Nan Apesa 20 - Chahta Holisso Holitopa 1886

¹ Yʋmohmi ma Islael im ʋlla ʋhleha moma kʋt kohchʋt ia tok; micha okla moma kʋt hatak achʋfa chiyuhmit iti hoyot Tan ʋttʋt ia kʋt Beesheba ont ʋhli, Kileat aiena hosh Mispeh ya̱ Chihowa im ai itʋnaha tok.

² Mihma okla moma, Islael apehlichi moma ka noshkoboka puta tahlepa sipokni tahlepa ushta, hatak aka a̱ya bʋshpo falaia ieshi hosh Chitokaka im okla hosh itʋnahʋt chieya tok.

³ (Mihma Benchamin im ʋlla ʋhleha hʋt Islael im ʋlla ʋhleha hʋt Mispeh ya̱ ona ka haklo tok.) Yʋmohmi ma Islael im ʋlla ʋhleha hʋt, Nan ashʋchi ilʋppʋt katiohmi hatuk o̱? pim anolí, achi tok.

⁴ Mihma ohoyo illi tuk i̱ hatak Lefait ash osh afalamichit, Ʋno micha ʋm it aiena aiena kʋt a pi nusa chi̱ hosh Kibeah, yʋmmʋt Benchamin immi ak o̱ e chukowa tok.

⁵ Atuk ak o̱ Kibeah hatak ʋhleha hʋt wakayʋt a̱ sanali cha, ninak o̱ chuka ya̱ afulloblit si apakfoyupa cha, sʋbi bʋnna tok: micha ʋm it aiena ya̱ im ahlia na illi tuk oke.

⁶ Mihma ʋm it aiena ya̱ ishi lish, bʋshlit tʋptulit tahli li mʋt, Islael ai isha he ʋlhpesa yakni moma ka hlopullichit pila li tuk oke: haui toba, micha im anukfila iksho aiena ho̱ Islael a̱ a yʋmohmi hoka.

⁷ Yakeh! Islael im ʋlla ʋhleha hʋchia hokʋt, ilʋppak oka hʋchim anukfila, micha anumpa ha̱ hʋsh bohlashke, achi tok.

⁸ Mihma okla moma kʋt hatak achʋfa chiyuhmit wakaya cha, Pishno ʋt achʋfa kia im ʋlbina ha̱ il ona he keyu, micha achʋfa kia fullotʋt in chuka ya̱ e chukowa he keyu:

⁹ Amba himak a̱ Kibeah ya̱ ilʋppak o̱ e yʋmihchashke: na shoeli hosh ont il itibashke.

¹⁰ Micha Islael apehlichi puta moma ka tahlepa achʋfakma, hatak pokoli, micha tahlepa sipoknikma, tahlepa achʋfa, micha tahlepa sipokni pokolikma, tahlepa sipokni achʋfa il ai ishikma, okla pinak isht a̱yashke; yohmi ho̱ Kibeah Benchamin a̱ onakmʋt, nana ik achukmo Islael a̱ a yʋmihchi tuk moma pulla mak o̱ yʋmihchashke.

¹¹ Yohmi ma Islael hatak moma kʋt tʋmaha holihta ya̱ i̱ sanalit itʋnaha tuk ʋt hatak achʋfa chiyuhmit iti halʋlli tok.

¹² Mihma Islael apehlichi puta kʋt Benchamin apehlichi moma ka hlopullichit hatak pilʋt, Nan ashʋchi ilʋppʋt nanta mak osh hʋch itintakla a yʋmohmi cho?

¹³ Yʋmohmi hoka himak a̱ hatak, Belial in chipota yʋmmʋt Kibeah a̱sha ka, pibbak hʋsh fohki na e bi cha, nana ik achukmo ya̱ Islael a̱ ai isht e kanchashke, achi tok. Yohmi kia Benchamin im ʋlla ʋhleha hʋt itibapishi ʋhleha Islael im ʋlla ʋhleha im anumpa ha̱ i̱ haponakla he keyu tok.

¹⁴ Amba Benchamin im ʋlla ʋhleha hʋt iti hoyot, in tʋmaha holihta puta ka akohchʋt Islael im ʋlla ʋhleha ha̱ itibit ia chi̱ hosh Kibeah ya̱ ona tok.

¹⁵ Nitak yʋmma Benchamin im ʋlla ʋhleha hʋt in tʋmaha holihta puta a holhtina kʋt tahlepa sipokni pokoli tuklo cha hannali tok; Kibeah ʋt ik iba holhtino ka, yʋmmak okʋto holhtina kʋt hatak aiyua ʋt tahlepa untuklo tok.

¹⁶ Okla moma ilʋppa hatak aiyua tahlepa untuklo kʋt afabi yosh tʋli pila kʋt, pa̱shi achʋfa kia ashʋcha he keyu bieka tok.

