Nan Apesa 21 - Chahta Holisso Holitopa 1886

¹ Mihma Islael hatak ʋhleha hʋt Mispeh a̱sha mʋt, anumpa kʋllo il onochi mʋt, Il achʋfa kia Benchamin a̱ tekchi ya chi̱ ka pim ushetik il ima he keyu, ai achi tuk atok.

² Mihmʋt okla hʋt Chitokaka im aboha ona cha, Chitokaka itikba aiasha na opia tok: micha itih ha̱ ʋba takalechit yaha̱ya fehna tok.

³ Mihmʋt, Islael in Chitokaka Chihowa ma! nanta katiohmi ho̱ Islael a̱ ant a yakohmi na himak nitak a̱ Islael a̱ apehlichi achʋfa kʋt iksho cho? achi tok.

⁴ Atuk osh onna ma yakohmi tok, okla hʋt onnahinli wakaya cha, alta ikbi cha, na hukmit isht aiokpʋchi, micha isht iti̱ nanaiyʋchi isht aiokpʋchi aiena ka im issa tok.

⁵ Mihma Islael im ʋlla ʋhleha hʋt, Kʋta hosh Islael apehlichi puta moma ka Chihowa im itʋnaha ka ta̱kla kʋt ik lo cho? achi tok. Anumpa kʋllo fehna ile onochit, Kʋna kia Mispeh ya̱ Chihowa ya̱ im ai itʋnaha ka ik a̱yokmʋt, illi pullashke, achi tuk atok okʋt.

⁶ Mihma Islael im ʋlla ʋhleha hʋt itibapishi Benchamin ak o̱ ishit nukha̱klo tok: micha, Islael a̱ apehlichi achʋfa kʋt himak nitak a̱ mosholishke.

⁷ Hieli moma ka tekchi ya chi̱ kʋno il i̱ katiohmicha chi̱ cho? Chihowa pulla anumpa kʋllo il onochit tekchi ya̱ chi̱ ka piso tek a̱ il ima he keyu, il achi tuk okʋt, achi tok.

⁸ Micha anonti, Kʋta achʋfa hosh Islael apehlichi moma ka Mispeh ya̱ Chihowa ya̱ ik im ai ʋlo tuk oh cho? achi tok: mihma yakeh! achʋfa kia Chabesh‐kileat minti kʋt abinanchit ai itʋnaha ya̱ ik lo tok.

⁹ Okla ha̱ hotihna ma, yakeh! Chabesh‐kileat okla hʋt achʋfa kia yʋmma iksho tok.

¹⁰ Mihma okla itʋnaha yash osh yʋmma hatak tahlepa sipokni auah tuklo chilita nukwia iksho moma i̱ shahli ka pila cha, im apesa mʋt, Hʋsh ia cha, Chabesh‐kileat okla ohoyo, micha ʋlla aiena ka bʋshpo falaia halupa isht ʋbit hʋsh tahlashke.

¹¹ Micha nana ilʋppak o̱ hʋsh yʋmihcha chi̱ hoke, Nakni, micha ohoyo puta hatak apota tok puta ka ʋbit tahlit hʋsh ʋmohmichashke, achi tok.

¹² Atuk o̱ Chabesh‐kileat okla ha̱ ohoyo himita tahlepa ushta hosh nakni nana kia iba tʋshkit ithana tok keyu yo̱ okla ahayuchi tok: mihmʋt Shiloh ʋlhtipo holitopa ya̱ yʋmmʋt Kenan yakni talaia ka isht ona tok.

¹³ Mihma itʋnahʋt aiasha tuk moma kʋt Benchamin im ʋlla ʋhleha, yʋmmʋt Limmon tʋli aiasha ka ont im anumpulit, i̱ kanʋt i̱ howa chi̱ ho̱ pila tok.

