Nan Apesa 2 - Chahta Holisso Holitopa 1886

¹ Yohmi ma Chihowa im enchel ʋt Kilkal pilla minti hosh Bochim a̱ ʋla mʋt, Echip a̱ hʋchi kohchichit, hʋch i̱ki ʋhleha ha̱ anumpa kʋllo il onochit im issa li tok yakni ya̱ hʋch isht ʋla li tok: micha anumpa chit im apesa li tok ʋt kobʋffi la himma keyu;

² Mikma okla hʋt yakni ilʋppa ai asha ka anumpa hʋsh ai itibai achʋfa he keyu; im alta puta ka kinahlichit hʋsh tahlashke: achi li tok: yohmi tok kia sʋtih ha̱ hʋchik sʋm antioshke: nanta katiohmi ho̱ ilʋppa hʋsh yʋmihchi cho? achi tok.

³ Yʋmohmi kʋt, Ʋno ak kia hʋchi tikba tihlelit kocha wehli la he keyu; amba kʋti hosh hʋchi naksi ya̱ shamʋlli chiyuhma hi oke; micha i̱ na holbʋt toba puta kʋt nan isht hʋch ibetʋbli yachi̱ hoke, achi li tok, achi tok.

⁴ Atuk o̱ yakohmi tok, Chihowa im enchel ʋt Islael im ʋlla ʋhleha ha̱ anumpa ilʋppa im anumpuli ma, okla chitolit yaiya tok.

⁵ Mihmʋt yʋmma Bochim okla hochifo tok: micha nan ʋbit a hukmit Chihowa ya̱ isht aiokpʋchi tok.

⁶ Mihma Choshua ʋt okla ha̱ tishelichi ma, Islael im ʋlla ʋhleha hʋt momʋt ai isha he ʋlhpesa yakni ya̱ isha chi̱ hosh ilhkoli tok.

⁷ Mihma Choshua ʋt okcha̱ya nitak moma, micha hatak asʋnonchi ʋhleha hʋt, Choshua ʋt illi haya̱, okcha̱ya moma Chihowa yʋt nana a fehna Islael a̱ i̱ yʋmihinchi ka pi̱sa tuk ʋt okcha̱ya nitak moma ka okla hʋt Chihowa ya̱ im antia tok oke.

⁸ Mihma Nun ushi Choshua Chihowa in tishu hʋt afʋmmi tahlepa achʋfa cha, pokoli aiena hosh illi tok.

⁹ Mihma ilap i̱ yakni ʋhli Timnalh‐heles yʋmmʋt Eflaim nʋnih talaia ka bokko Kaash falʋmmi in tʋnnʋp ak o̱ okla hohpi tok.

¹⁰ Micha nitak yʋmma okla a̱sha moma yʋmmak kia i̱ki ʋhleha ha̱ im ai itʋnahʋt taiyaha tok: mihma ai unchololi hosh iakaiyʋt Chihowa, micha Islael a̱ nana im atahli tok a̱ ithana keyu hosh ai asha tok.

¹¹ Mihma Islael im ʋlla ʋhleha hʋt nana ik achukmo ka Chihowa itikba a yʋmohmit, Baalim a̱ aiokpʋchi tok.

¹² Mihmʋt i̱ki ʋhleha in Chihowa Chitokaka, yʋmmak osh Echip yakni ya̱ ishit kohcha tok a̱ issa cha, naholbʋt toba puta, okla fullotʋt im ai asha ka iakaiyʋt im akachunoli cha, Chihowa ya̱ ishit nukhobelʋchi tok.

¹³ Mihmʋt Chihowa ya̱ issa cha, Baal, micha Ashtalolh ita tuklo kak o̱ iakaiya tok.

¹⁴ Mihma Chihowa im ai i̱ nukkilli ʋt Islael a̱ i̱ sanalit libbi tok, micha wehpuli puta ka ibbak fohki na wehpuli tok; micha in tʋnʋp afullotʋt ai asha ka i̱ kanchit ibbak foki na in tʋnʋp itikba hiohla he keyu tok.

¹⁵ Chihowa yʋt ahanchi tuk mak osh, micha Chihowa yʋt anumpa kʋllo ile onochit miha tuk mak osh kanima yo̱ kochʋt iakma, Chihowa ibbak ʋt nana ik achukmo isht im asanali beka tok: mihma okla komunta fehna tok.

¹⁶ Yohmi kia Chihowa yʋt nan apesa ʋhleha ha̱ i̱ hilechi na wehpuli ibbak a̱ a hlakofichit kohchi tok.

¹⁷ Yohmi kia nan im apesa ʋhleha ha̱ i̱ haponakla he keyu hosh, amba okla inla i̱ naholbʋt toba puta ka i̱ hauit im akachunoli beka tok: i̱ki ʋhleha hʋt Chihowa i̱ nan ʋlhpisa ha̱ iakaiya tok a̱ okla yohmi tok keyu, amba chekosi fehna filʋmmit naksika ona beka tok.

¹⁸ Mihma Chihowa yʋt nan apesa ʋhleha ha̱ i̱ hilechikmʋt, yʋmohmikmʋt Chihowa yʋt nan apesa ya̱ ibafoyukʋt, nan apesa ʋt okcha̱ya itintakla ka in tʋnʋp ʋhleha ibbak a̱ a hlakofihinchi beka tok: ilbʋshali, micha apistikeli hatuk o̱ kifa̱ha̱ha ka Chihowa yʋt i̱ nukha̱klo hatok.

¹⁹ Atuk o̱ yakohmi beka tok, nan apesa yʋt illikma, falamʋt i̱ki ʋhleha hatuk a̱ i̱ shahlit naholbʋt toba puta ka iakaiyʋt, aiokpʋchit im akachunolit, il okpʋni beka tok: ilap nana akaniohmi, micha ilapunlʋt a̱ya kʋt issa he keyu beka tok.

²⁰ Mihma Chihowa im ai i̱ nukkilli ʋt Islael a̱ i̱ sanalit libbi tok: micha, Okla ilʋppʋt anumpa itim apesa i̱ki ʋhleha im apesa li tok a̱ kobʋffi cha, ʋm anumpa ha̱ a haponakla he keyu beka tuk oka;

²¹ Ʋno ak kia himak pilla ma oklushi Choshua ʋt tihlelit ik kocha wehlo hosh illi tok, achʋfa kia itikba tihlelit kocha wehli la he keyu;

²² Micha yʋmmak o̱ Islael ʋt Chihowa i̱ hina ya̱ holitoblit a noho̱wa he i̱ki ʋhleha hʋt holitobli tok mak o̱ chohmikmá, keyukmá, nana ka isht imomaka pisa lashke, achi tok.

²³ Yʋmohmi hatuk osh Chihowa yʋt tu̱shpʋt tihlelit ik kocha wehlo, micha Choshua ak kia ibbak ik fohko hosh oklushi yʋmma ashanchi tok.