¹⁷ Mihma Islael im ʋlla ʋhleha hʋt, Benchamin ʋt ik iba holhtino ka, bʋshpo falaia ieshi kʋt holhtina kʋt tahlepa sipokni tahlepa ushta tok: ilʋppa moma kʋt hatak tʋnʋp a̱ya bieka tok.

¹⁸ Mihma Islael im ʋlla ʋhleha hʋt Chitokaka im aboha ona cha, Chitokaka im anukfila im asilhhʋt, Pi katima kak osh ti̱kba iʋt Benchamin im ʋlla ʋhleha ha̱ il itiba chi̱ cho? achi tok. Mihma Chihowa yʋt, Chutah yak ashke, achi tok.

¹⁹ Mihma Islael im ʋlla ʋhleha hʋt onnahinli wakaya cha, Kibeah ya̱ i̱ sanalit binachi tok.

²⁰ Mihma Islael hatak ʋhleha hʋt Benchamin a̱ itiba chi̱ hosh kohchʋt ia tok: micha Islael im ʋlla ʋhleha hʋt Kibeah aiasha ka itiba chi̱ hosh achukmʋt hiohlit taha tok.

²¹ Mihma Benchamin im ʋlla ʋhleha hʋt Kibeah kohcha cha, nitak yʋmma Islael okla ha̱ hatak tahlepa sipokni pokoli tuklo akucha tuklo ho̱ ʋbit akakohli tok.

²² Mihma okla, Islael hatak ʋhleha hash osh ilai yimitachi mʋt, ʋmmona nitak a̱ achukmʋt a hiohli tuk ak inli ho̱ itiba chi̱ kʋt achukmʋt hiohli tok.

²³ (Mihma Islael im ʋlla ʋhleha hʋt Chihowa itikba ona cha, yaha̱ya na ont opia mʋt, Chihowa im anukfila im asilhhʋt, Anonti ia lish, itibapishi li Benchamin im ʋlla ʋhleha ha̱ itibi la chi̱ cho? achi tok. Mihma Chihowa yʋt, Itibit hʋsh iashke, achi tok.)

²⁴ Mihma nitak atukla ma, Islael im ʋlla ʋhleha hʋt Benchamin im ʋlla ʋhleha ha̱ itiba chi̱ kʋt bili̱ka ona tok.

²⁵ Mihma Benchamin ʋt nitak atukla ma Kibeah ya̱ kohchʋt ia cha, itibi tok; micha hatak tahlepa sipokni auah untuchina ho̱ Islael im ʋlla ʋhleha ha̱ ʋbit akakohli tok: ilʋppa moma kʋt bʋshpo falaia ieshi atok.

²⁶ Yohmi ma Islael im ʋlla ʋhleha, micha okla moma kʋt iʋt Chitokaka im aboha ona cha, Chihowa itikba chieyʋt yaha̱ya tok: micha nitak yʋmma nahullochit aiasha na opia mʋt, Chihowa itikba ya̱ na hukmit isht aiokpʋchi, micha it i̱ nanaiyʋchi isht aiokpʋchi aiena ka ai imihi̱sa tok.

²⁷ Mihma Islael im ʋlla ʋhleha hʋt Chihowa ya̱ im a ponaklot, (Chitokaka it im apesa afohka itombi holitopa ʋt nitak yʋmma yʋmmak o̱ talaia hatok.

²⁸ Mikma Alon ushi Eleasa ushi Finehas ak osh nitak yʋmma itikba hikia tok oka,) Anonti ia lish, itibapishi li Benchamin im ʋlla ʋhleha ha̱ itibi la chi̱ cho? ak cho? issa la chi̱ cho? achi tok. Mihma Chihowa yʋt, Hʋsh iashke, onnakma hʋch ibbak a̱ fohki la chi̱ hoke, achi tok.

²⁹ Mihma Islael ʋt im aiehchi ya̱ Kibeah apakfoblit ashachi tok.

³⁰ Mihma Islael im ʋlla ʋhleha hʋt Benchamin im ʋlla ʋhleha ha̱ itiba chi̱ hosh tikba tuk ak inli chohmit nitak ont atuchina ma achukmʋt hiohli cha, Kibeah ya̱ itibi tok.

³¹ Mihma Benchamin im ʋlla ʋhleha hʋt kohchʋt okla ha̱ itibi mʋt, tʋmaha holihta ya̱ issʋt ia tok; hina takla achʋfa kʋt Chitokaka im aboha ia, achʋfa kʋt Kibeah osapa ia itatuklo ka foyukʋt tikba tuk ak inli chohmit issot, micha ʋbit isht ia kʋt hatak pokoli tuchina foka ho̱ ʋbi tok.

³² Mihma Benchamin im ʋlla ʋhleha hʋt, Tikba tuk a̱ chohmit pi tikba akakohʋshke, achi tok. Yohmi kia Islael im ʋlla ʋhleha hʋt achi kʋt, Kiloh i̱ yihlepa cha, tʋmaha holihta ya̱ akohchit isht iʋt hina takla isht il onashke, achi tok.

