Nan Apesa 18 - Chahta Holisso Holitopa 1886

¹ Nitak yʋmma foka ka Islael a̱ mi̱ko ʋt iksho tok: micha nitak yʋmma foka ka Tan aiunchololi hʋt yakni ai isha he ʋlhpesa aiasha chi̱ kʋt hoyo tok; nitak yʋmma ont ʋhli ka ai isha he ʋlhpesa moma kʋt Islael ai unchololi puta ka iba ta̱klʋt, ik im ʋlhpiso ki̱sha hatuk okʋt.

² Mihma Tan im ʋlla ʋhleha hʋt in chuka achʋfa ak inli ka aiasha ai ʋhli Solah, micha Eshtaol a̱ hatak tahlapi, hatak chilita nukwia iksho yo̱ yakni hoyot pisʋt tahla chi̱ ho̱ a tihleli tok; micha, Oh ia cha, yakni hʋsh hoyashke, im achi tok: atuk o̱ yʋmmak ash osh Eflaim nʋnih Mikah in chuka ona mʋt, okla a nusi tok.

³ Mikah in chuka ya̱ ona mʋt, Lefait hatak himita yash anumpuli ka ithana tok: mihmʋt yʋmmak o̱ iba chukowa cha, Kʋta hosh chisht ʋla tuk o̱? ilʋppa nanta ho̱ isht ish ʋtta ho̱? micha nanta hosh ilʋppa chim a̱sha cho? im achi tok.

⁴ Mihma, Yakohmi, micha yakohmi aiena kak o̱ Mikah ʋt a̱n yʋmihchi cha, sa tohno ho̱ naholitompa isht im ʋtta sia hoke, im achi tok.

⁵ Mihma, Il atia yʋmma il ia kʋt pim aia̱hla chi̱ hokmá nana ka Chitokaka ya̱ ish im a ponaklashke, im achi tok.

⁶ Mihma naholitompa isht ʋtta yash osh, Achukma̱kʋt hʋsh a̱yashke, hʋch i̱ hina yʋmma hʋsh ia kʋt Chihowa itikba yoke, im achi tok.

⁷ Yohmi ma hatak tahlapi kash osh ia mʋt, Laish a̱ ona cha, okla yʋmma aiasha kʋt ahah! ahni iksho, Sitonian ʋhleha a yʋmohmi chatuk ak inli holba hosh nuktaiyalʋt, nukta̱hla keyu hosh aiasha ho̱ pisa tok; micha mi̱ko im a̱sha tuk osh im alʋmma hinla kʋt iksho tok: Sitonian okla ho̱ i̱ hopaki cha, hatak nana kia nana it i̱ kaniohmi keyu tok.

⁸ Mihma itibapishi ʋhleha hʋt Solah, micha Eshtaol aiasha ka im ʋla tok: mihma itibapishi ʋhleha hʋt, Nanta ho̱ hʋsh achi cho? im achi tok.

⁹ Mihma, Hʋsh wakaya na iʋt ont iloh itibashke: yakni ya̱ ont e pisa ka yakeh! achukma fehna: mihma lumʋt hʋsh aiasha cho? iʋt ont hʋsh chukowa cha, yakni ya̱ ishi ka hʋsh sʋlaha ná.

¹⁰ Hʋsh iakmʋt, okla nukta̱hla keyu yosh aiasha, micha yakni chito ho̱ hʋsh ona chi̱ hoke: Chitokaka yʋt hʋch ibbak a̱ fohki tuk oka; yʋmma nana hosh yakni moma aiasha kʋt iksho keyushke, achi tok.

¹¹ Mihma Tanait in chuka achʋfa ʋt yʋmma asht Solah, micha Eshtaol a̱ a kohchʋt ia kʋt hatak tahlepa hannali hosh tʋnʋp a̱ya nahalupa il apakshʋnnit in taiyaha hosh ia tok.

¹² Micha ia cha, Chutah yakni Kichalh‐chealim a̱ abinachi tok: yohmi hosh yʋmma Mahaneh‐Tan hochifo tok a̱ himak nitak a̱ moma hoke; yakeh! Kichalh‐chealim im ashaka ya̱ talaia hoke.

¹³ Micha yʋmma asht ia mʋt, Eflaim nʋnih onʋt, Mikah in chuka ya̱ ona tok.

¹⁴ Yʋmohmi ma hatak tahlapi Laish yakni pisʋt a̱ya tuk ash osh itibapishi ʋhleha ha̱, Chuka ilʋppa talohma̱ya ka efot, micha telafim, mikmʋt tʋhlʋt naholbʋt toba, micha bilʋt naholbʋt toba aiena kʋt a̱sha ka hʋsh ithana cho? yʋmohmi ka himak a̱ nana hʋsh kaniohma chi̱ kʋt hʋsh anukfillashke, im achi tok.

¹⁵ Micha yʋmma pilla ho̱ iʋt, Lefait hatak himita yash in chuka, Micha in chuka ya̱ ona cha, aiokpʋchi tok.

¹⁶ Mihma hatak tahlepa hannali hosh tʋnʋp a̱ya, nahalupa il apakshʋnnit in taiyaha, Tan im ʋlla ʋhleha hash osh achukowa holihta okhissa yak o̱ hieli tok.

