Nan Apesa 17 - Chahta Holisso Holitopa 1886

¹ Mihma Eflaim nʋnih hatak osh anta yʋmma hohchifo kʋt Mikah atok.

² Mihma yʋmmak ash osh ishki ya̱, Tʋli hʋta shekel tahlepa auah achʋfa chim ishi na sa haksobish ʋt a ha̱klo ho̱ nana ik achukmo im ahnit ish mihachi chash yakeh! an tonla hoke; ʋno ak osh ishi li tok, im achi tok. Mihma ishki ʋt, Chihowa i̱ holitopa chia hashke, sʋso ma! achi tok.

³ Atuk o̱ tʋli hʋta auah achʋfa kash falʋmminchit ishki ya̱ ima ma, ishki ʋt, Tʋli hʋta sʋbbak foyuka tuk ʋt Chihowa ya̱ i̱ hullochi li mak osh i̱ hullochi li tuk o̱, sʋso hʋt tʋhlit naholbʋt toba, micha bilelit naholbʋt toba itatuklo ka ikba chin tuk atuk oke: yohmi hoka himak a̱ chi̱ falʋmmichi lashke, achi tok.

⁴ Yohmi kia tʋli holisso yash ishki ya̱ i̱ falʋmmichi tok; mihma ishki ʋt tʋli hʋta shekel tahlepa tuklo ho̱ ishi cha, tʋli hʋta ikbi ya̱ ima na yʋmmak ash osh tʋhlit naholbʋt toba, micha bilelit naholbʋt toba itatuklo ka ikbi tok: mihma Mikah in chuka yak o̱ hieli tok.

⁵ Mihma hatak Mikah yash osh, naholbʋt toba puta in chuka yʋt i̱ hikia cha, efot, micha telafim aiena ka ikbi mʋt, ushi ʋhleha ha̱ achʋfa ho̱ hullochi na yʋmmak ash osh naholitompa isht ʋtta in toba tok.

⁶ Nitak yʋmma foka ka Islael a̱ mi̱ko ʋt iksho tok; amba hatak puta kʋt ilap nishkin ai im ʋlhpiesa aiyukali hosh yʋmohmi beka tok.

⁷ Mihma hatak himita yosh Behlehem‐chutah minti, Chutah in chuka achʋfa, yʋmmʋt Lefait osh yʋmma ahanta tok.

⁸ Mihmʋt hatak yʋmmak ash osh in tʋmaha holihta Behlehem‐chutah ya̱ kohchʋt kanima ai ʋtta ahayuchikmʋt, ʋtta chi̱ hosh ia tok: atuk osh nowʋt a̱ya mʋt, Eflaim nʋnih Mikah in chuka ya̱ ona tok.

⁹ Mihma Mikah ʋt, Katima ish minti cho? im achi tok. Mihma Lefait sia hosh Behlehem‐chutah minti li hosh ai ʋtta kanima ahayuchi likmʋt, ʋtta la chi̱ hosh a̱ya li hoke, im achi tok.

¹⁰ Mihma Mikah ʋt, Sa takla ish ʋtta cha, a̱ki, micha na holitompa isht ʋtta is san tobashke; mikma afʋmmikma tʋli hʋta shekel pokoli ho̱ chima likmʋt, nafohka fohka achʋfa, micha il impa aiena ka chima lashke, im achi tok. Yohmi ho̱ Lefait ash osh chukowa tok.

¹¹ Mihmʋt Lefait ʋt hatak ash takla ahanta kʋt im achukma tok; mihma hatak himita yash osh yʋmma ushi ʋhleha achʋfa kak inli in chohmi tok.

¹² Mihma Mikah ʋt Lefait ash hullochi tok; mihma hatak himita yash osh na holitompa isht ʋtta in toba cha, Mikah in chuka ya̱ ahanta tok.

¹³ Yohmi ma Mikah ʋt, Chihowa yʋt nana achukma an yʋmihcha chi̱ ka himak ano ithana lishke, na holitompa isht ʋtta ʋt Lefait osh ʋm anta hokʋt, achi tok.