³³ Mihma Islael hatak moma kʋt aiasha tuk ʋt wakayʋt ia mʋt, Baal‐tama yak o̱ achukmʋt hiohlit, mikma im aiehchi Islael Kibeah oktak aiasha tuk ʋt akohcha tok.

³⁴ Mihma Kibeah itibi kʋt hatak tahlepa sipokni pokoli aiyua yosh Islael moma a kohcha hosh itibi na palʋmmi fehna tok: yohmi kia nana ik achukmo kʋt i̱ bili̱ka kʋt ik ithano tok.

³⁵ Mihma Chihowa yʋt Islael itikba ya̱ Benchamin a̱ issot kanchi tok: mihma Islael im ʋlla ʋhleha hʋt nitak yʋmma Benchamin a̱ hatak tahlepa sipokni pokoli tuklo cha, akucha tahlapi, micha tahlepa achʋfa ho̱ ʋbi tuk ilʋppa moma bʋshpo falaia ieshi atok.

³⁶ Yohmi ma Benchamin im ʋlla ʋhleha hʋt ilap ak o̱ imaiya ka pisa tok: Islael hatak ʋhleha hʋt im aiehchi Kibeah bili̱ka okla ashachi tuk ak osh anukchieto hatuk osh Benchamin a̱ i̱ kanʋlli tok oke.

³⁷ Mihma im aiehchi ʋt tu̱shpa hosh Kibeah ya̱ o̱ yihlepa tok; mihmʋt im aiehchi yash osh auatʋt ma̱ya mʋt, tʋmaha holihta ya̱ bʋshpo falaia halupa ya̱ isht issot kanchi tok.

³⁸ Mihma Islael hatak ʋhleha, micha im aiehchi ʋhleha nan it im apesa kʋt luak libbi chito ho̱ ikbi na shobullit tʋmaha holihta akochʋt ʋba ia he it im apesa tuk atok.

³⁹ Mihma Islael hatak ʋhleha hʋt itibi ka i̱ kanʋllit isht ia ma, Benchamin ʋt issot ʋbit isht ia kʋt Islael hatak pokoli tuchina foka tok: Ʋmmona tuk ak inli chohmit pi tikba ya̱ illit akakoha hoka, achi hatok okʋt.

⁴⁰ Yohmi tuk kia tʋmaha holihta ya̱ luak libbi, micha shobohli chito aiena hosh ʋba ma̱ya na Benchamait ʋhleha hʋt ashaka pit filema ma, yakeh! tʋmaha holihta lua kʋt ʋba iʋt shutik a̱ ona ho̱ pisa tok.

⁴¹ Mihma Islael hatak ʋhleha hʋt anonti falama ma, Benchamin hatak ʋhleha hʋt nukhlakancha tok: nana ik achukmo kʋt onʋtola ka pisa hatuk osh.

⁴² Yʋmohmi ma Islael hatak ʋhleha ha̱ itikba ya̱ i̱ shanaiyʋt, yakni haiaka pilla ho̱ ia tok: yohmi kia in tanampi kʋt sakki tok; mikma tʋmaha holihta ya̱ kohcha ka ai ititakla ʋbit tahli tok.

⁴³ Yakohmi hosh Benchamait ʋhleha ha̱ apakfopa cha, hliolit nana ik ahobo ho̱ Kibeah ichapaka i̱ hʋshi akocha imma yo̱ ai ahʋhlichi tok.

⁴⁴ Mihma Benchamin ʋt hatak tahlepa sipokni auah untuchina hosh akakoha tok; ilʋppa moma kʋt hatak chilita nukwia iksho bieka tok.

⁴⁵ Okla filema cha, maleli mʋt, yakni haiaka imma iʋt Limmon tʋli ya̱ ona tok: mihma hina takla ya̱ ʋlbʋllit isht a̱ya kʋt hatak tahlepa sipokni tahlapi tok; micha ahlioʋt atikonofʋt isht a̱yʋt Kitom a̱ isht onʋt, hatak tahlepa sipokni tuklo ʋbi tok.

⁴⁶ Yʋmohmi ho̱ nitak yʋmma Benchamin ʋt akakoha moma kʋt bʋshpo falaia ieshi ʋt hatak tahlepa sipokni pokoli tuklo akucha tahlapi tok: ilʋppa moma kʋt hatak chilita nukwia iksho bieka tok.

⁴⁷ Yohmi kia hatak tahlepa hannali kʋto falamʋt malelit yakni haiaka Limmon tʋli yak o̱ ona tok; micha Limmon tʋli yak o̱ aiasha na hʋshi ushta tok.

⁴⁸ Mihma Islael hatak ʋhleha hʋt falamʋt, Benchamin im ʋlla ʋhleha ha̱ tʋmaha holihta puta hatak ak kia, nana ʋlhpoa ai itilauechit, micha nana ho̱ ibbak a̱ fohkakma, bʋshpo falaia halupa isht issot kanchi tok: micha tʋmaha holihta puta onakmʋt, okla luak tikelichi tok.