¹⁷ Mihma hatak tahlapi yakni pisʋt aya tuk ash osh iʋt, ont chukowa cha, tʋhlʋt naholbʋt toba, micha efot, mikmʋt telafim, micha bilʋt naholbʋt toba aiena kash ishi tok: mihma naholitompa isht ʋtta yʋt achukowa holihta okhissa hatak tahlepa hannali hosh tʋnʋp a̱ya nahalupa il apakshʋnnit in taiyaha kash takla hikia tok.

¹⁸ Mihma ilʋppak osh Mikah in chuka ya̱ ont chukowa cha, tʋhlʋt naholbʋt toba, micha efot, micha telafim, micha bilʋt naholbʋt toba aiena kash ont isht kocha tok. Yohmi na naholitompa isht ʋtta yash osh, Katiohmi ho̱ hʋsh yʋmihchi cho? im achi tok.

¹⁹ Mihma, Ish anumpuli kʋt issá, chibbak a̱ chiteh ha̱ isht ish akamolashke, micha pi awant ish ia cha, pi̱ki, micha naholitompa isht pim ʋtta ish tobashke: hatak achʋfa in chuka yo̱ naholitompa isht ʋtta ak okmá, ak cho? Islael a̱ chuka achʋfa yʋmmʋt Islael a̱ apehlichika achʋfa naholitompa isht im ʋtta ak okmá, katimampo kak osh achukma kʋt chim i̱ shahli cho? im achi tok.

²⁰ Mihma naholitompa isht ʋtta yash osh chu̱kʋsh yukpa mʋt, efot, micha telafim, micha tʋhlʋt naholbʋt toba aiena kash ishi cha, okla iklʋna hikiʋt ia tok.

²¹ Yohmi mʋt okla filema cha, ia mʋt, wak, micha ʋlla micha na‐weki aiena ka tikba hilechi tok.

²² Atuk osh Mikah in chuka ya̱ hopakichit tahli ma, hatak Mikah in chuka bili̱ka chuka taloha aiasha tuk ʋt iti hoyot itʋnaha cha, Tan im ʋlla ʋhleha ha̱ ont sakki tok.

²³ Mihma Tan im ʋlla ʋhleha ha̱ i̱ pa̱ya tok. Mihma okla et filema cha, Nanta chi̱ katiohmi hosh okla yohmi ho̱ pehlichit ish la cho? im achi tok.

²⁴ Mihma, naholbʋt toba puta ikbi li tok, micha naholitompa isht ʋm ʋtta ya̱ hʋsh ishi cha, hʋsh tʋmoa tuk: yohmi ka himmakma nanta hosh ʋm a̱sha cho? micha nanta katiohmi ho̱ Chi̱ katiohmi cho? ilʋppa is sʋm achi kʋt nanta hoh cho? achi tok.

²⁵ Mihma Tan im ʋlla ʋhleha hʋt, Chim anumpa ha̱ pititakla ik a haklashke, hatak chu̱kʋsh homi ʋhleha hʋt chi o̱ maleli na chishno, micha chin chuka achʋfa aiena kʋt illi yoba ná, im achi tok.

²⁶ Mihma Tan im ʋlla ʋhleha hʋt ai ia hetuk ʋt ilhkoli tok: mihma kʋllo kʋt ilap a̱ i̱ shahli na Mikah ʋt pisa mʋt, falamʋt in chuka ya̱ ona tok.

²⁷ Mihma nana Mikah ʋt ikbi tuk, micha naholitompa isht im ʋtta aiena im ʋtta tuk a̱ im ishi cha, Laish okla nuktaiyalʋt nukta̱hla keyu hosh aiasha ka ona tok: micha bʋshpo falaia halupa isht issot kanchi cha, tʋmaha holihta yash luak ishit hukmi tok.

²⁸ Mihma hlakofichi ʋt iksho tok: Siton a̱ i̱ hopaki, micha hatak inla ya̱ nana it i̱ kaniohmi keyu; micha okfa yosh Belh‐lehob bili̱ka bachaya kak o̱ talaia hatuk oka. Mihma tʋmaha holihta ikbi cha, yʋmmak o̱ okla aiasha tok.

²⁹ Mihmʋt tʋmaha holihta ya̱ i̱ki Tan Islael im ʋtta tok ak o̱ a hochifochit Tan achi tok: yohmi kia tʋmaha holihta hohchifo ʋt ʋmmona ka Laish atok.

³⁰ Mihma Tan im ʋlla ʋhleha hʋt tʋhlʋt naholbʋt toba ya̱ hilechi tok; mihma Manasseh ushi Keshom ushi Chonahlan yʋmma, micha ushi ʋhleha aiena kak osh Tan ai unchololi ya̱ naholitompa isht im aha̱shwa na nitak yakni ʋt yuka ka ont ʋhli tok.

³¹ Mihma tʋhlʋt naholbʋt toba Mikah ʋt ikbi tok a̱ okla hilechi na, Chitokaka im aboha hʋt Shiloh ya̱ hikia moma ka hikia tok.