohka nutaka isht il ai ʋskofʋchi tok.

¹⁷ Micha na hʋlbina ya̱ Eklon Moab i̱ mi̱ko ya̱ isht im ona tok: mihma Eklon ʋt hatak nia fehna hatok.

¹⁸ Atuk osh nahʋlbina ya̱ im issʋt atahli mʋt, okla nahʋlbina shali tuk a̱ pit tihleli tok.

¹⁹ Amba ilap ʋto Kilkal bili̱ka tʋli na holbʋt toba a hiohli ya̱ falama cha, Anumpa luma ya̱ isht chim a̱ya lishke, mi̱ko ma! achi tok: mihma yʋmmak ash osh, Chulusashke, achi tok. Mihma bili̱ka hiohma̱ya tuk ʋt kohcha tok.

²⁰ Mihma Ehut ʋt im ona tok; mihma aboha paknaka tofa chuka talaia ilap bano immi yosh yʋmmʋt in talaia tuk osh binili tok: mihma Ehut ʋt, Chihowa im anumpa ho̱ isht chim a̱ya lishke, achi tok. Mihma im ai om binili ya̱ binili tuk ʋt wakaya tok.

²¹ Mihma Ehut ʋt ibbak ʋlhfʋbek imma pit welit iyubi isht impak imma ya̱ bʋshpo yash pit ai ishi cha, ikfoka ya̱ ishit bahli tok.

²² Micha halupa ʋt pit chukowa ma, ʋpi ak kia awant pit chukowa tok: mihma nia ʋt itakmot halupa ya̱ luhmi tok: yohmi na bʋshpo falaia ya̱ kohcha he keyu ma, lukfi ʋt kohcha tok.

²³ Yʋmohmi ma Ehut ʋt kohchʋt hoshontika ya̱ hlopullit tofa chuka okhissa ya̱ on okshita cha, ashʋnichi tok.

²⁴ Atuk osh kohchʋt ia ma, in tishu ʋhleha hʋt ʋla tok: micha okla ant pisa mʋt, yakeh! aboha paknaka chuka talaia okhissa yʋt ashana tok; mihma, Aboha paknaka tofa chuka talaia iyi ya̱ ai ompohomo pullʋshke, okla achi tok.

²⁵ Micha hielit pola̱ka hofahyʋt taha tok; mihma yakeh! aboha paknaka chuka talaia okhissa ya̱ ik tiwo ma, isht‐tiwa okla ishi cha, tiwi tok: mihma yakeh! i̱ mi̱ko yʋt illit aka itula tuk atok.

²⁶ Mihma Ehut ʋt, hieli itintakla ma, tʋli naholbʋt toba a hiohli ya̱ ont iʋt, hlakofit Seilalh a̱ ona tok.

²⁷ Atuk osh ona mʋt yakohmi tok, Eflaim nʋnih ha̱ isht pu̱fa ai olachi ma, Islael im ʋlla ʋhleha hʋt awant nʋnih ha̱ akowa ma, yʋmmak osh tikba ia tok.

²⁸ Mihmʋt, Hʋs si akaiyashke; hʋchin tʋnʋp Moab okla ha̱ Chihowa yʋt hʋch ibbak a̱ fohki hoka, im achi tok. Mihma okla iakaiyʋt akowʋt ia ma, Chatan okhina akocha Moab pilla ka ishi cha, hatak achʋfa kia ik hlopullí, ahna he keyu tok.

²⁹ Micha nitak yʋmma Moab a̱ hatak tahlepa sipokni pokoli foka, hatak nia bieka, micha hatak hlampko bieka tok: mihma hatak achʋfa kia hlakofi tok keyu hoke.

³⁰ Yʋmohmi hosh nitak yʋmma Moab a̱ Islael ʋt imaiyachit nutakʋchi tok. Mihma yakni ʋt afʋmmi pokoli untuchina ho̱ foha tok.

³¹ Mihma iakaiya kʋt Analh ushi Shamka, yʋmmʋt Filistin tahlepa hannali ho̱ wak toksʋli isht bihli yo̱ isht ʋbi tok: yʋmmak kia Islael a̱ hlakofichi tok.