¹⁴ Mihma Benchamin ʋt nitak yʋmma anonti ʋla tok: mihma Chabesh‐kileat ohoyo apowʋt okchalinchi tuk ʋt tekchi okla ima tok: yohmi kia yʋmmʋt okla ik im ono tok.

¹⁵ Mihma Benchamin a̱ okla ishit nukha̱klo tok; Chihowa yʋt Islael apehlichi puta ai ititakla ya̱ ashahbichi hatuk o̱.

¹⁶ Yʋmohmi ma itʋnaha aiasha tuk im asʋnonchi ʋhleha hʋt, Hieli moma ka tekchi ya̱ chi̱ ka il i̱ katiohmicha chi̱ cho? Benchamin a̱ ohoyo hʋt illit taha hoka, achi tok.

¹⁷ Micha anonti, Ai isha he ʋlhpesa ʋt Benchamin hlako̱fi in talaia he ʋlhpesa, yohmi ho̱ apehlichi achʋfa kʋt Islael a̱ illit ik taho kashke, achi tok.

¹⁸ Ik yohmi kia tekchi ya chi̱ ka piso tek a̱ il ima he keyu; Islael im ʋlla ʋhleha hʋt anumpa kʋllo il onochit, Kʋna hosh Benchamin a̱ tekchi imakmʋt, okpulot tahʋshke, achi tok.

¹⁹ Mihmʋt, Yakeh! Shiloh ya̱ yʋmmʋt Behlel a̱ i̱ falʋmmi in tʋnʋp hina Behlel a̱ ʋttʋt iʋt Shechem ona ka hʋshi akochaka imma in tʋnnʋp, micha Lebonah im oka mahli imma ya̱ afʋmmikma Chihowa impʋchi holitopa isht aiasha chatuk oke.

²⁰ Yʋmohmi ma Benchamin im ʋlla ʋhleha ha̱ okla im apesʋt, Hʋsh ia cha, pa̱ki ahollokchi ya̱ ont im aiehchit hʋsh aiashashke.

²¹ Micha hʋsh hopo̱koyashke, micha yakeh! Shiloh ushetik ʋhleha hʋt kohchʋt taloʋt hihla ya̱ hihlʋt a̱yakma; yohmikma pa̱ki ahollokchi yo̱ hʋsh kohchá, hatak hʋsh moma kʋt hʋchi tekchi ya̱ chi̱ aiyukali ka Shiloh ushetik ʋhleha ha̱ hʋsh hokli cha, Benchamin i̱ yakni ya̱ hʋsh onashke.

²² Atuk o̱ yakohmikma i̱ki ʋhleha, keyukmʋt, itibapishi ʋhleha hʋt nana achit pim ʋlakma, Pishno ak atuk mak o̱ hʋsh i̱ kanaske: il it in tanampi ka hatak tekchi aiyukali ka kil im il atombo tuk oka; himak a̱ hʋsh ashʋcha chi̱ hosh hʋsh ima tuk keyu hokʋt, il im acha hi oke, achi tok.

²³ Mihma Benchamin im ʋlla ʋhleha hʋt yʋmohmi cha, holhtina ka ʋlhpi̱sa ho̱ tekchi ya chi̱ ka hihlʋt a̱ya yʋmmak oka hoklit ai ishi tok: micha falamʋt ia cha, ai isha he ʋlhpesa yakni yash ona cha, in tʋmaha holihta puta ka apoksiachi cha, aiasha tok.

²⁴ Mihma Islael im ʋlla ʋhleha hʋt nitak yʋmma ashʋt tisheli mʋt, hatak puta kʋt im apehlichi ka, micha in chuka achʋfa aiyukali kʋt ona tok: micha yʋmma ashʋt okla ia mʋt, ai isha he ʋlhpesa aiyukali kʋt ona tok.

²⁵ Nitak yʋmma foka hoka Islael a̱ mi̱ko ʋt iksho tok: hatak puta kʋt ilap nishkin ai im ʋlhpiesa aiyukali hosh yʋmohmi beka tok.